Tag: ବାଣପୁର ପୋଲିସ

ବାଣପୁର: ଗତ ୧୯ ତାରିଖରେ ଜାତୀୟ ରାଜପଥରୁ କାରକୁ ଅଟକାଇ ବନ୍ଧୁକରୁ ଫାଙ୍କା ଗୁଳି ଚାଳନା କରି ଦୁର୍ବୁର୍ତ୍ତ ମାନେ ୮ଲକ୍ଷ ତିରିଶ ହଜାର ଟଙ୍କା ଲୁଟି ନେଇଥିଲେ। ଲୁଟରେ ସାମିଲ ଥିବା ଚାରିଜଣଙ୍କୁ ବାଣପୁର ପୋଲିସ ଗିରଫ କରିଥିବା ବେଳେ ଆହୁରି ତିନିଜଣ ଅଭିଯୁକ୍ତ ଧରା ପଡ଼ିନାହାନ୍ତି ବୋଲି ଆଜି ଏକ ସାମ୍ବାଦିକ ସମ୍ମିଳନୀ ଜରିଆରେ ଖୋର୍ଦ୍ଧା ଅତିରିକ୍ତ ଏସପି ସୁରେନ୍ଦ୍ର ନାଥ ମୁର୍ମୁ କହିଛନ୍ତି। ତତସହିତ ଏକ ଲକ୍ଷ ସତର ହାଜର ଟଙ୍କା, ୫ଟି ପିସ୍ତଲ, ୯ ଟି ଗୁଳି ଦୁଇଟି ଭୁଜାଲି, ଗୋଟିଏଛୁରୀ, ଗୋଟିଏ ମୋଟର ସାଇକେଲ, ପିକଅପ ଭ୍ୟାନ ସମେତ ଚାରିଟି ମୋବାଇଲ ଜବତ କରିଛି।

ଉକ୍ତ ଡକାୟତ ଦଳର ମୁଖ୍ୟ ବାଣପୁର ଅଞ୍ଚଳ ବାଂଳେଇ ଗ୍ରାମର ହରେକୃଷ୍ଣ ପ୍ରଧାନ (୪୦) ହୋଇଥିବା ବେଳେ ସେ ବଡ଼ ଗୋବିନ୍ଦପୁର ମୁନା ସୁବୁଦ୍ଧିଙ୍କ ଘରେ ଭଡାରେ ରହୁଥିଲା। ଅନ୍ୟ ଜଣେ ଅଭିଯୁକ୍ତ ତ୍ରିଲୋଚନ ବେହେରା (୩୬) ଗଞ୍ଜାମ ଖଲିକୋଟ ଅଞ୍ଚଳ ତେଲିଡିହ ଗ୍ରାମର ହୋଇଥିବା ବେଳେ ବିଶ୍ୱନାଥ ପରିଡା (୪୦), ଚିତ୍ତରଞ୍ଜନ ପ୍ରଧାନ (୨୮) ନୟାଗଡ ଜିଲ୍ଲା ରଣପୁର ଅଞ୍ଚଳର ବୋଲି ଜଣାପଡିଛି।

ପ୍ରକାଶ ଥାଉକି ଚଣ୍ଡହରଦେବ ରାଇସ ମିଲର ତିନିଜଣ କର୍ମଚାରୀ ବାଣପୁର ଅଂଚଳରୁ ଟଙ୍କା ସଂଗ୍ରହ କରି ଫେରୁଥୁବା ବେଳେ ଦୁର୍ବୁତ୍ତ ମାନେ ତାଙ୍କ କାର ଆଗରେ ନୟାଗଡ ଅଞ୍ଚଳର ଏକ ମିନି ଟ୍ରକକୁ ରଖି ଫାଙ୍କା ଗୁଲିଚଳନା କରି କର୍ମଚାରୀ ମାନଙ୍କ ଠାରୁ ଦୁଇଟି ମୋବାଇଲ ସହ ଆଠଲକ୍ଷ ତିରିଶ ହଜାର ଟଙ୍କା ଲୁଟି ନେଇଥିଲେ।

ଖୋର୍ଦ୍ଧାର ନୂତନ ଏସପି ସାଗରୀକା ନାଥଙ୍କ ନିର୍ଦେଶ କ୍ରମେ ଡକାୟତ ମାନଙ୍କୁ ଧରିବା ପାଇଁ ଆଇଆଇସି ରମେଶ ଦେବତାଙ୍କୁ ନେଇ ଏକ ଟିମ ଗଠନ କରାଯାଇଥିଲା। ଫଳରେ ଡକାୟତ ମାନଙ୍କୁ ଧରିବାରେ ପୋଲିସ ସଫଳତା ପାଇଲା ବୋଲି ଅତିରିକ୍ତ ଏସପି କହିଛନ୍ତି।

ତେବେ ବାଣପୁର ଅଂଚଳରୁ ଲାଗାତର ଚୋରି ହେଉଥିବାରୁ ଖୁବ ଶୀଘ୍ର ସେମାନଙ୍କୁ କାବୁ କରାଯିବ ବୋଲିଶ୍ରୀଯୁକ୍ତ ମୁର୍ମୁ ସାମ୍ବାଦିକଙ୍କୁ କହିବା ସହ ସମସ୍ତ ଚାରିଜଣ ଆସାମୀଙ୍କୁ କୋର୍ଟ ସ୍ଥାନାନ୍ତର କରାଯାଇଛି।

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଥାନା ଅଞ୍ଚଳରେ ଲଗାତାର ଭାବେ ଚୋରି ଲୁଟ ବଢ଼ିବାରେ ଲାଗିଛି। ଗତକାଲି ବାଣପୁର ବାଇପାସ ନିକଟରୁ ବନ୍ଧୁକ ମୁନରେ ୮ ଲକ୍ଷରୁ ଉର୍ଦ୍ଧ୍ଵ ଟଙ୍କା ଲୁଟ ହୋଇଥିବାବେଳେ ପୁଣି ଗତକାଲି ବିଳମ୍ବିତ ରାତ୍ରିରେ ପଲଟନ ପଡିଆ ନିକଟସ୍ଥ ଏକ ଘରେ କଳାକନା ବୁଲାଇ ଫେରାର ହୋଇଯାଇଛନ୍ତି ଦୁର୍ବୃତ୍ତ।

ସୂଚନା ମୁତାବକ ସାନହନ୍ତୁଆଡ଼ ଗ୍ରାମର ଗୋଦାବରୀ ପ୍ରଧାନ (୬୦) ନିଜ ପତ୍ନୀଙ୍କ ସହ ଟିକିରାଇ ମନ୍ଦିର ନିକଟରେ ବାସ କରନ୍ତି। ତେବେ ଗତକାଲି ପତ୍ନୀଙ୍କ ସ୍ୱାସ୍ଥ୍ୟବସ୍ଥା ଯାଞ୍ଚ ପାଇଁ ଗୋଦାବରୀ ତାଙ୍କୁ ଭୁବନେଶ୍ୱର କ୍ୟାପିଟାଲ ହସ୍ପିଟାଲ ନେଇ ଯାଇଥିଲେ। ଘର ତାଲା ପକାଇ ନିକଟସ୍ଥ ପଡୋଶୀଙ୍କୁ ଗୋଦାବରୀ ଚାବି ହସ୍ତାନ୍ତର କରି ଯାଇଥିଲେ।

ଗତକାଲି ରାତିରେ ଭୁବନେଶ୍ୱରରୁ ଫେରିନପାରିବାରୁ ସେ ପଡୋଶୀଙ୍କ ସହ ସମ୍ପର୍କରେ ଥିଲେ ଏବଂ ଶେଷଥର ରାତି ୧୨ ଘଟିକା ପାଖାପାଖି କଥା ହୋଇଥିଲେ ଏବଂ ଘର ତାଲା ପୂର୍ବପରି ପଡିଥିବାର ଜାଣିବାକୁ ପାଇଥିଲେ। କିନ୍ତୁ ରାତି ୪ ଘଟିକା ସମୟରେ ପଡୋଶୀ ଗୋଦାବରୀଙ୍କୁ ଫୋନ ଯୋଗେ ତାଙ୍କ ଘରୁ ଚୋରି ହୋଇଥିବାର ସୂଚନା ଦେଇଥିଲେ।

ଖବର ପାଇ ଆଜି ସକାଳେ ଗୋଦାବରୀ ଘରକୁ ଆସି ଦେଖିବାକୁ ପାଇଥିଲେ ଯେ, ତାଙ୍କ ଘରର ମୁଖ୍ୟ କବାଟ ସହ ଚାରି ଗୋଟି କବାଟ ତାଲା ଭାଙ୍ଗି ଦୁର୍ବୃତ୍ତମାନେ ଦେଢ଼ ଲକ୍ଷ ଟଙ୍କା ନଗଦ ଏବଂ ସୁନା ଅଳଙ୍କାର ଚୋରି କରି ବାରିପଟେ ଫେରାର ହୋଇଯାଇଛନ୍ତି। ଏ ନେଇ ଗୋଦାବରୀ ବାଣପୁର ଥାନାରେ ସୂଚନା ଦେଇଥିବା ଗଣମାଧ୍ୟମକୁ କହିଛନ୍ତି।

ସୂଚନା ଥାଉକି ଦୁଇ ଦିନ ତଳେ ପଲଟନ ପଡିଆ ଠୁ ୧୦୦ ମିଟର ଦୂରରେ ଦୁର୍ବୃତ୍ତମାନେ ଜଣଙ୍କ ଘରୁ ଚୋରି କରି ଫେରାର ହୋଇଯାଇଥିଲେ। ତେବେ ବାରମ୍ବାର ବାଣପୁର ଥାନା ଅଞ୍ଚଳରେ ଏପରି ଚୋରି ଓ ଲୁଟ ଅଞ୍ଚଳବାସୀ ଓ ପୋଲିସର ନିଦ ହଜାଇଦେଇଛି।

ବାଣପୁର: ବାଣପୁର ଥାନା ଅଞ୍ଚଳର ରାଜୀବ ଲୋଚନ ଲେଙ୍କା ବିଦେଶରେ ଚାକିରୀ ଦେବାକୁ କହି ଲୋକଙ୍କୁ ଠକିବା ଅଭିଯୋଗରେ ଗିରଫ ହୋଇଛି। ଖବର ମୁତାବକ ଅଭିଯୁକ୍ତ ରାଜୀବ ବାଣପୁର ବିଷ୍ଣୁଡ଼ିହ ଗ୍ରାମର ବଳରାମ ସୁବୁଦ୍ଧିଙ୍କୁ ବିଦେଶରେ ଭଲ ଦରମା ସୁବିଧା ଥିବା କହି ୭୦ ହଜାର ଟଙ୍କା ଅଗ୍ରିମ ନେଇଥିଲେ। ପରେ କିଛିଦିନ ପରେ ମିଥ୍ୟା ଭିଶା, ବିମାନ ଟିକେଟ ଏବଂ ଅଫର ଲେଟର ମଧ୍ୟ ପ୍ରଦାନ କରିଥିଲା। ଅଭିଯୁକ୍ତ ପୁଣି ୧୫୦୦୦ ଟଙ୍କା ମେଡିକାଲ ଫିଟନେସ ପାଇଁ ଦାବି କରିଥିଲେ। ଵଳରାମ ଏହା ମିଥ୍ୟା କାଗଜପତ୍ର ବୋଲି ଜାଣି ରାଜୀବଙ୍କୁ ଟଙ୍କା ଫେରସ୍ତ କରିବାକୁ କହିଥିଲେ। ବାରମ୍ବାର ମାଗିବା ପରେ ରାଜୀବ ଟଙ୍କା ନ ଫେରାଇବାରୁ ବଳରାମ ଥାନାର ଦ୍ୱାରସ୍ତ ହୋଇଥିଲେ।

ଅନୁରୂପ ଭାବେ ବାଣପୁର ଭୀମପୁର ଅଞ୍ଚଳର ମାନସ ଚୌଧୁରୀ, ମାଧବ ମାର୍ଥା ଏବଂ କୈଳାଶ ପ୍ରଧାନଙ୍କୁ ମଧ୍ୟ ଠକିଥିବା ଅଭିଯୋଗ ହେବା ପରେ ରାଜୀବକୁ ପୋଲିସ ଗିରଫ କରି କୋର୍ଟ ଚାଲାଣ କରିଛି। ଜାମିନ ନାମଞ୍ଜୁର ହେବାରୁ ବାଣପୁର ବିଚାର ବିଭାଗୀୟ କାରାଗାରକୁ ପଠାଇଦିଆଯାଇଛି।

ପ୍ରକାଶ ଥାଉକି ବାଣପୁର ଅଞ୍ଚଳର ବହୁ ଯୁବକ ନିଜର ପରିବାର ପ୍ରତିପୋଷଣ ପାଇଁ ବାହାର ଦେଶକୁ ଯାଉଥିବା ବେଳେ ବହୁବାର ଠକେଇର ଶିକାର ହେଉଥିବା ନଜରକୁ ଆସୁଛି। ତେଣୁ ସେମାନଙ୍କ ଠାରୁ ଦୁରେଇ ରହିବାକୁ ବାଣପୁର ପୋଲିସ ଜନସାଧାରଣଙ୍କୁ ନିବେଦନ କରିଛି।

ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ଅନ୍ତର୍ଗତ ବାଣପୁର ପୋଲିସ ଏକ ଚୋରି ଘଟଣାର ପର୍ଦ୍ଦାଫାଶ କରିବା ସହ ୨ ଅଭିଯୁକ୍ତଙ୍କୁ ଗିରଫ କରିଛି। ଏ ନେଇ ବାଣପୁର ଆଇଆଇସି ରମେଶ କୁମାର ଦେବତା ସୂଚନା ଦେଇଛନ୍ତି।

ସୂଚନା ମୁତାବକ ଚଳିତ ମାସ ୧୮ ତାରିଖରେ ବାଣପୁର ବ୍ଲକ ବିଷ୍ଣୁଡିହ ଗ୍ରାମ ପଞ୍ଚାୟତ ଗୋଦାମ ଗୃହରୁ ୫୮ ଗୋଟି ଚାଉଳ ବସ୍ତା ଏବଂ ଅନ୍ୟାନ୍ୟ ଜିନିଷ ଚୋରି ହୋଇଥିବାର ବାଣପୁର ଥାନାରେ ସରପଞ୍ଚ ଏବଂ ପିଇଓ ଲିଖିତ ଅଭିଯୋଗ କରିଥିଲେ। ଘଟଣାର ତ୍ୱରିତ ତଦନ୍ତ କରି ପୋଲିସ ଉକ୍ତ ଚୋରିରେ ସାମିଲ ଥିବା ପାଞ୍ଚ ଅଭିଯୁକ୍ତଙ୍କୁ ଚି଼ହ୍ନଟ କରିବା ସହ ବିଷ୍ଣୁଡିହ ଗ୍ରାମର ୨ ଅଭିଯୁକ୍ତଙ୍କୁ ଗିରଫ କରିଛି। ସେମାନଙ୍କ ନିକଟରୁ ପୋଲିସ ୧୧ ଗୋଟି ଚାଉଳ ବସ୍ତା ଏବଂ ଏକ ଟାଟା ଏସି ଗାଡି ଜବତ କରିଛି।

ତେବେ ଉକ୍ତ ଚୋରି ଘଟଣାରେ ସାମିଲ ଥିବା ଅନ୍ୟ ସମସ୍ତ ଫେରାର ଅଭିଯୁକ୍ତ ଖୁବ ଶୀଘ୍ର ଗିରଫ ହେବା ସହ ଚୋରି ଜିନିଷ ଆଦାୟ କରାଯିବ ବୋଲି ଆଇଆଇସି ଶ୍ରୀ ଦେବତା କହିଛନ୍ତି।

ବାଣପୁର (ସୀତାରାମ ଅଗ୍ରୱାଲ): ୧୦ କୋଟି ଠକେଇ ମାମଲାରେ ମହିଳା ଅଭିଯୁକ୍ତାଙ୍କୁ ଆଜି ବାଣପୁର ପୋଲିସ କାବୁ କରିଛି। ଅଭିଯୁକ୍ତା ବିଷ୍ନୁପ୍ରିୟା ଥାନାରେ ଥିବା ଖବର ପାଇ ଦାମିଆ ଓ ନୀଳାଦ୍ରି ଗ୍ରାମପଞ୍ଚାୟତର କ୍ଷତିଗ୍ରସ୍ତ ଶହଶହ ମହିଳା ଥାନାର ଦ୍ୱାରସ୍ତ ହୋଇଥିଲେ। ସେମାନେ ଗରିବ ଓ ଅଶିକ୍ଷିତ ଶ୍ରେଣୀର ହୋଇଥିବାରୁ ସେମାନଙ୍କୁ ଋଣଟଙ୍କା ଫେରସ୍ତ ସହ ଆମେ କେଉଁଠାରୁ ଟଙ୍କା ଆଣି କମ୍ପାନୀକୁ ସୁଝିବୁ ବୋଲି ଥାନାରେ ଅଭିଯୋଗ କରିଥିଲେ।

ଦୀର୍ଘସମୟ ଧରି ମହିଳାମାନେ ଥାନାରୁ ନ ଯିବା ଏବଂ ଉତ୍ତେଜନା ସୃଷ୍ଟି ହେବାରୁ ସ୍ଥାନୀୟ ସରପଞ୍ଚ ଏବଂ ବ୍ଲକ ଅଧକ୍ଷ ପହଂଚିବା ପରେ ଆଇଆଇସି ରମେଶ ଦେବତା କ୍ଷତିଗ୍ରସ୍ତ ମହିଳା ମାନଙ୍କୁ ବୁଝାସୁଝା କରିଥିଲେ। ଅଭିଯୁକ୍ତାଙ୍କୁ ଗିରଫ କରିବା ସହ କୋଟିଏ ଟଙ୍କାରୁ ଅଧିକ ଠକେଇ ହୋଇଥିବାରୁ ଏହା କ୍ରାଇମବ୍ରାଞ୍ଚକୁ ହସ୍ତାନ୍ତର ହେବ ବୋଲି କହିଥିଲେ।  ନିଶ୍ଚିତ ଭାବରେ ଏହାର ଉପଯୁକ୍ତ ଦଦନ୍ତ ହେବା ସହ ସମସ୍ତ କ୍ଷତିଗ୍ରସ୍ତ ମହିଳା ମାନଙ୍କ ଠାରୁ ଆଧାର କାର୍ଡ ଏବଂ ଠକେଇ ପରିମାଣର ପ୍ରମାଣ ପୋଲିସ ତରଫରୁ ସଂଗ୍ରହ କରାଯାଇଥିବା ଜଣାପଡିଛି।

ଖବରରୁ ଜଣାପଡିଛି ଅଭିଯୁକ୍ତା ବିଷ୍ନୁପ୍ରିୟା ବିଭିନ୍ନ ଫାଇନାନ୍ସ କମ୍ପାନୀ ମାନଙ୍କ ସହିତ ଯୋଗାସୁତ୍ର କରି ଉପରୋକ୍ତ ପଞ୍ଚାୟତର ହଜାର ହଜାର ମହିଳାଙ୍କ ନାମରେ ଲୋନ କରି ଟଙ୍କା ଆତ୍ମସାତ କରିଥିବା ଅଭିଯୋଗ ହୋଇଥିଲା। ତେବେ ମହିଳା ଅଭିଯୁକ୍ତ ବିଷ୍ନୁପ୍ରିୟା ପଞ୍ଚାୟତ ସ୍ତରୀୟ ମହିଳା ସଙ୍ଘର ସଭାନେତ୍ରୀ ଥିବାବେଳେ ଏକ ସପ୍ତାହ ତଳେ ବିଡ଼ିଓଙ୍କୁ ତାଙ୍କର ଇସ୍ତଫା ପତ୍ର ଦେଇଥିବା ବେଳେ ଏକ ନିର୍ଦ୍ଧିଷ୍ଟ ଦଳ ପାଇଁ କାର୍ଯ୍ୟ କରୁଥିବା ଜଣାପଡିଛି।

ବାଣପୁର (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଣପୁର ଅଞ୍ଚଳରେ ଜଣେ ଯୁବକଙ୍କ ଅଳଙ୍କାର ଠକେଇ ଉପାୟ ସାଧାରଣରେ ଆଶ୍ଚର୍ଯ୍ୟ କରିଛି। ସୂଚନା ମୁତାବକ ବାଣପୁର ଥାନା ଅଧିନସ୍ଥ ମଙ୍ଗରାଜପୁର ଛକଠାରେ ଘର କରି ରହିଥିବା ମୁନା ରାଉତ (୪୦) ବାଣପୁର ଅଞ୍ଚଳର ବୁଢାବୁଢ଼ୀ ମାନଙ୍କୁ ନଜରରେ ରଖି ସେମାନଙ୍କୁ ମିଠା କଥା କହି ପିନ୍ଧିଥିବା ସୁନା ଅଳଙ୍କାର ହରଣଚାଲ କରୁଥିଲା।

ଗତକାଲି ସାରୁବାରୀ ପଦର ଗ୍ରାମର କବିରାଜ ସ୍ୱାଇଁ ନାମକ ଜଣେ ବୃଦ୍ଧ ଏକ ମଙ୍ଗଳ ସୂତ୍ର ଗୁନ୍ଥିବା ନିମନ୍ତେ ବାଣପୁର ଆସୁଥିବା ବେଳେ ଅଭିଯୁକ୍ତ ମୁନା ତାଙ୍କୁ ମିଛ ପରିଚୟ ଦେଇ ମୋର ଚିହ୍ନାପରିଚୟ ଅଛି କହି ନିଜର ମୋଟର ସାଇକେଲରେ ବସାଇ ବଜାରକୁ ନେଇଯାଇଥିଲା। ପରେ ସୁନା ଦୋକାନ ପାଖରେ ବୃଦ୍ଧ ଜଣଙ୍କୁ ଛାଡ଼ିଦେଇ ମଙ୍ଗଳସୂତ୍ର ଧରି ଚମ୍ପଟ ମାରିଥିଲା।

କବିରାଜ ଉକ୍ତ ଘଟଣାକୁ ନେଇ ଥାନାର ଦ୍ୱାରସ୍ତ ହୋଇଥିଲେ। ଥାନା ଅଧିକାରୀ ରମେଶ କୁମାର ଦେବତା ବିଭିନ୍ନ ସିସିଟିଭିକୁ ଦେଖି ଏବଂ ବିଭିନ୍ନ ଲୋକଙ୍କୁ ପଚାରି ଅଭିଯୁକ୍ତକୁ ଚିହ୍ନିବାରେ ସଫଳ ହୋଇଥିଲେ। ଆଜି ସକାଳେ ଅଭିଯୁକ୍ତକୁ ଘରୁ ପୋଲିସ ଉଠାଇ ନେଇଥିଲା। ପଚରା ଉଚରା ପରେ ଅଭିଯୁକ୍ତ ନିଜ ଘରେ ଜୋତା ଭିତରେ ଲୁଚାଇ ରଖିଥିବା ମଙ୍ଗଳ ସୂତ୍ରକୁ ଉଦ୍ଧାର କରିଛି ପୋଲିସ।

ଅନୁରୂପ ଭାବେ ଅଭିଯୁକ୍ତ ମୁନା ମାଟିଆପୋଖରୀ ଗ୍ରାମର ତିଳୋତ୍ତମା ପ୍ରଧାନ ନାମ୍ନୀ ଜଣେ ବୃଦ୍ଧା ବ୍ୟାଙ୍କରୁ ବାର୍ଦ୍ଧକ୍ୟ ଭତ୍ତା ଧରି ଫେରୁଥିବା ବେଳେ ପେଟ୍ରୋଲ ଟାଙ୍କି ନିକଟରେ ବୃଦ୍ଧାଙ୍କୁ ଅଟକାଇ ଆଇ ବୋଲି ଡାକି ଏବଂ ମଇଳା କାନଫୁଲ କଣ ପିନ୍ଧିଛୁ ବୋଲି କହି ସଫା କରିବା ବାହାନାରେ ଜୋରକରି କାନଫୁଲ ଧରି ଚମ୍ପଟ ମାରିଥିଲା। ପୋଲିସ ପଚାରିବାରେ ଉକ୍ତ କାନଫୁଲ ଅଭିଯୁକ୍ତ ମୁନା ଗ୍ରାମର ଜନୈକ ବ୍ୟକ୍ତି ପାଖରେ ବନ୍ଧା ପକାଇଥିବା ସ୍ୱୀକାର କରିଥିଲା। ଉକ୍ତ କାନଫୁଲକୁ ବନ୍ଧା ପକାଇଥିବା ବ୍ୟକ୍ତିଙ୍କ ନିକଟରୁ ମଧ୍ୟ ଥାନାଧିକାରୀ ଶ୍ରୀ ଦେବତା ଉଦ୍ଧାର କରିଥିବା ଜଣାଯାଇଛି।

ଅଭିଯୁକ୍ତ ମୁନାକୁ ପୋଲିସ ଅଟକ ରଖି ଅନ୍ୟ କୌଣସି କେଳେଙ୍କାରୀରେ ସମ୍ପୃକ୍ତ ଅଛିକି ନାହିଁ ତଦନ୍ତ କରୁଛି।

ବାଣପୁର (ସୀତାରାମ ଅଗ୍ରୱାଲ): ଅଜାଣତରେ ଜଣେ କିନ୍ନରଙ୍କୁ ପ୍ରେମ ବିବାହ କରି ତାଙ୍କର ଅଶ୍ଳୀଳ ଫୋଟୋ ଓ ଭିଡ଼ିଓ ଭାଇରାଲ କରିବା ଯୁବକଙ୍କୁ ମହଙ୍ଗା ପଡିଛି। ଏହି ମାମଲାରେ ଅଭିଯୁକ୍ତ ଜଣଙ୍କ ଗିରଫ ହୋଇ ଜେଲ ଯାଇଛନ୍ତି। ଉକ୍ତ ଘଟଣା ଖୋର୍ଦ୍ଧା ଜିଲ୍ଲା ବାଣପୁରରେ ଆଲୋଚନାର ବିଷୟ ପାଲଟିଛି।

ସୂଚନା ମୁତାବକ ଦୀପକ ମାଝୀ ନାମକ ଯୁବକ ଇନଷ୍ଟାଗ୍ରାମରେ ଯୁବତୀ ଭାବି ଜଗତସିଂହପୁର ଚାରିବାଟିଆ ଅଞ୍ଚଳର କିନ୍ନର ନନ୍ଦିନୀ ନାଥଶର୍ମା ଓରଫ ରାହୁଲ ନାଥଙ୍କୁ ପ୍ରେମ କରି ବିବାହ କରିଥିଲେ। ନନ୍ଦିନୀଙ୍କ ଅଭିଯୋଗ କ୍ରମେ ବିବାହ ପରେ ଅଭିଯୁକ୍ତ ଦୀପକ ତାଙ୍କ ସହ ଶାରୀରିକ ସମ୍ପର୍କ ରଖିଥିବା ବେଳେ ନନ୍ଦିନୀଙ୍କ ଅଜାଣତରେ ତାଙ୍କର ଫୋଟୋ ଓ ଭିଡିଓ ମୋବାଇଲରେ ସାଇତି ରଖିଥିଲେ।

ଅଭିଯୁକ୍ତ ଦୀପକ ତାଙ୍କୁ ବ୍ଲାକମେଲ କରି ଉକ୍ତ ଫୋଟୋ ଓ ଭିଡ଼ିଓ ସାର୍ବଜନୀନ କରିବାକୁ ଧମକ ଦେଇ ବାରମ୍ବାର ଟଙ୍କା ଦାବୀ କରୁଥିଲେ। ନନ୍ଦିନୀ ଟଙ୍କା ନ ଦେବାରୁ ଶେଷରେ ଦୀପକ ସାଇତି ରଖିଥିବା ଅଶ୍ଳୀଳ ଫୋଟୋ ଓ ଭିଡିଓକୁ ନନ୍ଦିନୀଙ୍କ ଭାଇ ଓ ସମ୍ପର୍କୀୟଙ୍କ ପାଖକୁ ପଠାଇଥିଲେ।

ଉକ୍ତ ଘଟଣାକୁ ନେଇ ନନ୍ଦିନୀ ବାଣପୁର ଥାନାରେ ଏକ ମୋକଦମା ଦାୟର କରିଥିଲେ। ଆଜି ବାଣପୁର ପୋଲିସ ଅଭିଯୁକ୍ତ ଦୀପକଙ୍କ ବିରୁଦ୍ଧରେ ୩୭୦/୨୩ରେ ଏକ ମାମଲା ରୁଜୁ କରି କୋର୍ଟ ଚାଲାଣ କରିଛି। କୋର୍ଟରେ ଜାମିନ ନାମଞ୍ଜୁର ହେବାରୁ ଦୀପକଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି।

ସୀତାରାମ ଅଗ୍ରୱାଲ

ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ଅଞ୍ଚଳର ଜନୈକ ନାବାଳିକାଙ୍କୁ ଅପହରଣ ଓ ଦୁଷ୍କର୍ମ ଅଭିଯୋଗରେ ଅଭିଯୁକ୍ତଙ୍କୁ ଗିରଫ କରିଛି ପୋଲିସ।

ପୋଲିସ ସୂଚନା ମୁତାବକ ବାଣପୁର ଥାନା ଅନ୍ତର୍ଗତ ଦାଶରଥୀପୁର ଗ୍ରାମର ଅଭିଯୁକ୍ତ ରାଜା ନାୟକ (୧୯) ସମ୍ପୃକ୍ତ ନାବାଳିକାଙ୍କୁ ଅପହରଣ କରି ନେଇଥିବା ତାଙ୍କ ପିତା ଥାନାରେ ଅଭିଯୋଗ କରିଥିଲେ। ଏହି ପରିପ୍ରେକ୍ଷୀରେ ପୋଲିସ ୩୨୨/୨୩ ରେ ଏକ ମାମଲା ରୁଜୁ କରି ତଦନ୍ତ ଜାରି ରଖିଥିଲା।

ତେବେ ଆଜି କୌଣସି ସୂତ୍ରରୁ କେଶପୁର ଗ୍ରାମରେ ଅଭିଯୁକ୍ତଙ୍କ ସମ୍ପର୍କୀୟଙ୍କ ଘରେ ଉଭୟ ଉପସ୍ଥିତ ଥିବା ଖବର ପାଇ ପୋଲିସ ସେଠାରେ ଚଢ଼ାଉ କରିଥିଲା।  ନାବାଳିକାଙ୍କୁ ଉଦ୍ଧାର କରିବା ସହ ଅଭିଯୁକ୍ତକୁ ପୋଲିସ ଗିରଫ କରିଥିଲା।

ତେବେ ନାବାଳିକାଙ୍କ ବୟାନ ଅନୁଯାୟୀ ପୋଲିସ ଅଭିଯୁକ୍ତଙ୍କ ବିରୁଦ୍ଧରେ ଅପହରଣ ସମେତ ଦୁଷ୍କର୍ମ ଦଫା ମଧ୍ୟ ଲଗାଇଛି। ଆଜି ନାବାଳିକାଙ୍କ ଡାକ୍ତରମାଇନା କରାଯାଇ ଖୋର୍ଦ୍ଧା ସ୍ଵଧାର ଗୃହକୁ ପୋଲିସ ହସ୍ତାନ୍ତର କରିଥିବା ବେଳେ ଅଭିଯୁକ୍ତକୁ ଆସନ୍ତା କାଲି ଭୁବନେଶ୍ୱର ପୋକସୋ କୋର୍ଟ ଚାଲାଣ କରାଯିବ ବୋଲି ଜଣାପଡିଛି।

ସୀତାରାମ ଅଗ୍ରୱାଲ
ବାଣପୁର: ସୋମବାର ବିଳମ୍ବିତ ରାତ୍ରିରେ ବାଣପୁରର ଜଣେ ୧୩ ବର୍ଷର ବାଳକକୁ ତଣ୍ଟିଚିପି ହତ୍ୟା ଉଦ୍ୟମ କରିବା ଫଳରେ ଦୁଇ ମହିଳାଙ୍କୁ ଗିରଫ କରି କୋର୍ଟ ସ୍ଥାନାନ୍ତର କରିଛି ବାଣପୁର ପୋଲିସ। ଖବରରୁ ପ୍ରକାଶ ଗୁରବାରି ନାୟକଙ୍କ ଘର ଦାଣ୍ଡ ଦୁଆରକୁ ପାଣ୍ଡୀ ନାୟକ ଓ ମିନତୀ ନାୟକ ନାମକ ଦୁଇଜଣ ମହିଳା ଆସିଥିଲେ। ସେମାନେ ଗୁରବାରିଙ୍କ କବାଟ ଭାଙ୍ଗି ଘର ଭିତରେ ପଶିଥିଲେ। ଏବଂ ବିଭିନ୍ନ ଅଶ୍ରାବ୍ୟ ଭାଷାରେ ଗାଳି ଗୁଲଜ କରି ଗୁରୁବାରୀଙ୍କୁ ମାଡ଼ପିଟ କରିଥିଲେ। ଗୁରୁବାରୀଙ୍କ ୧୩ ବର୍ଷର ନାବାଳକ ପୁଅ ଆସିଯିବାରୁ ପାଣ୍ଡୀ ଓ ମିନତୀ ଜୀବନରେ ମାରିଦେବାର ଉଦ୍ଦେଶ୍ୟ ରଖି ତାର ତଣ୍ଟିକୁ ଚିପି ଦେଇଥିଲେ। କିନ୍ତୁ ସୌଭାଗ୍ୟବଶତଃ ସେ ସେଠାରୁ ଖସି ପଳାଇଯିବାର ସକ୍ଷମ ହୋଇଥିଲା।

ଉପରୋକ୍ତ ମହିଳା ଦୁଇଜଣ ଗ୍ରାମର ଲତା ନାୟକଙ୍କ ଘରକୁ ଯାଇ ଲତା ଓ ତାଙ୍କ ଝିଅକୁ ମଧ୍ୟ ଆକ୍ରମଣ କରିଥିଲେ। ଗୁରୁବାରୀ ଉକ୍ତ ଘଟଣାକୁ ନେଇ ଥାନାର ଦ୍ଵାରସ୍ଥ ହେଲାପରେ ବାଣପୁର ଥାନା ଅଧିକାରୀ ଜୟ ପ୍ରକାଶ ପରିଡା ପାଣ୍ଡୀ ଓ ମିନତୀଙ୍କୁ ମଙ୍ଗଳବାର ଗିରଫ କରି ୩୦୭ ଦଫାରେ କୋର୍ଟ ଚାଲାଣ କରିଥିଲେ। କୋର୍ଟ ଦୁଇ ମହିଳାଙ୍କର ଜାମିନ ନାମଂଜୁର କରି ଜେଲକୁ ପଠାଇଦେଇଥିବା ଜଣାଯାଇଛି।

ପ୍ରକାଶ ଥାଉ କି ଥାନା ଅଧିକାରୀଙ୍କ ଏତାଦୃଶ କାର୍ଯ୍ୟକୁ ସାଧାରଣରେ ପ୍ରଂଶସା କରାଯାଇଛି।

କଟକ: ଖୋର୍ଦ୍ଧା ଜିଲ୍ଲା ବାଣପୁର ଥାନା ପ୍ରତାପ ଗ୍ରାମର ଏକ ପରିବାରକୁ ବାସନ୍ଦ କରାଯାଇଥିବା ମାମଲାରେ ଉପଯୁକ୍ତ ତଦନ୍ତ କରିବାକୁ ହାଇକୋର୍ଟ ପୁଲିସକୁ ନିର୍ଦ୍ଦେଶ ଦେଇଛନ୍ତି। ପୁଲିସର ନିଷ୍କ୍ରିୟତା ବିରୋଧରେ ଆଗତ ମାମଲାରେ ବାଣପୁର ଥାନା ଆଇଆଇସିଙ୍କୁ ବିଚାରପତି ଏସ୍‌. କେ. ପାଣିଗ୍ରାହୀ ଏହି ନିର୍ଦ୍ଦେଶ ଦେବା ସହିତ ମାମଲାର ଅନ୍ତ ଘଟାଇଛନ୍ତି।

ମାମଲାର ବିବରଣୀରୁ ପ୍ରକାଶ ଯେ, ପ୍ରତାପ ଗ୍ରାମର ବାସନ୍ତୀ ବେହେରାଙ୍କୁ କେତେକ ବ୍ୟକ୍ତି ଗ୍ରାମରୁ ବାସନ୍ଦ କରିଥିବା ନେଇ ସେ ବାଣପୁର ଥାନାରେ ଅଭିଯୋଗ କରିଥିଲେ। ପୂର୍ବରୁ ହାଇକୋର୍ଟରେ ଅପରପକ୍ଷଙ୍କ ବିରୋଧରେ ବାସନ୍ତୀ କରିଥିବା ମାମଲା ବିଚାରାଧୀନ ରହିଥିଲାବେଳେ ଅପରପକ୍ଷ କେସ୍ ଉଠାଇନେବାକୁ ବାସନ୍ତୀଙ୍କ ସ୍ୱାମୀଙ୍କୁ କହିବା ସହ କେସ୍ ନ ଉଠାଇଲେ ଜୀବନରୁ ମାରିଦେବାକୁ ଧମକ ଦେଇଥିଲେ। କଙ୍ଗାରୁ କୋର୍ଟ କରି ସେମାନଙ୍କ ଉପରେ ମୋଟା ଅଙ୍କର ଜୋରିମାନା କରି ଗ୍ରାମରୁ ବାସନ୍ଦ କରିଥିଲେ। ଗ୍ରାମର ଲୋକମାନେ କେହି ତାଙ୍କ ପରିବାରକୁ ସହଯୋଗ ନ କରିବାକୁ ନିଷ୍ପତ୍ତି ନେଇଥିଲେ।

ବାସନ୍ତୀଙ୍କ ପକ୍ଷରୁ ବାଣପୁର ଥାନାରେ ଏନେଇ ଅଭିଯୋଗ ହୋଇଥିଲା। ମାତ୍ର ପୁଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିଲା। ଫଳରେ ସେ ପୁନର୍ବାର ହାଇକୋର୍ଟଙ୍କ ଦ୍ୱାରସ୍ଥ ହୋଇ ବାଣପୁର ଥାନା ଆଇଆଇସିଙ୍କୁ ଘଟଣାର ତଦନ୍ତ କରି ଅଭିଯୁକ୍ତମାନଙ୍କୁ ଗିରଫ ନିମନ୍ତେ ନିର୍ଦ୍ଦେଶ ଦେବାକୁ ପ୍ରାର୍ଥନା କରିଥିଲେ। ଆବେଦନକାରୀଙ୍କ ପକ୍ଷରୁ ଆଇନଜୀବୀ ଜୟଦେବ ବେହେରା ମାମଲା ପରିଚାଳନା କରୁଥିଲେ।