Tag: ବିଜେପି ବିଧାୟକ

ଭୁବନେଶ୍ବର, ନିର୍ଦ୍ଧାରିତ ସମୟ ପୂର୍ବରୁ ବନ୍ଦ ହେଲା ବିଧାନସଭା। ହେବା ମଧ୍ୟ ସ୍ବାଭାବିକ, କାରଣ ବିଧାନସଭାରେ ଯେପରି ବିଧାୟକମାନଙ୍କର ଆଚରଣ ଥିଲା ତାହା ଗୃହକୁ ବନ୍ଦ କରିବା ପାଇଁ ବାଧ୍ୟ କଲା। ବିଶେଷ କରି ବିଜେପି ବିଧାୟକମାନେ ଚଳିତ ବଜେଟ ଅଧିବେସନରେ ଯାହା କଲେ ତାହା ସାଧାରଣରେ ଆଲୋଚନା ହେବାରେ ଲାଗିଛି। ବିରୋଧୀ ଦଳର ଗୃହ ମଧ୍ୟରେ ବିରୋଧ କରିବାର ଅଧିକାର ରହିଛି। ହେଲେ ତାହା ସୀମା ଭିତରେ ରହିବା ଆବଶ୍ୟକ। ବିଧାୟକମାନେ ଏହା ଜାଣି ରଖିବା ଉଚିତ ଯେ, ସୀମା ବାହାରକୁ ଗଲେ ଲୋକେ କେବେ ଭଲ କହିବେ ନାହିଁ। ବରଂ ନିନ୍ଦା ଶୁଣିବେ ଯାହା ବିଜେପି ବିଧାୟକଙ୍କ ମଧ୍ୟରେ ପରିଲକ୍ଷିତ ହେଉଛି।

ବଜେଟ ଅଧିବେସନରେ ବିଭିନ୍ନ ଘଟଣାକୁ ନେଇ ବିଜେପି ବିଧାୟକମାନେ ଚର୍ଚ୍ଚାରେ ରହି ଆସିଛନ୍ତି। ଯାହାକୁ ସାଧାରଣରେ କେହି ପସନ୍ଦ କରୁ ନାହାଁନ୍ତି। ପ୍ରଥମ ଘଟଣା ଥିଲା ଗୃହ ମଧ୍ୟରେ ବିଜେପି ବିଧାୟକ ସୁବାସ ପାଣିଗ୍ରାହୀଙ୍କର ସାଇନିଟାଇଜର ପିଇ ଆତ୍ମହତ୍ୟା କରିବାର ଉଦ୍ୟମ। ଏହାକୁ ନେଇ ବିଧାନସଭା ପଡିଲା ଉଠିଲା। ଏପରି ଏକ ଘଟଣାରେ ବିଜେପି ବିଧାୟକମାନେ କ୍ଷମା ମାଗିବା ଦୂରେ ଥାଉ ଆତ୍ମହତ୍ୟା କରିବା ଏକ ନିନ୍ଦନୀୟ ଘଟଣା ବୋଲି ମଧ୍ୟ ପାଟି ଖୋଲି କହି ନ ଥିଲେ। ବଂର ତା ଉପରେ ଅଯଥା ଯୁକ୍ତି କରିବାକୁ ଲାଗିଲେ।

ଅନ୍ୟ ଏକ ଘଟଣାକୁ ଯଦି ଅବତରଣା କରାଯାଏ ତେବେ ବିଜେପି ବିଧାୟକମାନେ କିପରି ରାସ୍ତା ହୁଡି ଅଣରାସ୍ତାରେ ଯାଉଛନ୍ତି ତାହା ପ୍ରମାଣିତ ହୋଇଛି। ତାହା ହେଲା ବିଧାନସଭା ଠିକ୍ ଭାବେ ପରିଚାଳନା କରିବା ପାଇଁ ନବୀନ ନିବାସକୁ ବିଜେପି ବିଧାୟକମାନେ ରାଲି କରିଯିବା ଏବଂ ନବୀନ ପଟ୍ଟନାୟକଙ୍କୁ ସାକ୍ଷାତ କରିବା। ସେମାନେ ଭଲଭାବେ ଜାଣି ରଖିବା ଉଚିତ ଗୃହ ପରିଚାଳନା ବାଚସ୍ପତି କରନ୍ତି ଗୃହର ନେତା ନୁହେଁ। ଏ ସବୁ ଜାଣିବା ପରେ ସେମାନେ ନବୀନ ନିବାସ ଯାଇ ସେଠାରୁ ଯେପରି ମୁହଁ ନାଲି କରି ଫେରିଲେ ତାହା ବର୍ଣ୍ଣନା କରିବାର ଆବଶ୍ୟକତା ନାହିଁ। ନବୀନ ନିବାସ ଯିବା ଭୁଲ ଥିଲା ବୋଲି ଖୋଦ ବିରୋଧୀ ଦଳର ନେତା ଗୃହରେ ସ୍ବୀକାର କଲେ।

ବର୍ତ୍ତମାନର ବଡ ଚର୍ଚ୍ଚା ଚାଲିଥିବା ଘଟଣାକୁ ଆସିବା। ଗୃହରେ ବାଚସ୍ପତି ଠିକରେ କାମ କରୁ ନାହାଁନ୍ତି ବୋଲି ତାଙ୍କ ଉପରକୁ ହେଡ ଫୋନ, ପେନ୍ ଏପରିକି ଚପଲ ଫିଙ୍ଗିବା ଘଟଣା ଘଟିଯାଇଛି। ଏହାର ଭିଡିଓ ରେକର୍ଡିଂକୁ ତଦାରଖ କରି ବାଚସ୍ଫତି କାର୍ଯ୍ୟାନୁଷ୍ଠାନ କଲେ। ଏହାକୁ ବିରୋଧ କରି ବିଜେପି ବିଧାୟକମାନଙ୍କର ପୁଣି ନାଟକବାଜି ଆରମ୍ଭ। ରାତି ତମାମ ବିଧାନସଭା ପରିସରରେ ଥିବା ଗାନ୍ଧୀ ମୂର୍ତ୍ତି ତଳେ ଧାରଣାରେ ବସିଲେ। ଚପଲ ଫିଙ୍ଗା ଘଟଣାକୁ ବିଜେପି ବିଧାୟକମାନେ ଖୋଲାଖୋଲି କହିଲେ ଯେ ଏଥିରେ ଅନୁତାପ କରିବାର କିଛି ନାହିଁ। ଏପରି କାର୍ଯ୍ୟ ଓ ବିବୃତି ଦଳ ପାଇଁ କେତେ ଉପାୟେଦ ହେଉଛି ଏହି ନିର୍ବାଚିତ ପ୍ରତିନିଧୀମାନେ ଅନୁଧ୍ୟାନ କରିବା ଆବଶ୍ୟକ।

ଗତ ସାଧାରଣ ନିର୍ବାଚନ ସମୟରେ ବିଜେପି ଦଳ ତରଫରୁ ବହୁ ନାଟକ କରାଗଲା, ସେଥିରେ ସେମାନେ ବିଫଳ ହେଲେ। ସେତେବେଳୁ ସେମାନେ ଶିକ୍ଷା କରିବା ଆବଶ୍ୟକ ଯେ ଶାନ୍ତି ପ୍ରିୟ ଓଡିଶାରେ ଅଶାନ୍ତି ରାଜନୀତିକୁ ଲୋକେ ପସନ୍ଦ କରନ୍ତି ନାହିଁ। ଏହା ସତ୍ବେ ଗୋଟିଏ ପରେ ଗୋଟିଏ ନିନ୍ଦନୀୟ କାର୍ଯ୍ୟ କରିବା ଉଦ୍ଦେଶ୍ୟ ହେଉଛି ଯେ,ଦଳର ମଙ୍ଗୁଆଳ ଏବଂ ଉପଦେଷ୍ଠାମାନେ ବାଟବଣା ହୋଇଯାଇଛନ୍ତି। ସେହି ବାଟବଣା ଉପଦେଶ ଅନୁସାରେ ଚାଲି ବିଚରା ବିଜେପି ବିଧାୟକମାନେ ଅପମାନିତ ହେବାରେ ଲାଗିଛନ୍ତି।

ଭୁବନେଶ୍ବର, ବିଧାନସଭା ଚାଲିପାରୁ ନାହିଁ, ଚାଷୀଙ୍କ ସମସ୍ୟାର ସମାଧାନ ହୋଇ ପାରୁ ନାହିଁ। ଏ ନେଇ ଗୃହ ଦୀର୍ଘ ଦିନ ଧରି ଅଚଳ। ତେବେ ଏହାର ସମାଧାନ କରିବ କିଏ ?  ବାଚସ୍ବତି ନା ମୁଖ୍ୟମନ୍ତ୍ରୀ। ଏହିପରି ଏକ ପ୍ରଶ୍ନ ବର୍ତ୍ତମାନ ସାଧାରଣରେ ଆଲୋଚନା ହେଉଛି। କାରଣ ବିଜେପି ବିଧାୟକମାନେ ଏହି ସମସ୍ୟାର ସମାଧାନ ପାଇଁ ବାଚସ୍ପତିଙ୍କ ଅପେକ୍ଷା ମୁଖ୍ୟମନ୍ତ୍ରୀଙ୍କ ପ୍ରତି ଅଧିକ ଭରସା ରଖିଲେ।

ଆମର ବିଧାନସଭାର ନିୟମ ଅନୁସାରେ ଗୃହର ସର୍ବକର୍ତ୍ତା ହେଉଛନ୍ତି ବାଚସ୍ପତି। ତାଙ୍କ ପାଖରେ ଗୃହ ପରିଚାଳନା ପାଇଁ ସମସ୍ତ କ୍ଷମତା ପ୍ରଦାନ କରାଯାଇଛି। ଗୃହ ଭିତରେ ବିଧାୟକଙ୍କର ଯେ କୌଣସି ସମସ୍ୟାର ସମାଧାନ ବାଚସ୍ପତି କରିବେ। ଗୃହ ନ ଚାଲିଲେ ସେଥିପାଇଁ ବାଚସ୍ପତି ଦାୟୀ ରହିବେ। ଏଥିରେ ଅନ୍ୟ କେହି ନୁହଁନ୍ତି। ଯଦି ବିଧାୟକଙ୍କ ସମସ୍ୟା ସମାଧାନ ନ ହେଲା ତେବେ ସେମାନେ ବାଚସ୍ପତିଙ୍କ ନିକଟରେ ଅଭିଯୋଗ ହେଉ କିମ୍ବା ଗୃହ ଭିତରେ ଧାରଣ ହେଉ, ତାହା କରିବାର ଅଧିକାର ରହିଛି। ହେଲେ ମୁଖ୍ୟମନ୍ତ୍ରୀଙ୍କ ବାସଭବନକୁ ଯାଇ ତାଙ୍କ ପାଖରେ ନେହୁରା ହେବା, କଣ ବାଚସ୍ପତି ପଦମର୍ଯ୍ୟଦାରେ ଆଞ୍ଚ ଆସିବ ନାହିଁ କି ?

ପ୍ରଥମ କଥା ଗୃହ ଭିତରେ ବିଜେପି ବିଧାୟକ ସୁବାସ ପାଣିଗ୍ରାହୀ ସାଇନଟାଇଜର ପିଇ ଆତ୍ମହତ୍ୟା ଉଦ୍ୟମ କରିବା ନିଶ୍ଚିତ ଭାବେ ନିନ୍ଦନୀୟ ଘଟଣା। ବିଧାନସଭାରେ ନୁହେଁ ଯେ କୌଣସି ସ୍ଥାନରେ ଆତ୍ମହତ୍ୟା କରିବା ନିଶ୍ଚିତ ଭାବେ ଏକ ଘୃଣ୍ୟ ପଦକ୍ଷେପ। ଅନ୍ୟପକ୍ଷରେ କରୋନା ସମୟରେ ସମସ୍ତଙ୍କ ଘରେ ମହଜୁଦ ଥିବା ସାନିଟାଇଜର ପିଇ କି ବାର୍ତ୍ତା ଦେଉଛି ବିଜେପି ? ଏହି ଘଟଣା ପରେ ବିଜେପି ଏହାକୁ ନେଇ ଦୁଃଖ ପ୍ରକାଶ କରିବା ଦୂରର କଥା ଓଲଟା ବିଭିନ୍ନ ପ୍ରସଂଗ ଉତ୍ଥାପନ କରି ଘଟଣାକୁ ଲୁଚାଇବାରେ ଲାଗିଛି। ବିଜେପିର ଏପରି ହାବଭାବ ସୁବାସ ପାଣିଗ୍ରାହୀଙ୍କର ଆତ୍ମହତ୍ୟା ପଛରେ ଦଳର ହାତ ଅଛି ବୋଲି ସାଧାରଣରେ ପ୍ରମାଣିତ ହୋଇଯାଉଛି।

ଦ୍ବୀତିୟ କଥାଟି ହେଲା ଗୃହର ସମସ୍ୟା ବାଚସ୍ପତିଙ୍କ ନିକଟରେ ଅଭିଯୋଗ ନ କରି ମୁଖ୍ୟମନ୍ତ୍ରୀଙ୍କ ବାସଭବନକୁ ଯାଇ ତାଙ୍କ ପାଖରେ ଗୁହାରି କରିବା ଠିକ କି ?  ସେଥିପାଇଁ କୁହାଯିବ ଯେ, ବିଜେପି ଗୋଟିଏ ଭୁଲକୁ ଲୁଚାଇବା ପାଇଁ ଆଉ ଏକ ଭୁଲ କରି ବସିଲା। ସାନିଟାଇଜର ପିଇ ଆତ୍ମହତ୍ୟା ଉଦ୍ୟମ ଗୃହର ପଦମର୍ଯ୍ୟଦାକୁ ଖୁର୍ଣ୍ଣ କରୁଥିବା ବେଳେ ଗୃହର ସମସ୍ୟା ବାଚସ୍ପତିଙ୍କ ନିକଟରେ ଅଭିଯୋଗ ନ କରି ମୁଖ୍ୟମନ୍ତ୍ରୀଙ୍କ ନିକଟରେ ଅଭିଯୋଗ କରିବା ବାଚସ୍ପତି ପଦମର୍ଯ୍ୟଦାକୁ ମଧ୍ୟ କ୍ଷୁର୍ଣ୍ଣ କରୁଛି।

ଆଉ ଏକ ବଡ ମଜଦାର ଘଟଣା ହେଲା ନବୀନ ନିବାସରେ ବିଜେପି ବିଧାୟକଙ୍କୁ ଫୁଲଚନ୍ଦନ ଦେଇ ଭିତରକୁ ମହିଳାମାନେ ପାଛୋଟି ନେଲେ। ଯାହା ବିଧାୟକମାନେ କେବେ ବି ଆଶା କରି ନ ଥିଲେ। ସେମାନେ ନବୀନ ନିବାସ ଘେରାଉ କରି ନିଜେ ମାଇଲେଜ ନେବେ ବୋଲି ଭାବିଥିଲେ। ହେଲେ ସେଠାରେ ସେମାନଙ୍କୁ ଯେପରି ଭବ୍ୟ ଅଭର୍ଥନା କରାଗଲା ସାଧାରଣରେ ସମସ୍ତେ ନବୀନଙ୍କ ଏହି ପଦକ୍ଷେପକୁ ପ୍ରସଂଶା କରୁଛନ୍ତି। ପ୍ରଶ୍ନ ଉଠୁଛି ବିଜେପି ବିଧାୟକମାନେ ନବୀନ ନିବାସର ଅଭ୍ୟର୍ଥନା ନେଇ ଖୁସି ତ !