ନୂଆଦିଲ୍ଲୀ: ଶନିବାର (୩୧ ମଇ) ନାଗାଲାଣ୍ଡରେ ଏନସିପି ଅଜିତ ପାୱାର ଗୋଷ୍ଠୀର ସମସ୍ତ ସାତ ଜଣ ବିଧାୟକ ଦଳ ପରିବର୍ତ୍ତନ କରି ଶାସକ ଏନଡିପିପିରେ ଯୋଗ ଦେଇଥିଲେ। ଏବେ ଏ ସମ୍ପର୍କରେ ଅଜିତ ପାୱାରଙ୍କ ବୟାନ ଆସିଛି। ସେ କହିଛନ୍ତି ଯେ, ବିଧାୟକମାନେ ମୋତେ କହିଥିଲେ ଯେ, ସେମାନଙ୍କର କାମ ହେଉନାହିଁ।
ଉପମୁଖ୍ୟମନ୍ତ୍ରୀ ଅଜିତ ପାୱାର କହିଛନ୍ତି ଯେ, “କିଛି ସମୟ ପୂର୍ବରୁ ସେମାନେ ନିଜେ ଦେବଗିରି ବଙ୍ଗଳାରେ ମୋତେ ଭେଟିବାକୁ ଆସିଥିଲେ ଏବଂ ସେମାନଙ୍କର ଅସ୍ଥିରତା ପ୍ରକାଶ କରିଥିଲେ। ସେମାନେ ଅଭିଯୋଗ କରିଥିଲେ ଯେ, ସେମାନଙ୍କର କୌଣସି କାମ ହେଉନାହିଁ।”
ଏହି ସମ୍ପୂର୍ଣ୍ଣ ଘଟଣା ପରେ ଏନସିପି ଅଜିତ ପାୱାର ନେତାମାନଙ୍କର ଏକ ଟିମ ଆଜି କୋହିମା ପହଞ୍ଚିବ। ଏହି ଟିମ ଦଳର ନାଗାଲାଣ୍ଡ ୟୁନିଟର ନେତାମାନଙ୍କ ସହ କଥା ହେବ ଏବଂ ଏକ ବିସ୍ତୃତ ରିପୋର୍ଟ ପ୍ରସ୍ତୁତ କରିବ। ଏହି ରିପୋର୍ଟ ଅଜିତ ପାୱାରଙ୍କୁ ପ୍ରଦାନ କରାଯିବ।
ଅଜିତ ପାୱାର କ୍ଷୁବ୍ଧ:
ଏନଡିପିପି ଦ୍ଵାରା ଏନସିପିରେ ଫାଟ ସୃଷ୍ଟି କରିବାରୁ ଅଜିତ ପାୱାର ବହୁତ କ୍ଷୁବ୍ଧ। ଏନସିପି ଅଭିଯୋଗ କରିଛି ଯେ, ଏନଡିପିପି ସେମାନଙ୍କ ଦଳ ଭାଙ୍ଗି ମେଣ୍ଟ ଧର୍ମ ଉଲ୍ଲଂଘନ କରିଛି। ଅଜିତ ପାୱାର NDAର ପରବର୍ତ୍ତୀ ବୈଠକରେ ଏହି ପ୍ରସଙ୍ଗ ଉଠାଇବେ।
NDP କୁ ପୂର୍ଣ୍ଣ ବହୁମତ ମିଳିଛି:
ଉଲ୍ଲେଖ ଯୋଗ୍ୟ ଯେ, NCP ର ସାତ ଜଣ ବିଧାୟକ NDPP ରେ ଯୋଗ ଦେବା ପରେ, ମୁଖ୍ୟମନ୍ତ୍ରୀ ନେଫିଉ ରିଓଙ୍କ ନେତୃତ୍ୱରେ NDPP ୬୦ ସଦସ୍ୟ ବିଶିଷ୍ଟ ବିଧାନସଭାରେ ପୂର୍ଣ୍ଣ ବହୁମତ ପାଇଛି। NCP ବିଧାୟକମାନେ ଦଳରେ ଯୋଗ ଦେବା ପରେ, ନ୍ୟାସନାଲିଷ୍ଟ ଡେମୋକ୍ରାଟିକ୍ ପ୍ରୋଗ୍ରେସିଭ୍ ପାର୍ଟି (NDPP) ବିଧାୟକଙ୍କ ସଂଖ୍ୟା ୨୫ ରୁ ୩୨ କୁ ବୃଦ୍ଧି ପାଇଛି।
