ଭୁବନେଶ୍ୱର, ବ୍ୟକ୍ତି ସ୍ୱାଧୀନତା ଓ ନିର୍ଭୀକତାର ସମାଜ ବିକାଶ ଦିଗରେ ବଡ଼ ଭୂମିକା ରହିଥିବା କଥାକୁ ଗୁରୁତ୍ୱ ପ୍ରଦାନ କରି କେନ୍ଦ୍ର ପେଟ୍ରୋଲିୟମ ଓ ପ୍ରାକୃତିକ ବାଷ୍ପ ତଥା ଇସ୍ପାତ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ‘ନିର୍ଭୟ’ର ୭ମ ବାର୍ଷିକୋତ୍ସବରେ ନିଜ ବକ୍ତବ୍ୟ ରଖି କହିଥିଲେ ସ୍ୱାଭିମାନୀ, ସ୍ୱାବଲମ୍ବୀ ଓ ଆତ୍ମନିର୍ଭର ହେବା ପାଇଁ ବ୍ୟକ୍ତି ଜଣଙ୍କୁ ‘ନିର୍ଭୟ’ ହେବା ଦରକାର । କେବଳ ‘ନିର୍ଭୟ’ ବାଣୀରେ ନୁହେଁ ବରଂ ମନରେ ମଧ୍ୟ ସେହି ଭାବନା ରହିବା ଦରକାର । ଓଡ଼ିଶାରେ ପ୍ରଜାତନ୍ତ୍ରରେ ସମାଲୋଚନାର ବଡ଼ ଆବଶ୍ୟକତା ରହିଥିଲା ବେଳେ ‘ନିର୍ଭୟ’ ଏ ଦିଗରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି ବୋଲି ସେ ଉଲ୍ଲେଖ କରିଥିଲେ ।
ଶନିବାର ସ୍ଥାନୀୟ ହୋଟେଲ ମେ ଫେୟାର ଲାଗୁନର କନଭେନସନ ହଲ୍ ଠାରେ ‘ନିର୍ଭୟ’ର ୭ମ ବାର୍ଷିକୋତ୍ସବ ଏକ ଭବ୍ୟ ସମାରୋହରେ ଅନୁଷ୍ଠିତ ହୋଇଯାଇଛି । ସମ୍ପାଦକ ନବୀନ ଦାସଙ୍କ ପୌରହିତ୍ୟରେ ଅନୁଷ୍ଠିତ ମୁଖ୍ୟ ସମାରୋହରେ ମୁଖ୍ୟ ଅତିଥି ଭାବରେ ଭର୍ଚୁଆଲ ମୋଡରେ ସାମିଲ ହୋଇ ନିଜ ବକ୍ତବ୍ୟ ରଖିଥିଲେ ଧର୍ମେନ୍ଦ୍ର ପ୍ରଧାନ । ଏହି ଉତ୍ସବରେ ବରିଷ୍ଠ ସାମ୍ବାଦିକ ରାଜରାମ ଶତପଥୀ, ପୂର୍ବତନ ମୁଖ୍ୟଶାସନ ସଚିବ ବିଜୟ ପଟ୍ଟନାୟକ ପ୍ରମୁଖ ଯୋଗଦେଇଥିଲେ।
ବାର୍ଷିକୋତ୍ସବର ମୁଖ୍ୟ ସମାରୋହରେ ବିଶେଷ ବ୍ୟକ୍ତି ବିଶେଷଙ୍କୁ ପୁରସ୍କୃତ ଓ ସମ୍ମାନୀତ କରାଯାଇଥିଲା । ପଦ୍ମଶ୍ରୀ ପାଇଁ ସଦ୍ୟ ମନୋନୀତ ହୋଇଥିବା ଯାଜପୁର ଅଞ୍ଚଳର ବିଶିଷ୍ଟ ଶିକ୍ଷା ପ୍ରସାରକ ନନ୍ଦକିଶୋର ପୃଷ୍ଟିଙ୍କୁ ‘ନିର୍ଭୟ ଓଡ଼ିଶା ଗୌରବ’ ପ୍ରଦାନ କରାଯାଇଥିଲା । ‘ନିର୍ଭୟ ସତୀର୍ଥ ସମ୍ମାନ’ ଦ’ ହିନ୍ଦୁର ସାମ୍ବାଦିକ ସତ୍ୟସୁନ୍ଦର ବାରିକ ଏବଂ କନକ ନ୍ୟୁଜର ବିଶେଷ କାର୍ଯ୍ୟକ୍ରମ ଲୋକ ନକଲି ଓ କଥା ଅସଲିକୁ ପ୍ରଦାନ କରାଯାଇଥିଲା ।
‘ନିର୍ଭୟ’ର ୩ ଖବରଦାତା ଚିତ୍ତ ରଞ୍ଜନ ଜେନା(ଠାକୁରମୁଣ୍ଡା), ଲଡି ଶଙ୍କର ରାଓ(ମୁନିଗୁଡା) ଏବଂ ପ୍ରଦୀପ୍ତ କର (ସାଲେପୁର) ତଥା ‘ନିର୍ଭୟ’ ମୁଖ୍ୟ କାର୍ଯ୍ୟାଳୟର ବରିଷ୍ଠ ସହ-ସମ୍ପାଦିକା ମମତାରାଣୀ ବାରିକଙ୍କୁ ବିଶେଷ ଭାବରେ ସମ୍ବର୍ଦ୍ଧିତ କରାଯାଇଥିଲା । କାର୍ଯ୍ୟକ୍ରମ ସଂଚାଳନରେ ‘ନିର୍ଭୟ’ ପରିବାରର ବରିଷ୍ଠ ସଦସ୍ୟ ସମ୍ବିତ୍ ମହାପାତ୍ର, ବିଶ୍ୱଭୂଷଣ ମିଶ୍ର, ସୁନାକର ଦାସ ବିଶେଷ ଭୂମିକା ଗ୍ରହଣ କରିଥିଲେ । ରାଜ୍ୟସାରାର ‘ନିର୍ଭୟ’ ଖବରଦାତାମାନଙ୍କ ସହ ବିଭିନ୍ନ ବର୍ଗର ବିଶିଷ୍ଟ ବ୍ୟକ୍ତି ତଥା ଗଣମାଧ୍ୟମର କର୍ମୀମାନେ ଏହି ବାର୍ଷିକୋତ୍ସବରେ ସାମିଲ ହୋଇଥିଲେ ।