ନୂଆଦିଲ୍ଲୀ: ମଧ୍ୟପ୍ରଦେଶର ଜବଲପୁରର ଫ୍ୟାମିଲି କୋର୍ଟ ସ୍ପଷ୍ଟଭାବେ କହିଛନ୍ତି ଯେ ଯଦି କୌଣସି ମହିଳା ନିଜ ଇଚ୍ଛାରେ ଅଲଗା ରହୁଛନ୍ତି, ତେବେ ତାଙ୍କ ସ୍ୱାମୀଙ୍କଠାରୁ ଭରଣପୋଷଣ ପାଇବାର ତାଙ୍କର କୌଣସି ଅଧିକାର ନାହିଁ। ସ୍ୱାମୀଙ୍କଠାରୁ ଅଲଗା ରହୁଥିବା ମହିଳାଙ୍କ ଆବେଦନକୁ କୋର୍ଟ ଖାରଜ କରିଦେଇଛନ୍ତି। ଅଦାଲତ କହିଛନ୍ତି ଯେ ଯେହେତୁ ମହିଳା ଜଣକ ନିଜେ ତାଙ୍କ ସ୍ୱାମୀଙ୍କଠାରୁ ଅଲଗା ରହିବାକୁ ନିଷ୍ପତ୍ତି ନେଇଥିଲେ, ତେଣୁ ଭରଣପୋଷଣ ପାଇଁ ତାଙ୍କର କୌଣସି ଅଧିକାର ନାହିଁ।
ସ୍ୱାମୀ ଏହା କୋର୍ଟଙ୍କୁ ଜଣାଇଥିଲେ
ଅଦାଲତରେ ମହିଳାଙ୍କ ଆବେଦନର ଶୁଣାଣି ଚାଲିଥିବାବେଳେ ତାଙ୍କ ସ୍ୱାମୀ କହିଥିଲେ ଯେ ୨୦୨୦ ଡିସେମ୍ବର ୧୫ରୁ ଦୁହେଁ ଅଲଗା ହୋଇଯାଇଛନ୍ତି। ସ୍ୱାମୀ କହିଛନ୍ତି ଯେ ସେତେବେଳେ ପତ୍ନୀ ନିଜେ ଅଲଗା ହୋଇଯାଇଥିଲେ। ଏହାପରେ ସ୍ୱାମୀ ହିନ୍ଦୁ ବିବାହ ଆଇନର ଧାରା ୯ ଅନୁଯାୟୀ ଦିଆଯାଇଥିବା ବୈବାହିକ ଅଧିକାରକୁ ପୁନରୁଦ୍ଧାର କରିବାକୁ କୋର୍ଟଙ୍କ ଦ୍ୱାରସ୍ଥ ହୋଇଥିଲେ।
ସ୍ୱାମୀଙ୍କ ବିରୋଧରେ ମାମଲା ରୁଜୁ କରିଥିଲେ ପତ୍ନୀ
ଅନ୍ୟପକ୍ଷରେ ପତ୍ନୀ ମଧ୍ୟ ତାଙ୍କ ବିରୋଧରେ ଯୌତୁକ ନିର୍ଯାତନା ଅଭିଯୋଗ ଆଣିଥିଲେ। ଏହାସହ ଚୁକ୍ତି ଅନୁଯାୟୀ ତାଙ୍କ ସ୍ୱାମୀଙ୍କଠାରୁ ମିଳିଥିବା ୧୨ ଲକ୍ଷ ଟଙ୍କାର ଚେକ୍ ବାଉନ୍ସ ହୋଇଥିବା ନେଇ ମହିଳା ଜଣକ ଏକ ମାମଲା ମଧ୍ୟ ରୁଜୁ କରିଥିଲେ। ପରିବାର ଅଦାଲତର ମୁଖ୍ୟ ବିଚାରପତି ଜଷ୍ଟିସ କେଏନ୍ ସିଂହଙ୍କ ନିକଟରେ ଏହି ମାମଲା ଆସିବା ପରେ ସେ ମହିଳାଙ୍କ ବୟାନ ଦର୍ଶାଇ ତାଙ୍କ ଆବେଦନକୁ ଖାରଜ କରିଦେଇଥିଲେ।