ଭୁବନେଶ୍ୱର: ଓଡ଼ିଶାରେ ପ୍ରଧାନମନ୍ତ୍ରୀ ଆବାସ ଯୋଜନାକୁ ନେଇ ଗତ କିଛିଦିନ ହେଲା ରାଜ୍ୟ ବିଜେପି ନେତାମାନଙ୍କଠୁ ନେଇ କେନ୍ଦ୍ରମନ୍ତ୍ରୀଙ୍କ ପର୍ଯ୍ୟନ୍ତ ସମସ୍ତେ ଓଡ଼ିଶାବାସୀଙ୍କୁ ଭ୍ରମିତ କରି ଆସୁଛନ୍ତି। ଅତୀତରେ ଓଡ଼ିଶାର ବିଜେପି ସାଂସଦ ଏବଂ ଓଡ଼ିଶାରୁ ଯାଇଥିବା ଜଣେ ନିର୍ଦ୍ଦିଷ୍ଟ କେନ୍ଦ୍ରମନ୍ତ୍ରୀ ଷଡ଼ଯନ୍ତ୍ର କରି ଲକ୍ଷ ଲକ୍ଷ ଗରିବ ଓଡ଼ିଆ ହିତାଧିକାରୀଙ୍କୁ ତିନି ବର୍ଷ କାଳ ଆବାସ ଯୋଜନାରେ ଘର ଖଣ୍ଡେ ପାଇବାରୁ ବଞ୍ଚିତ କରିଥିବାବେଳେ ଏବେବି ଏଭଳି ଷଡ଼ଯନ୍ତ୍ର ଜାରି ରଖିଛନ୍ତି। ଆଜି ଶଙ୍ଖ ଭବନରେ ଆୟୋଜିତ ଏକ ସାମ୍ୱାଦିକ ସମ୍ମିଳନୀରେ ଓଡ଼ିଶାବାସୀଙ୍କ ସ୍ୱାର୍ଥ ବିରୋଧୀ ଏହି କେନ୍ଦ୍ରମନ୍ତ୍ରୀ ଏବଂ ବିଜେପି ସାଂସଦମାନଙ୍କ ଷଡ଼ଯନ୍ତ୍ରର ପର୍ଦ୍ଦାଫାସ୍ କରିଛି ବିଜେଡି।
ଏହି ସାମ୍ୱାଦିକ ସମ୍ମିଳନୀକୁ ସମ୍ୱୋଧିତ କରି ବିଜେଡି ମୁଖପାତ୍ର ଗୌତମବୁଦ୍ଧ ଦାସ କହିଲେ ଯେ ଖାଦ୍ୟ ଓ ବସ୍ତ୍ର ଭଳି ବାସଗୃହ ହେଉଛି ମଣିଷର ଏକ ମୌଳିକ ଆବଶ୍ୟକତା। ପ୍ରତ୍ୟେକ ଲୋକର ସ୍ୱପ୍ନ ଥାଏ ନିଜ ପାଇଁ ଘରଟିଏ ତୋଳିବ। ମାତ୍ର ବିଡ଼ମ୍ୱନା ହେଲା, ଯେତେବେଳେ ଓଡ଼ିଶାର ଗରିବ, ଆଦିବାସୀ ଏବଂ ଅନୁସୂଚିତ ଜନଜାତିର ୧୫ ଲକ୍ଷ ଲୋକ ପ୍ରଧାନମନ୍ତ୍ରୀ ଆବାସ ଯୋଜନାରେ ନିଜ ମୁଣ୍ଡ ଉପରେ ଛାତଟିଏ ଆବଶ୍ୟକ କରୁଥିଲେ, ଏହାକୁ ବନ୍ଦ କରିବା ଲାଗି ଓଡ଼ିଶାରୁ ଦିଲ୍ଲୀ ଯାଇଥିବା ବିଜେପିର ସାଂସଦମାନେ ମିଳିତ ହୋଇ ଷଡ଼ଯନ୍ତ୍ର କରିଥିଲେ। ଏଥିପାଇଁ ସେମାନେ କେନ୍ଦ୍ର ଗ୍ରାମୀଣ ବିକାଶ ମନ୍ତ୍ରୀଙ୍କୁ ଭେଟି ଓଡ଼ିଶାକୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ନ ଦେବାକୁ ଚାପ ପକାଇଥିଲେ। ଶେଷରେ ସେମାନଙ୍କର ଏହି ଷଡ଼ଯନ୍ତ୍ର ସଫଳ ମଧ୍ୟ ହେଲା ଏବଂ ଦୀର୍ଘ ୩ ବର୍ଷ କାଳ ଓଡ଼ିଶାକୁ ଘର ମିଳିବା ବନ୍ଦ ହୋଇଗଲା।
ତେବେ ଓଡ଼ିଶାବାସୀଙ୍କ ଆଗରେ ଏବେ ସେମାନଙ୍କର ଏହି ଷଡ଼ଯନ୍ତ୍ରର ପର୍ଦ୍ଦାଫାସ୍ ହୋଇଯାଇଛି। ଓଡ଼ିଶାର ବିଜେପି ସାଂସଦମାନେ ଏବଂ ଓଡ଼ିଶାର ସ୍ୱାର୍ଥ ବିରୋଧରେ ସଦାବେଳେ କାର୍ଯ୍ୟ କରୁଥିବା ଜଣେ ନିର୍ଦ୍ଦିଷ୍ଟ ଓଡ଼ିଆ କେନ୍ଦ୍ରମନ୍ତ୍ରୀ ନିକଟରେ ଓଡ଼ିଶା ଗସ୍ତରେ ଆସିଥିବା ତାଙ୍କ ଦଳର ରାଷ୍ଟ୍ରୀୟ ସଭାପତିଙ୍କୁ ଏ ବାବଦରେ ସମ୍ପୂର୍ଣ୍ଣ ଭୁଲ ତଥ୍ୟ ଦେଇଛନ୍ତି।
ପ୍ରଧାନମନ୍ତ୍ରୀ ଆବାସ ଯୋଜନାରେ ଓଡ଼ିଶା ପାଇଁ ମାତ୍ର ୮ ଲକ୍ଷ ଘର ମଞ୍ଜୁର ହୋଇଥିବାବେଳେ ୭୫ ଲକ୍ଷ ଘର ମଞ୍ଜୁର ହୋଇଛି ବୋଲି କଳାହାଣ୍ଡିର ଏକ ଜନସଭାରେ ବିଜେପିର ରାଷ୍ଟ୍ରୀୟ ସଭାପତିଙ୍କ ମୁହଁରେ କୁହାଇଛନ୍ତି। ଏଭଳି ଭୁଲ ତଥ୍ୟ ଦେଇ ଏହି ନିର୍ଦ୍ଦିଷ୍ଟ କେନ୍ଦ୍ରମନ୍ତ୍ରୀ ଏବଂ ଓଡ଼ିଶା ବିଜେପିର ସାଂସଦମାନେ ରାଷ୍ଟ୍ରୀୟ ସଭାପତିଙ୍କୁ ଅତ୍ୟନ୍ତ କଠିନ ଓ ଲଜ୍ଜାଜନକ ସ୍ଥିତିକୁ ଠେଲି ଦେଇଛନ୍ତି।
ଓଡ଼ିଶାର ବିଜେପି ସାଂସଦ ଏବଂ ଏହି ନିର୍ଦ୍ଦିଷ୍ଟ କେନ୍ଦ୍ରମନ୍ତ୍ରୀଙ୍କ ଏଭଳି ଷଡ଼ଯନ୍ତ୍ର ସତ୍ତ୍ୱେ ଓଡ଼ିଶା ସରକାର ଏବଂ ଓଡ଼ିଶାର ବିଜେଡି ସାଂସଦମାନଙ୍କ କ୍ରମାଗତ ଭାବେ ଚାପ ଫଳରେ ପ୍ରାୟ ୩ ବର୍ଷ ପରେ କେନ୍ଦ୍ର ସରକାର ୧୫ ଲକ୍ଷ ଜାଗାରେ ୮ ଲକ୍ଷ ଘର ମଞ୍ଜୁର କଲେ। ତେଣୁ ଘର ପାଇବାରୁ ବଞ୍ଚିତ ହେବାକୁ ଯାଉଥିବା ୭ ଲକ୍ଷ ହିତାଧିକାରୀ ଏବେ ଯିବେ କୁଆଡ଼େ ବୋଲି ଶ୍ରୀ ଦାସ ପ୍ରଶ୍ନ କରିଥିଲେ।
ସେ କହିଥିଲେ ଯେ, ଓଡ଼ିଶାବାସୀଙ୍କ ଭୋଟରେ ନିର୍ବାଚିତ ହୋଇଥିବା ବିଜେପି ସାଂସଦମାନେ ଏ ନେଇ ଚିନ୍ତା କରିବା ଉଚିତ। ଯେତେବେଳେ ଓଡ଼ିଶା ସରକାର ଏହି ବଞ୍ଚିତ ହିତାଧିକାରୀମାନଙ୍କୁ ଘର ଯୋଗାଇବା ଲାଗି ପ୍ରବଳ ଚେଷ୍ଟା କରୁଛନ୍ତି, ଏବେ ସେମାନେ ପୁଣିଥରେ ଏହାକୁ ବନ୍ଦ କରିବାକୁ ଷଡ଼ଯନ୍ତ୍ର ଚଳାଇଛନ୍ତି। ଗ୍ରାମୀଣ ଗୃହ ନିର୍ମାଣ କ୍ଷେତ୍ରରେ ଓଡ଼ିଶା ଶ୍ରେଷ୍ଠ ପ୍ରଦର୍ଶନ କରି କେନ୍ଦ୍ର ସରକାରଙ୍କ ଦ୍ୱାରା ପୂର୍ବରୁ ପୁରସ୍କୃତ ହୋଇଛି। ଏଭଳି ଉତ୍ତମ ପ୍ରଦର୍ଶନ ଲାଗି ଓଡ଼ିଶା ଆବାସ ଯୋଜନାରେ ଅଧିକ ଘର ପାଇବାକୁ ହକଦାର। ମାତ୍ର ଦୁର୍ଭାଗ୍ୟଜନକ ଭାବେ ଓଡ଼ିଶାକୁ ଘର ଦେବା ବନ୍ଦ କରି ଠିକ୍ ବିପରୀତ ବ୍ୟବହାର କରାଯାଉଛି।
ଶ୍ରୀ ଦାସ ସୂଚନା ଦେଇ କହିଥିଲେ ଯେ, ଚଳିତ ବର୍ଷ ଜାନୁଆରି ୨୫ ତାରିଖରେ ବିଜୁ ଜନତା ଦଳ ପକ୍ଷରୁ ଅନୁଷ୍ଠିତ ଏକ ସାମ୍ୱାଦିକ ସମ୍ମିଳନୀରେ ଆମେ ଘୋଷଣା କରିଥିଲୁ ଯେ ଯଦି କେନ୍ଦ୍ରର ବିଜେପି ସରକାର ଓଡ଼ିଶାର ଲକ୍ଷ ଲକ୍ଷ ଗରିବ ଲୋକଙ୍କୁ ଆବାସ ଯୋଜନାରେ ଘର ଦେବାରୁ ବଞ୍ଚିତ କରେ, ତେବେ ଓଡ଼ିଶା ସରକାର ନିଜ ଉଦ୍ୟମରେ ସେମାନଙ୍କ ଘର ପ୍ରଦାନ କରିବାର ବ୍ୟବସ୍ଥା କରିବେ। ଏହି ପ୍ରତିଶ୍ରୁତି ଅନୁସାରେ ଗତ ମେ’ ୨୯ ତାରିଖରେ ରାଜ୍ୟରେ ବିଜେଡି ସରକାର ଏହାର ପଞ୍ଚମ ପାଳିର ଚତୁର୍ଥ ବର୍ଷ ପୂର୍ତ୍ତି ଅବସରରେ “ମୋ ଘର” ଯୋଜନା ଆରମ୍ଭ କରିଛନ୍ତି। ଓଡ଼ିଶାର ଯେଉଁ ୭ ଲକ୍ଷ ପରିବାର ଯେଉଁମାନେ କି କଠୋର ଯୋଗ୍ୟତା ମାପଦଣ୍ଡ ଯୋଗୁଁ ଆବାସ ଯୋଜନାରେ ଘର ପାଇବାରୁ ବଞ୍ଚିତ ହୋଇଥିଲେ, ସେମାନଙ୍କୁ “ମୋ ଘର” ଯୋଜନାରେ ଘର ପ୍ରଦାନ କରାଯିବ।
“ମୋ ଘର” ଯୋଜନା ସଂପର୍କରେ ସୂଚନା ଦେଇ ଅନ୍ୟତମ ବିଜେଡି ମୁଖପାତ୍ର ତୁମ୍ୱନାଥ ପଣ୍ଡା କହିଲେ ଯେ ଏହି ଯୋଜନା ସମ୍ପୂର୍ଣ୍ଣ ରୂପେ ଓଡ଼ିଶା ସରକାରଙ୍କର। ଏଥିପାଇଁ ଶତପ୍ରତିଶତ ଅର୍ଥ ଓଡ଼ିଶା ସରକାର ହିଁ ଦେଉଛନ୍ତି। ଏହି ଯୋଜନାରେ ପ୍ରତ୍ୟେକ ହିତାଧିକାରୀଙ୍କୁ ଘର ନିର୍ମାଣ ପାଇଁ ରିହାତି ସହିତ ଋଣ ପ୍ରଦାନର ବ୍ୟବସ୍ଥା କରାଯାଇଛି।
“ମୋ ଘର’ ଯୋଜନାରେ ପ୍ରତ୍ୟେକ ହିତାଧିକାରୀ ୧ ଲକ୍ଷରୁ ୩ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ପାଇପାରିବେ, ଯାହାକି ୧୦ ବର୍ଷରେ ସହଜ କିସ୍ତି ଜରିଆରେ ଶୁଝିବାକୁ ପଡ଼ିବ । ଜଣେ ହିତାଧିକାରୀ ନିଜର ସୁବିଧା ଅନୁସାରେ ୧ ଲକ୍ଷ, ୨ ଲକ୍ଷ କିମ୍ୱା ୩ ଲକ୍ଷ ଟଙ୍କାର ଋଣ ନେଇ ପାରିବେ। ସବୁଠାରୁ ବଡ଼କଥା ହେଲା, “ମୋ ଘର” ଯୋଜନାରେ ଜଣେ ହିତାଧିକାରୀ ୩ ଲକ୍ଷ ଟଙ୍କାର ଋଣରେ ସର୍ବାଧିକ ୬୦ ହଜାର ଟଙ୍କାର ସବ୍ସିଡି ପାଇପାରିବେ।
ଅନୁସୂଚିତ ଜାତି, ଜନଜାତି ଓ ଭିନ୍ନକ୍ଷମଙ୍କ କ୍ଷେତ୍ରରେ ୭୦ ହଜାର ଟଙ୍କାର ସବ୍ସିଡି ମିଳିବ। କେବଳ ସେତିକି ନୁହେଁ, ଋଣ ପ୍ରଦାନ ଲାଗି ହିତାଧିକାରୀମାନଙ୍କ ଠାରୁ କୌଣସି ପ୍ରସେସିଂ ଫି’ ନନେବା ଲାଗି ରାଜ୍ୟ ସରକାର ବ୍ୟାଙ୍କଗୁଡ଼ିକୁ କହିସାରିଛନ୍ତି। ଏପରିକି ବ୍ୟାଙ୍କରେ ସିକ୍ୟୁରିଟି ଭାବେ ଜମି ବନ୍ଧକ ରଖିବା ଲାଗି ହିତାଧିକାରୀଙ୍କୁ କୌଣସି ପଞ୍ଜୀକରଣ ଫି’ କିମ୍ୱା ଷ୍ଟାମ୍ପ୍ ଡ୍ୟୁଟି ଇତ୍ୟାଦି ମଧ୍ୟ ଦେବାକୁ ପଡ଼ିବ ନାହିଁ ବୋଲି ରାଜ୍ୟ ସରକାର ସ୍ପଷ୍ଟ କରି ଦେଇଛନ୍ତି। ତେଣୁ ଗୋଟିଏ ପଟରେ ଓଡ଼ିଶାର ବିଜେପି ସାଂସଦମାନେ ଚକ୍ରାନ୍ତ କରି ପ୍ରଧାନମନ୍ତ୍ରୀ ଆବାସ ଯୋଜନାରେ ମୁଖ୍ୟତଃ ପଶ୍ଚିମ ଓଡ଼ିଶା ଓ ଦକ୍ଷିଣ ଓଡ଼ିଶାର ୭ ଲକ୍ଷ ଗରିବ, ଆଦିବାସୀ ଲୋକଙ୍କୁ ଘରଟିଏ ପାଇବାରୁ ବଞ୍ଚିତ କରିଥିବା ବେଳେ ରାଜ୍ୟରେ ବିଜେଡି ସରକାର କୌଣସି ଗରିବ ଲୋକ ଯେପରି ଘର ପାଇବାରୁ ବଞ୍ଚିତ ନ ହୁ୍ଅନ୍ତି, ସେଥିପାଇଁ “ମୋ ଘର” ଯୋଜନା ଆଣିଛନ୍ତି।
ଶ୍ରୀ ପଣ୍ଡା ଆହୁରି କହିଥିଲେ ଯେ ନିଜ ଅଧିକାର ବିଷୟରେ ଓଡ଼ିଶାବାସୀ ସବୁବେଳେ ସଚେତନ। କେନ୍ଦ୍ରର ବିଜେପି ସରକାର ପ୍ରଧାନମନ୍ତ୍ରୀ ଆବାସ ଯୋଜନାରେ ଗରିବ ଲୋକଙ୍କ ଘର ବନ୍ଦ କରିଥିବାରୁ ଗତ ପଞ୍ଚାୟତ ନିର୍ବାଚନରେ ସେମାନେ ବିଜେପିକୁ ଏହାର ଜବାବ ଦେଇଥିଲେ। ସବୁ ଜିଲ୍ଲାରେ ସେମାନେ ବିଜେପିକୁ ହରାଇଥିଲେ। ବିଜେଡି ବିପୁଳ ବିଜୟ ହାସଲ କରି ୩୦ରୁ ୩୦ଟି ଯାକ ଜିଲ୍ଲା ପରିଷଦ ଗଠନ କରିଥିଲା।
ଓଡ଼ିଶାର ବିଜେପି ସାଂସଦମାନେ ଷଡ଼ଯନ୍ତ୍ର କରି ୭ ଲକ୍ଷ ଗରିବ ଓଡ଼ିଆଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ପାଇବାରୁ ବଞ୍ଚିତ କରିଥିବାରୁ ଆଗାମୀ ଦିନରେ ଓଡ଼ିଶାବାସୀ ବିଜେପିକୁ ଆହୁରି କଡ଼ା ଜବାବ ଦେବାକୁ ଯାଉଛନ୍ତି।
ଅପରପକ୍ଷରେ ସେମାନଙ୍କର ଦୁଃଖ ବୁଝି ରାଜ୍ୟର ବିଜେଡି ସରକାର ପ୍ରତ୍ୟେକ ଗରିବ ଲୋକଙ୍କୁ “ମୋ ଘର” ଯୋଜନାରେ ଘର ପ୍ରଦାନ କରିବାକୁ ନିଷ୍ପତ୍ତି ନେଇଥିବାରୁ ଓଡ଼ିଶାବାସୀ କୃତଜ୍ଞତା ସ୍ୱରୂପ ମାନ୍ୟବର ମୁଖ୍ୟମନ୍ତ୍ରୀ ଏବଂ ବିଜୁ ଜନତା ଦଳକୁ ପୁଣିଥରେ ଜିତାଇବାକୁ ନିଷ୍ପତ୍ତି ନେଇ ସାରିଛନ୍ତି ବୋଲି ଶ୍ରୀ ପଣ୍ଡା ପ୍ରକାଶ କରିଥିଲେ।
