ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କର ଓଡ଼ିଶା ଗସ୍ତ କାଳରେ ରାଜ୍ୟର ଶାସନ କ୍ଷମତାରେ ଥିବା ବିଜଦ ସରକାରକୁ ସମାଲୋଚନା କରିବା ପରିବର୍ତ୍ତେ ଏହାର ମୁଖିଆ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ବନ୍ଧୁ ବୋଲି ସମ୍ବୋଧନ କରିଛନ୍ତି। ଓଡ଼ିଶାରେ ବିଜଦ ଓ ଭାଜପା ମଧ୍ୟରେ ପୁଣିଥରେ ମେଣ୍ଟ ହୋଇଗଲା କି ବୋଲି ପ୍ରଶ୍ନ ପଚରା ଯାଇଛି। ଏଭଳି ଖବର ଜାତୀୟ ଗଣମାଧ୍ୟମ ଟାଇମ୍ସ ଅଫ୍ ଇଣ୍ଡିଆ ଗ୍ରୁପର ନବଭାରତ ଟାଇମ୍ସରେ ପ୍ରମୁଖ ଖବର ପାଲଟିବା ସହିତ ଟ୍ରେଣ୍ଡ୍ ହେବାରେ ଲାଗିଛି।
ଏହି ଖବରକାଗଜରେ ଯାହା ପ୍ରକାଶ ପାଇଛି ତାହା ହେଉଛି ଏପରି। ଆଇଆଇଏମ୍ ସମ୍ବଲପୁରର ସ୍ଥାୟୀ କ୍ୟାମ୍ପସ ଉଦ୍ଘାଟନ ଉତ୍ସବରେ ଯୋଗଦେବା ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଗତ ଶନିବାର ଦିନ ଓଡ଼ିଶା ଆସିଥିଲେ। ମୋଦିଙ୍କର ଏହି ଗସ୍ତକାଳରେ ଆଶା କରାଯାଉଥିଲା ଯେ ସେ ଦଳୀୟ କର୍ମୀଙ୍କର ମନୋବଳକୁ ବଢ଼ାଇବା ପାଇଁ ରାଜ୍ୟର ଶାସନ କ୍ଷମତାରେ ଥିବା ବିଜଦ ସରକାର ଓ ତା’ର ମୁଖିଆଙ୍କୁ କଡ଼ା ସମାଲୋଚନା କରିବେ।
କିନ୍ତୁ ଏହି ସମୟରେ ପ୍ରଧାନମନ୍ତ୍ରୀ ମୋଦି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ସମାଲୋଚନା କରିବା ପରିବର୍ତ୍ତେ ତାଙ୍କୁ ବନ୍ଧୁ ବୋଲି ସମ୍ବୋଧନ କରିଥିଲେ। ଏପରିକି ପ୍ରଧାନମନ୍ତ୍ରୀ ମୋଦି ତାଙ୍କ ସାର୍ବଜନୀନ ଅଭିଭାଷଣରେ ବିଜଦକୁ ଟାର୍ଗେଟ କରିବାରୁ ମଧ୍ୟ ଦୂରେଇ ରହିଥିଲେ। ପ୍ରଧାନମନ୍ତ୍ରୀ ମୋଦିଙ୍କର ଏଭଳି ଆଭିମୁଖ୍ୟ ନିର୍ବାଚନ ପୂର୍ବରୁ ବିଜଦ-ଭାଜପା ମଧ୍ୟରେ ପୁଣିଥରେ ନିର୍ବାଚନୀ ମେଣ୍ଟ ହୋଇଗଲା କି ବୋଲି ଆଲୋଚନା ହେଉଥିବା ଏହି ଖବରକାଗଜର ପ୍ରମୁଖ ଖବର ହୋଇଛି।
ଆଇଆଇଏମ୍ ସମ୍ବଲପୁର ସ୍ଥାୟୀ କ୍ୟାମ୍ପସରେ ଆୟୋଜିତ ଏକ ସରକାରୀ କାର୍ଯ୍ୟକ୍ରମରେ ଉଦ୍ଘାଟନୀ ଭାଷଣ ଦେଇ ପ୍ରଧାନମନ୍ତ୍ରୀ ମୋଦୀ ଓଡ଼ିଶା ରାଜ୍ୟପାଳ ରଘୁବର ଦାସ ଜୀ, ମୁଖ୍ୟମନ୍ତ୍ରୀ ଏବଂ ମୋର ବନ୍ଧୁ ନବୀନ ପଟ୍ଟନାୟକ ଜୀ ବୋଲି ତାଙ୍କ ସମ୍ବୋଧନରେ ପ୍ରକାଶ କରିଥିଲେ।
କେବଳ ସେତିକି ନୁହେଁ ବିଜଦ ସଭାପତି ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଏହି ସୁଯୋଗକୁ ହାତଛଡ଼ା କରିନାହାନ୍ତି। ଭାରତକୁ ଏକ ଅର୍ଥନୈତିକ ମହାଶକ୍ତିରେ ପରିଣତ କରିଥିବାରୁ ନବୀନ ପଟ୍ଟନାୟକ ମଧ୍ୟ ପ୍ରଧାନମନ୍ତ୍ରୀ ମୋଦୀଙ୍କୁ ମଧ୍ୟ ପ୍ରଶଂସାରେ ପୋତି ପକାଇଛନ୍ତି। ମାନ୍ୟବର ପ୍ରଧାନମନ୍ତ୍ରୀ ଭାରତ ପାଇଁ ଏକ ନୂଆ ଦିଗ ସ୍ଥିର କରିଛନ୍ତି ଏବଂ ଆମେ ଏକ ଅର୍ଥନୈତିକ ମହାଶକ୍ତି ହେବାର ପଥରେ ଭଲ ଭାବରେ ଗତି କରୁଛୁ ବୋଲି ନବୀନ ପଟ୍ଟନାୟକ କହିଥିବା ପ୍ରକାଶ ପାଇଛି।
ଆଇଆଇଏମ୍ ସମ୍ବଲପୁର ସ୍ଥାୟୀ କ୍ୟାମ୍ପସ ଉଦ୍ଘାଟନ ପରେ ସମ୍ବଲପୁର ରିମେଡ ମଇଦାନରେ ଏକ ପ୍ରାକ୍ ନିର୍ବାଚନୀ ସାଧାରଣ ସଭାରେ ପ୍ରଧାନମନ୍ତ୍ରୀ ମୋଦି ନବୀନ ପଟ୍ଟନାୟକ ଓ ତାଙ୍କ ବିଜଦ ଉପରେ ଚୁପ୍ ରହିଥିଲେ। ବରଂ ୩୫ ମିନିଟର ସାର୍ବଜନୀନ ଅଭିଭାଷଣରେ ମୋଦି ବିଜେପି ନେତୃତ୍ୱାଧୀନ କେନ୍ଦ୍ରର ସଫଳତା ଓ ଯୋଜନା ଉପରେ ଆଲୋକପାତ କରିଥିଲେ, ଯେଉଁଥିରେ ଗତ ୧୦ ବର୍ଷ ମଧ୍ୟରେ ଓଡ଼ିଶାରେ ଗରିବ, କୃଷକ ଓ ମହିଳାଙ୍କ ସମେତ ଲକ୍ଷ ଲକ୍ଷ ଲୋକ ଉପକୃତ ହୋଇଛନ୍ତି ବୋଲି କହିଥିଲେ।
ମୋଦିଙ୍କ ଗସ୍ତ ପୂର୍ବରୁ ସମସ୍ତଙ୍କ ନଜର ତାଙ୍କ ସାର୍ବଜନୀନ ଅଭିଭାଷଣ ଉପରେ ରହିଥିଲା, କାରଣ ପ୍ରଧାନମନ୍ତ୍ରୀଙ୍କ ଏହି ପଦକ୍ଷେପ ନିର୍ବାଚନ ପୂର୍ବରୁ ବିଜଦ ବିରୋଧରେ ଦଳର ଆଭିମୁଖ୍ୟ ପାଇଁ ଦିଗ ନିର୍ଦ୍ଧାରଣ କରିବ ବୋଲି ଦଳର ରାଜ୍ୟ ନେତାମାନେ ଆଶା ବ୍ୟକ୍ତ କରିଥିଲେ। ଯଦିଓ ରାଜ୍ୟ ବିଜେପି ନେତାମାନେ ବାରମ୍ବାର ମୁଖ୍ୟମନ୍ତ୍ରୀଙ୍କ ବିରୋଧରେ ମୁହଁ ଖୋଲିଛନ୍ତି, ତଥାପି ଦଳର କେନ୍ଦ୍ରୀୟ ନେତାମାନେ ତାଙ୍କ ପ୍ରତି ନରମ ମନୋଭାବ ପୋଷଣ କରି ଆସୁଛନ୍ତି।
ସାମ୍ପ୍ରତିକ ସମୟରେ ନବୀନ ପଟ୍ଟନାୟକ ଅନେକ ବିବାଦୀୟ ଆଇନ, ରାଷ୍ଟ୍ରପତି ନିର୍ବାଚନ, ନୀତିକୁ ଅନୁମୋଦନ କରିବା ପ୍ରସଙ୍ଗରେ ପ୍ରଧାନମନ୍ତ୍ରୀ ମୋଦୀଙ୍କୁ ସମର୍ଥନ କରିଥିବାରୁ ରାଜନୈତିକ ଗତିବିଧି ଗୁରୁତ୍ୱପୂର୍ଣ୍ଣ। ଏହାବ୍ୟତୀତ ସେ ମୋଦି ସରକାରଙ୍କୁ ୧୦ରୁ ୮ ରେଟିଂ ମଧ୍ୟ ଦେଇଛନ୍ତି। ନବୀନ ପଟ୍ଟନାୟକଙ୍କ ଏଭଳି ଆଭିମୁଖ୍ୟ ଓଡ଼ିଶାରେ ବିଜଦ-ଭାଜପାର ଘନିଷ୍ଠତାକୁ ନେଇ କ୍ରମାଗତ କଳ୍ପନାଜଳ୍ପନା ସୃଷ୍ଟି କରିଛି। ଓଡ଼ିଶାରେ ମଧ୍ୟ ୨୦୦୦ରୁ ୨୦୦୯ ପର୍ଯ୍ୟନ୍ତ ଦୁଇ ଦଳ ମେଣ୍ଟ ସରକାର କରିଛନ୍ତି।
ଓଡ଼ିଶା ତା’ର ଅଧିକାର ହରେଇବା ଓ ରାଜ୍ୟର ବିକାଶରେ ବାଧା ସୃଷ୍ଟି ଦିଗରେ କଂଗ୍ରେସ ପାପ କରିଛି ବୋଲି ମୋଦି କହିଛନ୍ତି। ମୟୂରଭଞ୍ଜ ଜିଲ୍ଲାର ଆଦିବାସୀ ସମ୍ପ୍ରଦାୟର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଅପମାନିତ କରିଥିବା ଅଭିଯୋଗରେ କଂଗ୍ରେସକୁ ସମାଲୋଚନା କରିଛନ୍ତି ମୋଦି। ଆଦିବାସୀ ସମ୍ପ୍ରଦାୟର ପ୍ରତିନିଧିତ୍ୱ କରୁଥିବା ଦ୍ରୌପଦୀ ମୁର୍ମୁଙ୍କୁ ବିଜେପି ହିଁ ସ୍ୱୀକୃତି ଦେଇ ରାଷ୍ଟ୍ରପତି କରିଛି। କିନ୍ତୁ କଂଗ୍ରେସ ଓ ଏହାର ସହଯୋଗୀ ଦଳମାନେ ତାଙ୍କ ବିରୋଧରେ ଯଥାସମ୍ଭବ ଚେଷ୍ଟା କରିବା ସହ ତାଙ୍କୁ ଅପମାନିତ ମଧ୍ୟ କରିଥିଲେ ମୋଦିଙ୍କ ବକ୍ତବ୍ୟ ଖବର କାଗଜରେ ପ୍ରକାଶ ପାଇଛି।
