ଭୁବନେଶ୍ୱର: ୧୮୧୭ ମସିହା ପାଇକ ବିଦ୍ରୋହକୁ ଦେଶର ପ୍ରଥମ ସ୍ୱାଧୀନତା ସଂଗ୍ରାମ ଦାବି ଓ ଓଡ଼ିଶା ପାଇକ ରେଜିମେଣ୍ଟ ଗଠନ ଦାବିରେ ଓଡ଼ିଶା ବୀର ମହାସଂଘ ତରଫରୁ ବିରାଟ ପାଇକ ଜନଗର୍ଜନ ସମାବେଶ ଓ ସଂଗ୍ରାମ ଆସନ୍ତା ଏପ୍ରିଲ ମାସ ୨୭ ତାରିଖ ଦିନ ଭୁବନେଶ୍ୱରରେ ଅନୁଷ୍ଠିତ ହେବ ବୋଲି ହୋଟେଲ କେଶରୀଠାରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ଓଡ଼ିଶା ବୀର ମହାସଂଘର ସଭାପତି ଡ଼ଃ ପ୍ରକାଶ ଶ୍ରୀଚନ୍ଦନ, ସାଧାରଣ ସମ୍ପାଦକ ତଥା ପୂର୍ବତନ ବିଧାୟକ ଡ଼ଃ ଦିଲ୍ଲୀପ ଶ୍ରୀଚନ୍ଦନ, କାର୍ଯ୍ୟକ୍ରମ ସଂଯୋଜକ ଶ୍ରୀ ନରେନ୍ଦ୍ର ପୃଷ୍ଟି, ଅଶୋକ ସୁନ୍ଦରାୟ ଓ ଗଣେଶ ସାମନ୍ତ ଜଣାଇଛନ୍ତି। ସେମାନେ କହିଛନ୍ତି ଯେ, ମାର୍ଚ୍ଚ ୨୯ ତାରିଖ ଦିନ ଅନୁଷ୍ଠିତ ହେବାକୁ ଥିବା ସମାବେଶକୁ ପୌର ନିର୍ବାଚନ ଦୃଷ୍ଟିକୋଣରୁ ଘୁଞ୍ଚାଇ ଦିଆଗଲା। କିନ୍ତୁ ଓଡ଼ିଶାର ସ୍ୱାଭିମାନ, ବୀରତ୍ୱ ବ୍ୟଞ୍ଜକ ଇତିହାସ ସମ୍ପର୍କରେ ଓଡ଼ିଶା ବୀର ମହାସଂଘ ପକ୍ଷରୁ ପାଇକ ବିଦ୍ରୋହକୁ ଭାରତର ପ୍ରଥମ ସ୍ୱାଧୀନତା ସଂଗ୍ରାମ ଘୋଷଣା ଦାବି ଓ ଓଡ଼ିଶା ପାଇକ ରେଜିମେଣ୍ଟ ଗଠନ ପାଇଁ ଦାବି ପୂରଣ ନହେବା ପର୍ଯ୍ୟନ୍ତ ରାଜଧାନୀ ଭୁବନେଶ୍ୱରଠାରୁ ଦିଲ୍ଲୀ ପର୍ଯ୍ୟନ୍ତ ସଂଗ୍ରାମ ପର୍ଯ୍ୟାୟକ୍ରମେ ଜାରି ରହିବ।
ତେବେ ଆସନ୍ତା ଏପ୍ରିଲ ୨୭ ତାରିଖ ଦିନ ଖୋର୍ଦ୍ଧାରୁ ସକାଳ ୮ ଘଟିକା ସମୟରେ ପାଇକ ବାହିନୀ ଏକ ବିରାଟ ପଟୁଆରରେ ଆସିବେ ଓ ଓଡ଼ିଶାର ପ୍ରତ୍ୟେକ ଜିଲ୍ଲାରୁ ପାଇକ ବାହିନୀ ଭୁବନେଶ୍ୱରରେ ଏକତ୍ରିତ ହେବେ। ଏହାପରେ ମାଷ୍ଟର କ୍ୟାଣ୍ଟିନ ଛକରୁ ଏକ ଶୋଭାଯାତ୍ରା ବାହାରି ପ୍ରଦର୍ଶନୀ ପଡ଼ିଆ ପର୍ଯ୍ୟନ୍ତ ଯିବ। ସେଠାରେ ଏକ ଜନଗର୍ଜନ ସମାବେଶ ଅନୁଷ୍ଠିତ ହେବ। ଏହି ସମାବେଶକୁ ସଫଳ କରିବା ଓ ଓଡ଼ିଶାର ସ୍ୱାଭିମାନ ପାଇଁ ଜନସାଧାରଣ ଯୋଗଦାନ କରିବାକୁ ଓଡ଼ିଶା ବୀର ମହାସଂଘ ପକ୍ଷରୁ ଅନୁରୋଧ କରାଯାଇଛି।
