ଜୟପୁର : ରାଜସ୍ଥାନ ଜୟପୁରର ସହରର ରହୁଥିବା ଭଜନ ଗାୟକ ରାମଜାନ ଖାନ୍ ଓରଫ୍ ମୁନ୍ନା ମାଷ୍ଟରଙ୍କୁ ପଦ୍ମଶ୍ରୀ ପୁରସ୍କାରରେ ସମ୍ମାନିତ କରାଯିବ। ମୁନ୍ନା ମାଷ୍ଟର ଭଗବାନ ଶ୍ରୀକୃଷ୍ଣଙ୍କରେ ଭକ୍ତିଗୀତ ପାଇଁ ବେଶ୍ ଲୋକପ୍ରିୟ। ମୁନ୍ନା ମାଷ୍ଟର ହେଉଛନ୍ତି ପ୍ରଫେସର ଫିରୋଜ ଖାନ୍ଙ୍କ ବାପା। 61ବର୍ଷୀୟ ମୁନ୍ନା ମାଷ୍ଟର ଶ୍ରୀ ଶ୍ୟାମ୍ ସୁରଭି ବନ୍ଦାନ ନାମରେ ଏକ ପୁସ୍ତକ ମଧ୍ୟ ରଚନା କରିଛନ୍ତି। ଫିରୋଜ ବନାରସ ହିନ୍ଦୁ ୟୁନିଭର୍ସିଟିର ସଂସ୍କୃତ ନିକାୟରେ ନିଯୁକ୍ତିକୁ ନେଇ ବେଶ୍ ଚର୍ଚ୍ଚା ଲାଗିଥିଲା । ଫିରୋଜ ଖାନ୍ ନଭେମ୍ବର 5ରେ ବିଏଚ୍ୟୁର ସଂସ୍କୃତ ବିଦ୍ୟା ଧର୍ମ ବିଜ୍ଞାନ (ଏସ୍ଭିଡିଭି) ବିଭାଗରେ ନିଯୁକ୍ତ ହୋଇଥିବାବେଳେ ଫିରୋଜ ଖାନ୍ଙ୍କୁ ବିରୋଧ କରି କିଛି ଛାତ୍ର ଆନ୍ଦୋଳନକୁ କରିଥିଲେ । ଉପରୋକ୍ତ ବିଭାଗରେ ଧର୍ମ, ଶାସ୍ତ୍ର ଏବଂ କର୍ମକାଣ୍ଡ ଆଦି ପଢ଼ାଯାଉଥିବାରୁ କିଛି ଛାତ୍ର ଫିରୋଜଙ୍କ ନିଯୁକ୍ତିକୁ ବିରୋଧ କରିଥିଲେ। ଫିରୋଜ ମୁସଲିମ୍ ସମ୍ପ୍ରଦାୟର ହୋଇଥିବାରୁ ସେ ଏସବୁ ପଢ଼ାଇବା ନେଇ କିଛି ଛାତ୍ର ଆପତ୍ତି କରିଥିଲେ। ଏହାପରେ ଫିରୋଜ କଳା ବିଭାଗରେ ସଂସ୍କୃତ ପଢାଇବା ଲାଗି ନିଯୁକ୍ତି ହୋଇଥିଲେ ।
ଗତକାଲି ଦେଶର ସର୍ବୋଚ୍ଚ ବେସମାରିକ ସମ୍ମାନ ‘ପଦ୍ମ’ ସମ୍ମାନର ଘୋଷଣା କରାଯାଇଥିଲା। ଚଳିତ ଥର ସାତଜଣଙ୍କୁ ଦେଶର ବେସାମରିକ ଦ୍ବିତୀୟ ସର୍ବୋଚ୍ଚ ସମ୍ମାନ ପଦ୍ମବିଭୂଷଣ, 16ଜଣଙ୍କୁ ଦେଶର ବେସାମରିକ ତୃତୀୟ ସର୍ବୋଚ୍ଚ ସମ୍ମାନ ପଦ୍ମଭୂଷଣ ଓ 118ଜଣଙ୍କୁ ଚତୁର୍ଥ ବେସାମରିକ ସର୍ବୋଚ୍ଚ ସମ୍ମାନ ପ୍ରଦାନ କରାଯିବ । (ଏଜେନ୍ସି)