Tag: ବାଣପୁର

ସୀତାରାମ ଅଗ୍ରଓ୍ବାଲ

ବାଣପୁର :  ଖୋର୍ଦ୍ଧା ଜିଲ୍ଲା ବାଣପୁର ବ୍ଲକରେ ଦେଖାଦେଇଛି ସରକାରୀ କର୍ମଚାରୀଙ୍କ ଘୋର ଅଭାବ । ବ୍ଲକ କାର୍ଯ୍ୟାଳୟରେ ବହୁ ବିଭାଗୀୟ ପଦବୀଗୁଡ଼ିକ  ଖାଲିପଡିଥିବା ବେଳେ କେତେଗୋଟି ବିଭାଗରେ ଭାରପ୍ରାପ୍ତ ଅଧିକାରୀ ମାନେ କାମ ଚଳାଉଛନ୍ତି।ଯାହାଫଳରେ ଜନସାଧାରଣ ମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବାବେଳେ ଅପରପକ୍ଷରେ  ବ୍ଲକରେ ଉନ୍ନୟନ କାର୍ଯ୍ୟ ମଧ୍ୟ ଶିଥିଳ ହେଉଛି। ମିଳିଥିବା ସୂଚନା ଅନୁଯାୟୀ ବାଣପୁର ବ୍ଲକରେ ବି.ଡ଼ି.ଓ ଙ୍କୁ ମିଶାଇ ସମୁଦାୟ  ୨୩ ଗୋଟି ବିଭାଗରେ ୬୪ ଜଣ  ଅଧିକାରୀଙ୍କ ପଦବୀ  ସରକାରଙ୍କ ଦ୍ୱାରା ମଞ୍ଜୁରୀପ୍ରାପ୍ତ ହୋଇଥିବାସ୍ଥଳେ ବର୍ତମାନ ବ୍ଲକରେ ମାତ୍ର ୪୧ ଜଣ ଅଧିକାରୀ ବ୍ଲକ ର  ବିଭିନ୍ନ ବିଭାଗ ରେ କାର୍ଯ୍ୟକରୁଛନ୍ତି  ଏବଂ ୨୩ ଗୋଟି କର୍ମଚାରୀଙ୍କ ପଦବୀ ଖାଲିପଡ଼ିଛି ଯାହା ବ୍ଲକ ର ମଞ୍ଜୁରୀପ୍ରାପ୍ତ ପଦଵୀ ର ପାଖାପାଖି ୪୦ ପ୍ରତିଶତ ହେବ । ତେବେ ବ୍ଲକରେ ଖାଲି ପଡିଥିବା ବିଭିନ୍ନ ପଦବୀଗୁଡିକ ନିମ୍ନରେ ପ୍ରଦତ୍ତ।

ଖାଲି ପଡିଥିବା ପଦବୀ ସଂଖ୍ୟା, ଜାଣନ୍ତୁ କେଉଁ ବିଭାଗରେ କେତୋଟି ପୋଷ୍ଟ ଖାଲି ରହିଛି :

ହିସାବ ଅଧିକାରୀ- ୧

ସହକାରୀ ନିର୍ବାହୀ ଯନ୍ତ୍ରୀ -୧

କନିଷ୍ଠ ଯନ୍ତ୍ରୀ – ୧ ପୋଷ୍ଟ ( ୫ ଟି ପୋଷ୍ଟ ରୁ  )

ସେକ୍ସନ ଅଧିକାରୀ -୧ ପୋଷ୍ଟ

ଏସ. ଆର. ଏ – ୧ ପୋଷ୍ଟ (୨ ଟି ପୋଷ୍ଟ  ରୁ)

ଜେ.ଆର. ଏ – ୧ ପୋଷ୍ଟ

ଡବ୍ଲୁ.ଇ.ଓ – ୧ ପୋଷ୍ଟ

ଜି.ପି.ଇ.ଓ – ୧ ପୋଷ୍ଟ

ଯୋଗାଣ ନିରୀକ୍ଷକ – ୧ ପୋଷ୍ଟ

ପି.ଇ.ଓ – ୯ ଟି ପୋଷ୍ଟ (୧୭ ଟି ପୋଷ୍ଟ ରୁ)

ଜି.ଆର.ଏସ – ୨ ଟି ପୋଷ୍ଟ  (୧୭ ଟି ପୋଷ୍ଟ ରୁ)

ପିଅନ – ୩ ଗୋଟି (୫ ଟି ପୋଷ୍ଟ ରୁ)

ତେବେ ଉକ୍ତ ଖାଲି ଥିବା ପଦବୀମଧ୍ୟରେ ତିନି ଗୋଟି ପଦବୀ ଯଥା ସହକାରୀ ନିର୍ବାହୀ ଯନ୍ତ୍ରୀ, ସେକ୍ସନ ଅଧିକାରୀ ଏବଂ ଯୋଗାଣ ନିରୀକ୍ଷକଙ୍କ କାର୍ଯ୍ୟ ଡେପୁଟେସନ ରେ ଆସିଥିବା ଭାରପ୍ରାପ୍ତ ଅଧିକାରୀ ମାନେ କରୁଥିବାବେଳେ ସହକାରୀ ଯନ୍ତ୍ରୀ ଏବଂ ବି.ଏସ.ଏସ.ଓ ଙ୍କ ନିକଟରେ  ଟ୍ରାନ୍ସଫର ହୋଇଯାଇଛି l ବାଣପୁର ବ୍ଲକ ଖୋର୍ଦ୍ଧା ଜିଲ୍ଲାର ଏକ ଗୁରୁତ୍ୱପୂର୍ଣ୍ଣ ବ୍ଲକ ରୂପେ ପରିଗଣିତ ହେଉଥିବାବେଳେ ଏହା ଅଧୀନରେ ସତର ଗୋଟି ପଞ୍ଚାୟତ ଅଛି ଯାହାର ଜନସଂଖ୍ୟା ପାଖାପାଖି ଦେଢ଼ ଲକ୍ଷରୁ ଅଧିକ ହେବ । ଯେହେତୁ ବ୍ଲକର ବହୁ ଗୁରୁତ୍ୱପୂର୍ଣ ପଦବୀଗୁଡ଼ିକ ଖାଲି ପଡ଼ିଛି ସରକାରଙ୍କ ଦ୍ୱାରା ଲାଗୁ ହୋଇଥିବା ବିଭିନ୍ନ ଜନମଙ୍ଗଳକାରି  ଯୋଜନା ଗୁଡିକର ସଫଳ ରୂପାୟନ ହେବାକୁ ଅହେତୁକ ବିଳମ୍ବ ହେଉଛି ଏବଂ ବ୍ଲକ ର ଉନ୍ନୟନମୂଳକ କାର୍ଯ୍ୟ ଏକପ୍ରକାର ଠପ ହେଉଯାଉଛି ଫଳରେ ଜନଅସନ୍ତୋଷ ବଢୁଛି ।

ତେବେ ଏ ବିଷୟ  ନେଇ ଆମ ପ୍ରତିନିଧି ଖୋର୍ଦ୍ଧା ଜିଲ୍ଳା ଗ୍ରାମ୍ୟ ଉନ୍ନୟନ ସଂସ୍ଥାର ପ୍ରକଳ୍ପ ନିର୍ଦେଶକ  ଶ୍ରୀ ଦିଗନ୍ତ ରାଉତରାୟ ଙ୍କୁ ପଚାରିବାରୁ ସେ ଏହି ସମସ୍ୟା ବିଷୟରେ ଅବଗତ ଅଛନ୍ତି ଏବଂ ଗତକାଲି ଖୋର୍ଦ୍ଧା ଜିଲ୍ଲାପାଳ  ଜିଲ୍ଲାର ସମସ୍ତ  ବି.ଡ଼ି.ଓ ମାନଙ୍କୁ ସେମାନଙ୍କ ବ୍ଲକ ପାଇଁ ମଞ୍ଜୁରୀ ହୋଇଥିବା କର୍ମଚାରୀ ଙ୍କ ସଂଖ୍ୟା ଏବଂ ବର୍ତ୍ତମାନ ଖାଲି ପଡ଼ିଥିବା କର୍ମଚାରୀ ଙ୍କ ସଂଖ୍ୟାର ବିସ୍ତୃତ ରିପୋର୍ଟ ମଗେଇଥିବାର ସୂଚନା ଦେଇଛନ୍ତି । ହେଲେ ବାଣପୁର ବ୍ଲକ ବି.ଡ଼ି.ଓ ଗତକାଲିଠାରୁ ରିପୋର୍ଟ ପଠେଇଦେଇଥିବାସ୍ଥଳେ  ଅନ୍ୟ ବ୍ଲକର ରିପୋର୍ଟ ଆସିଲାପରେ ଆବଶ୍ୟକତା ସଂଖ୍ୟା ଅନୁଯାୟୀ ଜିଲ୍ଲାରେ ବିଭିନ୍ନ ବିଭାଗ ପାଈଁ  ଉପଲବ୍ଧ ଥିବା ଅଧିକାରୀଙ୍କୁ ବିଭିନ୍ନ ବ୍ଲକ ରେ ନିଯୁକ୍ତି ଦିଆଯିବ ଏବଂ ଯଦି କେଉଁ ବିଭାଗରେ ବିଭିନ୍ନ ବ୍ଲକରେ ନିଯୁକ୍ତି ଦେବା ପାଇଁ  ଜିଲ୍ଲାରେ ଉପଲବ୍ଧ ଥିବା ଅଧିକାରୀ କମ ପଡନ୍ତି ତେବେ ଜିଲ୍ଲାପାଳ ସିଧାସଳଖ ସମ୍ପୃକ୍ତ ବିଭାଗକୁ ବିଭିନ୍ନ ବ୍ଲକ ରେ ଅଧିକାରୀ ମାନଙ୍କୁ ନିଯୁକ୍ତି କରିବା ପାଇଁ ପତ୍ର ଲେଖିବେ ବୋଲି ଶ୍ରୀ ରାଉତ କହିଛନ୍ତି । ହେଲେ ପ୍ରାଥମିକତା ଦୃଷ୍ଟିରୁ ଆସନ୍ତା  ଦୁଇ ଦିନ ମଧ୍ୟରେ ବାଣପୁର ବ୍ଲକରେ ନୂତନ ଯୋଗାଣ ନିରୀକ୍ଷକ ଯୋଗଦେବେ ବୋଲି ଜଣାପଡିଛି ।

ସୀତାରାମ ଅଗ୍ରୱାଲ

ବାଣପୁର: ଦେଶରେ ନୂତନ କୃଷି ବିଲ୍‌କୁ ନେଇ ସାରା ଭାରତ ବର୍ଷରେ ବିରୋଧ ଚାଲିଥିବାବେଳେ ବାଣପୁର ଅଞ୍ଚଳରେ ସାର କଳାବଜାରୀକୁ ନେଇ ଶହ ଶହ ଚାଷୀ ଅନଶନ କରିଥିବାର ଦେଖିବାକୁ ମିଳିଛି। ଚାଷୀଙ୍କୁ ରାସାୟନିକ ସାର ମିଳୁନଥିବାରୁ ଚାଷୀଙ୍କ ଦ୍ଵାରା ତୀବ୍ର ଅସନ୍ତୋଷ ଦେଖାଯାଇଛି। ଏନେଇ ବାଣପୁରର ତିନିଶହରୁ ଅଧିକ ଚାଷୀ ରାସ୍ତା ଅବରୋଧ କରିବା ସହ ବାଣପୁର ଖୋର୍ଦ୍ଧା ସମବାୟ ସମିତି ଆଗରେ ପ୍ରତିବାଦ କରୁଛନ୍ତି। ଉକ୍ତ ପ୍ରତିବାଦରେ ବ୍ଲକ କୃଷି ଅଧିକାରୀ ଅଜୟ କୁମାର କରଙ୍କ ଉପରେ ଅଭିଯୋଗ ଆଣିଛନ୍ତି।

ଚାଷୀଙ୍କ ଅଭିଯୋଗ ଅନୁଯାୟୀ, ସାର ମିଳିବା ନେଇ ସମ୍ପୃକ୍ତ କୃଷି ଅଧିକାରୀ ଜଣକ ଚାଷୀଙ୍କ ପ୍ରତିଶ୍ରୁତି ଦେଉଥିବାବେଳେ ତାହା ମିଳିପାରୁନାହିଁ। କ୍ରମାଗତ ପାଞ୍ଚ ଦିନ ହେବ ଚାଷୀମାନେ ସୋସାଇଟିକୁ ଆସି ସାର ନ ପାଇ ଫେରି ଯାଉଛନ୍ତି। କୃଷି ଅଧିକାରୀ ଓ ଡିଲର୍‌ଙ୍କ ମଧୁଚନ୍ଦ୍ରିକା ଯୋଗୁଁ ଚାଷୀମାନେ ସାର ପାଇବାରୁ ବଞ୍ଚିତ ହେଉଛନ୍ତି। ଏପରିକି ଊଭୟ କୃଷି ଅଧିକାରୀ ଓ ଡିଲରଙ୍କ ଯୋଗୁଁ ବ୍ଲକରେ ସାରର କଳାବଜାରୀ ପ୍ରଭୁତ୍ବ ପରିମାଣରେ ହେଉଛି ବୋଲି ଚାଷୀମାନେ ଅଭିଯୋଗ କରିଛନ୍ତି। ୨୬୬ ଟଙ୍କାର ସାରକୁ ଚଢା ଦରରେ ବିକ୍ରି ହେଉଥିବାର ଅଭିଯୋଗ ହୋଇଛି। ଏପରିକି ସାର ବସ୍ତା‌ ପିଛା ୬୦୦ଟଙ୍କା ଉର୍ଦ୍ଧ୍ବରେ ବିକ୍ରି ହେଉଛି। ସାରର କଳାବାଜରୀକୁ ରୋକିବା ତଥା ସୁଲଭ ମୂଲ୍ୟରେ ଚାଷୀଙ୍କ ସାର ମିଳିବା ନେଇ ଚାଷୀମାନେ ଦାବି ଜଣାଇଛନ୍ତି। ଧାରଣାରେ ବସିଥିବା ଚାଷୀଙ୍କୁ ପୋଲିସ ବୁଝାସୁଝା ପରେ ପରିସ୍ଥିତି ସାମାନ୍ୟ ହୋଇଥିଲା। ପରେ ତହସିଲଦାରଙ୍କ ନିକଟରେ ଚାଷୀମାନେ ଦାବୀ ପତ୍ର ପ୍ରଦାନ କରିବା ସହିତ ଆଗାମୀ ଦିନରେ ଏହି ସମସ୍ୟାର ସମାଧାନ ନ ହେଲେ ଆନ୍ଦୋଳନ ଉଗ୍ର ରୂପ ନେବ ବୋଲି ଧମକ ଦେଇଛନ୍ତି।

ତେବେ ଏନେଇ କୃଷି ଅଧିକାରୀ ଅଜୟ କୁମାର କରଙ୍କ ପ୍ରତିକ୍ରିୟା ନେବା ପାଇଁ ଚେଷ୍ଟା କରାଯାଇଥିଲେ ମଧ୍ୟ ତାହା ସମ୍ଭବ ହୋଇପାରି ନାହିଁ।

ଏହିପରି ସମସ୍ୟା ବାଣପୁର ବ୍ଲକର ଅଧିକାଂଶ ସୋସାଇଟିରେ ଦେଖିବାକୁ ମିଳିଛି। ଗତକାଲି କୁମାରାଙ୍ଗ ପଂଚାୟତରେ ଶହେରୁ ଅଧିକ ଚାଷୀ ଅସନ୍ତୋଷ ବ୍ୟକ୍ତ କରିଥିଲେ। ସୋସାଇଟି ସେକ୍ରେଟାରୀଙ୍କ ପକ୍ଷରୁ ସାର ନେବା ପାଇଁ ସେମାନଙ୍କୁ ଖବର ଦିଆଯାଉଥିଲେ ମଧ୍ୟ ସାର ମିଳିପାରୁନି। ଘଣ୍ଟା ଘଣ୍ଟା ଧରି ଚାଷୀ ଅପେକ୍ଷା କରି ରହିଥିବାର ଦେଖିବାକୁ ମିଳିଥିଲା।

ସୀତାରାମ ଅଗ୍ରଓ୍ବାଲ

ବାଣପୁର : ବାଣପୁର ପୋଲିସ ଗତ ଦୁଇ ଦିନ ମଧ୍ୟରେ ବାଣପୁର ଥାନା ଅନ୍ତର୍ଗତ ବିଭିନ୍ନ ଜାଗାରେ ଚଢ଼ାଉ କରି ୨୯୦ ଲିଟର ଦେଶୀ ମଦ  ଜବତ ସହ ପାଞ୍ଚ ଜଣଙ୍କୁ ଗିରଫ କରିଛି। ମିଳିଥିବା ସୂଚନା ଅନୁଯାୟୀ ଲକ ଡ଼ାଉନ ଉଠିବାପରେ ଦେଶୀ ଚୋରା ମଦ ବେପାରୀମାନେ ଖୁଲମଖୁଲା ମଦ ବିକୁଥିବାର ଅଭିଯୋଗ ପାଇଥଲା ବାଣପୁର ପୋଲିସ। ଆଇ.ଆଇ.ସି ସଞ୍ଜୟ ପଟ୍ଟନାୟକଙ୍କ ନିର୍ଦେଶ କ୍ରମେ ଏସ.ଆଇ ପ୍ରସନ୍ନ ଜେନା ଏବଂ ଏସ.ଆଇ ରାଜକିଶୋର ବେହେରା ଦୁଇ ଗୋଟି ଟିମ ନେଇ ଗତ ଦୁଇ ଦିନ ହେଲା ବାଣପୁରର କୋଷରଡା, ସାନ ହନ୍ତୁଆଡ଼, ପୋଡା ସାହି ଆଦି  ବିଭିନ୍ନ ଅଞ୍ଚଳରେ ଦିନ ରାତି ଚଢ଼ାଉ ଜାରି ରଖିଥିଲେ। ଉକ୍ତ ଦୁଇ ଦିନ ମଧ୍ୟରେ ୫ ଜଣ ଚୋରା ଦେଶୀ ମଦ ବେପାରୀଙ୍କୁ ଗିରଫ କରିବା ସହ ସମସ୍ତଙ୍କ ଠାରୁ ସର୍ବମୋଟ ୨୯୦ ଲିଟର ଦେଶୀ ମଦ ଜବତ କରିଛି ବାଣପୁର ପୋଲିସ। ସମସ୍ତ ପାଞ୍ଚ  ଅଭିଯୁକ୍ତଙ୍କ ନାମରେ କେସ ନମ୍ବର ୨୮୩, ୨୮୪, ୨୮୫, ୨୮୬ ଏବଂ ୨୮୭ ରେ ମାମଲା ରୁଜୁକରି ଆଜି କୋର୍ଟ ଚାଲାଣ କରାଯାଇଅଛି।

ସୀତାରାମ ଅଗ୍ରଓ୍ବାଲ

ବାଣପୁର: ବାଣପୁର ବ୍ଲକ ସାମ୍ନାରେ ପ୍ରଶାସନ ତରଫରୁ ନିର୍ମାଣଧୀନ ଏକ ପାଚେରୀକୁ ନେଇ ବିବାଦ ସୃଷ୍ଟି ହୋଇଛି। ଗତ ଦୁଇ ଦିନ ତଳେ ବାଣପୁର ବ୍ଲକ ପ୍ରଶାସନ ତରଫରୁ ପାଚେରୀ ନିର୍ମାଣ କାର୍ଯ୍ୟ ଆରମ୍ଭ ହୋଇଥିବାବେଳେ ଏହାକୁ ନେଇ ସ୍ଥାନୀୟ ଜନସାଧାରଣ ବିରୋଧ କରିବା ଆରମ୍ଭ କରିଛନ୍ତି।

ବ୍ଲକ୍‌ ପ୍ରଶାସନ ତରଫରୁ ନିର୍ମାଣ ହେଉଥିବା ପାଚେରୀ ଯାଗାର କିଛି ଅଂଶ  ଐତିହ୍ୟସମ୍ପନ୍ନ ପଞ୍ଚୁଦୋଳ ଯାତ୍ରାରେ ବ୍ୟବହୃତ ହୋଇଥାଏ। ସେହି ରାସ୍ତାଟା ଓସାରିଆ ହୋଇଥିବାରୁ ବହୁ ସଂଖ୍ୟକ ଲୋକେ ସେହି ବାଟ ଦେଇ ଯିବାଆସିବା କରିଥାନ୍ତି। ଅପରପକ୍ଷରେ ଏହି ଅଞ୍ଚଳର ଏକ ପ୍ରମୁଖ ଗ୍ରାମ ଭୀମପୁରର ସମେତ ଆଉ ଅନେକ ଗ୍ରାମବାସୀମାନେ ଏହି ରାସ୍ତାରେ ନିର୍ଭରଶୀଳ ରହିଥିବା ସ୍ଥଳେ ବ୍ଲକ ପ୍ରଶାସନ ରାସ୍ତା କଡ଼ରେ  ପାଚେରୀ ଉଠାଇବା ପାଇଁ ପ୍ରୟାସ କରିଛି। ସାଧାରଣ ଯାତାୟତ ପାଇଁ ରାସ୍ତାକୁ ପ୍ରଶସ୍ତିକରଣ କରାଯାଉଥିବାବେଳେ ବାଣପୁର ବ୍ଲକ ପ୍ରଶାସନର ପ୍ରାଚୀର ନିର୍ମାଣ ଏହି ରାସ୍ତାକୁ ସଂକୁଚିତ କରିଦେବ  ଯାହାକୁ ନେଇ ଗ୍ରାମବାସୀମାନେ ଅସନ୍ତୋଷ ପ୍ରକଟ କରିଛନ୍ତି।

ଗତକାଲି ଏହି ପାଚେରୀ ନିର୍ମାଣ କାର୍ଯ୍ୟକୁ ନେଇ ବହୁ  ଲୋକେ ଘଟଣାସ୍ଥଳରେ ପ୍ରତିବାଦ କରିବା ସହ ଏହି କାର୍ଯ୍ୟ ତୁରନ୍ତ ବନ୍ଦ ନ ହେଲେ ଆଗାମୀ ଦିନରେ ପରିସ୍ଥିତି ଭୟାବହ ହେବ ବୋଲି ବ୍ଲକ ପ୍ରଶାସନକୁ ଚେତାବନୀ ଦେଇଛନ୍ତି।

ଅପରପକ୍ଷରେ ଏହି ରାସ୍ତା କାର୍ଯ୍ୟକୁ ବିରୋଧ କରୁଥିବାର କିଛି ଲୋକେ ସ୍ଥାନୀୟ ବିଧାୟକଙ୍କୁ ଭେଟିଥିଲେ। ବିଧାୟକ ଏହି ପ୍ରସଙ୍ଗରେ କହିଛନ୍ତି ଯେ, ବ୍ଲକ ପ୍ରଶାସନର ସୁରକ୍ଷା ପାଇଁ ଏହି ପାଚେରୀ ନିର୍ମାଣ ହେଉ। ତେବେ ଏହି ପାଚେରୀଟି ଅସ୍ଥାୟୀ ରୂପେ କରାଯାଉଛି ଏବଂ ପଞ୍ଚୁ ଦୋଳ ସମୟରେ  ଯାତାୟାତ ସମସ୍ୟା ଉପୁଜିଲେ ଏହା ପ୍ରତି ଦୃଷ୍ଟି ଦିଆଯିବା  ସହ ଏହି ପାଚେରୀ ନିର୍ମାଣରେ ରାସ୍ତା ଯେପରି ସଂକୁଚିତ ନ ହୁଏ, ସେଥିପ୍ରତି ମଧ୍ୟ ଧ୍ୟାନ ଦିଆଯିବ ବୋଲି ବିଧାୟକ ସୂଚନା ଦେଇଛନ୍ତି।

ରାସ୍ତାରେ ପାଚେରୀ ନିର୍ମାଣ କାର୍ଯ୍ୟ ଆରମ୍ଭ ପୂର୍ବରୁ ସମ୍ପୃକ୍ତ ଗ୍ରାମବାସୀ ତଥା ପଞ୍ଚୁଦୋଳ କମିଟି ସହ ବ୍ଲକ ପ୍ରଶାସନ ବୈଠକ ନକରି ଏପରି ନିଷ୍ପତ୍ତି ନେବା କେତେଦୂର ଯୁକ୍ତିଯୁକ୍ତ ବୋଲି ସ୍ଥାନୀୟବାସୀ ଅଭିଯୋଗ  କରିଛନ୍ତି। ତେବେ ଯାହାବି ହେଉ ସମୂହ ଜନତାଙ୍କ ସ୍ବାର୍ଥକୁ ଦୃଷ୍ଟିରେ ରଖି ବାଣପୁର ବ୍ଲକ ପ୍ରଶାସନ ଉତ୍ତମ ପଦକ୍ଷେପ ନେବ ବୋଲି ଆଶା କରାଯାଉଛି।

ସୀତାରାମ ଅଗ୍ରଓ୍ବାଲ

ବାଣପୁର : ଖୋର୍ଦ୍ଧା ଜିଲ୍ଲା ବାଣପୁର ସହରାଞ୍ଚଳ ଏବଂ ଗ୍ରାମାଞ୍ଚଳ ରେ ଦିନକୁ ଦିନ କରୋନା ସଂକ୍ରମଣ ବଢ଼ୁଥିବାରୁ ଏହାକୁ ବ୍ରେକ ଦେବା ପାଇଁ ବାଣପୁର ପ୍ରଶାସନ କେତେ ଗୋଟି କଡ଼ା ନିଷ୍ପତ୍ତି ନେଇଛି । ନିକଟରେ ନୂତନ ଭାବେ ଯୋଗ ଦେଇଥିବା ବାଣପୁର ବି.ଡ଼ି.ଓ ତଥା କୋଭିଡ କମିଟି ଚେୟାରମ୍ୟାନ ଡ଼ାଃ ଶୁଭଶ୍ରୀ ତ୍ରିପାଠୀ ଗତକାଲି କରୋନା ମୁକାବିଲା ପାଇଁ ଏକ ଜରୁରୀ ବୈଠକ ଡାକିଥିଲେ ଯେଉଁଥିରେ ବାଣପୁର ଏନ.ଏ.ସି କାର୍ଯ୍ୟନିର୍ବାହୀ ଅଧିକାରୀ, ବାଣପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଅଧିକାରୀ ଉପସ୍ଥିତ ଥିବାବେଳେ ବାଣପୁର ତହସିଲଦାର, ବାଣପୁର ଥାନାଧିକାରୀ ଏବଂ ସି.ଡ଼ି.ପି.ଓ ବାଣପୁର ଟେଲିଫୋନ ମାଧ୍ୟମରେ ବୈଠକରେ ଭାଗ ନେଇଥିଲେ।

ଉକ୍ତ ବୈଠକରେ ବହୁ ଗୁରୁତ୍ୱପୂର୍ଣ ବିଷୟ ଉପରେ ଆଲୋଚନା ହୋଇଥିଲା ଏବଂ ସର୍ବସମ୍ମତି କ୍ରମେ  ବାଣପୁର ବ୍ଲକ ଏବଂ ଏନ.ଏ.ସି କୁ ଅଗଷ୍ଟ ୧୨ ରୁ ଅଗଷ୍ଟ ୧୮ ଯାଏଁ  ୭ ଦିନ ପାଇଁ ସମ୍ପୂର୍ଣ୍ଣ  ସଟ ଡ଼ାଉନ କରିବା ପାଇଁ ଖୋର୍ଦ୍ଧା ଜିଲ୍ଲାପାଳଙ୍କ ନିକଟକୁ ଅନୁମତି ପତ୍ର ପ୍ରେରଣ କରିଛନ୍ତି ବାଣପୁର ପ୍ରଶାସନ । ଏହି ସାତ ଦିନ ଭିତରେ ବ୍ଲକର ସମସ୍ତ ସୀମାକୁ ସିଲ କରାଯାଇ ରା଼ପୀଡ଼ ଟେଷ୍ଟିଙ୍ଗ, ସମ୍ପୂର୍ଣ୍ଣ ସାନିଟାଇଜେସନ(ବ୍ଲକ ଏବଂ ଏନ.ଏ.ସି ),  ଆର.ଆର.ଟି ସର୍ଭେ ଆଦି ଜୋରଦାର କରାଯିବା ସହ ଲକ୍ଷଣ ଥିବା ବ୍ୟକ୍ତିଙ୍କୁ ଚି଼ହ୍ନଟ କରି କୋଭିଡ କେୟାର ହୋମ କୁ ସ୍ଥାନାନ୍ତର କରିଯିବ ।

ଏହି ବ୍ୟତୀତ ବାଣପୁର ପ୍ରଶାସନ ଦ୍ୱାରା ଗତକାଲି ବାଣପୁର ବ୍ଲକ ଏବଂ ସହରାଞ୍ଚଳର ସମସ୍ତ ଔଷଧ ଦୋକାନୀମାନଙ୍କ ପାଇଁ ଏକ ନୋଟିସ ଜାରି କରାଯାଇଅଛି ଯେଉଁଥିରେ କୌଣସି ବ୍ୟକ୍ତି ଜ୍ୱର,ଥଣ୍ଡା, କାଶ, ନିଶ୍ୱାସ ପ୍ରଶ୍ୱାସରେ କଷ୍ଟ ପରି ଲକ୍ଷଣ ପାଇଁ ଔଷଧ କିଣିବାକୁ ଆସିଲେ ସମ୍ପୃକ୍ତ ଦୋକାନୀ ସେମାନଙ୍କ ନାମ, ଦୂରଭାଷ ନମ୍ବର ଏବଂ ଠିକଣା ଟିପି ରଖିବା ସହ ଡାକ୍ତରଙ୍କ ବିନା ପରାମର୍ଶରେ କୌଣସି ଔଷଧ ଦେବେନାହିଁ ଏବଂ ପ୍ରତ୍ୟେକ ଦିନର ବିବରଣୀ ଏକ ନିର୍ଦିଷ୍ଟ ରେଜିଷ୍ଟର ରେ ଲିପିବଦ୍ଧ କରି ଉପରୋକ୍ତ  ପ୍ରଶାସନିକ ଅଧିକାରୀ ମାନଙ୍କୁ ସୂଚିତ କରାଇବେ ଯେଉଁଥିରେ ବାଣପୁର ଥାନାଧିକାରୀ ଏବଂ ସି.ଡ଼ି.ପି.ଓ ଙ୍କୁ ବାଦ ଦିଆଯାଇଛି ବୋଲି ଉଲ୍ଲେଖ ଅଛି। ଯଦି କୌଣସି ଦୋକାନୀ ଏଥିରେ ଖିଲାପ କରନ୍ତି ତାହାଲେ ଓଡିଶା କୋଭିଡ ୧୯ ଅଧିନିୟମ ୨0୨0 ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ।

ଅପରପକ୍ଷେ ଗତକାଲି ବାଣପୁର ବି.ଡ଼ି.ଓ ବାଣପୁର ବ୍ଲକରେ କରୋନାକୁ ରୋକିବା ପାଇଁ ବ୍ଲକ ର ସମସ୍ତ ସରପଞ୍ଚ, ସମିତି ସଭ୍ୟ ଏବଂ ଗ୍ରାମପଞ୍ଚାୟତର ନିର୍ବାହୀ ଅଧିକାରୀଙ୍କ ନିମନ୍ତେ ଏକ ନିର୍ଦେଶନାମା ଜାରି କରିଛନ୍ତି ।

୧. ଚଳିତ ସପ୍ତାହ ଶନିବାର ଏବଂ ରବିବାର ସମସ୍ତ ଗ୍ରାମରେ ମାଇକ ଦ୍ୱାରା ବହୁଳ ପ୍ରଚାର ପ୍ରସାର ସକାଳ ୮ ରୁ ୧୧ ଏବଂ ଅପରାହ୍ନ ୩ ରୁ ୬ ଟା ମଧ୍ୟରେ କରେଇ ଲୋକଙ୍କୁ ସ୍ୱତଃ ପ୍ରବୃତ୍ତ ଭାବରେ ଥଣ୍ଡାଜ୍ୱର ଲକ୍ଷଣ ଥିଲେ ପ୍ରକାଶ କରିବାକୁ ଆବେଦନ କରାଯିବ।

୨. ପଞ୍ଚାୟତର ଗ୍ରାମ୍ୟସ୍ତରୀୟ କୋଭିଡ ମ୍ୟାନେଜମେଣ୍ଟ କମିଟି ସହ ଯୋଗାଯୋଗ ରଖି ପ୍ରତ୍ୟେକ ବୁଧବାର ୱାର୍ଡ ଗୁଡିକ ବିଶୋଧନ କରାଯିବ । ସପ୍ତାହର ପ୍ରତି ବୁଧବାର ପ୍ରତ୍ୟେକ ଲୋକ ନିଜ ଘର ବ୍ଲିଚିଙ୍ଗ, ଫିନାଇଲ ପକାଇ ପୋଛିବା ସହ ଅଗଣା ଓ ଦୁଆର ଧୋଇବେ । ୱାର୍ଡ , ଗ୍ରାମ ପଞ୍ଚାୟତ ଏବଂ ବ୍ଲକ ମଧ୍ୟ ସେହିଦିନ ବିଶୋଧନ କରାଯିବ ।

୩. କୋଭିଡ ମ୍ୟାନେଜମେଣ୍ଟ କମିଟିର ସଦସ୍ୟମାନେ ତାଙ୍କ ୱାର୍ଡରେ ଲୋକଙ୍କୁ କୋଭିଡ ଲକ୍ଷଣ ଥିଲେ କିମ୍ବା କୋଭିଡ ପଜିଟିଭ ବ୍ୟକ୍ତିଙ୍କ ସଂସ୍ପର୍ଶରେ ଆସିଥିଲେ ସ୍ୱତଃ ପ୍ରବୃତ୍ତ ଭାବେ ସରପଞ୍ଚ ଙ୍କୁ ଜଣାଇ କୋଭିଡ କେୟାର ହୋମ କୁ ସ୍ଥାନାନ୍ତରିତ ହେବା ପାଇଁ ବୁଝାଇବେ ଏବଂ ନିଶ୍ଚିତ କରାଇବେ ।

୪. ସାହି କିମ୍ବା ଗ୍ରାମରେ କୌଣସି କରୋନା ପଜିଟିଭ ବ୍ୟକ୍ତି ବାହାରିଲେ ତାଙ୍କ ସହ ସଂସ୍ପର୍ଶରେ ଆସିଥିବା ଲୋକଙ୍କୁ ଆପେ ଆପେ ସଙ୍ଗରୋଧ ରେ ରହିବା ପାଇଁ ପ୍ରବର୍ତାଇବେ ଏବଂ ତୁରନ୍ତ ଉକ୍ତ ସ୍ଥାନ କୁ ବିଶୋଧନ କରାଇବେ ।

୫. ଆବଶ୍ୟକ ସ୍ଥଳେ ସଂକ୍ରମଣ ଶୃଙ୍ଖଳାକୁ ରୋକିବା ପାଇଁ ସଟଡ଼ାଉନ ଘୋଷଣା ହେଲେ ସମସ୍ତ ଆନୁସଙ୍ଗିକ ବ୍ୟବସ୍ଥା ପାଇଁ ପ୍ରସ୍ତୁତି କରି ରଖିବେ ।

୬. ସର୍ବୋପରି ବର୍ତ୍ତମାନ ପରିଲକ୍ଷିତ ହେଉଥିବା କୋଭିଡର ତୀବ୍ର ସଂକ୍ରମଣକୁ ପ୍ରତିହିତ କରିବା ପାଇଁ ୩ ଟି ବିଷୟ ଯଥା SMS( ସାମାଜିକ ଦୂରତା ରକ୍ଷା, ମାସ୍କ ପରିଧାନ, ବିଶୋଧନକରଣ ) ଉପରେ ଗୁରୁତ୍ୱାରୋପ କରାଯିବ ଏବଂ ସମସ୍ତଙ୍କୁ ଏହାର ପରିପାଳନ ପାଇଁ ସଚେତନ କରାଯିବ ।

ବିଗତ ପାଞ୍ଚ ମାସରେ ଆଜି ଯାଏଁ ବାଣପୁର ବ୍ଲକ ରେ  କରୋନା ସଂକ୍ରମଣ କୁ ବ୍ରେକ ଦେବା ପାଇଁ ନୂତନ  ବି.ଡ଼ି.ଓ ଙ୍କ ଏହା ଏକ ବଳିଷ୍ଠ ପଦକ୍ଷେପ ବୋଲି ଚର୍ଚ୍ଚା ହେଉଛି। ଏହାସହ ବି.ଡ଼ି.ଓ କୌଣସି ବ୍ୟକ୍ତି ର ଯଦି ଲକ୍ଷଣ ଦେଖାଏ ତାହାଲେ ତାକୁ ନ ଲୁଚାଇ ତୁରନ୍ତ ପ୍ରଶାସନକୁ ଜଣାଇବା ପାଇଁ ପୁନର୍ବାର ଅନୁରୋଧ କରିଛନ୍ତି ଯାହାଦ୍ୱାରା ସମ୍ପୃକ୍ତ ବ୍ୟକ୍ତିଙ୍କ ପରିବାର ଏବଂ ସମାଜ ସୁରକ୍ଷିତ ରହିପାରିବ।

ସୀତରାମ ଅଗ୍ରଓ୍ବାଲ 

ବାଣପୁର: ଦିନକୁ ଦିନ ଖୋର୍ଦ୍ଧା ଜିଲ୍ଲା ରେ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିବାରେ ଲାଗିଛି ।  ସମଗ୍ର ଜିଲ୍ଲାରେ ଆଜି ୨୨0 ଜଣ ଆକ୍ରାନ୍ତ ଚି଼ହ୍ନଟ ହୋଇଛନ୍ତି ।  ଯଦି ଏହିପରି ଆକ୍ରାନ୍ତ ବଢୁଥିବେ ତାହାଲେ ଅଳ୍ପ ଦିନ ମଧ୍ୟରେ ଖୋର୍ଦ୍ଧା ଜିଲ୍ଲା ରାଜ୍ୟର ଏକ ନମ୍ବର ହଟସ୍ପଷ୍ଟ ଜିଲ୍ଲା ଭାବେ ପରିଗଣିତ ହେବ । ଅନୁରୂପ ଭାବେ ଚିଲିକା ନିର୍ବାଚନ ମଣ୍ଡଳୀରେ ମଧ୍ୟ ଆକ୍ରାନ୍ତଙ୍କ ସଂଖ୍ୟା ବଢିବାରେ ଲାଗିଛି । ବାଣପୁର ରେ ଆଜି ସକାଳ ସୁଦ୍ଧା ୪୭ ଜଣ କରୋନା ଆକ୍ରାନ୍ତ ଚି଼ହ୍ନଟ ହୋଇଥିବାସ୍ଥଳେ କେବଳ ବାଣପୁର ଏନ.ଏ.ସି ରେ ୧୯ ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି ଯାହା ଗୋଟିଏ ଦିନର ସର୍ବକାଳୀନ ରେକର୍ଡ । ସମସ୍ତ ଆକ୍ରାନ୍ତ ଲୋକାଲ/ହୋମ କ୍ଵାରେନଟାଇନ କେସ ବୋଲି ଜଣାପଡିଛି। ଆକ୍ରାନ୍ତଙ୍କ ମଧ୍ୟରେ ପ୍ରାୟ ସବୁ ବାଣପୁର ଏନ.ଏ.ସି ର ୪,୫,୭,୮,୯,୧0,୧୨,୧୩ ନମ୍ବର ୱାର୍ଡର ଥିବାର ସୂଚନା ମିଳିଛି।

ଏହାକୁ ଗୁରୁତର ସହ ନେଇ ଆଜି ଖୋର୍ଦ୍ଧା ଉପଜିଲ୍ଲାପାଳ ଶ୍ରୀ ଅଶୋକ କୁମାର ବେହୁରିଆ ବାଣପୁର ଏନ.ଏ.ସି ର ୮ ଗୋଟି ୱାର୍ଡ ଯଥା ରଙ୍କନାଥ ପାଟଣା(ୱାର୍ଡ ୪), ବିଷାରପାଟଣା ଛକଠୁ ସରକାରୀ ବାଳକ ଉଚ୍ଚ ବିଦ୍ୟାଳୟ(ୱାର୍ଡ ନମ୍ବର ୪, ୫, ୭, ୯), ଦୋଳମଣ୍ଡପ ସାହି ଛକ ଠୁ ମା ଭଗବତୀ ମନ୍ଦିର(ୱାର୍ଡ ନମ୍ବର ୮,୧0), ଚିୟାଙ୍କ ସାହି(ୱାର୍ଡ ନମ୍ବର ୧୩) ଏବଂ ବଡ଼ହନ୍ତୁଆଡ଼ ମୁସଲିମ ସାହି(ୱାର୍ଡ ନମ୍ୱର ୧୨ ) କୁ କଣ୍ଟନମେଣ୍ଟ ଜୋନ ଘୋଷଣା କରିଛନ୍ତି ।  ଏହା ଆଜିଠାରୁ ଅର୍ଥାତ ଗୁରୁବାର ସଂଧ୍ୟା ୭ ଘଟିକାରୁ ଆସନ୍ତା ୯ ତାରିଖ(ରବିବାର) ସନ୍ଧ୍ୟା ୭ ଘଟିକା ଯାଏଁ ବଳବତ୍ତର ରହିବ।

ଉକ୍ତ ସମୟରେ କୌଣସି ବ୍ୟକ୍ତି ଘରୁ ବାହାରିବେ ନାହିଁ ଏବଂ ଏହି କଣ୍ଟେନମେଣ୍ଟ ଅଞ୍ଚଳରେ ସମସ୍ତ ସରକାରୀ ଏବଂ ବେସରକାରୀ ପ୍ରତିଷ୍ଠାନ ବନ୍ଦ ରହିବ। ଉକ୍ତ ସମୟରେ ସମ୍ପୃକ୍ତ ଅଞ୍ଚଳକୁ ସାନିଟାଇଜେସନ କରାଯିବା ସହ ଆକ୍ରାନ୍ତଙ୍କ କଣ୍ଟାକ୍ଟ ଟ୍ରେସିଂ କରାଯିବ। ଏହି ସମୟରେ ସମସ୍ତ ଜନସାଧାରଣଙ୍କୁ ଘରେ ରହିବାକୁ ଅନୁରୋଧ କରିଛନ୍ତି ଉପ ଜିଲ୍ଲାପାଳ। ତେବେ  ଅତ୍ୟାବଶ୍ୟକ ସାମଗ୍ରୀ ଏବଂ ମେଡ଼ିସିନ ଅଞ୍ଚଳବାସୀଙ୍କୁ ଜିଲ୍ଲା ପ୍ରଶାସନ ଦ୍ୱାରା ଗଠନ କରାଯାଇଥିବା ବିଭିନ୍ନ ଟିମ ଦ୍ୱାରା ଯୋଗାଇଦିଆଯିବ।

କଣ୍ଟେନମେଣ୍ଟ ଜୋନରେ ଅତ୍ୟାବଶ୍ୟକ ସାମଗ୍ରୀ ପହଞ୍ଚାଇବା ସହ ବିଭିନ୍ନ କାର୍ଯ୍ୟ ତଦାରଖ ପାଇଁ ଉପ ଜିଲ୍ଲାପାଳ ନିମ୍ନଲିଖିତ ଅଧିକାରୀଙ୍କୁ ନୋଡାଲ ଅଧିକାରୀ ଭାବେ ନିଯୁକ୍ତି ଦେଇଛନ୍ତି। ଅଜୟ କୁମାର ଗୁମାନସିଂ (କନିଷ୍ଠ ଯନ୍ତ୍ରୀ, ବାଣପୁର ବ୍ଲକ), ଅତ୍ୟାବଶ୍ୟକ ସାମଗ୍ରୀର ଯୋଗାଣ ଦାୟିତ୍ବ ଦିଆଯାଇଥିବାବେଳେ ବାଣପୁର ଫାୟାର ଷ୍ଟେସନ ଅଫିସରଙ୍କୁ କଣ୍ଟେନମେଣ୍ଟ ଏବଂ ବଫର୍‌ ଜୋନ୍‌କୁ ନିୟମିତ ବ୍ୟବଧାନରେ ସାନିଟାଇଜ୍‌ କରିବାକୁ ଦାୟିତ୍ବ ଦିଆଯାଇଛି। ଡ଼ାଃ ଡ଼ି. ମହାପାତ୍ର(ବାଣପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର ଭାରପ୍ରାପ୍ତ ଅଧିକାରୀ) ଙ୍କୁ କଣ୍ଟ୍ରାକ୍ଟ ଟ୍ରେସିଂ ଏବଂ ସମ୍ପୃକ୍ତ ଅଞ୍ଚଳରେ ସର୍ଭେଲାନ୍ସ ଓ ସ୍ବାବ୍‌ ଟେଷ୍ଟିଂ ଦାୟିତ୍ବ ଦିଆଯାଇଛି।  ଏବଂ ଶ୍ରୀମତୀ ବିଦ୍ୟୁତପ୍ରଭା ରଥ( ସି.ଡ଼ି.ପି.ଓ )ଙ୍କୁ ଘରକୁ ଘର ବୁଲି ସର୍ଭେ କରିବା ଦାୟିତ୍ବ ଦିଆଯାଇଛି। ଉକ୍ତ ସବୁ କାର୍ଯ୍ୟକୁ ତଦାରଖ କରିବେ ବାଣପୁର ତହସିଲଦାର ଶ୍ରୀ ମନ୍ମଥ କୁମାର ବେହେରା। ଅନୁରୂପ ଭାବେ ପ୍ରାୟତଃ ବାଣପୁର ଏନ.ଏ.ସି ର ଅଧା ରୁ ଅଧିକ ଅଞ୍ଚଳ କଣ୍ଟେନମେଣ୍ଟ ହେଉଥିବାରୁ ସହରବାସୀଙ୍କ ସହଯୋଗ ଆଶା କରିଛନ୍ତି ଏନ.ଏ.ସି କାର୍ଯ୍ୟନିର୍ବାହୀ ଅଧିକାରୀ ଶ୍ରୀ ସନ୍ତୋଷ ନିଆଲ l ଏହି ସମୟରେ କିପରି ଅଧିକରୁ ଅଧିକ ଟେଷ୍ଟିଙ୍ଗ ହେଇପାରିବ ତାକୁ ବିଶେଷ ଗୁରୁତ୍ୱ ଦେବା ସହ ଯେଉଁ ବ୍ୟକ୍ତିର ଲକ୍ଷଣ ଦେଖାଯାଉଛି ସେ ତୁରନ୍ତ କାର୍ଯ୍ୟନିର୍ବାହୀ ଅଧିକାରୀଙ୍କୁ ଯୋଗାଯୋଗ କରିବା ପାଇଁ ଅନୁରୋଧ କରିଛନ୍ତି ଶ୍ରୀ ନିଆଲ ।