ନୂଆଦିଲ୍ଲୀ, ୩/୧୨: ଆର୍ଜେଣ୍ଟିନା ଫୁଟ୍ବଲ୍ ଷ୍ଟାର ଲିଓନେଲ ମେସି ରେକର୍ଡ ଷଷ୍ଠ ଥର ପାଇଁ ବାଲନ୍ ଡି ଓର୍ ପୁରସ୍କାର ହାସଲ କରିଛନ୍ତି। ଶେଷ ଥର ପାଇଁ ୨୦୧୫ରେ ଏହି ପୁରସ୍କାର ହାସଲ କରିଥିବା ମେସି ସୋମବାର ରାତିରେ ଏହି ପୁରସ୍କାର ହାସଲ କରିଛନ୍ତି। ସୋମବାର ଡୁ ଚାଟେଲେଟ୍ ଥିଏଟରରେ ମେସିଙ୍କୁ ଏହି ପୁରସ୍କାର ପ୍ରଦାନ କରାଯାଇଥିଲା। ବିଗତ ୧୨ ବର୍ଷ ମଧ୍ୟରେ ମେସି ଏବଂ ରୋନାଲ୍ଡୋ ଏହି ପୁରସ୍କାର ୧୧ ଥର ପରସ୍ପର ମଧ୍ୟରେ ବାଣ୍ଟି ନେଇଛନ୍ତି। ଲିଭରପୁଲକୁ ଚାମ୍ପିୟନ୍ସ ଲିଗ୍ ବିଜୟୀ କରାଇଥିବା ଭିର୍ଗିଲ୍ ଭାନ୍ ଡିକ୍ଙ୍କୁ ଦ୍ବିତୀୟ ସର୍ବାଧିକ ଭୋଟ୍ ମିଳିଥିଲା। ସେପ୍ଟେମ୍ବରରେ ମେସିଙ୍କୁ ଫିଫା ପକ୍ଷରୁ ଶ୍ରେଷ୍ଠ ଖେଳାଳି ଭାବରେ ଘୋଷଣା କରାଯାଇଥିଲା।
ସେହିପରି ମହିଳା ବିଭାଗରେ ଆମେରିକୀୟ ଅଧିନାୟିକା ମେଗାନ୍ ରାପିଓନେଙ୍କୁ ବାଲନ୍ ଡି ଓର୍ ପ୍ରଦାନ କରାଯାଇଛି। ଇଂଲଣ୍ଡର ଲୁସି ବ୍ରୋଞ୍ଜଙ୍କୁ ପଛରେ ପକାଇ ବିଶ୍ବକପ୍ ବିଜୟିନୀ ରାପିଓନେ ଏହି ପୁରସ୍କାର ହାସଲ କରିଛନ୍ତି। ରାପିଓନେଙ୍କୁ ମହିଳା ବିଶ୍ବକପ୍ରେ ଗୋଲ୍ଡେନ୍ ବୁଟ୍ ଏବଂ ଗୋଲ୍ଡେନ୍ ବଲ୍ ପୁରସ୍କାର ହାସଲ କରିଥିଲେ। (ଏଜେନ୍ସୀ)
