ନୂଆଦିଲ୍ଲୀ: ଅର୍ଥ ହେରେଫେରେ ମାମଲାରେ ବିଲଡର ଲଲିତ ଟେକଚନ୍ଦାନୀ ଏବଂ ତାଙ୍କ ସହଯୋଗୀଙ୍କ ବିରୋଧରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ବଡ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଏହି କ୍ରମରେ ମନି ଲଣ୍ଡରିଂ ଆକ୍ଟ (PMLA) ଅଧୀନରେ ତାଙ୍କର ଅନେକ ସମ୍ପତ୍ତି ଜବତ କରିବାକୁ ଇଡି ଏକ ଅସ୍ଥାୟୀ ନିର୍ଦ୍ଦେଶ ଜାରି କରିଛି। ଏଥିମଧ୍ୟରେ ଦୁବାଇର ଏକ ଭିଲ୍ଲା, ମୁମ୍ବାଇର ଅନେକ ଆବାସିକ ଏବଂ ବାଣିଜ୍ୟିକ ପ୍ରକଳ୍ପ, ଅନେକ ସ୍ଥାବର ଏବଂ ଅସ୍ଥାବର ସମ୍ପତ୍ତିଲ ଏବଂ ଫିକ୍ସଡ ଡିପୋଜିଟ ଅନ୍ତର୍ଭୁକ୍ତ। ସେଗୁଡିକର ମୋଟ ମୂଲ୍ୟ ହେଉଛି ୪୪.୦୭ କୋଟି ଟଙ୍କା।
ଫ୍ଲାଟ କ୍ରେତାଙ୍କ ଠାରୁ ୪୦୦ କୋଟି ଟଙ୍କା ଠକେଇ ଅଭିଯୋଗ:
୪୦୦ କୋଟି ଟଙ୍କାର ଫ୍ଲାଟ କ୍ରେତାଙ୍କୁ ଠକିବା ଅଭିଯୋଗରେ ଲଲିତ ଏବଂ ତାଙ୍କର ୧୫ ସହଯୋଗୀଙ୍କ ବିରୋଧରେ ଏକ ମାମଲା ରୁଜୁ ହୋଇଛି। ଇଡି ଚାର୍ଜସିଟରେ ଅଭିଯୋଗ ଅନୁଯାୟୀ, ଲଲିତ ଘର କ୍ରେତାଙ୍କଠାରୁ ଟଙ୍କା ଲୁଟିବା ପରେ ନିଜ ତଥା ପରିବାର ସଦସ୍ୟଙ୍କ ନାମରେ ସମ୍ପତ୍ତି କ୍ରୟ କରିବାରେ ବ୍ୟବହାର କରିଥିଲେ। ଆର୍ଥିକ ଠକେଇ ମାମଲାରେ, ଇଡି ପୂର୍ବରୁ ସେୟାର, ମ୍ୟୁଚୁଆଲ ଫଣ୍ଡ ଏବଂ ଫିକ୍ସଡ ଡିପୋଜିଟରେ ୧୫୮ କୋଟି ଟଙ୍କା ମୂଲ୍ୟର ନିବେଶ ଜବତ କରିଥିଲା।
ଇଡି ଅନୁସନ୍ଧାନ ଅନୁଯାୟୀ, ଲଲିତ ଏକ ଗୃହ ପ୍ରକଳ୍ପ ପାଇଁ ୧୭୦୦ ରୁ ଅଧିକ ଘର କ୍ରେତାଙ୍କଠାରୁ ୪୦୦ କୋଟିରୁ ଅଧିକ ଟଙ୍କା ସଂଗ୍ରହ କରିଛନ୍ତି। ପରେ କ୍ରେତାମାନେ ଫ୍ଲାଟ ପାଇଲେ ନାହିଁ କିମ୍ବା ଫେରସ୍ତ ମଧ୍ୟ ପାଇଲେ ନାହିଁ। ଅନୁସନ୍ଧାନରୁ ଜଣାପଡିଛି ଯେ, ଘର କ୍ରେତାମାନଙ୍କଠାରୁ ନିଆଯାଇଥିବା ଟଙ୍କା ବିଭିନ୍ନ ନାମରେ ସମ୍ପତ୍ତି କ୍ରୟ ପାଇଁ ବ୍ୟବହୃତ ହୋଇଥିଲା। ଏଥିମଧ୍ୟରେ ଲଲିତଙ୍କ ପରିବାର ସଦସ୍ୟଙ୍କ ନାମ ମଧ୍ୟ ଅନ୍ତର୍ଭୁକ୍ତ।
