ନୂଆଦିଲ୍ଲୀ: କେନ୍ଦ୍ର ସରକାରର ମନ୍ତ୍ରୀ ତଥା ଜୟନ୍ତ ଚୌଧୁରୀଙ୍କ ରାଷ୍ଟ୍ରିୟ ଲୋକ ଦଳ ପାର୍ଟି କେନ୍ଦ୍ର ଏବଂ ୟୁପି ସରକାରରେ ଏନଡିଏର ସହଯୋଗୀ। ଉଭୟେ ଲୋକସଭା ନିର୍ବାଚନରେ ଏକାଠି ଲଢିଥିଲେ, କିନ୍ତୁ ଆଗାମୀ ନିର୍ବାଚନରେ ବିଜେପିକୁ ଝଟକା ଦେବାକୁ ଆରଏଲଡି ପ୍ରସ୍ତୁତ ହୋଇଛି। ଖୁବ ଶୀଘ୍ର ଜମ୍ମୁ କାଶ୍ମୀରରେ ନିର୍ବାଚନ ହେବାକୁ ଯାଉଛି, ଆରଏଲଡି ମଧ୍ୟ ଏହି ନିର୍ବାଚନରେ ପ୍ରବେଶ କରିଛି। ଏଠାରେ ନିର୍ବାଚନରେ ଆରଏଲଡି ଏକାକୀ ପ୍ରତିଦ୍ୱନ୍ଦ୍ୱିତା କରିବ।
ଜମ୍ମୁ କାଶ୍ମୀର ନିର୍ବାଚନରେ ଆରଏଲଡି ଏବଂ ବିଜେପି ଅଲଗା ହୋଇଯାଇଛନ୍ତି। ବିଶ୍ୱାସ କରାଯାଏ ଯେ, ଆରଏଲଡି ୧୫-୨୦ ବିଧାନସଭା ଆସନରେ ନିର୍ବାଚନ ଲଢିପାରେ। ଏଥିପାଇଁ ଦଳର ସାଧାରଣ ସମ୍ପାଦକ ତ୍ରିଲୋକ ତ୍ୟାଗୀ ୨୩ ତାରକା ପ୍ରଚାରକଙ୍କ ତାଲିକା ପ୍ରକାଶ କରିଛନ୍ତି। ଏଥିମଧ୍ୟରେ ଦଳର ସଭାପତି ଜୟନ୍ତ ଚୌଧୁରୀ, ୟୁପି ର ରାଷ୍ଟ୍ରୀୟ ଲୋକ ଦଳର ସାଂସଦ ଚନ୍ଦନ ଚୌହାନ ଏବଂ ରାଜକୁମାର ସାଙ୍ଗୱାନଙ୍କ ସହ ଛପରୋଲି ବିଧାୟକଙ୍କ ନାମ ରହିଛି।
ଆରଏଲଡି ସାଧାରଣ ସମ୍ପାଦକ କହିଛନ୍ତି ଯେ, ଜମ୍ମୁ କାଶ୍ମୀରରେ କୌଣସି ଦଳ ସହ ଆମର ମେଣ୍ଟ ହେବ ନାହିଁ। ଆମ ଦଳ ବିଜେପି ଠାରୁ ଅଲଗା ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବ। ଯେଉଁଠାରେ ଓବିସି ଏବଂ ପଛୁଆ ବର୍ଗର ଭୋଟର ବହୁ ସଂଖ୍ୟାରେ ଅଛନ୍ତି ସେହି ଆସନଗୁଡିକ ଉପରେ ଆରଏଲଡି ନଜର ରଖିଛି। ଏହା ସହିତ ଦଳର ମୁସଲମାନ ଭୋଟ୍ ବ୍ୟାଙ୍କ ଉପରେ ମଧ୍ୟ ନଜର ରହିଛି। ରାଷ୍ଟ୍ରୀୟ ଲୋକ ଦଳ ପ୍ରବେଶ ପରେ ଜମ୍ମୁ କାଶ୍ମୀରରେ ନିର୍ବାଚନ ଅତ୍ୟନ୍ତ ଆକର୍ଷଣୀୟ ହେବ।
ଗୋଟିଏ ପଟେ ଜମ୍ମୁ କାଶ୍ମୀରରେ ଓମାର ଅବଦୁଲ୍ଲାଙ୍କ ପାର୍ଟି ଏନସି ସହ କଂଗ୍ରେସ ନିର୍ବାଚନ ଲଢୁଥିବା ବେଳେ ଅନ୍ୟ ପଟେ ବିଜେପି ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରୁଛି। ଉଭୟଙ୍କ ମଧ୍ୟରେ କଡ଼ା ପ୍ରତିଯୋଗିତା ହେବ ବୋଲି ବିଶ୍ୱାସ କରାଯାଉଛି। ଏହି ସମୟରେ ମେହବୁବା ମୁଫତିଙ୍କ ପିଡିପି, ସମାଜବାଦି ପାର୍ଟି ଏବଂ ବହୁଜନ ସମାଜବାଦୀ ପାର୍ଟି ପ୍ରତିଦ୍ୱନ୍ଦିତା କରୁଛନ୍ତି। ଏଭଳି ପରିସ୍ଥିତିରେ ଆରଏଲଡି ର ପ୍ରବେଶ ସହିତ ନିର୍ବାଚନ ଯୁଦ୍ଧ ଅଧିକ ଆକର୍ଷଣୀୟ ହେବ।
ପ୍ରକାଶ ଯୋଗ୍ୟ ଯେ, ଦଶ ବର୍ଷ ପରେ ଜମ୍ମୁ କାଶ୍ମୀରର ୯୦ ଟି ବିଧାନସଭା ଆସନରେ ତିନିଟି ପର୍ଯ୍ୟାୟରେ ଭୋଟ୍ ଅନୁଷ୍ଠିତ ହେବ। ପ୍ରଥମ ପର୍ଯ୍ୟାୟରେ ସେପ୍ଟେମ୍ବର ୧୮ ତାରିଖରେ ରାଜ୍ୟର ୨୪ ଟି ବିଧାନସଭା ଆସନରେ ଭୋଟ୍ ଗ୍ରହଣ କରାଯିବ। ସେହିଭଳି ଦ୍ୱିତୀୟ ପର୍ଯ୍ୟାୟରେ ସେପ୍ଟେମ୍ବର ୨୫ ତାରିଖରେ ୨୬ ଟି ବିଧାନସଭା ଆସନରେ ଭୋଟ୍ ଗ୍ରହଣ କରାଯିବ। ତୃତୀୟ ତଥା ଶେଷ ପର୍ଯ୍ୟାୟରେ ଜମ୍ମୁ କାଶ୍ମୀରର ୪୦ ଟି ବିଧାନସଭା ଆସନରେ ଭୋଟ୍ ଗ୍ରହଣ କରାଯିବ। ଅକ୍ଟୋବର ୮ ତାରିଖରେ ନିର୍ବାଚନର ଫଳାଫଳ ଘୋଷଣା କରାଯିବ।
