ବିଏମସି ମେୟର Archives

ଭୁବନେଶ୍ୱର: ଭୁବନେଶ୍ୱର କଳ୍ପନା ଛକ ସ୍ଥିତ କନିକା ଗ୍ୟାଲେରୀୟା ମଲ୍ ପରିସରରେ ଚଳଚ୍ଚିତ୍ର ‘ଡଷ୍ଟବିନ୍‌’ର ସଙ୍ଗୀତ ଲୋକାର୍ପିତ ହୋଇଯାଇଛି। ଖୋଲା ମଞ୍ଚ ଓ ଏକ ଭବ୍ୟ ସମାରୋହରେ ଏହାକୁ ଲୋକାର୍ପିତ କରିଛନ୍ତି ବିଏମସି ମେୟର ସୁଲୋଚନା ଦାସ। ଦେଖନ୍ତୁ ଏହା କେମିତି ଏକ ସଂଯୋଗ। ଫିଲ୍ମର ଶୀର୍ଷକ ‘ଡଷ୍ଟବିନ’ ହୋଇଥିବା ବେଳେ ଉତ୍ସବର ମୁଖ୍ୟ ଆକର୍ଷଣ ହେଉଛନ୍ତି ଭୁବନେଶ୍ୱରକୁ ସ୍ୱଚ୍ଛ ସୁନ୍ଦର କରିବାରେ ଯାହାଙ୍କର ପ୍ରମୁଖ ଭୂମିକା ରହିଛି, ସେ ହେଉଛନ୍ତି ମାନ୍ୟବର ମେୟର ଭୁବନେଶ୍ୱର। ଅନ୍ୟ ମାନଙ୍କ ମଧ୍ୟରେ ତରଙ୍ଗ ମ୍ୟୁଜିକର ମୁଖ୍ୟ ଦୀପ୍ତି ରଞ୍ଜନ ପଣ୍ଡା, ଦୁଲାଲ ଚନ୍ଦ୍ର ସାହୁ, ମୁଖ୍ୟ ପରିଚାଳନା ଅଧିକାରୀ, କନିକା ଗ୍ୟାଲେରିଆ ମଲ, ରାଜଶ୍ରୀ ପ୍ରଦକ୍ସନର ଅଖିଲ ବାବୁ, ‘ଡଷ୍ଟବିନ’ର ପ୍ରଯୋଜକ କେ. କେ ସାହୁ, କାର୍ଯ୍ୟକାରୀ ପ୍ରଯୋଜକ ପ୍ରଦୀପ୍ତ ସ୍ୱାଇଁ, ଅଭିନେତା ତଥା ସଙ୍ଗୀତ ନିର୍ଦ୍ଦେଶକ ପପୁ ପମ ପମ, ପ୍ରଚାର ବିଭାଗ ମୁଖ୍ୟ ହରପ୍ରସାଦ ମହାପାତ୍ର, ଶୁଭେଛୁ ତଥା ଯୁବ ପ୍ରଯୋଜକ ହିମାଦ୍ରୀ ତନୟ ଦାସ ଏବଂ ଚଳଚ୍ଚିତ୍ରର ସମସ୍ତ କଳାକାର ଓ ଟେକନିସିଆନ ଉପସ୍ଥିତ ଥିଲେ।

ତରଙ୍ଗ ମ୍ୟୁଜିକ ବ୍ୟାନରରେ ଏହାର ସଙ୍ଗୀତ ମୁକ୍ତିଲାଭ କରିଥିବା ବେଳେ ଏଥିରେ ସମୁଦାୟ 4ଟି ଗୀତ ରହିଛି। ଗୀତ ଗୁଡିକରେ କଣ୍ଠଦାନ କରିଛନ୍ତି କୁଲଦୀପ, ଅନ୍ତରା, ଅନୁରାଗ ଦାସ, ଅନନ୍ୟା ଶ୍ରୀତମ ନନ୍ଦ ଓ ଦେବେଶ ପତି ପ୍ରମୁଖ ଆଗଧାଡିର କଣ୍ଠଶିଳ୍ପୀ। ଗୀତିକାର ଡ. ନିର୍ମଳ ନାୟକ, ଡ.ଦୀପକ ଜେନା ଓ ରଞ୍ଜନ ନାୟକଙ୍କ ଗୀତକୁ ସଙ୍ଗୀତରେ ସଜେଇଛନ୍ତି ସଙ୍ଗୀତକାର ତତ୍ତ୍ୱପ୍ରକାଶ ଶତପଥୀ ଓରଫ୍ ପପୁ ପମ୍ ପମ୍। ପ୍ରତ୍ୟେକଟି ଗୀତ ଭିନ୍ନ ସ୍ୱାଦର ଓ ମନଛୁଆଁ ହୋଇପାରିଛି। ଏହା ଏକ ବ୍ୟୟବହୁଳ ଛବି ହୋଇଥିବା ବେଳେ ଏଥିରେ ଏକ ଦାମୀ ଡ୍ୟାନ୍ସ ନମ୍ବର ରହିଛି। ଏହି ଗୀତଟି ପାଇଁ ସମୁଦାୟ ୧୨ ଲକ୍ଷ ଟଙ୍କା ଖର୍ଚ୍ଚ ହୋଇଛି ଯାହା ଓଡ଼ିଆ ଚଳଚ୍ଚିତ୍ର କ୍ଷେତ୍ରରେ ଏକ ଉଲ୍ଲେଖନୀୟ ଘଟଣା।

‘ଡଷ୍ଟବିନ୍‌’ରେ କାହାଣୀ, ଚିତ୍ରନାଟ୍ୟ, ସଙ୍ଗୀତ ନିର୍ଦ୍ଦେଶନା ଓ ନିର୍ଦ୍ଦେଶନା ସହିତ ନାୟକ ଭୂମିକାରେ ଅଛନ୍ତି ପପୁ ପମ୍ ପମ୍। କେ. କେ ସାହୁ ଫିଲ୍ମର ପ୍ରଯୋଜକ ଥିବା ବେଳେ କାର୍ଯ୍ୟକାରୀ ପ୍ରଯୋଜକ ଅଛନ୍ତି ପ୍ରଦୀପ୍ତ ସ୍ୱାଇଁ। ଡ ଦୀପକ ଜେନା ସଂଳାପ ରଚନା କରିଛନ୍ତି। କ୍ୟାମେରା ପରିଚାଳନା କରିଛନ୍ତି ଶୁଭମ।

ଫିଲ୍ମରେ ରହିଛି ଦମଦାର ଷ୍ଟାରକାଷ୍ଟ। ନାୟକ ଭୂମିକାରେ ପପୁ ପମ୍ ପମ୍ ଥିବା ବେଳେ ଏଥିରେ ତାଙ୍କର ନାୟିକା ସାଜିଛନ୍ତି ପ୍ରାଚୀ। ପ୍ରାଚୀ ଜଣେ ଓଡ଼ିଆ ହୋଇଥିଲେ ମଧ୍ୟ ଦକ୍ଷିଣ ଭାରତୀୟ ରିଏଲିଟି ଶୋ’, ଧାରାବାହିକ ଓ ଚଳଚ୍ଚିତ୍ରରେ ବେଶ ସୁନାମ ଅର୍ଜନ କରିଛନ୍ତି। ଅନ୍ୟ ପକ୍ଷରେ ଆଜିକା ତାରିଖରେ ଚର୍ଚ୍ଚିତ ଦୁଇ ତାରକା ସୁକୁମାର ଟୁଡୁ ଓ ଦ୍ବୀପାନ୍ୱିତ ଦାସ ମହାପାତ୍ର ଦୁଇ ଦମଦାର ଭୂମିକାରେ ନଜର ଆସିବେ।ଅନ୍ୟାନ୍ୟ ଚରିତ୍ରରେ ଚୌଧୁରୀ ଜୟପ୍ରକାଶ ଦାସ, ସ୍ମିତା ମହାନ୍ତି, ଜୀବନ ପଣ୍ଡା, ଅରବିନ୍ଦ ଷଡ଼ଙ୍ଗୀ, ପୁଷ୍ପାଞ୍ଜଳି ସାହୁ, ଟୁକୁନା ଷ୍ଟାଇଲିସ, ମନୋଜ ସ୍ୱାଇଁ ଓ ଶିଶୁ କଳାକାର ଏସ. କ୍ରିତିକା ପ୍ରମୁଖ ଅଭିନୟ କରିଛନ୍ତି।

‘ଡଷ୍ଟବିନ୍‌’ ଏକ ସସ୍ପେନ୍ସ ଥ୍ରୀଲର ଓ ମର୍ଡର ମିଷ୍ଟ୍ରି ହୋଇଥିବା ବେଳେ ଏଥିରେ ଲଭ, ରୋମାନ୍ସ, ଆକ୍ସନ, ଇମୋସନ ସବୁକିଛି ଭରିରହିଛି। ସାଧାରଣ ପ୍ରେମ କାହାଣୀରେ ଡଷ୍ଟବିନ କେମିତି ଏକ ପ୍ରମୁଖ ଭୂମିକା ଗ୍ରହଣ କରିପାରେ ତାର ନିଆରା ନଜିର ରହିଛି ଏହି ଚଳଚ୍ଚିତ୍ରରେ।ଏପ୍ରିଲ ୧୧ ତାରିଖରେ ଏହି ଚଳଚ୍ଚିତ୍ର ମୁକ୍ତିଲାଭ କରିବ ବୋଲି ପ୍ରଯୋଜନା ସଂସ୍ଥା ପିକେ ଫିଲ୍ମ ପକ୍ଷରୁ ସୂଚନା ଦିଆଯାଇଛି।

ଭୁବନେଶ୍ବର : ଏଥର ରାଜଧାନୀର ମାଲିକ ହେବେ ଜଣେ ମହିଳା। ଭୁବନେଶ୍ବର ମହାନଗରର ମେୟର ପଦବୀ ମହିଳା ସଂରକ୍ଷଣ ନେଇ ଚିଠା ତାଲିକା ପ୍ରକାଶ ପାଇଛି। ଏହା ପ୍ରଚାର ହେବା ପରେ ବର୍ତ୍ତମାନ ବିଜେଡି କାହାକୁ ମେୟର କରିବ ସେ ନେଇ ସମସ୍ତଙ୍କର ଦୃଷ୍ଟି ନିକ୍ଷେପ ରହିଛି। କାରଣ ସମସ୍ତେ ଜାଣନ୍ତି ଯେ, ଅନ୍ୟ ଦଳର ବର୍ତ୍ତମାନ ଯାହା ସ୍ଥିତି ସେଥିରେ ସେମାନଙ୍କ ଦଳର ନେତ୍ରୀ ମେୟର ହେବେ, ତାହାର ସମ୍ଭାବନା ନାହିଁ।

ଭୁବନେଶ୍ବର ମେୟର ପଦବୀ ମହିଳା ସଂରକ୍ଷଣ ନେଇ ପ୍ରସ୍ତାବ ଆସିବା ପରେ ବିଜେଡି ନେତ୍ରୀଙ୍କ ପାଟିରୁ ଲାଳ ଗଡିବା ଆରମ୍ଭ ହୋଇଯାଇଛି। କାରଣ ବିଜେଡିରୁ ଯାହାକୁ ବି ମେୟର ହେବା ନେଇ ମୋହର ବାଜିଲା ସେ ନିଶ୍ଚିତ ଜିତିବ, ଏହି ସମ୍ଭାବନା ନେତ୍ରୀମାନଙ୍କର ରହିଛି। ସେହି ଅନୁସାରେ ବର୍ତ୍ତମାନ ବିଜେଡି ନେତ୍ରୀମାନେ ବିଭିନ୍ନ ପର୍ଯ୍ୟାୟରେ ସେମାନଙ୍କର ଲବି ଆରମ୍ଭ କରିଦେଇଛନ୍ତି। ତେବେ ସର୍ବଶେଷ ରିପୋର୍ଟ ଅନୁସାରେ ବର୍ତ୍ତମାନ ତିନିଜଣଙ୍କ ନାମ ବେଶ୍ ଚର୍ଚ୍ଚାରେ ରହିଛି। ସେମାନେ ହେଲେ ପ୍ରୀତିନନ୍ଦା ରାଉତରାୟ, ସୁଲତା ଦେଓ ଏବଂ ଶ୍ରୀମୟୀ ମିଶ୍ର।

ବିଏମସି ରାଜନୀତି ସହିତ ପ୍ରୀତିନନ୍ଦା ରାଉତରାୟ ବେଶ୍ ପରିଚିତ। କାରଣ ସେ ଆଗରୁ କରର୍ପୋରେଟର ରହି ଆସିଛନ୍ତି। ଗତ ବିଧାନସଭା ନିର୍ବାଚନରେ ସେ ଭୁବନେଶ୍ବରର ଉତ୍ତରରୁ ବିଧାୟିକ ପ୍ରାର୍ଥୀ ହେବା ନେଇ ଚର୍ଚ୍ଚା ଚାଲିଥିଲା। ଅନ୍ୟପକ୍ଷରେ ସେ ହେଉଛନ୍ତି ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ଦାମୋଦର ରାଉତଙ୍କ ଝିଅ। ତାଙ୍କ ଭାଇ ସମ୍ବିତ ରାଉତରାୟ ବର୍ତ୍ତମାନ ପାରାଦ୍ବୀପର ବିଜେଡି ବିଧାୟକ ଅଛନ୍ତି। ଯେହେତୁ ପ୍ରୀତିନନ୍ଦା ଉଭୟ ରାଜନୈତିକ ପରିବାରର ଏବଂ ବିଏମସି ରାଜନୀତି ସହ ଓତଃପ୍ରାତଃ ଭାବେ ଜଡିତ, ସେଥିପାଇଁ ସେ ମେୟର ପାଇଁ ଉପଯୁକ୍ତ ବୋଲି ବିବେଚନା କରାଯାଉଛି।

ଅନ୍ୟପକ୍ଷରେ ସୁଲତା ଦେଓଙ୍କ ନାମ ମଧ୍ୟ ଏହି ପଦବୀ ପାଇଁ ଚର୍ଚ୍ଚାରେ ରହିଛି। କାରଣ ରାଜ୍ୟ ସ୍ତରରେ ବିଜେଡିର ଭାବ ମୂର୍ତ୍ତିକୁ ସଜାଡି ରଖିବାରେ ସେ ପ୍ରମୁଖ ଭୂମିକା ଗ୍ରହଣ କରିଛନ୍ତି। ଅନ୍ୟପକ୍ଷରେ ସେ ଭୁବନେଶ୍ବର ସାଂସଦ ଅପରାଜିତା ଷଡଙ୍ଗୀଙ୍କୁ ଜବାବ ଦେବା ପାଇଁ ବିଜେଡି ସୁଲତାଙ୍କୁ ହିଁ ବ୍ୟବହାର କରୁଛି। ସେଥିରେ ସଫଳତା ମଧ୍ୟ ଦଳକୁ ମିଳୁଛି। ଗତ ନିର୍ବାଚନରେ ତାଙ୍କୁ ବରିରୁ ଟିକେଟ ମିଳିବ ବୋଲି ଆଶା କରାଯାଉଥିଲା। ହେଲେ ତାହା ହେଲା ନାହିଁ। ବର୍ତ୍ତମାନ ସେ ମହିଳା ଓ ଶିଶୁ ବିକାଶ ବିଭାଗର ଉପଦେଷ୍ଠା ଅଛନ୍ତି। ସେ ଏହି ମେୟର ପଦବୀ ପାଇଁ ବେଶ୍ ଉପଯୁକ୍ତ ବୋଲି ବରିଷ୍ଠ ମହଲରେ ଚର୍ଚ୍ଚା ଚାଲିଛି।

ଶେଷରେ ଯାହାଙ୍କ ନାମ ଚର୍ଚ୍ଚାରେ ରହିଛି ସେ ହେଉଛନ୍ତି ଓଟିଡିସି ଅଧ୍ୟକ୍ଷା ଶ୍ରୀମୟୀ ମିଶ୍ର। ବଲାଙ୍ଗିର ରାଜନୀତି ସହିତ ବେଶ୍ ପରିଚିତ ଥିବା ଶ୍ରୀମୟୀ ବର୍ତ୍ତମାନ ଓଡିଶା ରାଜନୀତିରେ ବେଶ୍ ସକ୍ରିୟ ଅଛନ୍ତି। ସେ ମଧ୍ୟ ଟିଭି ବିତର୍କରେ ଭାଗ ନେଇ ଦଳର ଭାବମୂର୍ତ୍ତିକୁ ରକ୍ଷା କରିବାରେ ସହାୟତା ଦେଇ ଆସୁଛନ୍ତି।

ଏଥିସହିତ ଓଟିଡିସିର ଅଧ୍ୟକ୍ଷା ଭାବ ସେ ଭୁବନେଶ୍ବରରେ ବିଭିନ୍ନ କାର୍ଯ୍ୟ କରିଛନ୍ତି। ସେଥିପାଇଁ ସେ କୁଆଡେ ବିଜେଡିର ମେୟର ପ୍ରାର୍ଥୀ ହେବେ ବୋଲି ଚର୍ଚ୍ଚା ଚାଲିଛି। ତାଙ୍କୁ କୁଆଡେ ନବୀନ ନିବାସରୁ ସବୁଜ ସଙ୍କେତ ଦିଆଯାଇଛି ବୋଲି ଆଲୋଚନା ଚାଲିଛି। ତେବେ ଏହି ତିନି ଜଣଙ୍କ ମଧ୍ୟରୁ ସୁଲତା ଓ ଶ୍ରୀମୟୀଙ୍କ ନାମ ବେଶ୍ ଆଗରେ ରହିଛି।