Tag: SoumyaRanjanPatnaik

କେଦାର ମିଶ୍ର 

ଓଡିଶାରେ ସର୍ବାଧିକ ଥର ଭୁଲ ରାଜନୈତିକ ନିଷ୍ପତ୍ତି ନେବାରେ ସୌମ୍ୟ ରଞ୍ଜନ ପଟ୍ଟନାୟକଙ୍କର ବିଶେଷ ଖ୍ୟାତି ରହିଛି। ସେ ଓଡିଶାର ପ୍ରାୟ ସବୁ ରାଜନୈତିକ ଦଳରେ କିଛି କିଛି ଦିନ ରହି ସାରିଛନ୍ତି। କଂଗ୍ରେସ, ବିଜେପି, ଏନସିପି ଓ ବିଜେଡି ଭଳି ଦଳରେ ତାଙ୍କର ଯୋଗଦାନ ଯେତିକି ଗୁରୁତ୍ୱପୂର୍ଣ୍ଣ ରହିଥିଲା, ସେସବୁ ଦଳକୁ ଛାଡିବାରେ ମଧ୍ୟ ସେ ଇତିହାସ ତିଆରି କରିଛନ୍ତି।ସେ ନିଜେ ଏକ ଆଞ୍ଚଳିକ ଦଳ ଗଢି ତାକୁ ଭାଙ୍ଗି ମଧ୍ୟ ସାରିଛନ୍ତି। ଏବେ ଅବଶ୍ୟ ସେ ବିଜେଡିରେ ଅଛନ୍ତି ଓ ବିଭିନ୍ନ ସଭା ସମିତିରେ ଆଜି ମଧ୍ୟ ବିଜେଡି ମୁଖିଆ ନବୀନ ପଟ୍ଟନାୟକଙ୍କର ଭୂୟସୀ ପ୍ରଶଂସା କରୁଛନ୍ତି। ତେବେ ସୌମ୍ୟ ବାବୁଙ୍କର ଲେଖାଲେଖି ଓ ତାଙ୍କର ସାଧାରଣ ସଭା ଗୁଡିକର ଭାଷଣରେ ଏବେ ବିଜେଡି ପ୍ରତି ମୋହଭଙ୍ଗର ଆଭାସ ସ୍ପଷ୍ଟ ବାରି ହୋଇପଡୁଛି। ତାଙ୍କ ଅଧୀନରେ ରହିଥିବା ଓଡିଶାର ସର୍ବାଧିକ ପ୍ରସାରିତ ଖବର କାଗଜ ସମ୍ବାଦ ଓ ଟେଲିଭିଜନ ଚାନେଲ କନକ ଟିଭିରେ ସରକାର ବିରୋଧୀ ଓ ସରକାର ସପକ୍ଷବାଦୀ ଖବରର ତାଳମେଳ ଏବେ ଆଉ ଦେଖିବାକୁ ମିଳୁନାହିଁ।

ବହୁ ଦଳ ବୁଲି ବୁଲି ସେ ଯେତେବେଳେ ବିଜୁ ଜନତା ଦଳରେ ଯୋଗଦେଲେ ଓ ସିଧା ସଳଖ ରାଜ୍ୟସଭାକୁ ନିର୍ବାଚିତ ହେଲେ, ସେତେବେଳେ ଆଶା କରାଯାଉଥିଲା ଯେ, ଏବେ ବୋଧେ ସେ ଆଉ ବିଚଳିତ ହେବେନାହିଁ। ୧୫ ବର୍ଷରୁ ଅଧିକ ସମୟ ନବୀନ ପଟ୍ଟନାୟକଙ୍କର ତୀବ୍ର ସମାଲୋଚକ ରହି ଆସିଥିବା ସୌମ୍ୟ ବାବୁ, ହଠାତ ରୂପ ବଦଳ କରିବା ଅନେକଙ୍କୁ ଆଶ୍ଚର୍ୟ କରି ଦେଇଥିଲା। ଏପରିକି ତାଙ୍କର ଘନିଷ୍ଠ ସହଯୋଗୀମାନେ ମଧ୍ୟ ସୌମ୍ୟ ବାବୁଙ୍କୁ ବିଜେଡିରେ ଦେଖି ଚକିତ ହୋଇ ପଡିଥିଲେ।

ବିଜେଡିରେ ତାଙ୍କର ଅବସ୍ଥାନକୁ ଦୁଇ ବର୍ଷ ମାତ୍ର ହୋଇଛି। ଦୁଇ ବର୍ଷ ଭିତରେ ସେ ରାଜ୍ୟସଭା କୁ ଯାଇ, ସେଠାରୁ ଇସ୍ତଫା ଦେଇ, ଅବିକା ବିଧାନସଭାର ସଦସ୍ୟ। ଦୀର୍ଘ ବର୍ଷ ଧରି ନିର୍ବାଚନୀ ରାଜନୀତିରେ ପରାଜୟ ଭୋଗିଥିବା ସୌମ୍ୟ ବାବୁଙ୍କୁ ପରିଶେଷରେ ଏକ ବିରାଟ ବିଜୟ ଉପହାର ସ୍ଵରୂପ ମିଳିଛି। ଖଣ୍ଡପଡାରେ ତାଙ୍କର ବିପୁଳ ବିଜୟ, ହୁଏତ ଗୋଟେ ବାର୍ତ୍ତା ଦେଇଥିଲା ଯେ ତାଙ୍କୁ ରାଜ୍ୟ ମନ୍ତ୍ରୀ ମଣ୍ଡଳରେ ସ୍ଥାନ ମିଳିପାରେ। ନିର୍ବାଚନ ପରେ ପରେ ସୌମ୍ୟଙ୍କ ମନ୍ତ୍ରୀପଦ ଓ ତାଙ୍କୁ ବାଚସ୍ପତି କରାଯାଇପାରେ ବୋଲି ଉଡା ଖବର ଘୂରିବା, ତାଙ୍କ ଲାଗି ସବୁଠୁ ବଡ ଅଡୁଆ ପାଲଟିଗଲା। ମନ୍ତ୍ରୀମଣ୍ଡଳରେ ସୌମ୍ୟଙ୍କ ଯୋଗଦାନ ନିଶ୍ଚିତ ବୋଲି ଯେଉଁ ପ୍ରଚାର ଚାଲିଥିଲା, ସେଥିରେ ବିଜେଡି ମୁଖିଆ ନବୀନ ପଟ୍ଟନାୟକ ପାଣି ଢାଳିଦେଲେ। ତାପରେ ସୌମ୍ୟଙ୍କ ରାଜନୀତିରେ ପୁରୁଣା ଅଭ୍ୟାସର ପୁନରାବୃତ୍ତି ଘଟୁଛି।

ଏବେ ସୌମ୍ୟବାବୁ ତାଙ୍କର ପୁରୁଣା ସଂପାଦକୀୟ ସ୍ତମ୍ଭ “ଆମ ଘରର ହାଲଚାଲ” ନିୟମିତ ଲେଖିବା ଆରମ୍ଭ କରିଛନ୍ତି। ଜଣେ ବିଚକ୍ଷଣ ଲେଖକ ଓ ସମ୍ପାଦକ ଭାବରେ ତାଙ୍କର ପ୍ରତିଭା ରହିଛି, ହେଲେ ଏହି ପ୍ରତିଭା ତାଙ୍କ ରାଜନୈତିକ ଜୀବନର ସବୁଠୁ ବଡ ଜଞ୍ଜାଳ ହେବା ଆରମ୍ଭ କରିଛି। ତାଙ୍କ ସଂପାଦକୀୟ ଅଗ୍ରଲେଖ ଗୁଡିକୁ ନେଇ ବିଜେପି ଓ ବିଜେପିର ପୃଷ୍ଠପୋଷକତାରେ ଚାଲିଥିବା କେତେକ ଗଣମାଧ୍ୟମ, ଏବେ ବଢିଆ ପ୍ରସଙ୍ଗ ପାଇ ଯାଇଛନ୍ତି। ଏଠି ଉଲ୍ଲେଖଯୋଗ୍ୟ ଯେ ୨୦୧୬-୧୭ ରେ ପୂର୍ବତନ ସାଂସଦ ବୈଜୟନ୍ତ ପଣ୍ଡାଙ୍କ ଲେଖା ଗୁଡିକୁ ବିଜେପି ଠିକ ଏଭଳି ବ୍ୟବହାର କରୁଥିଲା। ନବୀନଙ୍କ ବିରୋଧରେ ବିଜେଡ଼ିର ଜଣେ ବିଧାୟକଙ୍କ ଲେଖାରୁ ଜୀରା ରୁ ଶିରା କାଢିବାର ସୁଯୋଗ ଏବେ ବିଜେପି ନେଉଛି। ନେବା ସ୍ଵାଭାବିକ ମଧ୍ୟ। ଜଣେ ସମ୍ପାଦକ ଭାବରେ ସୌମ୍ୟ ବାବୁ ସରକାରର ସ୍ତାବକ ହୋଇ ପାରିବେ ନାହିଁ। ଏକ ସନ୍ତୁଳିତ ମତ ରଖିବାକୁ ଯାଇ ତାଙ୍କୁ ସରକାରକୁ କିଛିଟା ସମାଲୋଚନା ମଧ୍ୟ କରିବାକୁ ପଡିବ। ବାସ, ସେଇଠି ରହିଛି ଅସଲ ସମସ୍ୟା। ଆଜିକାଲିର ରାଜନୀତିରେ ସବୁକିଛି କଳା ନଚେତ ଧଳା। ମଝାମଝି ବୋଲି କିଛି ନାହିଁ। ଏବେ ବିଜେଡି ଭିତରେ ସୌମ୍ୟରଞ୍ଜନ ସବୁଠୁ ମୁଣ୍ଡବିନ୍ଧା ବୋଲି ଏକ ଧାରଣା କ୍ରମେ ସୃଷ୍ଟି ହୋଇ ଚାଲିବ ଓ ଏହାର ଆଧାରରେ ଅଳ୍ପ କିଛିମାସ ବା ବର୍ଷ  ପରେ ସୌମ୍ୟଙ୍କୁ ବିଜେଡ଼ିରୁ ବିଦା କରିବାର ବାଟ ପରିଷ୍କାର ହୋଇଯିବ।

ସୌମ୍ୟ ନିଜେ ଏ ପ୍ରକାର ଘଟୁ ବୋଲି ଚାହୁଁଛନ୍ତି ନା ତାଙ୍କ ବିରୋଧରେ ତାଙ୍କ ଲେଖାକୁ ପ୍ରୟୋଗ କରାଯାଉଛି, ତାହା ମଧ୍ୟ ଏକ ଜଟିଳ ପ୍ରଶ୍ନ। ସ୍ଵଭାବତଃ ଅସ୍ଥିର ସୌମ୍ୟରଞ୍ଜନଙ୍କ ରାଜନୀତିରେ ବିଜେଡି ପ୍ରତି ମୋହଭଙ୍ଗ ହେବା ଓ ଅନ୍ୟ ଦଳ ପ୍ରତି ଆସକ୍ତି ବଢିବା, କିଛି ନୂଆ କଥା ନୁହେଁ। ତେବେ ବିଜେଡିରେ ସୌମ୍ୟ ବାବୁ ଆଉ କେତେଦିନ ରହି ପାରୁଛନ୍ତି, ତାହାର ଅବଗଣନା, କେହି କେହି ଆରମ୍ଭ କରି ଦେଲେଣି!

ସମୀକ୍ଷା ବ୍ୟୁରୋ

ଆମେ କହୁଛୁ ବିଧାନସଭା ଚାଲିଥିବା ବେଳର ଏକ ଘଟଣା। ହଠାତ୍ ଗୃହ ଭିତରୁ ଜଣେ ଟାଣୁଆ ବିଜେଡି ବିଧାୟକ ରାଗ ତମତମ ହୋଇ ବାହରକୁ ବାହାରି ଆସିଲେ। ତାଙ୍କର ଏପରି ଅବସ୍ଥା ଦେଖି ସାମ୍ବାଦିକମାନେ ତାଙ୍କ ଚାରିପଟେ ଘେରି ଗଲେ। ହେଲେ ସେ କିଛି କହିଲେ ନାହିଁ। ସିଧା ଜଣେ ମନ୍ତ୍ରୀଙ୍କ ଚ୍ୟାମ୍ବର ଭିତରକୁ ପଶିଯାଇ ଲଥ କରି ବସିଗଲେ। ସେତେବେଳେ ସେ ଚ୍ୟାମ୍ବରରେ ମନ୍ତ୍ରୀ ନ ଥିଲେ। ଏକାକି ବସିଥିବାର ଦେଖି ତାଙ୍କ ପାଖକୁ ଆମେ ଗଲୁ। ପଚାରିଲୁ ଭାଇ କଣ ହେଲା କି ? ସେ ରାଗ ତମତମ ହୋଇ କହିଲେ ଯେ, ସମ୍ବାଦରେ ଛପାଯାଇଥିବା ନାବାଳିକା ନିର୍ଯ୍ୟାତନ ରିପୋର୍ଟକୁ ନେଇ ବର୍ତ୍ତମାନ ବିରୋଧୀ ଘେରି ଗଲେଣି। ରାଜ୍ୟରେ ଏହି ନିର୍ଯ୍ୟାତନର ସ୍ଥିତି କଣ ଅଛି ତାହାର ଉତ୍ତର ମୁଖ୍ୟମନ୍ତ୍ରୀ ଦିଅନ୍ତୁ ବୋଲି ଦାବୀ କରୁଛନ୍ତି। ଗୃହ ବାରମ୍ବାର ମୁଲତବି ଘୋଷଣା ହେଲାଣି। ଆଉ କେଉଁ ଖବରକାଗଜରେ ବାହାରିଥିଲେ ଅଲଗା କଥା। ହେଲେ ଖୋଦ ସୌମ୍ୟବାବୁ ଖବରକାଗଜରେ ଏ କଥା ବାହାରିଲା। ସରକାରଙ୍କୁ ଅଡୁଆ ହେବା ପରି କିପରି ରିପୋର୍ଟ ଛାପୁଛନ୍ତି ଦେଖୁ ନାହାଁନ୍ତି । ସେ ଏପରି ଅବସ୍ଥା କରିଦେଲେଣି ଯେ, ଏପଟେ ସରକାରଙ୍କୁ ଅଡୁଆ ସେପଟେ ଦଳକୁ ମଧ୍ୟ ଅଡୁଆ ହେଉଛି।

ଆମେ ପଚାରିଲୁ ସୌମ୍ୟବାବୁ ହେଉଛନ୍ତି ଜଣେ ମିଡିଆ ଲୋକ, ସେ ବିଜେଡିରେ ଯୋଗଦେବେ ବୋଲି କଣ ତାଙ୍କ କାଗଜ ମଧ୍ୟ ଆପଣଙ୍କ ଦଳରେ ସାମଲି ହେବ କି? ସେ ଚଟାପଟ କହିଲେ, କାହିଁକି ସାମିଲ ହେବ ନାହିଁ, ତାଙ୍କର ପେପର ପାଇଁ ତ ତାଙ୍କୁ ଦଳରେ ମିଶାଗଲା, ରାଜ୍ୟସଭା ସଦସ୍ୟ କରାଗଲା, ବିଧାୟକ କରାଗଲା। ସେ ଯେ ଜଣେ ଭଲ ନେତା, ସେଥିପାଇଁ ତ ତାଙ୍କୁ ଦଳରେ ମିଶାଯାଇ ନାହିଁ। ତାଙ୍କ ରାଜନୈତିକ ଜୀବନରେ ସେ କେତେଥର ଜିତିକି ଆସିଛନ୍ତି କି ? ବିଜେଡିରେ ଆସିବା ପରେ ସବୁ ପଦପଦବୀ ଦିଆଗଲା, ବିଜେଡି ବ୍ରାଣ୍ଡରେ ସେ ଜିତିକି ଆସିଲେ। ଦଳ ଏତେସବୁ ତ୍ୟାଗ କରିବା ପରେ ସେ କାହିଁକି ସରକାରଙ୍କ ବିରୋଧରେ ଏପରି ଲେଖୁଛନ୍ତି। ଏହା କଣ ଠିକ୍ କଥା!

ତାପରଦିନ ମଧ୍ୟ ସେହି କଥା। ସମ୍ବାଦର ଆଉ ଏକ ରିପୋର୍ଟକୁ ନେଇ ବିଧାନସଭାରେ ତୁମ୍ବି ତୋଫାନ ହେଲା। ଆମେ ସେ ବିଧାୟକଙ୍କୁ ଖୋଜିଲୁ। ଭାଗ୍ୟବସତଃ ଅପରାହ୍ନରେ ତାଙ୍କର ଦେଖା ମିଲିଲା। ପଚାରିଲୁ ଆଜ୍ଞା ଆଜି ମଧ୍ୟ ସମ୍ବାଦର ଏକ ରିପୋର୍ଟକୁ ନେଇ ଗୃହରେ ଝଡ ସୃଷ୍ଟି ହୋଇଛି। ସେତିକି ନୁହେଁ, ସମ୍ବାଦରେ ବାହାରିଛି ଯେ, ତାଙ୍କ ଖବରକୁ ନେଇ ଗୃହରେରେ  ତୁମ୍ବି ତୋଫାନ। ସେଥିପାଇଁ ସେମାନେ ବେଶ୍ ଖୁସି। କଣ ଘଟଣାଟି ଟିକେ କହୁ ନାହାଁନ୍ତି। ସେ ହସିଦେଲେ, କହିଲେ ଆପଣ ସବୁ ଜାଣିଛନ୍ତି। ମୋତେ ବକରା ବନାଇବାକୁ ଚାହୁଛନ୍ତି। ଆମେ କହିଲୁ ନାହଁ ଆଜ୍ଞା, ପ୍ରକୃତରେ ଭିତର କଥାଟା କଣ ଆମେ ଜାଣି ନାହୁଁ। ଯାହା ଚର୍ଚ୍ଚା ଚାଲିଛି ଯେ ନବୀନବାବୁ ତାଙ୍କୁ ମନ୍ତ୍ରୀ କଲେ ନାହିଁ ବୋଲି ସେ କୁଆଡେ ଖପ୍ପା ହୋଇଛନ୍ତି। ସେ ଉତ୍ତର ଦେଲେ ଆପଣ ତ ଜାଣିଛନ୍ତି ମୋତେ କାହିଁକି ପଚାରୁଛନ୍ତି। ନାହିଁ ଆଜ୍ଞା, ଆମର କହିବା କଥା ଯେ, ବର୍ତ୍ତମାନ ଆପଣଙ୍କ ସୁପ୍ରିମୋ ଏ କଥା ଜାଣିସାରିବେଣି। ସେ ବର୍ତ୍ତମାନ କଣ କିଛି ପଦକ୍ଷେପ ନେଉଛନ୍ତି କି ନା ନାହିଁ। ଆମର ଏପରି ପ୍ରଶ୍ନରେ ସେ ଟିକିଏ ଅପ୍ରସ୍ତୁତ ହୋଇଗଲେ। କହିଲେ କେଜାଣି ଆମେ ମଧ୍ୟ ଜାଣିପାରୁ ନାହୁଁ କଣ ଚାଲିଛି।

ଆଜ୍ଞା, ସୌମ୍ୟବାବୁ  ଯେତେବେଳେ ଆମ ଦଳରେ ମିଶିଲେ, ମୋ ପରି କେତେକ ନେତା ଏହି ନିଷ୍ପତିକୁ ପସନ୍ଦ କରି ନ ଥିଲୁ। ଏପରିକି ତାଙ୍କୁ କହିଥିଲୁ ଯେ, ଆପଣ ତାଙ୍କୁ ଦଳରେ ମିଶାଉଛନ୍ତି ଠିକ୍ ଅଛି, ହେଲେ ସେ ଦଳ କଥା ମାନି ଚଳିବେ ସେ ବିଶ୍ବାସ ରଖନ୍ତୁ ନାହିଁ। ସେତେବେଳେ ଆମ କଥା କେତେକଙ୍କୁ  ଗନ୍ଧାଇଥିଲା। ହେଲେ ଏବେ ଆମ ସୁପ୍ରିମୋ ବୁଝୁଥିବେ। ଏପରି ଲୋକଙ୍କୁ ଆଣି ଦଳର ତ କୌଣସି ଲାଭ ହେଉ ନାହିଁ ବରଂ କ୍ଷତି ହେବାରେ ଲାଗିଛି।

ବିଧାନସଭା ସରିବାର କିଛି ଦିନ ପରେ ସେ ବିଧାୟକଙ୍କୁ ଭୁବେନଶ୍ବରର ଏକ କାର୍ଯ୍ୟକ୍ରମରେ ଦେଖିବାକୁ ମିଳିଲା। ତାଙ୍କୁ ଦେଖି ସେହି କଥା ପୁଣି ଥରେ ପଚାରିବାକୁ ଇଚ୍ଛା ହେଲା। ଆଜ୍ଞା ଦଳ କେମିତ ଚାଲିଛି ବୋଲି ପଚାରି ଦେଲୁ। ସେ କହିଲେ ଜାଣିଛନ୍ତି ସୌମ୍ୟବାବୁ ନୟାଗଡରେ ଏକ ଦଳ କରି ଯୁବକମାନଙ୍କୁ ଶପଥ କରାଉଛନ୍ତି। ଆମେ କହିଲୁ ହଁ ଏଥିରେ କିଛି ଅସୁବିଧା ହେଲା କି ?  ସେ ହସି ହସି କହିଲେ ହୋଇନି, ଅସୁବିଧା କରିବାକୁ ବର୍ତ୍ତମାନ ସୌମ୍ୟବାବୁ ରାସ୍ତା ତିଆରି କରୁଛନ୍ତି। ଆପଣ ସୌମ୍ୟବାବୁଙ୍କୁ ବୋଧହୁଏ ଜାଣି ନାହାଁନ୍ତି। ଆପଣ ସେଦିନ ବିଧାନସଭାରେ କହୁଥିଲେ ଯେ, ସୌମ୍ୟବାବୁଙ୍କୁ ମନ୍ତ୍ରୀ କରାଗଲା ନାହିଁ ବୋଲି ସେ ତାଙ୍କ କାଗଜରେ ସରକରାଙ୍କୁ ଅଡୁଆରେ ପକାଉଛନ୍ତି। କଥାଟି ସେତିକିରେ ସରି ନାହିଁ। ସୌମ୍ୟବାବୁ ପୁରା ମୁଖ୍ୟମନ୍ତ୍ରୀ ହେବାର ସ୍ବପ୍ନ ଦେଖିସାରିଲେଣି।

ତାଙ୍କ କାର ପାଖକୁ ଚାଲିଚାଲି ଯିବା ବେଳେ ସେ ଆଉ କିଛି କଥା କହିଲେ, ଯାହା ଆମକୁ ଆଶ୍ଚର୍ଯ୍ୟ କରିଥିଲା। ସେ କହିଲେ, ଗତ ନିର୍ବାଚନରେ ସୌମ୍ୟବାବୁ ତାଙ୍କର ବହୁ ପ୍ରାର୍ଥୀଙ୍କୁ ଟିକେଟ ଦେବା ପାଇଁ ଲବି କରିଥିଲେ। କାରଣ ହେଲା ତାଙ୍କ ଲୋକ ଜିତିକି ଆସିଲେ ବିଜେଡି ମାଧ୍ୟମରେ ତାଙ୍କ ବ୍ୟକ୍ତିଗତ ରାଜନୀତିକୁ ସୁଦୃଢ କରିଦେବେ। ହେଲେ ଭାଗ୍ୟ ଭଲ ନବୀନବାବୁ ଏ ସବୁ ଜାଣିପାରି ତାହା କରାଇ ଦେଲେ ନାହିଁ। ଆପଣ ବିଶ୍ବାସ କରିବେ ନାହିଁ, ବର୍ତ୍ତମାନ ସୌମ୍ୟବାବୁ ବିଜେଡିକୁ କିପରି କରାୟତ କରିବେ ସେ ନେଇ ଖାଲି ଦିନରାତି ଚିନ୍ତା କରୁଛନ୍ତି। ନବୀନବାବୁ ଅବସର ନେଲେ ସେ ଦଳର ମୁଖିଆ ହେବେ ବୋଲି ତାଙ୍କର ବଡ ଇଚ୍ଛା ଅଛି।

ଏକଥା ଶୁଣି ଆମେ ହତବାକ ହେଲୁ। ସୋମ୍ୟବାବୁ କଣ ଭିତରେ ଭିତରେ ଏତେ କଥା ଭାବି ସାରିଲେଣି। ତେବେ ଭବିଷ୍ୟତ କଣ ହେବ ବୋଲି ଆମେ ତାଙ୍କୁ ପଚାରିଲୁ। ସେ କହିଲେ କିଛି ନାଇଁ। ଏମିତି ବହୁ ନେତା ଅଛନ୍ତି ଯେଉଁମାନେ ଦଳ ଆରମ୍ଭରୁ ମୁଖ୍ୟମନ୍ତ୍ରୀ ହେବାର ସ୍ବପ୍ନରେ ବିଭୋର ହୋଇ ଦଳରୁ ତଡା ଖାଇଛନ୍ତି। ଏବେ ଘରେ ବସି ରହିଛନ୍ତି। ସେମିତି ତାଙ୍କର ଅବସ୍ଥା ହେବ। ସତକଥା ଆଜ୍ଞା, ଆମ ଦଳ ସୌମ୍ୟବାବୁଙ୍କୁ କୋଳେଇ ନେଇ ମସ୍ତବଡ ଭୁଲ କରିଛି। ଦେଖନ୍ତୁ ଆଗକୁ ସେ ଆହୁରି କଣ କରୁଛନ୍ତି। ଦିନେ ନା ଦିନେ ସେ ଦଳ ପାଇଁ ସମସ୍ୟା ସୃଷ୍ଟି କରିବେ। ଏପରି କଥା କହି କହି ସେ ତାଙ୍କ କାର ଭିତରକୁ ପଶି ଆମକୁ ବାଏ କଲେ। ହେଲେ ତାଙ୍କ କଥାର କେତେ ଗୁରତ୍ବ ରହିଛି ତାହା ଠିକରେ ବୁଝି ହେଲା ନାହିଁ।