The Samikhsya Odia
ବେଗୁନିଆପଡା (ଟୁକୁନା ପ୍ରଧାନ)-: ଆଜି ଗଞ୍ଜାମ ଜିଲ୍ଲା ବେଗୁନିଆପଡ଼ା ବ୍ଲକ ଅନ୍ତର୍ଗତ ସାଙ୍କୁଡା ସ୍ଥିତ ବିଦ୍ୟୁତ୍ ସବ୍ ଷ୍ଟେସନ୍, ନୂଆଁଗଡ଼, ନୂଆଗାଁ, କୋଦଳା, ବେଗୁନିଆପଡା ସମେତ ଅନ୍ୟ ସ୍ଥାନ ମାନଙ୍କରେ ମଧ୍ଯ ଦେବଶିଳ୍ପୀ ବିଶ୍ୱ ନିର୍ମାତା ତଥା ସକଳ ଶିଳ୍ପକାରିଗର ଙ୍କ ଜନକ ପ୍ରଭୂ ଶ୍ରୀ ବିଶ୍ୱକର୍ମାଙ୍କ ପୂଜା ବହୁ ଆଡମ୍ବର ସହକାରେ ଅନୁଷ୍ଠିତ ହୋଇଯାଇଛି। ଏ ନେଇ ବିଭିନ୍ନ ପୂଜାମଣ୍ଡପ ରେ ଭକ୍ତିମୟ ପରିବେଶ ସୃଷ୍ଟି ହୋଇଛି। ବିଭିନ୍ନ ସ୍ଥାନରେ ନୀତିକାନ୍ତି ଅନୁଯାୟୀ ପୂଜାର୍ଚ୍ଚନା ସମାପନ ହୋଇଯାଇଛି।
ବ୍ରହ୍ମପୁର (କୈଳାସ ଚନ୍ଦ୍ର ଚୌଧୁରୀ): ଗଞ୍ଜାମ ଜିଲ୍ଲା କୋଦଳା ଥାନା ଅନ୍ତର୍ଗତ ଜାଗିଲିପଦର ଗ୍ରାମରେ ଏକ ଅଭାବନୀୟ ଘଟଣା ଦେଖିବାକୁ ମିଳିଛି। ସ୍ତ୍ରୀ କୁ ସ୍ବାମୀ ହତ୍ୟା କରିବା ପରେ ଟାଙ୍ଗିଆରେ ମୃତ ଦେହକୁ ଖଣ୍ଡ ଖଣ୍ଡ କରି ନଦୀରେ ଭସାଇଦେଇଥିବା ଭଳି ଜଘନ୍ୟ ଘଟଣା ସାମ୍ନାକୁ ଆସିଛି।
ମିଳିଥିବା ସୂଚନା ଅନୁଯାୟୀ, ସୋରଡ଼ା ଥାନା ଅନ୍ତର୍ଗତ ଭଗବାନପୁର ଗ୍ରାମର ନାରାୟଣ ମୁଳି ଗତ ୩ ମାସ ତଳେ କୋଦଳା ଥାନା ଅନ୍ତର୍ଗତ ଜାଗିଲିପଦର ଗ୍ରାମର ବୁଲି ମୁଳିଙ୍କୁ ହିନ୍ଦୁ ବୈଦିକ ରୀତିରେ ବିବାହ କରିଥିଲେ। ସୋରଡ଼ା ସ୍ଥିତ ପଞ୍ଚାନନ ମନ୍ଦିରରେ ଉଭୟ ପରିବାରଙ୍କ ଉପସ୍ଥିତିରେ ନାରାୟଣ ଓ ବୁଲିଙ୍କର ବିବାହ ଅନୁଷ୍ଠିତ ହୋଇଥିଲା। ଏହି ବାହାଘର ପରେ ନାରାୟଣ ଅନେକ ସମୟ ଶ୍ଵଶୁର ଘରେ ରହୁଥିଲେ। ଗତ ଦୁଇ ଦିନ ତଳେ ଉଭୟେ ଜାଗିଲିପଦର ଗ୍ରାମକୁ ଆସିଥିଲେ।
କିନ୍ତୁ କ’ଣ ହେଲା କେଜାଣି ଗତ ବୁଧବାର ରାତିରେ ଏକ ସାମାନ୍ୟ କଥାକୁ ନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ଏହା ଏତେ ଉଗ୍ରରୂପ ନେଇଥିଲା ଯେ, ସ୍ବାମୀ ନାରାୟଣ ବୁଲିଙ୍କ ତଣ୍ଟି ଚିପି ଦେଇଥିଲେ। ଯାହାପରେ ତାଙ୍କର ମୃତ୍ୟୁ ହୋଇଥିଲା। ମୃତ୍ୟୁ ପରେ ଏକ ଟାଙ୍ଗିଆରେ ମୃତକଙ୍କ ବିଭିନ୍ନ ଅଙ୍ଗକୁ କାଟି ପ୍ରମାଣ ଲିଭାଇବା ପାଇଁ ନିକଟସ୍ଥ ରୁଷିକୁଲ୍ୟା ନଦୀରେ ଭଷାଇ ଦେଇ ସକାଳୁ ସକାଳୁ ସ୍ତ୍ରୀ ନିରୁଦିଷ୍ଟ ବୋଲି ଥାନାରେ ଅଭିଯୋଗ କରିଥିଲେ।
ପୋଲିସ ନାରାୟଣଙ୍କୁ ଥାନାରେ ଜେରା କରିବା ବେଳେ ସେ ନିଜେ ହିଁ ହତ୍ୟା କରିଥିବା ସ୍ବୀକାର କରିଥିଲା। ପୋଲିସ ନାରାୟଣକୁ ନେଇ ଘଟଣାସ୍ଥଳରେ ପହଞ୍ଚିବା ପରେ ପୋଲିସ ସେଠାରୁ ଏକ ଟାଙ୍ଗିଆ ଜବତ କରିଛି ଓ ଅଗ୍ନିଶମ ବିଭାଗ ଜରିଆରେ ଶବ ଉଦ୍ଧାର ଚେଷ୍ଟା ଜାରି ରଖିଛି। ଏଥି ସହିତ ହତ୍ୟାକାରୀ ନାରାୟଣକୁ ଥାନାରେ ଅଟକ ରଖି ପୋଲିସ ପଚରାଉଚରା କରୁଛି।
କୈଳାଶ ଚନ୍ଦ୍ର ଚୌଧୁରୀ
ବ୍ରହ୍ମପୁର: ଗଞ୍ଜାମ ଜିଲ୍ଲା କବିସୂର୍ଯ୍ୟ ନଗର ଥାନା ଅନ୍ତର୍ଗତ ପଙ୍କଳବାଡି ଗ୍ରାମରେ ଦୁଇ ପରିବାର ମଧ୍ୟରେ ଗଣ୍ଡଗୋଳ ଘଟି ଦୁଇ ଜଣଙ୍କର ମୃତ୍ୟୁ ହୋଇଛି। ଦିପୁନ୍ ଭୁୟାଁ ଓ ଲିପୁନ୍ ସ୍ବାଇଁ ନାମରେ ଦୁଇ ଜଣଙ୍କ ମୃତ୍ୟୁ ଘଟିଥିବା ବେଳେ ଅନ୍ୟ ୪ ଜଣ ଆହତ ହୋଇ କବିସୂର୍ଯ୍ୟ ନଗର ଡାକ୍ତରଖାନାରେ ଚିକିତ୍ସିତ ହେଉଛନ୍ତି।
ଖବର ପାଇ କବିସୂର୍ଯ୍ୟ ନଗର ଥାନା ପୋଲିସ ଘଟଣାସ୍ଥଳରେ ପହଞ୍ଚି ଗଣ୍ଡଗୋଳରେ ଗୁରୁତର ଆହତ ବ୍ୟକ୍ତିଙ୍କୁ ଉଦ୍ଧାର କରି ବ୍ରହ୍ମପୁର ବଡ଼ ଡ଼ାକ୍ତରଖାନାରେ ଚିକିତ୍ସିତ ପାଇଁ ନେଇଥିଲା ବେଳେ ଉକ୍ତ ଦୁଇ ଯୁବକଙ୍କୁ ଡାକ୍ତର ମୃତ ଘୋଷଣା କରିଥିଲେ। ଅନ୍ୟ ପଟେ ପୋଲିସ ଘଟଣାସ୍ଥଳରେ ପହଞ୍ଚି ପରିସ୍ଥିତି ଆୟତ୍ତ କରିବାସହ ଅନୁଧ୍ୟାନ କରି ଦୁଇ ଜଣ ଯୁବକଙ୍କୁ ଥାନାରେ ଅଟକ ରଖି ଘଟଣାର ତଦନ୍ତ ଆରମ୍ଭ କରିଛନ୍ତି।
ବେଗୁନିଆପଡା (ଟୁକୁନା ପ୍ରଧାନ): ଗଞ୍ଜାମ ଜିଲ୍ଲା ବେଗୁନିଆପଡ଼ା ବ୍ଲକ ଅନ୍ତର୍ଗତ କୁମାରୀପାରି ଗ୍ରାମର ଦେବରାଜ ଭୂୟାଁଙ୍କ ୮୦ ବର୍ଷ ବୟସରେ ଆଜି ସକାଳେ କ଼ୁମାରୀପାରି ସ୍ଥିତ ବାସଭବନରେ ବିୟୋଗ ହୋଇଯାଇଛି। ସେ ଏକା ଧାରରେ ଜଣେ ରାଜନେତା, ସୁସଂଗଠକ, ସମାଜସେବୀ ଭାବରେ ଅଞ୍ଚଳରେ ବେଶ୍ ପରିଚିତ।
ସ୍ଵର୍ଗତ ଭୂୟାଁ ଓଡ୍ର ଖଣ୍ଡାୟତ କାଳଞ୍ଜି ସମାଜ ସିଦ୍ଧେଶ୍ଵର ଅଞ୍ଚଳ ପରିଷଦ ସଭାପତି ଭାବେ ଦାୟିତ୍ବ ରେ ଥିଲେ। ତାଙ୍କ ମୃତ୍ୟୁ ସଜ୍ଜା ନିକଟରେ ପୁଅ ବୋହୂ ଏବଂ ଆତ୍ମୀୟ ସ୍ଵଜନ ମାନେ ଉପସ୍ଥିତ ଥିଲେ। ତାଙ୍କ ମୃତ୍ୟୁରେ ଅଞ୍ଚଳରେ ଶୋକର ଛାୟା ଖେଳିଯାଇଛି।
ତାଙ୍କ ଶେଷ ଦର୍ଶନ ନିମନ୍ତେ ଅଞ୍ଚଳର ବହୁ ବିଶିଷ୍ଠ ବ୍ୟକ୍ତିବିଶେଷ ମାନେ ଉପସ୍ଥିତ ଥିଲେ। ନିଜ ଗ୍ରାମ କୁମାରୀପାରି ରେ ତାଙ୍କର ଶେଷକୃତ୍ୟ ସମ୍ପନ୍ନ ହୋଇଛି।
ମାନସ ପୂର୍ଣ୍ଣ ଆଚାର୍ଯ୍ୟ
ଭଞ୍ଜନଗର: ଭଞ୍ଜନଗର ଅଂଚଳର ଜଣା ଶୁଣା ବ୍ୟବସାୟୀ, କଂଗ୍ରେସର ଜଣେ ବରିଷ୍ଠ ନେତା, ପୂର୍ବତନ ବ୍ଲକ୍ କଂଗ୍ରେସ ସଭାପତି ତଥା ଗଞ୍ଜାମ ଜିଲ୍ଲାର ପୂର୍ବତନ ଉପ ସଭାପତି ଭାସ୍କର ପତିଙ୍କ ସଡ଼କ ଦୁର୍ଘଟଣାରେ ଅକାଳ ବିୟୋଗ ହୋଇଯାଇଛି।
ଖବର ମୁତାବକ ଗତ କାଲି ସନ୍ଧ୍ୟା ସମୟରେ ସେ ନିଜ ଚାଷ ଜମି ସାମ୍ନାରେ ନିଜ ମୋଟର ସାଇକେଲ ଉପରେ ବସି ଚାଷ ଜମିରେ କାମ କରୁଥିବା ଶ୍ରମିକମାନଙ୍କ କାର୍ଯ୍ୟକୁ ଅନୁସନ୍ଧାନ କରୁଥିଲେ। ଠିକ୍ ସେତିକି ବେଳେ ଅପର ପାର୍ଶ୍ଵରୁ ଏକ କାର ଆସି ତାଙ୍କୁ ଶାକ୍ତ ଧକ୍କା ଦେଇ ଥିଲା। ଯେଉଁଥିରେ ତାଙ୍କର ପ୍ରାଣହାନୀ ଘଟିଥିଲା।
ଭଞ୍ଜନଗର ଥାନା ଅଧିକାରୀଙ୍କ ସୂଚନା ମୁତାବକ, ବର୍ତ୍ତମାନ ସୁଦ୍ଧା କୌଣସି ଏତଲା ହୋଇ ନଥିବା ବେଳେ, କାର ଟି ଥାନାରେ ଅଟକ ରହିଛି। ଏହି ମର୍ମନ୍ତୁଦ ସଡକ ଦୁର୍ଘଟଣାରେ ଭଞ୍ଜନଗର ଅଞ୍ଚଳରେ ଶୋକର ଛାୟା ଖେଳି ଯାଇଛି।
ବେଗୁନିଆପଡା (ଟୁକୁନା ପ୍ରଧାନ): ଗଞ୍ଜାମ ଜିଲ୍ଲା ବେଗୁନିଆପଡ଼ା ଥାନା ଅନ୍ତର୍ଗତ ଷଣ୍ଢମୂଳ ଗ୍ରାମ ର ବାପିନୀ ସ୍ଵାଇଁ ବାରିଆହେତା ଗ୍ରାମ ନିକଟରେ ଥିବା ନିଜ ଜମିରେ ଏକ ପୋଖରୀ ଖନନ କରି ମାଛ ଚାଷ କରିଥିଲେ। ଢେର ଦି ପଇସା ରୋଜଗାର କରିବା ପାଇଁ ମଧ୍ୟ ଲକ୍ଷ୍ୟ ରଖିଥିଲେ। କିନ୍ତୁ କୌଣସି ଦୃବର୍ତ୍ତ ଉକ୍ତ ପୋଖରୀରେ ବିଷ ପକେଇ ମାଛ ମାରିଥିବା ନେଇ ବାପିନୀ ଥାନାରେ ଲିଖିତ ଅଭିଯୋଗ କରିଛନ୍ତି।
ବାପିନୀଙ୍କ କହିବା ମୁତାବକ ସେ ଗତ ୨୪ ତାରିଖ ଦିନ କୌଣସି ଏକ କାମରେ ଭୁବନେଶ୍ବର ଯାଇଥିଲେ। କାମ ସାରି ସେ ୨୬ ତାରିଖ ଦିନ ଭୁବନେଶ୍ବରରୁ ଫେରି ପ୍ରତିଦିନ ଭଳି ସେଦିନ ମଧ୍ୟ ପୋଖରୀକୁ ବୁଲିବା ପାଇଁ ଯାଇଥିଲେ। ସେଠାରେ ସେ ଦେଖିଲେ ପୋଖରିରେ ସବୁ ମାଛ ମରି ଭାସୁଛି। ପୋଖରିରେ ପ୍ରାୟ ୫ ଶହ କିଲୋ ମାଛ ଥିବା ନେଇ ସେ କହିଛନ୍ତି। ଏବଂ ତାଙ୍କ ଅନୁପସ୍ଥିତିର ସୁଯୋଗ ନେଇ କୌଣସି ଦୃବର୍ତ୍ତ ପୋଖରିରେ ବିଷ ପକେଇ ମାଛ ମାରିଥିବା ନେଇ ବେଗୁନିଆପଡ଼ା ଥାନାରେ ଅଭିଯୋଗ କରିଛନ୍ତି।
ଏ ନେଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି। ବାସ୍ତବରେ କୌଣସି ଦୃବର୍ତ୍ତ ବିଷ ପକେଇ ମାଛ ମାରିଛି ନା ଅନ୍ୟ କିଛି କାରଣ ପାଇଁ ମାଛ ମରିଛି ତାହା ଜନସାଧାରଣଙ୍କ ମନରେ ପ୍ରଶ୍ନ ଉଙ୍କି ମାରିଛି।
ମାନସ ପୂର୍ଣ୍ଣ ଆଚାର୍ଯ୍ୟ
ଆସିକା: ବିଜ୍ଞାନ ଯୁଗରେ ବି ହଟୁନି ଅନ୍ଧ ବିଶ୍ବାସ। ସଚେତନତା ସୃଷ୍ଟି ଉଦ୍ଦେଶ୍ୟରେ ସରକାର କୋଟି କୋଟି ଟଙ୍କା ପାଣି ଭଳି ଖର୍ଚ୍ଚ କରୁଛନ୍ତି। ହେଲେ ଏସବୁ ସଚେତନତାର ବାର୍ତ୍ତା ଅସଲ ବେଳକୁ କାମରେ ଆସୁନି। ଆଉ ଅନ୍ଧବିଶ୍ୱାସର ବଶବର୍ତ୍ତୀ ମଣିଷ ଶେଷରେ ଗୁଣି ଗାରେଡ଼ି ସନ୍ଦେହରେ ଅନେକ କିଛି ଅପ୍ରୀତିକର ପରିସ୍ଥିତି ସୃଷ୍ଟି କରୁଛି। ଏଭଳି ଏକ ଅଭାବନୀୟ ଘଟଣା ଆଜି ଗଞ୍ଜାମ ଜିଲ୍ଲାର ଆସିକା କୋଟିନଡା ଥାନା ପରିସରରେ ଦେଖିବାକୁ ମିଳିଛି।
କୋଟିନଡା ଗ୍ରାମର ଗନ୍ଧର୍ବ ମହାନ୍ତିଙ୍କ ପରିବାରର ୩ ଜଣଙ୍କୁ ଏକା ବେଳକେ ଭୂତ ସବାର ହୋଇଛି। ଗ୍ରାମବାସୀ ମାନେ କୋଟିନଡା ଥାନା ଆଗରେ ସଂପୃକ୍ତ ବ୍ୟକ୍ତିମାନଙ୍କ ଶରୀରକୁ ଭୂତ ଆସିଥିବା ଓ ସେମାନେ ବିଭିନ୍ନ ପ୍ରକାର ଚିତ୍କାର କରୁଥିବା ଉଲ୍ଲେଖ କରିଛନ୍ତି। ଏଥି ସହିତ ଗ୍ରାମବାସୀମାନେ କୋଟିନଡା ଥାନାକୁ ଆସି ଗାଁ ରେ ସର୍ବଦା ଏଭଳି ଅଭାବନୀୟ ଘଟଣା ଲାଗି ରହୁଥିବାରୁ ତୁରନ୍ତ ଗୁଣିଆ ଆଣିବା ସହ ଗାଁ ରୁ ଗୁଣିଆକୁ ଖୋଜି ବାହାର କରିବାକୁ ଥାନା ଅଧିକାରୀଙ୍କୁ ଅନୁମତି ଦେବାକୁ ଦାବି କରୁଛନ୍ତି।
ଶେଷରେ ଆସିକା ଏସଡିପିଓ ଉମାଶଙ୍କର ସିଂ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିଥିଲେ ମଧ୍ୟ ଏବେବି ସେଠାରେ ଉତ୍ତେଜନା ଲାଗି ରହିଛି।
କୈଳାଶ ଚନ୍ଦ୍ର ଚୌଧୁରୀ
ବ୍ରହ୍ମପୁର: ଗଞ୍ଜାମ ଜିଲ୍ଲା ତାରାସିଂ ଥାନା ଅନ୍ତର୍ଗତ କୁପାଟି ଗ୍ରାମରେ ଲକ୍ଷ୍ମୀ ନାରାୟଣ ତ୍ରିପାଠୀ ନାମକ ଜଣେ ମିଟର ରିଡରଙ୍କୁ ନିର୍ମମ ଭାବେ ହତ୍ୟା କରାଯାଇଛି। ନିହତ ଲକ୍ଷ୍ମୀ ନାରାୟଣଙ୍କ ଘର ଗାଲେରୀ ଗ୍ରାମ ବୋଲି ଜଣାପଡ଼ିଛି। ଆଜି ସେ କୁପାଟି ଗ୍ରାମକୁ ମିଟର ରିଡିଂ ପାଇଁ ଯାଇଥିବା ବେଳେ ଗୋବିନ୍ଦ ସେଠୀ ନାମକ ଜଣେ ବ୍ୟକ୍ତି ବିଦ୍ୟୁତ ବିଲ୍ ଅଧିକ ଆସୁଥିବା ବିଷୟରେ ପାଟିତୁଣ୍ଡ କରିଥିଲେ। ଏହାକୁ ନେଇ ଗୋବିନ୍ଦ ଏତେ କ୍ରୋଧିତ ହୋଇଥିଲେ ଯେ, ଏକ ଧାରୁଆ ଅସ୍ତ୍ରରେ ଲକ୍ଷ୍ମୀ ନାରାୟଣଙ୍କ ବେକକୁ ଆଘାତ କରିଥିଲେ। ଯାହାଫଳରେ ଲକ୍ଷ୍ମୀ ନାରାୟଣଙ୍କ ଘଟଣାସ୍ଥଳରେ ହିଁ ମୃତ୍ୟୁ ଘଟିଥିଲା। ତାଙ୍କୁ ବଞ୍ଚାଇବାକୁ ଯାଇ ଅନ୍ୟ ଜଣଙ୍କ ହାତରେ ଗଭୀର ଆଘାତ ଲାଗିଛି।
ଆକ୍ରମଣକାରୀ ଗୋବିନ୍ଦ ତଳେ ପଡିଯିବାରୁ ସେ ମଧ୍ୟ ଗୁରୁତର ଆହତ ହୋଇ ପୋଲିସ ଜରିଆରେ ଡାକ୍ତରଖାନାରେ ଚିକିତ୍ସିତ ହେଉଛନ୍ତି। ଏହି ସବୁ ଘଟଣା ପରେ ପୋଲିସ ଘଟଣାସ୍ଥଳରେ ପହଂଚି ମୃତ ଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇବା ସହ ଘଟଣାର ତଦନ୍ତ ଆରମ୍ଭ କରିଛି।
ମାନସ ପୂର୍ଣ୍ଣ ଆଚାର୍ଯ୍ୟ
ଆସିକା: ପଦମପୁର ଉପ ନର୍ବାଚନ ସମୟରୁ ରାଜ୍ୟରେ ଜିଲ୍ଲା ପୂନ ର୍ଗଠାନ ଓ ନୂଆଁ ଜିଲ୍ଲା ସୃଷ୍ଟିକୁ ନେଇ ଚର୍ଚ୍ଚା ଲାଗି ରହିଛି। ଆସିକା ହେଉଛି ଗଞ୍ଜାମ ଜିଲ୍ଲାର କେନ୍ଦ୍ର ସ୍ଥଳ। ଆସିକା, କବିସୂର୍ଯ୍ୟନଗର, ପୋଲସରା, ବେଗୁନିଆ ପଡ଼ା, ଧରାକୋଟ, ଶେରଗଡ଼, ସାନଖେମୁଣ୍ଡି, ହିଞ୍ଜିଳିକାଟୁ ଅଞ୍ଚଳକୁ ନେଇ ଋଷିକୁଲ୍ୟା ଜିଲ୍ଲା ଗଠନ ଦାବି କୁ ଅଧିକ ଶାଣିତ କରିବା ଲାଗି ରୂପରେଖ ପ୍ରସ୍ତୁତ କରିବା ସକାଶେ ରବିବାର ଅପରାହ୍ନରେ ସ୍ଥାନୀୟ ଓକିଲ ସଂଘ କାର୍ଯ୍ୟାଳୟ ପରିସରରେ କ୍ରିୟାନୁଷ୍ଠାନ କମିଟିର ଏକ ଗୁରୁତ୍ବପୂର୍ଣ୍ଣ ବ୍ୟଠକ ଅନୁଷ୍ଠିତ ହୋଇ ଯାଇଛି।
ଆସିକା ଓକିଲ ସଂଘର ସଭାପତି ରବୀନ୍ଦ୍ର ନାଥ ଶର୍ମାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଓକିଲ ସଂଘର ସମ୍ପାଦକ ନାରାୟଣ ମୁନି, ଉପ ସଭାପତି ଛବିଳ ରାମ ମିଶ୍ର, ଆସିକା ଲୟନ୍ସ କ୍ଲବ୍ ସଭାପତି ଇ . ଅରୁଣ କୁମାର ପାତ୍ର, ଜିଲ୍ଲା ପରିଷଦ ସଦସ୍ୟା ଅନିମା ପରିଡ଼ା, ଆଇନ ଜିବୀ ସନ୍ତୋଷ କୁମାର ପାଣିଗ୍ରାହୀ ପ୍ରମୁଖ ମଞ୍ଚାସୀନ ଥିଲେ। ଏଥିରେ ଆସିକା ଅଞ୍ଚଳର ବହୁ ସଚେତନ ନାଗରିକ ଓ ବିଭିନ୍ନ ସଂଗନର କର୍ମକର୍ତ୍ତା ଋଷିକୁଲ୍ୟା ଜିଲ୍ଲା ଗଠନର ଆବଶ୍ୟକତା ଉପରେ ମତ ପ୍ରକାଶ କରିଥିଲେ। ଗଞ୍ଜାମ ଜିଲ୍ଲାର କେନ୍ଦ୍ର ସ୍ଥଳରେ ଥିବା ଆସିକାରେ ବହୁ ସରକାରୀ ଓ ବେସରକାରୀ କାର୍ଯ୍ୟାଳୟ ରହିଛି ଏବଂ ଏଠାରେ ହିଁ ଏହାର ମୁଖ୍ୟ କାର୍ଯ୍ୟାଳୟ ରଖିବାକୁ ବିଭିନ୍ନ ମହଲରେ ଦାବି ହେଉଛି।
ଏଥିରେ ଅନ୍ୟ ମାନଙ୍କ ମଧ୍ୟରେ ସାଂସଦ ପ୍ରତିନିଧି ସତ୍ୟ ନାରୟଣ ସ୍ୱାଇଁ, ଗଞ୍ଜାମ ଜୋନ୍ ଯୁବ ବିଜେଡି ସଭାପତି ନଚିକେତା ସ୍ୱାଇଁ, ସମବାୟ ବିତ୍ ସୂର୍ଯ୍ୟ କାନ୍ତ ପରିଡ଼ା, ବସ ମାଲିକ ସଂଘର ସମ୍ପାଦକ ସନ୍ତୋଷ କୁମାର ପୋଲାଇ, ଆସିକା ପ୍ରେସ କ୍ଲବ୍ ର ସଭାପତି ସତ୍ୟ ନାରାୟଣ ରଥ ଓକିଲ ସଂଘର ପୂର୍ବତନ ସଭାପତି ସୁରେନ୍ଦ୍ର ନାଥ ପଣ୍ଡା, ଆଇନ ଜୀବି ଅଜିତ ଚୌଧୁରୀ, ସୁଧିର ତ୍ରୀପାଠୀ, ସରୋଜ ତ୍ରିପାଠୀ, ସରୋଜ ନାୟକ, ପୂର୍ଣ୍ଣଚନ୍ଦ୍ର ନାୟକ, ଲଲିତ ଦାସ, ସିଶର ନାୟକ, ଦିଲ୍ଲୀପ ପାଣିଗ୍ରାହୀ, ମାନସ ଆଚାର୍ଯ୍ୟ, ପ୍ରଭାତ ପାଢ଼ୀ, ଅଜିତ କୁମାର ମୁନି, ବୁଲୁ ପାଣିଗ୍ରାହୀ, ମାନସ ଗୌଡ, ସନ୍ତୋଷ ମିଶ୍ର, ନିର୍ମଳ କୁମାର ଦାସ, ଦେବ କାନ୍ତ ଶର୍ମା, ଅଜିତ୍ ନାୟକ ସମେତ ଅନେକ ଆଇନ୍ ଯିବି ଯୋଗ ଦେଇ ଥିଲେ।
କୈଳାଶ ଚନ୍ଦ୍ର ଚୌଧୁରୀ
ବ୍ରହ୍ମପୁର: ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ପୋଲିସ ପେଟ୍ରୋଲିଂ କରୁଥିବା ସମୟରେ ଖଲ୍ଲିକୋଟ ବଡ ଘାଟିରେ ଏକ ଅଖା ବୋଝେଇ ଗାଡ଼ିକୁ ସନ୍ଦେହ କରି ଅଟକାଇ ଥିଲେ। କିନ୍ତୁ ଗାଡ଼ିର ଚାଳକ ସେଠାରୁ ତୁରନ୍ତ ଗାଡ଼ି ଛାଡ଼ି ଚାଲିଯାଇଥିଲେ। ଯାହା ଫଳରେ ପୋଲିସର ସନ୍ଦେହ ବଢ଼ିଥିଲା। ଗାଡ଼ିରୁ ଅଖା ବାହାର କରି ଦେଖିଲା ବେଳକୁ ସେଥିରେ ବିପୁଳ ପରିମାଣର ଗଞ୍ଜେଇ ମିଳିଲା।
ପୋଲିସ ଉକ୍ତ ଗାଡିକୁ ଥାନାକୁ ନେଇ ଉପରେ ଅଖା ଖାଲି କରି ଦେଖିଲା ବେଳକୁ ତା ଭିତରେ ବହୁତ ଅଖାରେ ଗଞ୍ଜେଇ ଭର୍ତ୍ତି ରହିଥିଲା। ତତକ୍ଷଣାତ୍ ଥାନା ଅଧିକାରୀ ତହସିଲଦାରଙ୍କୁ ଜଣାଇଥିଳା ଓ ତହସିଲଦାରଙ୍କ ଉପସ୍ଥିତିରେ ଉକ୍ତ ଗଞ୍ଜେଇକୁ ଓଜନ କରାଯାଇଥିଲା। ଯାହାର ପରିମାଣ ୮୩୦ କିଲୋ ଓ ଆନୁମାନିକ ୧୦ ଲକ୍ଷ ଟଙ୍କା ହେବ ବୋଲି ଜଣାପଡିଛି।
ଖୋର୍ଦ୍ଧା: ଭୁବନେଶ୍ୱରରୁ ଦାମୀ ବାଇକ୍ ଚୋରୀ କରିବା ପରେ ଗାଁ ଗହଳିରେ ଉକ୍ତ ଚୋରୀ ବାଇକ୍ ଗୁଡିକୁ ଲୁଟେରାମାନେ ବିକ୍ରି କରୁଥିଲେ। ପୋଲିସ୍ କୁ ଚକମା ଦେବା ପାଇଁ ଖୋର୍ଦ୍ଧା ଜିଲ୍ଲା ନିରାକାର ପୁର ଥାନା ଅଂଚଳର ଗାଁ ଗହଳିରେ ଏସବୁ ଚୋରୀ ବାଇକ୍ ଗୁଡିକୁ ଲୁଟେରାମାନେ ବିକ୍ରି କରୁଥିଲେ। ଏନେଇ ପୋଲିସ୍ ନିକଟରେ ଅଭିଯୋଗ ହୋଇଥିଲା।
ଅଭିଯୋଗ ପରେ ପୋଲିସ୍ ତଦନ୍ତ କରି ଲୁଟେରାମାନଙ୍କୁ ଧରିବା ପାଇଁ ଜାଲ ବିଛାଇଥିଲା। ଏହା ପରେ ନିରାକାର ପୁର ଥାନା ପୋଲିସ୍ କୁ ସଫଳତା ମିଳିଥିଲା। ୪ ଜଣ ବାଇକ୍ ଲୁଟେରାଙ୍କୁ ଗଞ୍ଜାମ ଜିଲ୍ଲା କୋଦଳାରୁ ଗିରଫ କରିଥିଲା। ଏବଂ ସେମାନଙ୍କ ଠାରୁ ପୋଲିସ ୨ ଟି ବାଇକ୍ ଜବତ କରିଥିଲା। ପଲସର ବାଇକ୍ ସହ ପୋଲିସ ଗୋଟିଏ ୟାମା FZ ବାଇକ୍ ଜବତ କରିଥିଲା।
ଗିରଫ ଅଭିଯୁକ୍ତ ମାନେ ହେଲେ ଗଂଜାମ ଜିଲା କୋଦଳା ଥାନା ଅଂଚଳର ପି ରବି, ପି ମାଧବ, ଏସ୍ ସିନୁ ଓ ଏସ୍ ଆପା ରାଓ ବୋଲି ଜଣା ପଡିଛି।
ଏତଦବ୍ୟତୀତ ନିରାକାର ପୁର ବଜାରରେ ଥିବା ବ୍ୟାଙ୍କ ଅଫ୍ ବରୋଦାର ATM ରୁ ଜଣେ ବ୍ୟକ୍ତି ଟଙ୍କା ଉଠାଇ ନିଜ ସ୍କୁଟି ଡିକିରେ ରଖିଥିବା ବେଳେ ଦୁଇ ଜଣ ଦୁର୍ବୃତ୍ତ ସ୍କୁଟି ଡିକି ଭାଙ୍ଗି ୨୦ ହଜାର ଟଙ୍କା ଲୁଟି ନେଇଥିଲେ। ଅଭିଯୋଗ ପରେ ସେହି କୋଦଳା ଅଂଚଳରୁ ୨ ଜଣ ଲୁଟେରାଙ୍କୁ ଗିରଫ କରିଛି ନିରାକାର ପୁର ପୋଲିସ୍। ସେମାନେ ହେଲେ ଏସ ରାମ ଓ ଏସ ଇଶ୍ୱର ବୋଲି ପୋଲିସ୍ ପ୍ରକାଶ କରିଛି।
କୈଳାଶ ଚନ୍ଦ୍ର ଚୌଧୁରୀ
ବ୍ରହ୍ମପୁର: ଗଞ୍ଜାମ ଜିଲ୍ଲା ବୁଗୁଡ଼ା ଥାନା ଅନ୍ତର୍ଗତ ମୋଟାବାଡି ଗ୍ରାମର ମଲା ପ୍ରଧାନ ନାମ୍ନୀ ଜନୈକ ମହିଳାଙ୍କ ଗତ କିଛି ଦିନ ହେଲା ଖୋଜ ଖବର ନଥିଲା। ପରିବାର ଲୋକେ ବହୁତ ଖୋଜାଖୋଜି କରିଥିଲେ ମଧ୍ୟ ତାଙ୍କର ସନ୍ଧାନ ମିଳିନଥିଲା।
କିନ୍ତୁ ଗାଁ ର ଜନୈକ ଲୋକଙ୍କ ଘର ବାଡ଼ି ପଟ କୂଅରେ ବୃଦ୍ଧାଙ୍କ ଶବ ଭାସୁଥିବା ଖବର ପ୍ରଘଟ ହେବା ପରେ ପୋଲିସ ପହଞ୍ଚି ଅଗ୍ନିଶମ ବିଭାଗକୁ ଖବର ଦେଇଥିଲେ ଓ ବିଭାଗୀୟ କର୍ମଚାରୀ ମାନେ ଘଟଣାସ୍ଥଳରେ ପହଞ୍ଚି ଶବ ଉଦ୍ଧାର କରି ବ୍ୟବଚ୍ଛେଦ ପାଇଁ ଡାକ୍ତରଖାନାକୁ ପଠାଇଛନ୍ତି।
କୈଳାଶ ଚନ୍ଦ୍ର ବେହେରା
ବ୍ରହ୍ମପୁର: ଗଞ୍ଜାମ ଜିଲ୍ଲା କୁକଡାଖଣ୍ଡି ବ୍ଳକ ବନ୍ଥପଲୀ ଗ୍ରାମ ପଞ୍ଚାୟତର ପୁର୍ବତନ ସରପଞ୍ଚ ପ୍ରଶାନ୍ତ କୁମାର ସ୍ବାଇଁଙ୍କୁ ନନ୍ଦନ ବେହେରା ସମେତ ଅନ୍ୟ କିଛି ଯୁବକ ଆକ୍ରମଣ କରିଛନ୍ତି ବୋଲି ଦିଗପହଣ୍ଡି ଥାନାରେ ଅଭିଯୋଗ ହୋଇଛି।
ସୂଚନାଯୋଗ୍ୟ ଯେ, ପ୍ରଶାନ୍ତ ଏକ କ୍ରିକେଟ ଟୁର୍ଣ୍ଣାମେଣ୍ଟ କାର୍ଯ୍ୟକ୍ରମରେ ଯୋଗ ଦେଇ ନିଜ ଗ୍ରାମ ଚାଞ୍ଚଡାପଲି ଫେରୁଥିବା ବେଳେ ଗାଁ ର ଠାକୁରାଣୀ ମନ୍ଦିର ପଛପଟରେ ଛକି ବସିଥିବା କିଛି ଯୁବକ ତାଙ୍କୁ ଅତର୍କିତ ଭାବେ ବିଭିନ୍ନ ମାରଣାସ୍ତ୍ରରେ ଆକ୍ରମଣ କରିଥିଲେ। ଯାହା ଫଳରେ ତାଙ୍କର ଶରୀରର ବିଭିନ୍ନ ସ୍ଥାନରେ ଗଭୀର ଆଘାତ ହୋଇଛି ଓ ଡାକ୍ତରଖାନାରେ ଚିକିତ୍ସିତ ହେଉଛନ୍ତି।
ପ୍ରକାଶ ଥାଉକି ପ୍ରଶାନ୍ତ ସରପଞ୍ଚ ଥିବା ବେଳେ ଗାଁ ରେ ବଚନ ସ୍ବାଇଁ ନାମକ ଜଣେ ଯୁବକକୁ ହତ୍ୟା କରାଯାଇଥିଲା। ସେହି ମକଦ୍ଦମାରେ ପ୍ରଶାନ୍ତ ସାକ୍ଷୀ ରହି ଶୁଣାଣି ବେଳେ ସାକ୍ଷୀ କାଟିଦେବାରୁ ଆକ୍ରମଣକାରୀ ଯୁବକ ମାନେ ପ୍ରଥମେ ପଚାରିଥିଲେ ଓ ପରେ ଆକ୍ରମଣ କରିଥିଲେ। ଆହତ ପ୍ରଶାନ୍ତ ଦିଗପହଣ୍ଡି ଥାନାରେ ଅଭିଯୋଗ କରିଛନ୍ତି ଓ ଅଭିଯୋଗକୁ ଭିତ୍ତି କରି ପୋଲିସ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛି।
ନୂଆଦିଲ୍ଲୀ: ଗଞ୍ଜାମ ଜିଲ୍ଲା ଦିଗପହଣ୍ଡିଠାରେ ଘଟିଥିବା ମର୍ମନ୍ତୁଦ ସଡ଼କ ଦୁର୍ଘଟଣାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୋକ ବ୍ୟକ୍ତ କରିଛନ୍ତି। ଏହାସହିତ ମୃତକଙ୍କ ସମ୍ପର୍କୀୟଙ୍କ ପାଇଁ ଅନୁକମ୍ପା ରାଶି ଘୋଷଣା କରିଛନ୍ତି। ପ୍ରତ୍ୟେକ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଲେଖାଏଁ ସହାୟତା ଦେବା ପାଇଁ ପ୍ରଧାନମନ୍ତ୍ରୀ ଘୋଷଣା କରିଛନ୍ତି। ସେହିଭଳି ଆହତଙ୍କ ପରିବାରକୁ ୫୦ ହଜାର ଟଙ୍କା ଲେଖାଏଁ ସହାୟତା ରାଶି ଦେବା ପାଇଁ ପ୍ରଧାନମନ୍ତ୍ରୀ ମୋଦୀ ଘୋଷଣା କରିଛନ୍ତି।
ଏହାକୁ ନେଇ ପ୍ରଧାନମନ୍ତ୍ରୀ ଟ୍ବିଟ କରି କହିଛନ୍ତି ଯେ, ”ଓଡ଼ିଶାର ଗଞ୍ଜାମ ଜିଲ୍ଲାରେ ଘଟିଥିବା ମର୍ମନ୍ତୁଦ ବସ ଦୁର୍ଘଟଣାରେ ମୁଁ ମର୍ମାହତ। ମୃତକଙ୍କ ପରିବାର ବର୍ଗଙ୍କୁ ସମବେଦନା ଜଣାଉଛି। ଆହତଙ୍କ ଆଶୁ ଆରୋଗ୍ୟ କାମନା କରୁଛି। ପ୍ରଧାନମନ୍ତ୍ରୀ ରାଷ୍ଟ୍ରୀୟ ରିଲିଫ୍ ପାଣ୍ଠି (PMNRF)ରୁ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଅନୁକମ୍ପା ମୂଳକ ସହାୟତା ରାଶି ପ୍ରଦାନ କରାଯିବ। ଆହତ ମାନଙ୍କୁ ୫୦ ହଜାର ଟଙ୍କାର ସହାୟତା ରାଶି ଯୋଗାଇ ଦିଆଯିବ।”
ଓଡ଼ିଶାର ଗଞ୍ଜାମ ଜିଲ୍ଲାରେ ଘଟିଥିବା ମର୍ମନ୍ତୁଦ ବସ ଦୁର୍ଘଟଣାରେ ମୁଁ ମର୍ମାହତ । ମୃତକଙ୍କ ପରିବାର ବର୍ଗଙ୍କୁ ସମବେଦନା ଜଣାଉଛି । ଆହତଙ୍କ ଆଶୁ ଆରୋଗ୍ୟ କାମନା କରୁଛି । ପ୍ରଧାନମନ୍ତ୍ରୀ ରାଷ୍ଟ୍ରୀୟ ରିଲିଫ୍ ପାଣ୍ଠି(PMNRF)ରୁ ମୃତକଙ୍କ ପରିବାରକୁ ୨ ଲକ୍ଷ ଟଙ୍କା ଅନୁକମ୍ପା ମୂଳକ ସହାୟତା ରାଶି ପ୍ରଦାନ କରାଯିବ । ଆହତ ମାନଙ୍କୁ ୫୦…
— PMO India (@PMOIndia) June 26, 2023
ଉଲ୍ଲେଖ ଯୋଗ୍ୟ ଯେ, ଗତକାଲି ମଧ୍ୟ ରାତ୍ରୀରେ ଦିଗପହଣ୍ଡି ଥାନା ଅନ୍ତର୍ଗତ ଖେମୁଣ୍ଡି ମହାବିଦ୍ୟାଳୟ ନିକଟରେ ଭୟାବହ ଦୁର୍ଘଟଣା ଘଟି ୧୫ ରୁ ଉର୍ଦ୍ଧ୍ବ ଲୋକଙ୍କ ପ୍ରାଣହାନୀ ଘଟିଥିବା ବେଳେ ପ୍ରାୟ ୨୫ ଜଣ ଗୁରୁତର ଆହତ ହୋଇଥିଲେ। ମୃତକଙ୍କ ମଧ୍ୟରେ ଦୁଇଟି ପିଲା ଅଛନ୍ତି। ନିକଟସ୍ଥ କୌଣସି ଏକ ଗାଁ କୁ କନ୍ୟା ଯାତ୍ରୀ ବସ୍ ପ୍ରାୟ ୪୦ ଜଣ ଯାତ୍ରୀଙ୍କୁ ନେଇ ଯାଉଥିବା ବେଳେ ଅପରପକ୍ଷରୁ ଗୁଡ଼ାରୀ ଠାରୁ ଭୁବନେଶ୍ଵର ଅଭିମୁଖେ ଯାଉଥିବା ଓ ଏସ୍ ଆର୍ ଟି ସି ବସ୍ ସହ ମୁହାଁମୁହିଁ ଧକ୍କା ହୋଇ ଏହି ଭଳି ଘଟଣା ଘଟିଥିଲା ଓ ଉଭୟ ବସ୍ ର ଡ଼୍ରାଇଭର ଗୁରୁତର ଆହତ ହୋଇ ଡାକ୍ତରଖାନାରେ ଚିକିତ୍ସିତ ହେଉଛନ୍ତି।
କୈଳାଶ ଚନ୍ଦ୍ର ଚୌଧୁରୀ
ବ୍ରହ୍ମପୁର: ଗଞ୍ଜାମ ଜିଲ୍ଲାର ସହର ଉପକଣ୍ଠ ନିମଖଣ୍ଡି ଫାଣ୍ଡିକୁ ରାଜ୍ୟ ସରକାର ଥାନାରେ ପରିଣତ କରିଥିଲେ। କିନ୍ତୁ ଆବଶ୍ୟକ ଭିତ୍ତିଭୂମୀ ଥାଇ କୋଠା ନଥିବାରୁ ସହର ମଧ୍ୟରେ ଖାଜା ସାହିସ୍ଥିତ ପୁରୁଣା ମହିଳା ଥାନାକୁ ଅସ୍ଥାୟୀ ଭାବେ ନିମଖଣ୍ଡି ଥାନାର କାର୍ଯ୍ୟାଳୟ ଆରମ୍ଭ ହୋଇଥିଲା। ଏହା ମଧ୍ୟରେ ନୂତନ ସ୍ଥାୟୀ କୋଠା ନିର୍ମାଣ ପାଇଁ ସରକାରୀ ଜାଗା ଚିହ୍ନଟ ଆରମ୍ଭ ହୋଇଥିଲା। ସେହି ପ୍ରକାରେ ଲୋଚାପଡା କାଳୀ ମନ୍ଦିର ନିକଟରେ ୨୩୩ ଡିସିମିଲ ଜମି ଥିବାର ଜଣାପଡିଥିଲା ଓ ଜାଗା ସଂରକ୍ଷଣ ପାଇଁ ଗଲାବେଳେ ସେଠି କିଛି ସାଧାରଣ ଲୋକ ଜାଗା ଜବରଦଖଲ କରି ୮ ଟି ଦୋକାନ ଗୃହ ନିର୍ମାଣ କରି ବ୍ୟବସାୟ ପ୍ରତିଷ୍ଠାନ ଚଳାଇଥିଲେ।
ଏହି ଭଳି ପରିସ୍ଥିତିରେ କୁକୁଡାଖଣ୍ଡି ତହସିଲଦାର କଲ୍ୟାଣୀ ସଂଘମିତ୍ରା, ସଦର ଏସ୍ ଡି ପି ଓ ଶିବଶଙ୍କର ମହାପାତ୍ର ଓ ସଦର ଥାନା ଆଇଆଇସି ଭାଵାନନ୍ଦଙ୍କ ଉପସ୍ଥିତିରେ ଉକ୍ତ ଦୋକାନ ଗୃହ ଗୁଡ଼ିକ ଉଚ୍ଛେଦ କରି ସେହି ସ୍ଥାନରେ ଥାନା କୋଠା ନିର୍ମାଣ ପ୍ରକ୍ରିୟା ଆରମ୍ଭ ହୋଇଛି।
କୈଳାଶ ଚନ୍ଦ୍ର ଚୌଧୁରୀ
ବ୍ରହ୍ମପୁର: ଗଞ୍ଜାମ ଜିଲ୍ଲା ବୁଗୁଡ଼ା ଥାନା ଅନ୍ତର୍ଗତ ଭଗବାନପୁର ପଞ୍ଚାୟତ ମହୁଲପଲୀ ଗ୍ରାମର ଜନୈକ ଯୁବତୀ ଆତ୍ମହତ୍ୟା କରିଥିବା ଅଭିଯୋଗ ହୋଇଛି। ମୃତକ ଯୁବତୀ ଜଣଙ୍କ ମହୁଲପଲୀ ଗ୍ରାମର ଧୋବା ଗୌଡ଼ଙ୍କ ଝିଅ ଭାରତୀ ଗୌଡ଼ ବୋଲି ଜଣାପଡିଛି। ମାଁ ଙ୍କ ସହିତ କୌଣସି କଥାକୁ ନେଇ ଭାରତୀଙ୍କ ଝଗଡ଼ା ହୋଇଥିଲା। ଯାହାପରେ ଭାରତୀ ଘର ବାଡିପଟକୁ ଯାଇ ପୋକମରା ଔଷଧ ଖାଇଦେଇଥିଲେ।
ଭାରତୀ ଅଚେତ ଥିବା ଦେଖି ପରିବାର ଲୋକେ ସଙ୍ଗେ ସଙ୍ଗେ ଡାକ୍ତରଖାନାକୁ ନେଇଥିଲେ। ହେଲେ ଡାକ୍ତର ସେଠାରେ ତାଙ୍କୁ ଘୋଷଣା କରିଥିଲେ। ଖବର ପାଇ ପୋଲିସ ଡାକ୍ତରଖାନାରେ ପହଞ୍ଚି ଶବ ଜବତ କରି ୨/୨୩ ଅନୁଯାୟୀ ଅପମୃତ୍ୟୁ ମାମଲା ରୁଜୁ କରି ତଦନ୍ତ ଚଳାଇଥିବା ଥାନା ଅଧିକାରୀ ଚିତ୍ତରଂଜନ ବେହେରାଙ୍କ ଠାରୁ ପ୍ରକାଶ।
କୈଳାଶ ଚନ୍ଦ୍ର ଚୌଧୁରୀ
ବ୍ରହ୍ମପୁର: ଗଞ୍ଜାମ ଜିଲ୍ଲା ବେଗୁନିଆପଡା ବ୍ଲକ ପଞ୍ଚାୟତ ସମିତିର ଦ୍ଵିତୀୟ ବୈଠକ ଅନୁଷ୍ଠିତ ହୋଇଯାଇଛି। ଅଧ୍ୟକ୍ଷା ରେଣୁବାଳା ଗୌଡ଼ଙ୍କ ସଭାପତିତ୍ବରେ ଏହି ବୈଠକରେ ବିଧାୟିକା ଲତିକା ପ୍ରଧାନ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ ଓ ବିଡ଼ିଓ ପ୍ରଜ୍ଞା ପ୍ରିୟଦର୍ଶିନୀ ଓ ଉପାଧ୍ୟକ୍ଷ ସୁଧାକର ପ୍ରଧାନ, ଥାନା ଅଧିକାରୀ ପୁର୍ଣ୍ଣ ଚନ୍ଦ୍ର ପ୍ରଧାନ ଓ ସହକାରୀ ଯନ୍ତ୍ରୀ ଗୌଡ଼ ପ୍ରମୁଖ ମଞ୍ଚାସୀନ ଥିଲେ।
ଉକ୍ତ ବୈଠକରେ ବ୍ଳକ ଅଞ୍ଚଳରୁ ସରପଞ୍ଚ, ସମିତି ସଭ୍ୟ ଓ ଜିଲ୍ଲା ପରିଷଦ ସଭ୍ୟ ମାନେ ଯୋଗ ଦେଇ ନିଜ ଅଞ୍ଚଳର ବିଭିନ୍ନ ସମସ୍ୟା ଯଥା ଶିକ୍ଷା, ସ୍ବାସ୍ଥ୍ୟ, ପରିମଳ, କୃଷି, ଅଙ୍ଗନବାଡ଼ି କେନ୍ଦ୍ର ଓ ଆଇନ ଶ୍ରୁଙ୍ଖଳା ପରିସ୍ଥିତି ଓ ନିରାପତ୍ତା ସମସ୍ୟା ବିଷୟରେ ଆଲୋଚନା କରିବା ସହ ସାଧାରଣ ଜନତାଙ୍କ ମୌଳିକ ସମସ୍ୟା ଗୁଡିକ ଯଥା ଶିଘ୍ର ସମାଧାନ ପାଇଁ ଦାବି ଉପସ୍ଥାପନ କରିଥିଲେ।
ସୀତାରାମ ଅଗ୍ରୱାଲ
ବାଣପୁର: ରାଜ୍ୟ ସରକାରଙ୍କ ନିର୍ଦ୍ଦେଶକ୍ରମେ ତିନିଦିନ ଧରି ଚାଲିଥିବା ପଞ୍ଚାୟତ ସ୍ତରୀୟ ପ୍ରତିନିଧି ମାନଙ୍କର କର୍ମଶାଳା ଆଜି ସମାପ୍ତ ହୋଇଛି। ଏହି ପରିପ୍ରେକ୍ଷୀରେ ଗଞ୍ଜାମ ଜିଲ୍ଲାର ପଞ୍ଚାୟତ ପ୍ରତିନିଧିମାନଙ୍କର ଏକ ପ୍ରତିନିଧି ମଣ୍ଡଳୀ ଆଜି ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଗସ୍ତ କରିଥିଲେ। ଏଥିରେ ଗଞ୍ଜାମ ଜିଲ୍ଲାର ପୋଲସରା, ହିଞ୍ଜିଳି ଓ ପାତ୍ରପୁର ବ୍ଲକର ଅଧ୍ୟକ୍ଷ ଓ ଅଧ୍ୟକ୍ଷାଙ୍କ ସମେତ ସରପଞ୍ଚ ଓ ସମିତି ସଭ୍ୟ ସମୁଦାୟ ୨୨ ଜଣ ପ୍ରତିନିଧି ଏହି କର୍ମଶାଳାରେ ଅଂଶ ଗ୍ରହଣ କରିଥିଲେ।
ପ୍ରତିନିଧି ମଣ୍ଡଳୀ ବାଣପୁର ବ୍ଲକ ଅଧିନସ୍ଥ ଗମ୍ଭାରୀମୁଣ୍ଡା ପଂଚାୟତରେ ପହଂଚିବା ପରେ ସରପଞ୍ଚ ପ୍ରେମାଞ୍ଜଳି ପଟ୍ଟନାୟକ ଓ ସମିତି ସଭ୍ୟା ମିନାକ୍ଷୀ ପ୍ରଧାନ, ବିଡିଓ ବୁଲବୁଲ ବେହେରା, ଜିଲ୍ଲା ପରିଷଦ ଉପସଭାପତି ଗୋପୀନାଥ ମହାରଣାଙ୍କ ସମେତ ସମସ୍ତ ୱାର୍ଡ ସଭ୍ୟମାନେ ଉପସ୍ଥିତ ରହି ପ୍ରତିନିଧି ମଣ୍ଡଳୀଙ୍କୁ ସ୍ୱାଗତ ସମ୍ବର୍ଦ୍ଧନା କରିଥିଲେ।
ପରେ ପ୍ରତିନିଧି ମଣ୍ଡଳୀ ବାଣପୁର ବ୍ଲକର ବିଭିନ୍ନ ଉନ୍ନୟନ ମୂଳକ କାର୍ଯ୍ୟ ଗୁଡିକୁ ତଦାରଖ କରିଥିଲେ ଏବଂ ବୁଲି ଦେଖିଥିଲେ। ପ୍ରତିନିଧି ମଣ୍ଡଳୀ ପଙ୍କାଳ ସ୍ଥିତ ସଂଗ୍ରାମ ରଣାଙ୍କର ସମ୍ମିଳିତ କୃଷି ଉଦ୍ୟାନ ଯଥା ମତ୍ସ୍ୟ ଚାଷ, ଛତୁ ଚାଷ, କୁକୁଡ଼ା ଚାଷକୁ ବୁଲି ଦେଖିଥିଲେ।
ସେଠାରେ ମଧ୍ୟାହ୍ନ ଭୋଜନ କରି ଭେଟେଶ୍ୱର ଗ୍ରାମ ପଞ୍ଚାୟତ ଅଭିମୁଖେ ଯାଇଥିବା ବେଳେ ସେଠାରେ ସରପଞ୍ଚ ସାବିତ୍ରୀ ଭୋଳ, ସମିତି ସଭ୍ୟା ରଶ୍ମିତା ପ୍ରଧାନ ଓ ଗାଲୁଆ ସରପଞ୍ଚ ସୁରେଶ ବାରିକି ପ୍ରତିନିଧି ମଣ୍ଡଳୀଙ୍କୁ ସ୍ୱାଗତ କରିଥିଲେ। ପଞ୍ଚାୟତର ବାଂଳେଇ ଗ୍ରାମରେ ଥିବା ଆଦର୍ଶ ପୋଖରୀକୁ ବୁଲି ଦେଖିଥିଲେ।
ସମସ୍ତ କାର୍ଯ୍ୟକୁ ଦେଖିବା ପରେ ପ୍ରତିନିଧି ମଣ୍ଡଳୀ ଖୁସିବ୍ୟକ୍ତ କରି ମା’ ଭଗବତୀଙ୍କ ମନ୍ଦିର ପରିଦର୍ଶନ ପରେ ଗଞ୍ଜାମ ଫେରିଯାଇଥିଲେ। ଏ ସମସ୍ତ କାର୍ଯ୍ୟକ୍ରମକୁ ବାଣପୁର ବ୍ଲକ ତରଫରୁ ବିଡ଼ିଓ ବୁଲବୁଲ ବେହେରା, ଜେଇ ଭଞ୍ଜ କିଶୋର ପାଣି, ଜିପିଇଓ ମମତା ମଞ୍ଜରୀ ଚିନ୍ନାରା, ବିପିଏମ ଶିବ ନାରାୟଣ ଜାଲି, ପିଇଓ ନୃସିଂହ ଜେନା ପ୍ରମୁଖ ତ୍ୱରାନ୍ୱିତ କରିଥିଲେ।
କୈଳାଶ ଚନ୍ଦ୍ର ଚୌଧୁରୀ
ବ୍ରହ୍ମପୁର: ଆଜି ଗଞ୍ଜାମ ଜିଲ୍ଲା ତପ୍ତପାଣି ଘାଟି ନିକଟରେ ବ୍ରହ୍ମପୁର ଅବକାରୀ ଗୋଇନ୍ଦା ବିଭାଗ ପକ୍ଷରୁ ଚଢାଉ କରି ଏକ କାର୍ ସହିତ ୫୦ କିଲୋ ଗଞ୍ଜେଇ ଜବତ କରିଛି। ଏହି ମାମଲାରେ ମୋହନା ଥାନା କେଳା ସାହିର ମୁନ ନାୟକ ନାମକ ଚାଲାଣକାରୀ ଯୁବକକୁ ଗିରଫ କରି କୋର୍ଟ ଚାଲାଣ କରାଯାଇଛି।
ଜବତ ଗଞ୍ଜେଇ ଗଜପତି ଜିଲ୍ଲାରୁ ଭୁବନେଶ୍ୱର ଚାଲାଣ ହେଉଥିବା ଅବକାରୀ ଗୋଇନ୍ଦା ବିଭାଗ ଉପାୟୁକ୍ତ ଅଶୋକ କୁମାର ଶତପଥୀଙ୍କ ଠାରୁ ପ୍ରକାଶ।
ଏଠାରେ ଉଲ୍ଲେଖ ଥାଉକି ଏହି ଚଳିତ ସପ୍ତାହରେ ଅବକାରୀ ଗୋଇନ୍ଦା ବିଭାଗ ପକ୍ଷରୁ ବିଭିନ୍ନ ସ୍ଥାନରେ ଚଢାଉ କରାଯାଇ ପ୍ରାୟ ୩୦୦ କିଲୋ ରୁ ଅଧିକ ଗଞ୍ଜେଇ, ୩ ଟି କାର୍ ଜବତ୍ ସହ ୮ ଅଭିଯୁକ୍ତଙ୍କୁ ଗିରଫ କରାଯାଇଛି।
କୈଳାଶ ଚନ୍ଦ୍ର ଚୌଧୁରୀ
ହିଞ୍ଜିଳି: ଗଞ୍ଜାମ ଜିଲ୍ଲା ହିଞ୍ଜିଳି ଥାନା ଅଞ୍ଚଳରେ ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଯାଇଛି। ଯେଉଁଥିରେ ଜଣେ ଶିଶୁ ପୁତ୍ରର ମୃତ୍ୟୁ ହୋଇଛି। ଫଳରେ ଉତ୍ୟକ୍ତ ଲୋକ ରାସ୍ତା ଅବରୋଧ କରିଥିବା ଜଣାପଡିଛି।
ସୂଚନା ଅନୁଯାୟୀ, ହିଞ୍ଜିଳି ଥାନା ଅନ୍ତର୍ଗତ ଶିକିରି ଗ୍ରାମ ମୁଖ୍ୟ ରାସ୍ତାରେ ହିମାଂଶୁ ଦଳେଇଙ୍କ ୪ ବର୍ଷର ଶିଶୁ ପୁତ୍ର ସିଦ୍ଧାର୍ଥ ଦଳେଇଙ୍କ ଉପରେ ଏକ ହାଇୱ। ଟ୍ରକ୍ ମାଡ଼ିଯାଇଥିଲା। ଯାହା ଫଳରେ ଘଟଣାସ୍ଥଳରେ ଶିଶୁ ପୁତ୍ରର ମୃତ୍ୟୁ ହୋଇ ଯାଇଥିଲା। ଉକ୍ତ ଘଟଣା ପରେ ଉତ୍ୟକ୍ତ ଗ୍ରାମବାସୀମାନେ ମୃତ ଦେହକୁ ରଖି ରାସ୍ତା ଅବରୋଧ କରିଥିଲେ।
ଖବର ପାଇ ହିଞ୍ଜିଳି ପୋଲିସ ପହଞ୍ଚି ଲୋକ ମାନଙ୍କୁ ବୁଝାସୁଝା କରି ଅବରୋଧ ହଟାଇବା ସହ ଦୁର୍ଘଟଣାଗ୍ରସ୍ତ ଗାଡ଼ିକୁ ଅଟକାଇ ଘଟଣାର ତଦନ୍ତ ଚଳାଇଛି।
ବ୍ରହ୍ମପୁର: ଗତ ରାତିରେ ଗଞ୍ଜାମ ଜିଲ୍ଲା କଳିଙ୍ଗ ଘାଟିରେ ଏକ ବଡ଼ ଦୁର୍ଘଟଣା ଘଟିଛି। ସେଠାରେ ବସ୍ ଓଲଟି ୬ ଜଣଙ୍କର ମୃତ୍ୟୁ ହୋଇଛି। ଏହାସହିତ ଏଥିରେ ୪୦ ଜଣ ଯାତ୍ରୀ ଆହତ ହୋଇଛନ୍ତି। ପଶ୍ଚିମବଙ୍ଗର ପର୍ଯ୍ୟଟକମାନେ ଦାରିଙ୍ଗବାଡିରୁ ଫେରୁଥିବା ବେଳେ ଏହି ଦୁର୍ଘଟଣା ଘଟିଛି। ବ୍ରେକ ଫେଲ ଯୋଗୁଁ ଏପରି ଦୁର୍ଘଟଣା ଘଟିଥବା କୁହାଯାଉଛି। ଆହତମାନଙ୍କୁ ଚିକିତ୍ସା ପାଇଁ ବ୍ରହ୍ମପୁର ବଡ ମେଡିକାଲକୁ ପଠାଯାଇଛି।