ନୂଆଦିଲ୍ଲୀ: କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ଅମିତ ଶାହ ହିମାଚଳ ପ୍ରଦେଶରେ ବାରମ୍ବାର ପ୍ରାକୃତିକ ବିପର୍ଯ୍ୟୟ ଏବଂ ଏହାର ତୀବ୍ରତାକୁ ଦୃଷ୍ଟିରେ ରଖି ଏକ ବହୁ-କ୍ଷେତ୍ରୀୟ କେନ୍ଦ୍ରୀୟ ଦଳ ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି।
ନିକଟରେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀଙ୍କ ନେତୃତ୍ୱରେ ଅନୁଷ୍ଠିତ ଏକ ବୈଠକରେ ଏହା ଦେଖିବାକୁ ମିଳିଥିଲା ଯେ, ରାଜ୍ୟରେ ବାଦଲଫଟା ବର୍ଷା, ଆକସ୍ମିକ ବନ୍ୟା, ଭୂସ୍ଖଳନ ଏବଂ ବାରମ୍ବାର ପ୍ରବଳ ବର୍ଷାର ତୀବ୍ରତା ବୃଦ୍ଧି ପାଇଛି, ଯାହା ବ୍ୟାପକ ଜୀବନହାନି, ଭିତ୍ତିଭୂମି, ଜୀବିକା ଏବଂ ପରିବେଶ ଅବକ୍ଷୟର କ୍ଷତି ଘଟାଇଛି। କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହ ତୁରନ୍ତ ଜାତୀୟ ବିପର୍ଯ୍ୟୟ ପରିଚାଳନା ପ୍ରାଧିକରଣ (ଏନଡିଏମଏ), ସେଣ୍ଟ୍ରାଲ ବିଲ୍ଡିଂ ରିସର୍ଚ୍ଚ ଇନଷ୍ଟିଚ୍ୟୁଟ୍ (ସିବିଆରଆଇ) ରୁର୍କି, ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟ୍ରପିକାଲ୍ ମେଟେରୋଲୋଜି (ଆଇଆଇଟିଏମ) ପୁଣେ, ଜିଓଲୋଜିଷ୍ଟ ଏବଂ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି (ଆଇଆଇଟି) ଇନ୍ଦୋରର ବିଶେଷଜ୍ଞଙ୍କୁ ନେଇ ଏକ ବହୁ-କ୍ଷେତ୍ରୀୟ କେନ୍ଦ୍ରୀୟ ଦଳ ଗଠନ କରିବାକୁ ନିର୍ଦ୍ଦେଶ ଦେଇଛନ୍ତି।
ଆହୁରି ମଧ୍ୟ ହିମାଚଳ ପ୍ରଦେଶର ବିଭିନ୍ନ ଭାଗରେ ୨୦୨୫ ମସିହାର ଦକ୍ଷିଣ-ପଶ୍ଚିମ ମୌସୁମୀ ଋତୁରେ ବନ୍ୟା, ଆକସ୍ମିକ ବନ୍ୟା ଏବଂ ଭୂସ୍ଖଳନ କାରଣରୁ କେନ୍ଦ୍ର ସରକାର ସେମାନଙ୍କ ସ୍ମାରକପତ୍ରର ଅପେକ୍ଷା ନକରି ଏକ ଆନ୍ତଃମନ୍ତ୍ରିସ୍ତରୀୟ କେନ୍ଦ୍ରୀୟ ଦଳ (ଆଇଏମସିଟି)ଙ୍କୁ ଆଗୁଆ ନିୟୋଜିତ କରିସାରିଛନ୍ତି, ଯେଉଁମାନେ କ୍ଷୟକ୍ଷତିର ସଠିକ୍ ଆକଳନ କରିପାରିବେ। ଆଇଏମସିଟି ୨୦୨୫ ଜୁଲାଇ ୧୮ରୁ ୨୫ତାରିଖ ପର୍ଯ୍ୟନ୍ତ ରାଜ୍ୟର ପ୍ରଭାବିତ ଅଞ୍ଚଳ ପରିଦର୍ଶନ କରୁଛି।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ କେନ୍ଦ୍ର ସରକାର ବିନା କୌଣସି ଭେଦଭାବରେ ବିପର୍ଯ୍ୟୟ ସମୟରେ ରାଜ୍ୟମାନଙ୍କ ସହିତ ଦୃଢତାର ସହ ଛିଡା ହୋଇଛନ୍ତି। ଏହି ଦିଗରେ କେନ୍ଦ୍ର ସ୍ୱରାଷ୍ଟ୍ର ତଥା ସମବାୟ ମନ୍ତ୍ରୀ ଅମିତ ଶାହଙ୍କ ଅଧ୍ୟକ୍ଷତାରେ ଗଠିତ ଏକ ଉଚ୍ଚସ୍ତରୀୟ କମିଟି ହିମାଚଳ ପ୍ରଦେଶରେ ୨୦୨୩ ମସିହା ପାଇଁ ବନ୍ୟା, ଭୂସ୍ଖଳନ ଏବଂ ବାଦଲଫଟା ବର୍ଷା ଭଳି ବିପର୍ଯ୍ୟୟ ଦ୍ୱାରା ପ୍ରଭାବିତ ଅଞ୍ଚଳର ପୁନରୁଦ୍ଧାର ଏବଂ ପୁନଃନିର୍ମାଣ ପାଇଁ ୨୦୦୬.୪୦ କୋଟି ଟଙ୍କାର ବ୍ୟୟ ବରାଦକୁ ଅନୁମୋଦନ କରିବା ସହିତ ପ୍ରଥମ ପର୍ଯ୍ୟାୟ କିସ୍ତି ବାବଦରେ ୭ ଜୁଲାଇ ୨୦୨୫ ରେ ୪୫୧.୪୪ କୋଟି ଟଙ୍କା ମଂଜୁର କରିଛନ୍ତି।
ଏହା ବ୍ୟତୀତ ରାଜ୍ୟର ପ୍ରଭାବିତ ଲୋକଙ୍କୁ ସହାୟତା ଦେବା ପାଇଁ, କେନ୍ଦ୍ର ସରକାର ତୁରନ୍ତ ରିଲିଫ୍ ପଦକ୍ଷେପ ପାଇଁ ୧୮ ଜୁନ୍ ୨୦୨୫ରେ ରାଜ୍ୟ ବିପର୍ଯ୍ୟୟ ପ୍ରତିକ୍ରିୟା ପାଣ୍ଠି (ଏସଡିଆରଏଫ୍)ରୁ ହିମାଚଳ ପ୍ରଦେଶକୁ କେନ୍ଦ୍ରୀୟ ଅଂଶର ୧୯୮.୮୦ କୋଟି ଟଙ୍କାର ପ୍ରଥମ କିସ୍ତି ପ୍ରଦାନ କରିସାରିଛନ୍ତି। କେନ୍ଦ୍ର ସରକାର ହିମାଚଳ ପ୍ରଦେଶ ସମେତ ସମସ୍ତ ରାଜ୍ୟକୁ ଲଜିଷ୍ଟିକ୍ ସହାୟତା ମଧ୍ୟ ପ୍ରଦାନ କରିଛନ୍ତି, ଯେଉଁଥିରେ ଆବଶ୍ୟକୀୟ ଜାତୀୟ ବିପର୍ଯ୍ୟୟ ପ୍ରତିକ୍ରିୟା ବାହିନୀ (ଏନଡିଆରଏଫ) ଦଳ, ସେନା ବାହିନୀ ଏବଂ ବାୟୁସେନା ସହାୟତା ଅନ୍ତର୍ଭୁକ୍ତ। ଉଦ୍ଧାର ଏବଂ ରିଲିଫ୍ କାର୍ଯ୍ୟ ପାଇଁ ରାଜ୍ୟରେ ଏନଡିଆରଏଫ୍ ର ମୋଟ ୧୩ ଟି ଦଳ ନିୟୋଜିତ ଅଛନ୍ତି।