ନୂଆଦିଲ୍ଲୀ : ଭାରତୀୟ ଭାରୋତ୍ତଳିକା ସର୍ବଜିତ୍ କୌର୍ ଚାରି ବର୍ଷ ପାଇଁ ବାସନ୍ଦ ହୋଇଛନ୍ତି । ନିଷିଦ୍ଧ ଡ୍ରଗ୍ସ ସେବନ କାରଣରୁ ନାଡା ପକ୍ଷରୁ ବୁଧବାର ଏହି ବାସନ୍ଦାଦେଶ ଜାରି କରାଯାଇଛି । ଫେବୃୟାରୀ ମାସରେ ବିଶାଖାପାଟନମ୍ରେ ଅନୁଷ୍ଠିତ 34 ତମ ଜାତୀୟ ଭାରୋତ୍ତଳନ ପ୍ରତିଯୋଗିତାରେ ସର୍ବଜିତ୍ କୌର୍ଙ୍କ ନମୂନାରେ ନିଷିଦ୍ଧ ପଦାର୍ଥ ମିଳିଛି । ଏହି ପ୍ରତିଯୋଗିତାରେ 71 କିଗ୍ରା ବର୍ଗରେ ସର୍ବଜିତ୍ ସ୍ବର୍ଣ୍ଣ ପଦକ ହାସଲ କରିଥିଲେ । ସର୍ବଜିତ୍ଙ୍କ ନମୂନାରେ ଡାଇ ହାଇଡ୍ରୋକ୍ସି ଏଲ୍ଜିଡି-4033 ସହିତ ସାର୍ମ ଏବଂ ଅଷ୍ଟ୍ରେଇନ୍ ପରି ନିଷିଦ୍ଧ ପଦାର୍ଥ ମିଳିଥିବା ନେଇ ନାଡା ପକ୍ଷରୁ ସୂଚନା ଦିଆଯାଇଛି । ଉଲ୍ଲେଖଯୋଗ୍ୟ ଯେ, କିଛିଦିନ ପୂର୍ବରୁ 2017 ରାଜ୍ୟଗୋଷ୍ଠୀ ରୌପ୍ୟ ପଦକ ବିଜୟିନୀ ସୀମାଙ୍କୁ ମଧ୍ୟ ନାଡା ପକ୍ଷରୁ ଚାରି ବର୍ଷ ପାଇଁ ବାସନ୍ଦ କରାଯାଇଥିଲା । (ଏଜେନ୍ସୀ)
Tag: nada
ନୂଆଦିଲ୍ଲୀ,28/12 : ନିଷିଦ୍ଧ ଡ୍ରଗ୍ସ ସେବନ କାରଣରୁ ଭାରତୀୟ ଭାରୋତ୍ତଳିକା ସୀମାଙ୍କୁ 4 ବର୍ଷ ପାଇଁ ବାସନ୍ଦ କରାଯାଇଛି । ରାଜ୍ୟଗୋଷ୍ଠୀ କ୍ରୀଡାରେ ରୌପ୍ୟ ପଦକ ବିଜୟିନୀ ସୀମାଙ୍କୁ ନାଡା ପକ୍ଷରୁ 4 ବର୍ଷ ପାଇଁ ବାସନ୍ଦ କରାଯାଇଛି । 34 ତମ ଜାତୀୟ ଚାମ୍ପିୟନ୍ସିପ୍ ସମୟରେ ସୀମାଙ୍କ ନମୂନା ପଜିଟିଭ୍ ସାବ୍ୟସ୍ତ ହୋଇଛି । ସୀମାଙ୍କ ନମୂନାରୁ ହାଇଡ୍ରୋକ୍ସି-4, ମିଥୋକ୍ସି ଟେମୋକ୍ସିଫେନ୍, ଏଷ୍ଟ୍ରୋଜେନ୍ ମଡ୍ୟୁଲାର(ଏସ୍ଇଆର୍ଏମ୍), ମେଟେନୋଲୋନ୍, ଏନୋବୋସ୍ରାମ୍ ଏବଂ ଆର୍ଡ୍ରୋଜେନ୍ ରିସେପ୍ଟର ମଡ୍ୟୁଲାର ମିଳିଥିବା ନେଇ ନାଡା ପକ୍ଷରୁ ସ୍ପଷ୍ଟ କରାଯାଇଛି । ଏହି ସମସ୍ତ ଔଷଧକୁ ଓ୍ବାଡା ପକ୍ଷରୁ 2019ରେ ନିଷିଦ୍ଧ ଘୋଷଣା କରାଯାଇଛି । ରାଜ୍ୟଗୋଷ୍ଠୀ କ୍ରୀଡାରେ ରୌପ୍ୟ ପଦକ ବିଜୟିନୀ ସୀମା ଗୋଲ୍ଡକୋଷ୍ଟ ସିଡବ୍ଲ୍ୟୁଜିର 75 କିଗ୍ରା ବର୍ଗରେ ଷଷ୍ଠ ସ୍ଥାନରେ ରହିଥିଲେ । (ଏଜେନ୍ସୀ)