ଆଜମଗଡ : ଅଯୋଧ୍ୟାରେ ରାମ ମନ୍ଦିର ନିର୍ମାଣ ପାଇଁ ଜନୈକ ମୁସଲିମ ଶ୍ରଦ୍ଧାଳୁ ଏକ ପ୍ରାଚୀନ ମୁଦ୍ରା ଉପହାର ସ୍ବରୂପ ପ୍ରଦାନ କରିଛନ୍ତି । ଆଜମଗଡର ସୟଦ୍ ମହମ୍ମଦ ଇସଲାମ ଅଷ୍ଟଧାତୁରେ ନିର୍ମିତ ଏକ ପ୍ରାଚୀନ ମୁଦ୍ରା ଉପହାର ସ୍ବରୂପ ପ୍ରଦାନ କରିଛନ୍ତି । ଏହି ମୁଦ୍ରାରେ ରାମ, ସୀତା ଏବଂ ହନୁମାନଙ୍କ ଚିତ୍ର ରହିଥିବା ବେଳେ ଏହାର ମୂଲ୍ୟ ଲକ୍ଷାଧିକ ଟଙ୍କା ହେବ । ଆଜମଗଡର ସୀତାରାମ ଅଞ୍ଚଳରେ ବାସ କରୁଥିବା ସୟଦ୍ ନିଜ ପୁରୁଣା ଘରୁ ଏହି ମୁଦ୍ରାଟିକୁ ପାଇଥିଲେ । ନଭେମ୍ବର 30, 2019ରେ ନିଜ ଗ୍ରାମର ଘରୁ ଏହି ମୁଦ୍ରାଟିକୁ ପାଇଥିଲେ । ଖୁବ୍ ଶୀଘ୍ର ଅଯୋଧ୍ୟା ଯାତ୍ରା କରି ରାମ ତୀର୍ଥ କ୍ଷେତ୍ରର ଚେୟାରମ୍ୟାନ୍ ନୃତ୍ୟ ଗୋପାଳ ଦାସଙ୍କୁ ଏହି ମୁଦ୍ରା ପ୍ରଦାନ କରିବେ ବୋଲି ଜଣାଇଛନ୍ତି । ଏହି ଉପହାର ଦେଶର ଅନ୍ୟ ମୁସଲିମଙ୍କୁ ରାମନ୍ଦିର ପାଇଁ ଦାନ କରିବାକୁ ଉତ୍ସାହିତ କରିବ ଏବଂ ଏହାଦ୍ବାରା ଦେଶରେ ସାମ୍ପ୍ରଦାୟିକ ସଦ୍ଭାବନା ଜାରି ରହିବ ବୋଲି ସୟଦ୍ ପ୍ରକାଶ କରିଛନ୍ତି । (ଏଜେନ୍ସି)
