Tag: ନୟାଗଡ଼ ଜିଲ୍ଲା

ନୟାଗଡ଼ (ସୁଧାକର ମିଶ୍ର): ନୟାଗଡ଼ ଜିଲ୍ଲା ଖଣ୍ଡପଡ଼ା ନିର୍ବାଚନ ମଣ୍ଡଳୀରେ ସ୍ବାଧୀନ ପ୍ରାର୍ଥୀ ଭାବେ ପାଥିପତ୍ର ଦାଖଲ କରିଛନ୍ତି ପୂର୍ବତନ ବିଧାୟକ ଅନୁଭବ ପଟ୍ଟନାୟକ। ବିଜେଡ଼ି ସଭାପତି ନବୀନ ପଟ୍ଟନାୟକ ତାଙ୍କ ପ୍ରତି ଅଣଦେଖା କରିଛନ୍ତି ବୋଲି ସେ ଅଭିଯୋଗ କରିଛନ୍ତିି। ଗତ ବିଧାନସଭା ନିର୍ବାଚନରେ ବିଜେଡି ତାଙ୍କୁ ଟିକେଟ ନଦେବା ଫଳରେ ସେ ଦଳ ଛାଡ଼ିନଥିଲେ, କିନ୍ତୁ ୨୦୨୪ ବିଧାନସଭା ନିର୍ବାଚନରେ ତାଙ୍କୁ ଦଳ ଅଣ ଦେଖା କରିଛି ବୋଲି ସେ ଅଭିଯୋଗ କରିଛନ୍ତି।

ଅହରହ ଦଳ ପାଇଁ କାମ କରି ଦଳ ତାଙ୍କୁ ଏଇ ଉପହାର ଦେଲା। କିନ୍ତୁ ସେ ହାରିଯାଇନାହାନ୍ତି। ସ୍ବାଧିନ ଭାବେ ସେ ପ୍ରାର୍ଥୀପତ୍ର ଦାଖଲ କରିଛନ୍ତି। ଖଣ୍ଡପଡ଼ା ନିର୍ବାଚନ ମଣ୍ଡଳୀ ଭୋଟର୍ ଭାଇ ଭଉଣି ମାନଙ୍କର ତାଙ୍କ ପ୍ରତି ସମର୍ଥନ ଅଛି ବୋଲି ସେ ମତ ରଖିଛନ୍ତି।

ତାଙ୍କ ମା ପୁର୍ବତନ ବିଧାୟକା ବିଜୟଲକ୍ଷ୍ମୀ ପଟ୍ଟନାୟକ ସ୍ବାଧୀନ ଭାବେ ଖଣ୍ଡପଡ଼ାରେ ଜିତିଥିଲେ। ତାଙ୍କ ପୁତ୍ର ଅନୁଭବ ପଟ୍ଟନାୟକ ଆଶା ରଖିଛନ୍ତି କି ଖଣ୍ଡପଡ଼ାବାସୀ ମଧ୍ୟ ତାଙ୍କୁ ଜିତାଇବେ।

ଚାନ୍ଦପୁର: ନୟାଗଡ ଜିଲ୍ଲା ଚାନ୍ଦପୁର ପୋଲିସକୁ ବଡ ସଫଳତା ମିଳିଛି। ସିମେଣ୍ଟ ବୋଝେଇ ଟ୍ରକରୁ ୨୫୦ ବସ୍ତା ଚୋରୀ ମାମଲାର ପୋଲିସ ପର୍ଦ୍ଦାଫାସ କରି ୩ ଲୁଟେରାଙ୍କୁ ଗିରଫ କରିବା ସହ ରାମକୋ କମ୍ପାନୀର ୭୨ ବସ୍ତା ସିମେଣ୍ଟ ଏବଂ ଦୁଇଟି ଟ୍ରାକ୍ଟର ଜବତ କରିଛି।

ସୂଚନା ଅନୁଯାୟୀ, ଗତ ୨୫ ତାରିଖରେ ଯାଜପୁର ଜିଲ୍ଲାର ରାମକୋ ସିମେଣ୍ଟ କମ୍ପାନୀରୁ ୫୦୦ ବସ୍ତା ସିମେଣ୍ଟ ବୋଝେଇ ଟ୍ରକ ଚାନ୍ଦପୁର ଅଭିମୁଖେ ବାହାରିଥିଲା। ଚାନ୍ଦପୁର ନିକଟ ରାଇପଡା ଠାରେ ୨୫୦ ବସ୍ତା ସିମେଣ୍ଟ ଖାଲି କରିବା ପରେ ଟ୍ରକଟି ଚଣ୍ଡେଶ୍ୱର ଅଭିମୁଖେ ବାହାରିଥିଲା। ହେଲେ ରାସ୍ତାରେ ସିମେଣ୍ଟ ବୋଝେଇ ଟ୍ରକଟି ଖରାପ ହେବାରୁ ଟ୍ରକ ଚାଳକ କେରେଣ୍ଡା ଟାଙ୍ଗୀ ନିକଟସ୍ଥ ରାସ୍ତା ପାର୍ଶ୍ଵରେ ପାର୍କିଂ କରି ସେହି ଟ୍ରକ କ୍ୟାବିନରେ ବିଶ୍ରାମ ନେଇଥିଲେ। ତେବେ ୨୬ ତାରିଖ ଭୋର ସମୟରେ କେତେକ ଲୁଟେରା ଘଟଣା ସ୍ଥଳରେ ପହଁଚି ଟ୍ରକ ଚାଳକକୁ ଭୟଭୀତ କରି ୪୦୭ ଓ ଟ୍ରାକ୍ଟର ଲଗାଇ ନିମିଷକ ମଧ୍ୟରେ ଟ୍ରକରୁ ସମସ୍ତ ୨୫୦ ବସ୍ତା ସିମେଣ୍ଟ ଲୁଟି ନେଇଥିଲେ।

ଟ୍ରକ ଚାଳକ ଚାନ୍ଦପୁର ଥାନାରେ ପହଁଚି ଲିଖିତ ଅଭିଯୋଗ କରିବା ପରେ ଚାନ୍ଦପୁର ପୋଲିସ ଆଇଆଇସି ଜଗଦୀଶ ଚନ୍ଦ୍ର କର ଓ ସବ ଇନ୍ସପେକ୍ଟର କ୍ଷେତ୍ରବାସୀ ହରିଚନ୍ଦନ ବିଭିନ୍ନ ସ୍ଥାନରେ ଚଢ଼ାଉ କରି ୩ ଲୁଟେରାଙ୍କୁ ଗିରଫ କରିଛନ୍ତି। ଗିରଫ ଲୁଟେରା ମାନେ ହେଲେ ଚାନ୍ଦପୁର ଥାନା ଅଞ୍ଚଳର କୁଶ ବେହେରା (୨୪ ବର୍ଷ) ସୁବଳ ପ୍ରଧାନ (୨୨ ବର୍ଷ) ଓ ରାଧାକୃଷ୍ଣ ପାଇକରାୟ ବୋଲି ଜଣା ପଡିଛି। ଏହା ସହ ଚାନ୍ଦପୁର ପୋଲିସ ଏହି ଘଟଣାରେ ଅନ୍ୟ ଅଭିଯୁକ୍ତ ମାନଙ୍କୁ ଗିରଫ କରିବା ପାଇଁ ଚଢ଼ାଉ ଜାରୀ ରଖିଛି।

ରଣପୁର: ମାର୍ଚ୍ଚ ୨୨ ତାରିଖ ଆଜି ନୟାଗଡ ଜିଲ୍ଲାର ୮୦ ଟି ବିଦ୍ୟାଳୟରେ ରାଜ୍ୟ ସ୍ତରୀୟ ସଫଳତା ସର୍ବେକ୍ଷଣ କାର୍ଯ୍ୟକ୍ରମ ଅନୁଷ୍ଠିତ ହୋଇ ଯାଇଛି। ଏହି କାର୍ଯ୍ୟକ୍ରମ ନୟାଗଡ ଜିଲ୍ଲା ରାଜସୁନାଖଳା ସ୍ଥିତ ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନ ଦ୍ୱାରା ଅଧ୍ୟକ୍ଷ ଡ଼. ବିଜୟ କୁମାର ତ୍ରିପାଠୀଙ୍କ ତତ୍ୱାବଧାନରେ ପରିଚାଳିତ ହୋଇଥିଲା।

ଏହି ସର୍ବେକ୍ଷଣରେ ଦ୍ଵିତୀୟ, ଚତୁର୍ଥ ଓ ସପ୍ତମ ଶ୍ରେଣୀ ଛାତ୍ରଛାତ୍ରୀଙ୍କୁ ନେଇ କରାଯାଇଥିଲା।  ସରକାରଙ୍କ ନିର୍ଦ୍ଦେଶ ଅନୁଯାୟୀ ପ୍ରତି ବ୍ଲକର ୧୦ଟି ବିଦ୍ୟାଳୟରେ କରାଯିବା ପାଇଁ ନିର୍ଦ୍ଦେଶ ଥିବା ବେଳେ ନୟାଗଡ ଜିଲ୍ଲାର ୮ଟି ବ୍ଲକର ମୋଟ ୮୦ ଟି ବିଦ୍ୟାଳୟରେ ଏହି ସର୍ବେକ୍ଷଣ କରାଯାଇଛି।

ଏହି କାର୍ଯ୍ୟରେ ନୟାଗଡ ଜିଲ୍ଲା ରାଜସୁନାଖଳା ସ୍ଥିତ ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନ ଏବଂ ଖୋର୍ଦ୍ଧା ଜିଲ୍ଲା ପାଞ୍ଚଗଡ଼ ଅନଙ୍ଗ ନରେନ୍ଦ୍ର ପ୍ରାରମ୍ଭିକ ଶିକ୍ଷକ ଶିକ୍ଷା ପ୍ରତିଷ୍ଠାନର ଛାତ୍ରଛାତ୍ରୀମାନେ ପରୀକ୍ଷକ ଭାବେ ଦାୟିତ୍ୱ ତୁଲାଇ ଥିଲେ। ଏହା ସହିତ ଦଶପଲ୍ଲା, ଗଣିଆ, ନୂଆଗାଁ ଓ ଖଣ୍ଡପଡା ବ୍ଲକରେ ୪୪ ଜଣ ଶିକ୍ଷକ ଶିକ୍ଷୟତ୍ରୀ କ୍ଷେତ୍ର ଅନୁସନ୍ଧାନନକାରୀ ଭାବେ ଦାୟିତ୍ୱ ତୁଲାଇ ଥିଲେ। ନୟାଗଡ ଜିଲ୍ଲାରେ ଦ୍ଵିତୀୟ ଶ୍ରେଣୀର ୧୧୨୬ ଜଣ, ଚତୁର୍ଥ ଶ୍ରେଣୀର ୮୭୮ ଜଣ ଏବଂ ସପ୍ତମ ଶ୍ରେଣୀର ୯୩୫ ଜଣ ଛାତ୍ରଛାତ୍ରୀଙ୍କୁ ଏହି ପରୀକ୍ଷା କାର୍ଯ୍ୟକ୍ରମରେ ଅନ୍ତର୍ଭୁକ୍ତ କରାଯାଇଥିଲା। ୨୭୮ ଜଣ ଶିକ୍ଷକ ଶିକ୍ଷୟତ୍ରୀମାନେ ଶିକ୍ଷକ ପ୍ରଶ୍ନପତ୍ରରେ ପରୀକ୍ଷା ଦେଇଛନ୍ତି।

ଭୁବନେଶ୍ୱର ସେଣ୍ଟ୍ରାଲ ସ୍କୋୟାର ଫାଉଣ୍ଡେସନର ଶ୍ଵେତା ଡୋଭଲ, ରାଜସୁନାଖଳା ଜିଲ୍ଲା ଶିକ୍ଷା ଓ ପ୍ରଶିକ୍ଷଣ ପ୍ରତିଷ୍ଠାନର ଅଧ୍ୟକ୍ଷ ଡ଼. ବିଜୟ କୁମାର ତ୍ରିପାଠୀ, ଶିକ୍ଷକ ପ୍ରଶିକ୍ଷକ ଦୀପକ କୁମାର ପ୍ରଧାନ,ରଣପୁର ବ୍ଲକ ଶିକ୍ଷା ଅଧିକାରିଣୀ ବନଲତା ବେହେରା ଓ ସହକାରୀ ବ୍ଲକ ଶିକ୍ଷା ଅଧିକାରୀ ବସନ୍ତ କୁମାର ରାଉତ ନିରୀକ୍ଷକ ଭାବେ ନରସିଂହପୁର ୟୁଜିଏମଇ ବିଦ୍ୟାଳୟ, ବି.ସି. ହାଇସ୍କୁଲ, ରାଜସୁନାଖଳା ବିଦ୍ୟାଳୟରେ ପର୍ଯ୍ୟବେକ୍ଷକ ଭାବେ କାର୍ଯ୍ୟକ୍ରମକୁ ନିରୀକ୍ଷଣ କରିଥିଲେ।

ସେହିପରି ଜିଲ୍ଲା ଶିକ୍ଷା ଅଧିକାରିଣୀ ରାଜଶ୍ରୀ ପଟ୍ଟନାୟକ ମଧ୍ୟ ନୟାଗଡ ଜିଲ୍ଲାର ବିଦ୍ୟାଳୟଗୁଡିକରେ ପର୍ଯ୍ୟବେକ୍ଷକ ଭାବେ କାର୍ଯ୍ୟକ୍ରମକୁ ନିରୀକ୍ଷଣ କରିଥିଲେ। ଆସନ୍ତା ୨୦୨୪ ମସିହାରେ ନଭେମ୍ବର ମାସରେ ହେବାକୁ ଥିବା ନାସ୍ ପରୀକ୍ଷାରେ ଓଡିଶାର ପିଲାମାନେ କିପରି ଭଲ ସଫଳତା ପ୍ରଦର୍ଶନକରିବେ ସେ ନେଇ ଏହା ଏକ ସରକାରଙ୍କ ପ୍ରସ୍ତୁତି କାର୍ଯ୍ୟକ୍ରମ ଅଟେ।

ଶିକ୍ଷକ ପ୍ରଶିକ୍ଷକ ମନୋରଞ୍ଜନ ଦାଶ, ବଟକୃଷ୍ଣ ସାହୁ, ଅନିନ୍ଦିତା ପ୍ରିୟଦର୍ଶିନୀ, ମାନସ କୁମାର ସାହୁ, ସନ୍ତୋଷ କୁମାର ମିଶ୍ରଙ୍କ ସମେତ ସି.ଆର.ସି.ସି. ସୁଶୀଲ କୁମାର ରଣା, ସଞ୍ଜୟ କୁମାର ବରାଡ଼, ଜ୍ୟୋତି ରଞ୍ଜନ କର, ପବିତ୍ର ମୋହନ ସାମନ୍ତରାୟ, ବିଶ୍ୱ ଭୂଷଣ ବେହେରା, ଅକ୍ଷୟ ମହାପାତ୍ରଙ୍କ ସମେତ ନୟାଗଡ ଜିଲ୍ଲାର ସମସ୍ତ ବ୍ଲକ ଶିକ୍ଷା ଅଧିକାରୀ ଓ ସି.ଆର.ସି.ସି.ମାନେ ଏହି କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।

ରଣପୁର: ନୟାଗଡ ଜିଲ୍ଲା ରଣପୁର ଏନଏସି ରେ ଥିବା ଦ୍ୱିତୀୟ ଶ୍ରୀକ୍ଷେତ୍ର ଭାବେ ପରିଚିତ ହୋଇଆସୁଥିବା ଜଗନ୍ନାଥ ମନ୍ଦିର ସମ୍ମୁଖରୁ ଶ୍ରୀକ୍ଷେତ୍ର ପରିକ୍ରମା ପ୍ରକଳ୍ପ ଲୋକାର୍ପଣ ଉଦ୍ଦେଶ୍ୟରେ ଏକ ଅର୍ପଣ ରଥ ବାହାରିଥିବା ଜଣାଯାଇଛି। ସ୍ଥାନୀୟ ବିଧାୟକ ସତ୍ୟନାରାୟଣ ପ୍ରଧାନ ଓ ଏନଏସି ଅଧ୍ୟକ୍ଷା ରଙ୍ଗୀନ ମହାନ୍ତି ଜଗନ୍ନାଥ ମନ୍ଦିରରେ ଦୁଇଟି ଶୁଭ କଳସୀ ମଧ୍ୟରେ କିଛି ଅକ୍ଷତ ଓ ଗୁଆ ରଖି ପୂଜାର୍ଚ୍ଚନା ସାରି ଆଜ୍ଞାମାଳ ପାଇବା ପରେ ଏହି ରଥ ଶୁଭାରମ୍ଭ ହୋଇଥିବା ଜଣାଯାଇଛି।

ଏହି ରଥ ପ୍ରତି ଓାର୍ଡ ର ପ୍ରତ୍ୟେକ ଦ୍ୱାର ବୁଲି ମହାପ୍ରଭୂଙ୍କ ଉଦ୍ଦେଶ୍ୟରେ ମୁଠାଏ ଅରୁଆ ଚାଉଳ ଓ ଗୋଟିଏ ଗୁଆ ସଂଗ୍ରହ ପାଇଁ ଏକ ଭକ୍ତିପୂର୍ଣ୍ଣ ପରିବେଶ ମଧ୍ୟରେ ଅଭିଯାନ ଆରମ୍ଭ କରିଥିବା ଦେଖିବାକୁ ମିଳିଛି। ପ୍ରତ୍ୟେକ ଦୁଆରେ ଏହି ରଥକୁ ସ୍ୱାଗତ କରାଯିବା ସହ ଏହି ରଥ ସମ୍ମୁଖରେ ପ୍ରଦର୍ଶିତ ଖୋଳ, ଝାଞ୍ଜ ଓ ଜଗନ୍ନାଥ ନାମ କୀର୍ତନ ମଧ୍ୟରେ ତିନୋଟି ଓାର୍ଡ ପରିକ୍ରମା କରିଥିବା ବେଳେ ଆସନ୍ତା ୧୫ତାରିଖ ମଧ୍ୟରେ ଏହି ରଥ ରଣପୁର ଏନଏସି ର ସମସ୍ତ ଦୁଆର ପରିକ୍ରମା କରିବାର କାର୍ଯ୍ୟକ୍ରମ ରହିଛି।

ରଣପୁର: ଆଜି ରାଜ୍ୟପାଳ ରଘୁବର ଦାସଙ୍କ ନୟାଗଡ ଜିଲ୍ଲା ଗସ୍ତ କାର୍ଯ୍ୟକ୍ରମ ରହିଥିଲା। ଏହି ଅବସରରେ ସେ ରଣପୁର ବ୍ଲକ ଅଧିନସ୍ଥ ଦର୍ପନାରାୟଣପୁର ଡାକ୍ତରଖାନାରେ ପହଂଚି ଡାକ୍ତରଖାନାର ସ୍ଥିତି ସମୀକ୍ଷା କରିଥିଲେ। ଏହା ସହ ଡାକ୍ତରଖାନାର ଡାକ୍ତର ଓ ରୋଗୀଙ୍କ ସହିତ ଆଲୋଚନା କରି ଡାକ୍ତରଖାନାର ଭଲମନ୍ଦ ବୁଝିଥିଲେ।

ଏହି ଅବସରରେ ସ୍ଥାନୀୟ ଅଧିବାସୀମାନେ ରାଜ୍ୟପାଳଙ୍କୁ ଭେଟି ସେମାନଙ୍କ ସମସ୍ୟା ସମ୍ପର୍କରେ ଜଣାଇବା ସହ ତାର ସମାଧାନ ପାଇଁ ଗୁହାରି କରିଥିଲେ। ଧାନ ମଣ୍ଡିରେ କଟଣି ଛଟଣି ନେଇ ଦର୍ପନାରାୟଣପୁର ଗ୍ରାମବାସୀମାନେ ରାଜ୍ୟପାଳଙ୍କୁ ଅଭିଯୋଗ କରିଥିଲେ। ଅଭିଯୋଗଗୁଡିକର ତୁରନ୍ତ ସମାଧାନ କରିବା ପାଇଁ ନୟାଗଡ ଜିଲ୍ଲାପାଳ ରବିନ୍ଦ୍ରନାଥ ସାହୁଙ୍କୁ ନିର୍ଦ୍ଦେଶ ଦେଇଥିଲେ।

ଭୁବନେଶ୍ୱର: ଶିକ୍ଷା ଓ ଅନୁସନ୍ଧାନ (ସୋଆ) ଅନ୍ତର୍ଗତ ଭଏସ୍ ଅଫ୍ ସୋଆ କମ୍ୟୁନିଟି ରେଡିଓ ୯୦.୪ ର ନିର୍ଦ୍ଦେଶିକା ହନୀ ପଟ୍ଟନାୟକ ସର୍ବଭାରତୀୟ କମ୍ୟୁନିଟି ରେଡିଓ ସଂଘର ରାଜ୍ୟ ଉପସଭାପତି ଭାବେ ମନୋନୀତ ହୋଇଛନ୍ତି।

ସର୍ବଭାରତୀୟ କମ୍ୟୁନିଟି ରେଡିଓ ସଂଘର ଅନୁମୋଦନ କ୍ରମେ ଓଡ଼ିଶାରେ ଏକ ରାଜ୍ୟସ୍ତରୀୟ ସଂଘ ଗଠନ ହୋଇଥିବା ବେଳେ ନୟାଗଡ ଜିଲ୍ଲାର ଦଶପଲ୍ଲା ସ୍ଥିତ ‘ରେଡିଓ ସୁରଭି’ ର ମୁଖ୍ୟ ଶିଶିର କୁମାର ଦାସଙ୍କୁ ରାଜ୍ୟ ସଭାପତି, ‘ରେଡିଓ ଉତ୍କଳ’ର ମୁଖ୍ୟ ଅମିୟ ଭୂଷଣ ବିଶ୍ୱାଳଙ୍କୁ ସମ୍ପାଦକ, ‘ରେଡିଓ ମୁସ୍କାନ’ ର ଧନେଶ୍ୱର ସାହୁଙ୍କୁ କୋଷାଧ୍ୟକ୍ଷ, ‘ସୋଆ କମ୍ୟୁନିଟି ରେଡିଓ’ ର ନିର୍ଦ୍ଦେଶିକା ହନି ପଟ୍ଟନାୟକଙ୍କୁ ଉପସଭାପତି ଓ ‘ରେଡିଓ ବାଘାଯତୀନ’ର ମିନତି ବିନ୍ଧାଣିଙ୍କୁ ସହ-ସମ୍ପାଦକ ଭାବେ ମନୋନୀତ କରାଯାଇଛି।

ଏ ନେଇ ନିକଟରେ ଅନୁଷ୍ଠିତ ସଂଘର ଜାତୀୟ ଉପ-ସଭାପତି ପ୍ରଦୀପ୍ତ ଦତଙ୍କ ଅଧ୍ୟକ୍ଷତାରେ ସଭାରେ ଓଡିଶାର ସମସ୍ତ କମ୍ୟୁନିଟି ରେଡିଓ ସଭ୍ୟମାନେ ଉପସ୍ଥିତ ଥିଲେ।

ଏହା ଛଡ଼ା ରାଜ୍ୟର ବିଭିନ୍ନ ଅଂଚଳର କମ୍ୟୁନିଟି ରେଡିଓ ମୁଖ୍ୟ ବିକାଶ ମହାପାତ୍ର, ସୁଜିତ ପଟ୍ଟନାୟକ, ପ୍ରଭାସ ସାମନ୍ତରାୟ, ସୌମ୍ୟ ରଂଜନ ନାୟକ, ପ୍ରତାପ ବାରିକ ଓ ଲିଙ୍ଗରାଜ ସାମନ୍ତରାୟଙ୍କୁ ସଭ୍ୟ ଭାବେ ଚୟନ କରାଯାଇଛି। ଉଲ୍ଲେଖ୍ୟଯୋଗ୍ୟ ଯେ ରାଜ୍ୟରେ ବର୍ତମାନ ମୋଟ ୩୭ଟି କମ୍ୟୁନିଟି ରେଡିଓ କାର୍ଯ୍ୟ କରୁଛି।

ରଣପୁର: ନୟାଗଡ଼ ଜିଲ୍ଲା ରଣପୁର ବନ ବିଭାଗ ଅଧୀନରେ ଥିବା କାଞ୍ଚନପୁର କାଜୁ ଜଙ୍ଗଲରେ ଏକ ଅସୁସ୍ଥ ଦନ୍ତା ହାତୀ ଏବେ କିଛି ଦିନ ହେବ ବୁଲୁ ଥିବା ଦେଖିବାକୁ ମିଳିଥିଲା।  ଏ ନେଇ ସ୍ଥାନୀୟ ଗ୍ରାମବାସୀମାନେ ବନ ବିଭାଗରେ ଜଣାଇ ଥିଲେ। ହାତୀଟିର ଗୋଡ଼ରେ ଗୁଳି ବାଜିଥିବା ଜଣା ପଡିଥିଲା। କୌଣସି ଶିକାରୀ ହାତୀଟିକୁ ଗୁଳି କରିଥିବା ସ୍ଥାନୀୟ ଲୋକମାନେ କହିଥିଲେ। ତୁରନ୍ତ ବନ ବିଭାଗ ହାତୀଟିକୁ ଟାଙ୍କୁଲାଇଜାର କରି ଚିକିତ୍ସା କରିବା ପାଇଁ ସ୍ଥାନୀୟ ଗ୍ରାମବାସୀମାନେ ଦାବି କରିଥିଲେ।

ଯାହା ଫଳରେ ଆଜି ଅସୁସ୍ଥ ଦନ୍ତାକୁ ଟ୍ରାଙ୍କୁଲାଇଜ କରି ଚିକିତ୍ସା କରିବା ଆରମ୍ଭ କରିଛି ବନ ବିଭାଗ। ହାତୀକୁ ଚିକିତ୍ସା କରିବା ପାଇଁ ଭୁବନେଶ୍ୱରରୁ ସ୍ୱତନ୍ତ୍ର ବିଶେଷଜ୍ଞ ଦଳ ଆସିଥିବା ଜଣା ପଡିଛି। ଖୋର୍ଦ୍ଧା ବନଖଣ୍ଡ ରଣପୁର ରେଞ୍ଜ କାଞ୍ଚନପୁର ଜଙ୍ଗଲରେ ଅସୁସ୍ଥ ଦନ୍ତା ହାତୀ ବୁଲୁଥିବା ନେଇ ବିଭିନ୍ନ ଗଣ ମାଧ୍ୟମରେ ଖବର ପ୍ରକାଶିତ ହୋଇଥିଲା।

ଏଥିପାଇଁ ହରିହରପୁର, କାଞ୍ଚନପୁର ଜଙ୍ଗଲରେ ରଣପୁର ବନବିଭାଗ ଡେରା ପକାଇଥିଲା।  ଗତ କାଲି ରାତି ସାରା ରଣପୁର ରେଞ୍ଜର ୨ଟି ଟିମ ଅସୁସ୍ଥ ଦନ୍ତା କୁ ଖୋଜିବା ପାଇଁ ହରିହରପୁର ଓ କାଞ୍ଚନପୁର ଜଙ୍ଗଲରେ ଖୋଜିଥିଲା। ଅସୁସ୍ଥ ଦନ୍ତା ହାତୀ ମିଳିବା ପରେ ଆଜି ସକାଳୁ ଚିକିତ୍ସା କାର୍ଯ୍ୟ ଆରମ୍ଭ ହୋଇଛି। ହାତୀର ଗୋଡ଼ରେ ଗଭୀର କ୍ଷତ ସହ ସଂକ୍ରମଣ ଥିବା ଜଣା ପଡିଛି। ବର୍ତ୍ତମାନ ହାତୀଟିର ଅବସ୍ଥାରେ ଉନ୍ନତି ଆସିଥିବା ରଣପୁର ରେଞ୍ଜର ସୁଶାନ୍ତ ଦଳେଇ କହିଛନ୍ତି।

ରଣପୁର: ନୟାଗଡ ଜିଲ୍ଲା ରଣପୁର ବ୍ଲକ ରାଜସୁନାଖଳା “କାଉଁରୀ ମହୋତ୍ସବ” ପଞ୍ଚମ ବର୍ଷରେ ସଫଳତାର ସହ ପାଦ ଥାପିଛି। ଏହି ପଞ୍ଚମ ବର୍ଷର”କାଉଁରୀ ମହୋତ୍ସବ-୨୦୨୩” ପ୍ରଥମ ଦିବସର ମୁଖ୍ୟ ଅତିଥି ତଥା ଓଡ଼ିଶାର ରାଜ୍ୟପାଳ ରଘୁବର ଦାସଙ୍କ କରକମଳରେ ଉଦଘାଟିତ ହୋଇ ଯାଇଛି।

ମୁଖ୍ୟ ବକ୍ତା ଭାବେ ଜାତୀୟ ପର୍ଯ୍ୟଟକ ବିଭାଗର ଅଧ୍ୟକ୍ଷ ସମ୍ବିତ ପାତ୍ର, ସମ୍ମାନିତ ଅତିଥି ଭାବେ ନୟାଗଡ ଜିଲ୍ଲାପାଳ ରବିନ୍ଦ୍ରନାଥ ସାହୁ, ସେବା ଉତ୍ସବ ଅଧ୍ୟକ୍ଷ ଶିବରାମ ମହାପାତ୍ର, ରଣପୁର ବାର ଆସୋସିଏସନର ଅଧ୍ୟକ୍ଷ ଗିରିଜାକାନ୍ତ ମହାପାତ୍ର ପ୍ରମୁଖ ଯୋଗ ଦେଇଥିଲେ।

ଏହି ପରିପ୍ରେକ୍ଷୀରେ ରାଜସୁନାଖଳାର ଐତିହ୍ୟ ପରମ୍ପରା, ଶିକ୍ଷା, କଳା, ସଂସ୍କୃତି ଓ ଇତିହାସକୁ ନେଇ ଏକ ବାର୍ଷିକ ବିଶେଷାଙ୍କ ”କାଉଁରୀ” ଉନ୍ମୋଚିତ ହୋଇ ଯାଇଛି।  ରାଜସୁନାଖଳାକୁ ଭଲ ପାଉଥିବା ପ୍ରତ୍ୟେକ କବି, ଲେଖକ ତଥା ବାହୁ ମାନ୍ୟଗଣ୍ୟ ବ୍ୟକ୍ତିମାନଙ୍କର ଗଳ୍ପ, କବିତା ଆଦି ଏହି ପତ୍ରିକାରେ ସ୍ଥାନିତ ହୋଇଛି।

ରାଜସୁନାଖଳା ମହୋତ୍ସବ ପାଇଁ ନିର୍ଦ୍ଧିଷ୍ଟ ଜାଗା ଯୋଗାଇ ଦେବା ପାଇଁ ଜିଲ୍ଲାପାଳଙ୍କୁ ରଣପୁର ବାର ଆସୋସିଏସନର ଅଧ୍ୟକ୍ଷ ଗିରିଜା କାନ୍ତ ମହାପାତ୍ର ବକ୍ତବ୍ୟ ମାଧ୍ୟମରେ ନିବେଦନ କରିଥିଲେ।

ଏହି ଅବସରରେ ବିଭିନ କ୍ଷେତ୍ରରେ କୃତି ଅର୍ଜନ କରିଥିବା ପ୍ରତିଭାମାନଙ୍କୁ ରାଜ୍ୟପାଳ ସମ୍ବର୍ଦ୍ଧିତ କରିଥିଲେ। ଏହା ପରେ ମହୋତ୍ସବ କମିଟି ତରଫରୁ କମିଟିର ଅଧ୍ୟକ୍ଷ ଆର୍ତ୍ତତ୍ରାଣ ପ୍ରଧାନ ରାଜ୍ୟପାଳ ମହୋଦୟଙ୍କୁ ମୁମେଣ୍ଟମ ଉପହାର ଭାବେ ପ୍ରଦାନ କରିଥିଲେ।

ମହାମହିମ ରାଜ୍ୟପାଳ କହିଥିଲେ ଯେ ମୁଁ ଏଠି ଜନସାଧାରଣଙ୍କ ସେବକ ଭାବେ ଉପସ୍ଥିତ ଅଛି। ଶହୀଦ ରଘୁଦିବାକରଙ୍କ ସମେତ ସମସ୍ତ ସ୍ୱାଧୀନତା ସଂଗ୍ରାମୀଙ୍କୁ ଶ୍ରଦ୍ଧାଞ୍ଜଳି ଜଣାଇଥିଲେ। ଉତ୍ସବ ବିନା ଜୀବନ ବ୍ୟର୍ଥ ଅଟେ। ତେଣୁ ସମୟ ସମୟରେ ଉତ୍ସବ କରି ଜୀବନକୁ ସାର୍ଥକ କରିବାର ଆବଶ୍ୟକତା ରହିଛି।

ଏହି ଉତ୍ସବ ମାଧ୍ୟମରେରେ ସଂସ୍କୃତି, ପ୍ରଥା, ପରମ୍ପରାର ପ୍ରଚାର ପ୍ରସାର ହୋଇ ପାରିଛି।  ଏହା ମାଧ୍ୟମରେ ସ୍ଥାନୀୟ କଳାକାରମାନଙ୍କ କଳା ପ୍ରଦର୍ଶନ କରିବାର ସୁଯୋଗ ମଧ୍ୟ ପାଇ ପାରନ୍ତି। ସଭାକାର୍ଯ୍ୟ ପରେ ବିଭିନ୍ନ ଆକର୍ଷଣୀୟ ସାଂସ୍କୃତିକ କାର୍ଯ୍ୟ ପରିବେଷଣ କରାଯାଇଥିଲା।

ରଣପୁର: ଆମ ଓଡିଶା ନବୀନ ଓଡ଼ିଶାରେ ଯୋଡିହେଲା ନୟାଗଡ ଜିଲ୍ଲା ରଣପୁର ବ୍ଲକ। ଓଡିଶା ଆଗକୁ ବଢିବ, ଶସକ୍ତ ହେବ, ପରିବହନ ବ୍ୟବସ୍ଥାରେ ରୂପାନ୍ତର ହେବ, ସାମାଜିକ ଓ ଅର୍ଥନୀତିରେ ବିକାଶ ହେବ। ରାଜ୍ୟରେ ଏହି ବିକାଶ ଧାରା ଆହୁରି ଆଗକୁ ଶିଖର ଛୁଇଁବ। ଆଜି ଲଷ୍ମୀ ଯୋଜନାରେ ବସ ଯୋଜନାର ଶୁଭାରମ୍ଭ ହେଲା।

ଏହିଯୋଜନାରେ ଉପାନ୍ତ ଅଞ୍ଚଳର ଅର୍ଥନୀତିକୁ ସୁଦୃଢ କରିବା ସହ ଗାଁ ଗହଳିର ସମୃଦ୍ଧି ଆଣିବ ବୋଲି ମାନ୍ୟବର ମୁଖ୍ୟମନ୍ତ୍ରୀ “ଲକ୍ଷ୍ମୀ” ବସ ଯୋଜନା କରିଛନ୍ତି।

ରଣପୁରର ଏହି କାର୍ଯ୍ୟକ୍ରମରେ ମୁଖ୍ୟ ଅତିଥି ମାନ୍ୟବର ବିଧାୟକ ରଣପୁର ସତ୍ୟନାରାୟଣ ପ୍ରଧାନ, ଜିଲ୍ଲା ପରିଷଦ ସଦସ୍ୟ ରାଜନୀରାଣୀ ପଟ୍ଟନାୟକ, ବ୍ଲକ ଉପାଧ୍ୟକ୍ଷ ପ୍ରଭାତ ଦଳବେହେରା, ରଣପୁର ବିଜ୍ଞାପିତ ଅଞ୍ଚଳର ନଗର ସଭାପତି ଲିଙ୍ଗରାଜ ନାୟକ, ସନ୍ତୋଷ କୁମାର ଲେଙ୍କା, ବିଜୁ ଯୁବ ସଭାପତି ଆକାଶ କୁମାର ପାଣି, ରଣପୁର ବିଜ୍ଞାପିତ ପରିଷଦର ଅଧ୍ୟକ୍ଷା ରଙ୍ଗୀନ ମହାନ୍ତି, ନର୍ମଦା ରାୟ, ପ୍ରମୁଖ ଯୋଗ ଦେଇଥିଲେ।

ରଣପୁର: ନୟାଗଡ ଜିଲ୍ଲା ରଣପୁର ଥାନାରେ ଇନ୍ସପେକ୍ଟର ନିହାର ରଞ୍ଜନ ମହାନ୍ତିଙ୍କ ତତ୍ୱାବଧାନରେ ଶନିବାର ଦିନ ଆମ ପୋଲିସ ସମିତି କାର୍ଯ୍ୟକ୍ରମ ଅନୁଷ୍ଠିତ ହୋଇ ଯାଇଛି। ଏହି କାର୍ଯ୍ୟକ୍ରମ ରଣପୁର ଥାନା ପରିସର ମଧ୍ୟରେ ଆୟୋଜିତ ହୋଇଥିଲା।

ଏହି ଆମ ପୋଲିସ ସମିତି ବୈଠକରେ ପୂଜା କମିଟିରେ ଭଲ୍ୟୁଣ୍ଟର ରଖିବା, ଟ୍ରାଫିକ ଅସୁବିଧା ନ କରିବା, ଶାନ୍ତି ଶୃଙ୍ଖଳାର ସହ ବିଭିନ୍ନ କାମ କରିବା, ସଭା ସମିତି, ଧାରଣା, ରାଲି, ଶୋଭାଯାତ୍ରା ନିମନ୍ତେ ପୋଲିସ ପରମିଶନ ନେବାର ନୀତି ନିୟମ, ବିଭିନ୍ନ ସାମାଜିକ ସଚେତନତା କାର୍ଯ୍ୟକ୍ରମ, ଗାଡି ଚାଳନାର ବିଭିନ୍ନ ସତର୍କ ଓ ସଚେତନତା ନିୟମ, ଗାଡି ଚଲେଇବା ସମୟରେ ହେଲମେଟ ପିନ୍ଧିବା ବାଧ୍ୟତା ମୂଳକ, ସାଇବର ଫ୍ରଡ଼ ସଚେତନତା, ସାଇବର ଫ୍ରଡ଼ ସଚେତନତା ରଥ, ମୋବାଇଲ ବ୍ୟବହାର ସମୟରେ ସତର୍କତା ଅବଲମ୍ବନ କରିବା ସମ୍ବନ୍ଧରେ ଆଲୋଚନା କରାଯାଇଥିଲା। ପ୍ରତି କ୍ଷେତ୍ରରେ ପୋଲିସ ଜନସାଧାରଣଙ୍କୁ ସହଯୋଗ କରିବ ବୋଲି ଇନ୍ସପେକ୍ଟର ନିହାର ରଞ୍ଜନ ମହାନ୍ତି ମତ ରଖିଥିଲେ। ଏହି ପୋଲିସ ସମିତି କାର୍ଯ୍ୟକ୍ରମ ପ୍ରତି ପଞ୍ଚାୟତରେ କରାଯାଇ ଲୋକଙ୍କୁ ସଚେତନ କରାଯିବ ବୋଲି ଶ୍ରୀ ମହାନ୍ତି କହିଥିଲେ।

ସାମ୍ବାଦିକ କୃଷ୍ଣଚନ୍ଦ୍ର ଦାଶ, ମଧୁସୁଦନ ପରିଡା, କୋର୍ଟ ନବୀ ସନ୍ଧା ସର ମହାପାତ୍ର ପ୍ରମୁଖ ସାଇବର ଠକେଇର ପ୍ରତିକାର, ଗାଁ ମାନଙ୍କରେ ହେଉଥିବା ବୟକଟ, ବାଲ୍ୟ ବିବାହ, ନିଶା ନିବାରଣ, ଗୋ-ଚାଲାଣ ଆଦିର ପ୍ରତିକାର ସମ୍ବନ୍ଧରେ ପ୍ରଶ୍ନ କରିଥିଲେ। ଏହାର ପ୍ରତିକାର ସମ୍ବନ୍ଧରେ ଇନ୍ସପେକ୍ଟର ଶ୍ରୀ ମହାନ୍ତି ବୁଝାଇ ଥିଲେ ଏବଂ ସମସ୍ତେ ପୋଲିସଙ୍କୁ ସହଯୋଗ କରିବା ପାଇଁ କହିଥିଲେ। ବର୍ତ୍ତମାନ ରଣପୁରରେ ପୂର୍ବ ଅପେକ୍ଷା ଚୋରି ଡକାୟତି କମି ଥିବା ପ୍ରଭାତ ଦଳେଇ ଓ ଧନେଶ୍ୱର ପ୍ରଧାନ ମତ ରଖିଥିଲେ | ରଣପୁର ଥାନାକୁ ଅଧିକ କର୍ମଚାରୀ ଦେବା ପାଇଁ ଜିଲ୍ଲା ଆରକ୍ଷୀ ଅଧିକାରୀଙ୍କୁ ଜଣାଇ ଥିବା ଇନ୍ସପେକ୍ଟର ଶ୍ରୀ ମହାନ୍ତି ମତ ରଖିଥିଲେ। ନଗର ସଭାପତି ଲିଙ୍ଗରାଜ ନାୟକ ଅଧିକ ପେଟ୍ରୋଲିଙ୍ଗ ପାଇଁ ମତ ପ୍ରକାଶ କରିଥିଲେ।

ଏହି କାର୍ଯ୍ୟକ୍ରମରେ ରଣପୁର ଅଞ୍ଚଳର ସାମ୍ବାଦିକ, ଓକିଲ, ଗଣେଶ ପୂଜା କମିଟିର ସଦସ୍ୟ, ଦୁର୍ଗା ପୂଜା କମିଟିର ସଦସ୍ୟ, କେତେକ ସାହିର ମୁଖିଆ ଓ ସାଧାରଣ ଜନ ସାଧାରଣ ଆଦି ଯୋଗ ଦେଇଥିଲେ, ଅନ୍ୟମାନଙ୍କ ମଧ୍ୟରେ ସବ-ଇସ୍ପେକ୍ଟର ସଞ୍ଜୟ ପରିଡା, ସବ-ଇସ୍ପେକ୍ଟର ସୁନିତା ସାମଲ, ରାଜେଶ କୁମାର ଶ୍ରୀଚନ୍ଦନ ଓ ଥାନାର ସମସ୍ତ କର୍ମଚାରୀ ଉପସ୍ଥିତ ଥିଲେ।