The Samikhsya Odia
ଭୁବନେଶ୍ବର: ଆଜି ବିଜେଡି ନେତା କାର୍ତ୍ତିକ ପାଣ୍ଡିଆନଙ୍କ ହେଲିକାପ୍ଟରକୁ ଯାଞ୍ଚ କରିଛନ୍ତି ନିର୍ବାଚନ ଅଧିକାରୀ। ଆଜି ପାଣ୍ଡିଆନ ଉମରକୋଟ ଗସ୍ତ ବେଳେ ଏହି ଯାଞ୍ଚ କରାଯାଇଥିବାର ଜଣାପଡିଛି। ତେବେ ସେତେବେଳେ ପାଣ୍ଡିଆନ ସେହି ହେଲିକାପ୍ଟରରୁ ଓହ୍ଲାଇ ସଭା ମଞ୍ଚକୁ ଚାଲିଯାଇଥିଲେ।
ହେଲିପ୍ୟାଡରେ ନିର୍ବାଚନ ଅଧିକାରୀମାନେ ପହଞ୍ଚି ବହୁ ସମୟ ଧରି ଯାଞ୍ଚ କରିଥିଲେ। ହେଲିକାପ୍ଟରର ସିଟଠାରୁ ଆରମ୍ଭ କରି ଭିତରେ ଥିବା ବିଭିନ୍ନ କାଗଜପତ୍ର ଯାଞ୍ଚ କରିଥିଲେ।ହେଲେ ସେମାନେ କୌଣସି ଜିନିଷ ପାଇ ନ ଥିବାର ଜଣାପଡିଛି।
ଭୁବନେଶ୍ବର: ନିର୍ବାଚନ ସମୟରେ ସବୁ ରାଜନୈତିକ ଦଳ ସେମାନଙ୍କର ଇସ୍ତାହାର ପ୍ରକାଶ କରିଥାନ୍ତି। ସେଥିରେ ଭୋଟରଙ୍କୁ ଦଳ ତରଫରୁ ବହୁ ପ୍ରତିଶୃତି ଦିଆଯାଇଥାଏ। ସେହି ଅନୁସାରେ ଭୋଟର ସେମାନଙ୍କ ଦଳକୁ ମନୋନିତ କରିଥାନ୍ତି। ସେହିପରି ବିଜେଡି ତାହାର ଇସ୍ତାହାର ଏକ ଭିନ୍ନ ପ୍ରକାରରେ ପ୍ରସ୍ତୁତ କରିବାକୁ ଚାହିୁଁଛି।
ବିଜେଡି ଏଥର ଲୋକମାନଙ୍କୁ ଇସ୍ତାହାରରେ ସେମାନଙ୍କ ମତ ରଖିବା ପାଇଁ ଆହ୍ବାନ କରିଛି। ଦଳର ନେତା ତଥା 5ଟି ଏବଂ ନବୀନ ଓଡିଶାର ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଜନସାଧାରଣଙ୍କୁ ନିବେଦନ କରିଛନ୍ତି। ଆଜି ସକାଳେ ସେ ମର୍ଣ୍ଣିଂ ୱାର୍କ କରୁଥିବା ବେଳେ ସେ ଲୋକଙ୍କୁ ନିବେଦନ କରିଛନ୍ତି। ଯାହାର ଭିଡିଓ ସାମାଜିକ ଗଣମାଧ୍ୟମରେ ଘୁରି ବୁଲୁଛି।
ପାଣ୍ଡିଆନ କହିଛନ୍ତି ଯେ, ବିଜୁ ଜନତା ଦଳ ବର୍ତ୍ତମାନ ତାହାର ଇସ୍ତାହାର ପ୍ରସ୍ତୁତ କରୁଛି। ଆପଣମାନେ ଆପଣଙ୍କ ମତ ଦେଇପାରିବେ। ଆପଣଙ୍କ ମତଙ୍କୁ ମୁଖ୍ୟମନ୍ତ୍ରୀ ବେଶ ଗୁରୁତ୍ବ ପ୍ରଦାନ କରନ୍ତି। ଏହା ହେଉଛି ଆପଣଙ୍କ ସରକାର। ଆପଣଙ୍କ ମତକୁ ମୁଖ୍ୟମନ୍ତ୍ରୀ ଗୁରୁତର ସହ ବିଚାର କରି ସେଥିରେ ସ୍ଥାନିତ କରିବେ।
ଏଠାରେ ସୂଚନା ଦିଆଯାଇପାରେ କି ଯେଉଁମାନେ ବିଜେଡି ଇସ୍ତାହାରରେ ସେମାନଙ୍କ ମତାମତ ଦେବା ପାଇଁ ଚାହାଁନ୍ତି ସେମାନେ [email protected] କୁ ମେଲ କରିପାରିବେ।
ଭୁବନେଶ୍ବର: ମେଣ୍ଟକୁ ନେଇ ବର୍ତ୍ତମାନ ସାରା ରାଜ୍ୟ ରାଜନୀତି ପଡୁଛି ଉଠୁଛି। ହେଲେ ଏହା କେବ ହେବ କେମିତି ହେବ ସେ ନେଇ ଏ ପର୍ଯ୍ୟନ୍ତ କୌଣସି ପୂର୍ଣ୍ଣାଙ୍ଗ ତଥ୍ୟ ଆସିପାରି ନାହିଁ। ଏପରି କ୍ଷେତ୍ରରେ ବିଜେଡି ନେତା କାର୍ତ୍ତିକ ପାଣ୍ଡିଆନଙ୍କ ମେଣ୍ଟକୁ ନେଇ ଦେଇଥିବା ବୟାନ ପୁଣି ଥରେ ଏହି ଚର୍ଚ୍ଚାକୁ ଜୋରଦାର କରିଛି। ପାଣ୍ଡିଆନ ମେଣ୍ଟକୁ ନେଇ ବେଶ ସୁନ୍ଦର ତଥ୍ୟଗୁଡିଏ ଉପସ୍ଥାପନା କରିଛନ୍ତି। ହେଲେ ମେଣ୍ଟ ହେବ କି ନାହିଁ ତାହାକୁ ମଧ୍ୟ ସେ ସୁନ୍ଦର ଭାବେ ଏଡାଇଯାଇଛନ୍ତି।
ନୂଆଦିଲ୍ଲୀରେ ନ୍ୟୁଜ-18 ତରଫରୁ ଆୟୋଜିତ ଏକ କନକ୍ଲେଭରେ ସେ ଯୋଗଦେଇ ରାଜ୍ୟ ତଥା ଦେଶର ରାଜନୀତି ଉପରେ ବକ୍ତବ୍ୟ ରଖିଛନ୍ତି। ସେହି ମଞ୍ଚରେ ଓଡିଶାରେ ମେଣ୍ଟ ହେବ କି ନାହିଁ ବୋଲି ତାଙ୍କୁ ପ୍ରଶ୍ନ ପଚରାଯାଇଥିଲା। ହେଲେ ସେ ମେଣ୍ଟ ସଂପର୍କରେ ବହୁ ସୁନ୍ଦର ତଥ୍ୟଗୁଡିଏ ଉପସ୍ଥାପନା କରିଥିଲେ। ଏପରିକି ତାଙ୍କର ମେଣ୍ଟ ସଂପର୍କରେ ବକ୍ତବ୍ୟ ବେଶ୍ ଗବେଷଣାତ୍ମକ ମଧ୍ୟ ଥିଲା। ହେଲେ ସେ ବେଶ ଚତୁରତା ସହିତ ମେଣ୍ଟ ହେବ କି ନାହିଁ ତାହାକୁ ସ୍ପଷ୍ଟ କରି ନ ଥିଲେ।
ମେଣ୍ଟ ସଂପର୍କରେ ସେ କହିଥିଲେ ଯେ, ଓଡିଶାରେ ନବୀନ ପଟ୍ଟନାୟକ ବିଜେପିର ବିନା ମେଣ୍ଟରେ ସରକାର ଗଠନ କରିବେ। ଷଷ୍ଠଥର ପାଇଁ ସେ ମୁଖ୍ୟମନ୍ତ୍ରୀ ହେବେ। ସେହିପରି ଦେଶରେ ବିଜେଡି ସହିତ ବିନା ମେଣ୍ଟରେ ପୁଣି ଥରେ ନରେନ୍ଦ୍ର ମୋଦି ପ୍ରଧାନମନ୍ତ୍ରୀ ହେବେ। ତଥାପି ଦେଶର ଏହି ଦୁଇ ମହାନ ନେତା ଏକାଠି ହେଲେ ଏକ ବୃହତର ସ୍ବାର୍ଥ ହାସଲ ହୋଇପାରିବ ବୋଲି ପାଣ୍ଡିଆନ କହିଥିଲେ।
ପାଣ୍ଡିଆନ ଆହୁରି କହିଥିଲେ ଯେ, ସାଧାରଣତଃ ମେଣ୍ଟ ଅର୍ଥ ବୁଝାଯାଏ ଯେ, ଦୁଇଟି ଦଳ ମିଶିଲେ ଆସନ ଭାଗବଣ୍ଟା ଗଣିତରେ ପରିବର୍ତ୍ତନ ହେବ। ମେଣ୍ଟ ହେଲେ ଦୁଇ ରାଜନୀତିକ ଦଳ ବିଜୟର ସମ୍ଭାବନା ଅଧିକ ରହିବ। ମେଣ୍ଟ ହେଲେ ରାଜନୈତିକ ସଂଗଠନ ସଦୃଢ ହେବ। ହେଲେ ଏଠାରେ ସେମିତି କିଛି ଗଣିତ ନାହିଁ। ଓଡିଶାରେ ବିଜେପି ସହିତ ମେଣ୍ଟ କଲେ ବିଜେଡି ଜିତିବ ନ ହେଲେ ହାରିବ ସେ କଥା ନାହିଁ। ସେହିପରି ଦେଶରେ ମୋଦି ଆସିବା ପାଇଁ ବିଜେଡିର କୌଣସି ଆବଶ୍ୟକତା ନାହିଁ। ତେବେ ମେଣ୍ଟରେ ରାଜନୈତିକ ଗଣିତ ଅପେକ୍ଷା ବୃହତ୍ତର ସ୍ବାର୍ଥ ଅଧିକ ରହିଛି।
ତେବେ କାର୍ତ୍ତିକ ପାଣ୍ଡିଆନ ତାଙ୍କର ମନ୍ତବ୍ୟକୁ ଏପରି ଢଙ୍ଗରେ ଦେଇଛନ୍ତି ଯେ, ଯେପରି ସାଧାରଣ ଲୋକେ କାହିଁକି ବିଜ୍ଞ ଲୋକେ ମଧ୍ୟ ବୁଝିବା କଷ୍ଟକର ହେବ। କାରଣ ଗୋଟିଏ ପଟେ ତାଙ୍କ ବକ୍ତବ୍ୟରୁ ସ୍ପଷ୍ଟ ଯେ, ବିଜେଡି ବିଜେପି ମେଣ୍ଟ ହେବ, ପୁଣି ଅନ୍ୟପଟେ ବିଚାର କଲେ ତାଙ୍କ କଥାରୁ ଜଣାପଡୁଛି ଯେ ମେଣ୍ଟ ହେବ ନାହିଁ।
ତେବେ ପାଣ୍ଡିଆନ ଦ୍ବିତୀୟ ଥର ପାଇଁ ଜାତୀୟ ଗଣମାଧ୍ୟମରେ ଯେପରି ଢଙ୍ଗରେ ଏବଂ ଜଣେ ବିଚକ୍ଷଣ ରାଜନେତା ପରି ଉତ୍ତର ରଖିଛନ୍ତି ତାହା ବେଶ ଚର୍ଚ୍ଚାର ବିଷୟ ପାଲଟିଛି।
ଭୁବନେଶ୍ବର: ଆଜି 5ଟି ଅଧ୍ୟକ୍ଷ ତଥା ଆମ ଓଡିଶା ନବୀନ ଓଡିଶା ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ ଗଂଜାମ ଗସ୍ତ ବେଳେ ଅଭାବନୀୟ ଘଟଣା ଦେଖିବାକୁ ମିଳିଛି। ତାହା ହେଲା ସେ ସଭାକୁ ଯିବା ବେଳେ ତାଙ୍କ ଉପରକୁ କେହି ଜଣେ ଟମାଟୋ ମାରିଛି।
ବେଳଗୁଣ୍ଠାଠାରେ ଆୟୋଜିତ ଆମ ଓଡିଶା ନବୀନ ଓଡିଶା କାର୍ଯ୍ୟକ୍ରମକୁ ଯିବା ବେଳେ ଏହି ଟମାଟୋ ମାଡ କରାଯାଇଛି। ତେବେ ସେଠାରେ ଉପସ୍ଥିତ ଥିବା ବିଜେଡି କର୍ମି ସେ ବ୍ୟକ୍ତିଙ୍କୁ ଧରି ପୋଲିସ ଜିମା ଦେଇଛନ୍ତି। ପୋଲିସ ତାଙ୍କୁ ଅଟକ ରଖି ପଚରାଉଚୁରା କରୁଛି। ତେବେ ସେ ଜଣେ କଂଗ୍ରେସ କର୍ମି ବୋଲି ଜଣାପଡିଛି।
ଏହି ଘଟଣା ପରେ ମଧ୍ୟ ସତସାହସ କରି ସଭା କରିଥିଲେ କାର୍ତ୍ତିକ ପାଣ୍ଡିଆନ। ସେଠାରେ ଉପସ୍ଥିତ ଥିବା ହଜାର ହଜାର ଲୋକଙ୍କୁ ସେ ତାଙ୍କର ଶୈଳୀରେ ସମ୍ବୋଧିତ କରିଥିଲେ। ତେବେ ସେ ସେଠାରେ କହିଥିଲେ ଯେ, ମୋତେ ଟମାଟୋ ମାର, ଚପଲ ମାର, କାଳି ମାର ଏପରିକି ଗୁଳି ମାର ମୁଁ ଡରିବାର ନାହିଁ।
ଏହି କଥା କହିବା ପରେ ସେଠାରେ ଉପସ୍ଥିତ ଲୋକେ ତାଳି ମାରି ପାଣ୍ଡିଆନଙ୍କୁ ସାହାସ ଦେଇଥିଲେ। ପାଣ୍ଡିଆନ କହିଲେ ଯେ, ମୋତେ ମୁଖ୍ୟମନ୍ତ୍ରୀ ଲୋକଙ୍କ କଥା ବୁଝିବାକୁ ପଠାଇଛନ୍ତି। ମୋତେ ଯେତେ ଯିଏ ବିରୋଧ କଲେ ମଧ୍ୟ ମୁଁ ମୋର ଜନସେବା ଜାରୀ ରଖିବି। ଏହାପରେ ସେ ଯେମିତି ସଭା କରିବା କଥା ତାହା କରିଥିଲେ।
ଏହି ଗୋଟିଏ ଘଟଣା ନୁହେଁ ପୂର୍ବରୁ ପିପିଲିରେ ତାଙ୍କ ଉପରେ କାଳି ଫୋପଡା ଯାଇଥିଲା। ସେଥିରେ ମଧ୍ୟ ସେ ସାଧାରଣ ଲୋକଙ୍କୁ ଭେଟିଥିଲେ। ଏପରିକି ମହିଳାମାନେ ତାଙ୍କ ପଣତ କାନିରେ ତାଙ୍କ ମୁହଁପୋଛି ଦେଇଥିଲେ। ସେତେବେଳେ ମଧ୍ୟ ସେହି ବ୍ୟକ୍ତିଙ୍କୁ ପୋଲିସ ପଚରାଉଚୁରା କରି ଛାଡି ଦେଇଥିଲା।
ବହୁ ପୂର୍ବରୁ ପାଣ୍ଡିଆନଙ୍କ ଏହି ଗସ୍ତକୁ ନେଇ ବିରୋଧୀ ପ୍ରବଳ ବିରୋଧ କରିଆସିଛନ୍ତି। ସେ ଯେତେବେଳେ ଚାକିରୀରେ ଥିଲେ ସେତେବେଳେ ଏହି ବିରୋଧ ତୀବ୍ରତର ହୋଇଥିଲା। ତାଙ୍କ ବିରୋଧରେ କାର୍ଯ୍ୟାନୁଷ୍ଠନ ନେବା ପାଇଁ ବିଜେପି କେନ୍ଦ୍ର ସରକାରଙ୍କୁ ଚିଠି ଲେଖି ଅଭିଯୋଗ କରିଥିଲେ। ହେଲେ ପାଣ୍ଡିଆନ ଗସ୍ତକୁ କେହି ରୋକି ପାରିଲେ ନାହିଁ।
ବିଜେପି ଓ କଂଗ୍ରେସ ମିଳିତ ଭାବେ ପାଣ୍ଡିଆନ ଗସ୍ତକୁ ରୋକିବାକୁ ଚେଷ୍ଠା କରି ବିଫଳ ହୋଇଛନ୍ତି। ସେ ପୂର୍ବପରି ସତସାହସ କରି ମୁଖ୍ୟମନ୍ତ୍ରୀଙ୍କ କାର୍ଯ୍ୟଧାରାକୁ ବଢାଇବାରେ ଲାଗିଛନ୍ତି। ଅନ୍ୟପକ୍ଷରେ ପାଣ୍ଡିଆନଙ୍କ ଏହି ଗସ୍ତ ଲୋକଙ୍କ ଉପରେ ବେଶ ପ୍ରଭାବ ପକାଇବାରେ ଲାଗିଛି।
ଭୁବନେଶ୍ବର: ନିର୍ବାଚନ ଯେତିକି ପାଖେଇବାରେ ଲାଗିଛି, ରାଜ୍ୟ ରାଜନୀତି ସେତିକି ଗରମ ହେବାରେ ଲାଗିଛି। ତେବେ ଏହି ଗରମ ବର୍ତ୍ତମାନ ସମ୍ବଲପୁର ଲୋକସଭା ନିର୍ବାଚନ ମଣ୍ଡଳୀରେ ଅଧିକ ଅନୁଭୂତ ହେବାରେ ଲାଗିଛି। କାରଣ ସେଠାରେ ବିଜେପିର ହେଭି ୱେଟ ନେତା ଧର୍ମେନ୍ଦ୍ର ପ୍ରଧାନ ଲୋକସଭା ପାଇଁ ଲଢେଇ କରିବେ। ତାଙ୍କର ଗତିବିଧିରୁ ସ୍ପଷ୍ଟ ହୋଇଛି ଯେ ସେ ସମ୍ବଲପୁକୁ ହି ନିଜର ମଇଦାନ ଭାବେ ବାଛିଛନ୍ତି।
ତେବେ ତାଙ୍କୁ ଟକ୍କର ଦେବା ପାଇଁ ବିଜେଡି ବଡ ସମର ସଜା ଆରମ୍ଭ କରିଦେଇଛି। ଧର୍ମେନ୍ଦ୍ରଙ୍କୁ ହରାଇବା ପାଇଁ ବିଜେଡି ନିଶ୍ଚିତ ବଡ ଗେମ କରିବ ଏବେଠାରୁ ତାହା ଜଳଜଳ ହୋଇ ଦେଖାଗଲାଣି। କାରଣ ସେହି ଲୋକସଭା ନିର୍ବାଚନ ମଣ୍ଡଳିରେ ବିଜେଡି ନେତା କାର୍ତ୍ତିକ ପାଣ୍ଡିଆନଙ୍କ ବାରମ୍ବାର ଗସ୍ତ କରି ବିଜେଡିର ପ୍ରଚାର ଆରମ୍ଭ କରିଦେଲେଣି। ଧର୍ମେନ୍ଦ୍ରଙ୍କୁ ହରାଇବା ପାଇଁ ସେ ବାହାରେ ଯେତିକି ପରିଶ୍ରମ କରୁଛନ୍ତି ଭିତିରିଆ ମଧ୍ୟ ଆହୁରି ଅଧିକ କାମ କରୁଛନ୍ତି।
ନିକଟରେ ସମ୍ବଲପୁରର ବହୁ ପ୍ରତୀକ୍ଷିତ ମା ସମଲେଇ ପ୍ରକଳ୍ପର ଉଦଘାଟନ କରାଯାଇଛି। ଯାହା ବିଜେଡି ପାଇଁ ଏକ ବଡ ଫାଇଦା ମିଳିବ ଏଥିରେ ସନ୍ଦେହ ନାହିଁ। ଏହି ପ୍ରକଳ୍ପ ପୂର୍ବରୁ ସେ ତାହାର ତଦାରଖ କରିବା ପାଇଁ ବହୁବାର ସମ୍ବଲପୁର ଗସ୍ତ କରିଛନ୍ତି। ସେହିପରି ‘ନୂଆ- ଓ’ କାର୍ଯ୍ୟକ୍ରମ ଏବଂ ବିଭିନ୍ନ ପ୍ରକଳ୍ପ ଉଦାଘାଟନ କାର୍ଯ୍ୟକ୍ରମରେ ସେ ସାମିଲ ହୋଇ ବିଜେଡିକୁ ସଶକ୍ତ କରିବାରେ ଲାଗିଛନ୍ତି। ସେଠାରୁ ଯୁବ ଭୋଟରଙ୍କୁ ଆକୃଷ୍ଠ କରିବା ଏବଂ ସରକାର ସମ୍ବଲପୁର ବିକାଶରେ କିପରି ଅଛନ୍ତି ତାହାର ହିସାବ ସେ ଗୋଟି ଗୋଟି କରି ଦେବାରେ ଲାଗିଛନ୍ତି।
ତେବେ ସବୁଠାରୁ ବଡ କଥା ହେଲା ଯେ, ସେ ଜାନୁୟାରୀ ମାସରେ ସମ୍ବଲପୁର ମାଟିରେ ଧର୍ମେନ୍ଦ୍ରଙ୍କ ନାମ ନ ନେଇ ତାଙ୍କୁ ତୀବ୍ର ସମାଲୋଚନା କରିଛନ୍ତି। ସମ୍ବଲପୁର ଜିଲ୍ଲାର କୁଚିଣ୍ଡା ଓ ରେଢାଖୋଲ ନିର୍ବାଚନ ମଣ୍ଡଳିରେ ଆୟୋଜିତ ସଭାରେ ନାଆଁ ନ ନେଇ କେନ୍ଦ୍ରମନ୍ତ୍ରୀଙ୍କୁ ଦୁଇଟି ପ୍ରସଂଗ ଚେତାଇ ଦେଇଛନ୍ତି ପାଣ୍ଡିଆନ।
ଏହି ଦୁଇ ସଭାରେ ପାଣ୍ଡିଆନ କହିଛନ୍ତି ଯେ, ଦୀର୍ଘ ୧୦ବର୍ଷ ହେଲା କଟକ-ସମ୍ବଲପୁର ଜାତୀୟ ରାଜପଥ କାମ ଶେଷ ହେଉନି। ନିର୍ବାଚନ ଆସିଲେ କିଛି ନେତା ବଡବଡ ଭାଷଣ ମାରୁଛନ୍ତି, ହେଲେ ଜାତୀୟ ରାଜପଥ କାମ ତାଙ୍କ ଦ୍ବାରା ହୋଇପାରୁ ନାହିଁ।
ସେତିକି ନୁହେଁ ଧର୍ମେନ୍ଦ୍ରଙ୍କୁ ତାଚ୍ଛଲ୍ୟ କରିଛନ୍ତି କାର୍ତ୍ତିକ ପାଣ୍ଡିଆନ। ସେ କହିଥିଲେ ଯେ, ଖରାପ ରାସ୍ତା ଯୋଗୁଁ କେନ୍ଦ୍ରମନ୍ତ୍ରୀ ଏବେ କଟକ-ସମ୍ବଲପୁର ଜାତୀୟ ରାଜପଥରେ ନ ଯାଇ ରାଜ୍ୟ ରାଜପଥରେ ଯିବାକୁ ପସନ୍ଦ କରୁଛନ୍ତି। ଏପରି କଥା ଧର୍ମେନ୍ଦ୍ର ଶୁଣି ନିଶ୍ଚିତ ରାଗି ନାଲି ପଡିଥିବେ ଏଥିରେ ସନ୍ଦେହ ନାହିଁ।
ପୁଣି ଚଳିତ ମାସ ୧୧ ତାରିଖରେ ଭୋରରୁ ସମ୍ବଲପୁର ଗସ୍ତ କରିଥିଲେ ପାଣ୍ଡିଆନ। ସେଠାରେ ଜନସମାଗମରେ ପ୍ରାୟ ୧୫୦୦ କୋଟି ଟଙ୍କାର ପ୍ରକଳ୍ପର ହିସାବ ରଖିଲେ। ସମ୍ବଲପୁର ପାଇଁ ଟଙ୍କାର ବର୍ଷା କଲେ ପାଣ୍ଡିଆନ। ସେତିକି ନୁହେଁ ସେଠାରେ ବିଶାଳ ଜନସମାଜକୁ ଉଦବୋଧନ ମଧ୍ୟ ଦେଇଥିଲେ।
ସେହି ଗସ୍ତ ସମୟରେ ପାଣ୍ଡିଆନ ସେଠାକାର ଯୁବକମାନଙ୍କ ସହିତ କ୍ରିକେଟ ମଧ୍ୟ ଖେଳିଥିଲେ। ସେ ଖୁସିରେ ଖେଳ ଖେଳିଥିଲେ ମଧ୍ୟ ତାହା ରାଜ୍ୟ ରାଜନୀତିରେ ଥିଲା ବେଶ ଗରୁତ୍ବପୂର୍ଣ୍ଣ। ପରୋକ୍ଷରେ ସେ ଧର୍ମେନ୍ଦ୍ରଙ୍କୁ ଚେତେଇ ଦେଲେ ଯେ, ତମେ ଖେଳିବାକୁ ଚିନ୍ତା କରୁଥିବା ବେଳେ ଆମେ ଖେଳ ଆରମ୍ଭ କରିଦେଲାଣୁ।
ଭୁବନେଶ୍ୱର : ବହୁତ ଲୋକ ଅଛନ୍ତି ଶ୍ରେୟ ନେବା ପାଇଁ କାମ କରନ୍ତି। କିଛି ଲୋକ ଅଛନ୍ତି ଅନ୍ୟ ଲୋକ ଯେପରି ଶ୍ରେୟ ପାଇପାରିବେନି ସେଥିପାଇଁ କାମ ବନ୍ଦ କରିବାକୁ ଚେଷ୍ଟା କରନ୍ତି । ଓଡ଼ିଶାବାସୀ ସେମାନଙ୍କୁ ଠିକ ଚିହ୍ନି ପାରିବେ। କିନ୍ତୁ ଦୁନିଆରେ ବହୁତ କମ୍ ଲୋକ ଅଛନ୍ତି, ଯେଉଁମାନେ ଶ୍ରେୟ ନେବା ପାଇଁ ନୁହେଁ, ବରଂ ସେବା ମନୋଭାବ ନେଇ କାମ କରନ୍ତି। ସେହି ବହୁତ କମ ଲୋକଙ୍କ ମଧ୍ୟରେ ଜଣେ ହେଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ।
ଆଜି ବିକାଶ ବିରୋଧୀଙ୍କୁ ଏପରି ତେରେଚ୍ଛା ତୀର ମାରିଛନ୍ତି ଫାଇଭ-ଟି ତଥା ନବୀନ ଓଡ଼ିଶାର ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ। ଯୋରନ୍ଦା ମହିମାପୀଠର ରୂପାନ୍ତରଣ ପାଇଁ ଆୟୋଜିତ ଭୂମିପୂଜନ ଉତ୍ସବରେ ଓଡ଼ିଶାର ବିକାଶକୁ ବିରୋଧ କରୁଥିବା ବ୍ୟକ୍ତିଙ୍କୁ ସମାଲୋଚନା କରିଛନ୍ତି କାର୍ତ୍ତିକ ପାଣ୍ଡିଆନ।
ଫାଇଭ ଟି ଅଧ୍ୟକ୍ଷ କହିଥିଲେ ଯେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶରେ ସେ ଗତ ମେ ୨୯ ତାରିଖରେ ମହିମାଗାଦିର ଉନ୍ନତୀକରଣ ପାଇଁ ଏଠାକୁ ଆସି ସ୍ଥିତି ଅନୁଧ୍ୟାନ କରିଥିଲେ ଓ ଆଲୋଚନା କରିଥିଲେ। ମହିମାଗାଦିର ଉନ୍ନତି ପାଇଁ କ’ଣ କ’ଣ ଆବଶ୍ୟକ ସେନେଇ ଜାଣିବାକୁ ଚାହିଁଥିଲେ। ପରେ ତିନି ଥର ମହିମା ସାଧୁମାନେ ଭୁବନେଶ୍ବର ନବୀନ ନିବାସ ଓ ମୁଖ୍ୟମନ୍ତ୍ରୀଙ୍କ କାର୍ୟ୍ୟାଳୟ ଆସି ବିଭିନ୍ନ ପ୍ରସ୍ତାବ ଦେଇଥିଲେ। ସାଧୁମାନଙ୍କ ଇଚ୍ଛାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମହିମାଗାଦିର ରୂପାନ୍ତରଣର ପାଇଁ ପ୍ରାୟ ୧୬୦ କୋଟି ଟଙ୍କା ମଂଜୁର କରିଛନ୍ତି। ପ୍ରକଳ୍ପର ଅଟକଳ ୧୧୨ କୋଟି ରହିଥିବା ବେଳେ ଅନ୍ୟାନ୍ୟ ଖର୍ଚ୍ଚ ମିଶି ମୋଟ୍ ୧୬୦ କୋଟି ଟଙ୍କା ହେବ।
ମହିମାଗାଦିର ଉନ୍ନତୀକରଣ ପରିପ୍ରେକ୍ଷୀରେ ଆଜି ଏଠାରେ ୪ ଝ ନୀତି ଦେଇଥିଲେ ଫାଇଭ-ଟି ଅଧ୍ୟକ୍ଷ। ସେ କହିଥିଲେ, ଯେବେ ଗୋଟେ ବଡ଼ କାମ କରିବାକୁ ପଡ଼େ କିଛି ଲୋକ କାମକୁ ବିରୋଧ କରନ୍ତି। ଏଠାରେ ମଧ୍ୟ ବିକାଶ କାମକୁ ବିରୋଧ କରି ଏହି କାମ କରାଇ ନଦେବାକୁ ଚେଷ୍ଟା କରିଥିଲେ। ଏତେ ଖର୍ଚ୍ଚ କରି ବିକାଶ ନ କରିବାକୁ ମୁଖ୍ୟମନ୍ତ୍ରୀଙ୍କ ନିକଟକୁ ଚିଠି ମଧ୍ୟ ଲେଖିଥିଲେ। କାହିଁକି ଏତେ ଖର୍ଚ୍ଚ ହେବ ଏବଂ କାମ ହେଲେ କ’ଣ ଲାଭ ହେବ ବୋଲି କହି କାମ ବନ୍ଦ କରିବାକୁ ଚେଷ୍ଟା କରିଥିଲେ।
ହେଲେ ମହିମା ଧର୍ମକୁ ବହୁତ ଭଲ ପାଉଥିବା ଓ ବହୁତ ସମ୍ମାନ ଦେଉଥିବା ମୁଖ୍ୟମନ୍ତ୍ରୀ ଏସବୁକୁ ଗୁରୁତ୍ବ ନଦେଇ ଓଡ଼ିଶା ମାଟିରେ ଜନ୍ମ ନେଇ ଦୁନିଆକୁ ସ୍ବଚ୍ଛତା, ସରଳତା, ସମାନତା ଏବଂ ନିଃସ୍ବାର୍ଥ ସେବା ବାର୍ତ୍ତା ଦେଇଥିବା ମହିମା ଧର୍ମକୁ ଆଗେଇ ନେବାକୁ ନିଷ୍ପତ୍ତି ନେଇଥିଲେ । ଏହି ଚାରିଟି ଯାକ ‘ସ’ର ପ୍ରତୀକ ହେଉଛନ୍ତି ନିଜେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବୋଲି ମଧ୍ୟ ସେ କହିଥିଲେ । ଏହାକୁ ଲକ୍ଷ୍ୟରେ ରଖି ଯୋରନ୍ଦା ମହିମା ଗାଦି ସହ ଏହି ପ୍ରକଳ୍ପ ଅନୁମୋଦନ କରିଥିଲେ ମୁଖ୍ୟମନ୍ତ୍ରୀ।
ସାରା ରାଜ୍ୟରେ ରହିଥିବା ୧୦୫ଟି ମହିମା ମନ୍ଦିରର ଉନ୍ନତି ପାଇଁ ମୁଖ୍ୟମନ୍ତ୍ରୀ ୮୩୦ ଲକ୍ଷ ଟଙ୍କା ଅର୍ଥ ମଞ୍ଜୁର କରିଛନ୍ତି । ମହିମା ମନ୍ଦିରର ରୂପାନ୍ତରଣକୁ ପ୍ରାଥମିକତା ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେ ଯେବେ ଯେବେ ଜିଲ୍ଲା ଗସ୍ତରେ ଯାଇଥାଆନ୍ତି ମୁଖ୍ୟମନ୍ତୀ ପଚାରନ୍ତି ସେହି ସବୁ ଜିଲ୍ଲାରେ ମହିମା ମନ୍ଦିର ପାଇଁ କିଛି ପ୍ରସ୍ତାବ ଆସିଛି କି ! ଶୁଣିସାରିବା ପରେ ତୁରନ୍ତ ପଦକ୍ଷେପ ନେଇଥାଆନ୍ତି । ସବୁ ଜାଗାରେ ଥିବା ମହିମା ମନ୍ଦିରର ଉନ୍ନତି ପାଇଁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।
ରାଜନୀତିକୁ ଆସିବାପରେ ବିଭିନ୍ନ ସଭାରେ ୫ଟି ଅଧ୍ୟକ୍ଷ ବରାବର ବିକାଶ ବିରୋଧୀଙ୍କୁ ସମାଲୋଚନା କରିଆସିଛନ୍ତି । ବିଭିନ୍ନ କ୍ଷେତ୍ରରେ ଓଡିଶାର ବିକାଶକୁ ମୂଳମନ୍ତ୍ର କରି ଆସିଥିବା କାର୍ତ୍ତିକ ପାଣ୍ଡିଆନ ନିରନ୍ତର ଭାବେ ବିକାଶ ବିରୋଧୀଙ୍କ ଉଦ୍ୟମକୁ ପଣ୍ଡ କରିଆସିଛନ୍ତି ।