Tag: ଜାତୀୟ ରାଜପଥ

ବାଲୁଗାଁ: ୫ନଂ ଜାତୀୟ ରାଜପଥ ବାଲୁଗାଁ ସହରର ମୁଖ୍ୟ ରାସ୍ତା ସମ୍ପ୍ରସାରଣ ନେଇ ଉଭୟ ପାର୍ଶ୍ଵରେ ଥିବା ବେଆଇନ ନିର୍ମାଣ ଉଚ୍ଛେଦ ପ୍ରକ୍ରିୟା ଆଜି ଆରମ୍ଭ ହୋଇଛି। ଖବର ମୁତାବକ ବାଲୁଗାଁ ସହରର ମୁଖ୍ୟ ରାସ୍ତା ଗୋବର୍ଦ୍ଧନପୁର ଠାରୁ ଗବପଦର ମୌଜା ପର୍ଯ୍ୟନ୍ତ ଦୀର୍ଘ ୪ କିମି ରାସ୍ତା ୪ ଲେନ ବିଶିଷ୍ଟ ସମ୍ପ୍ରସାରଣ ନିମନ୍ତେ ରାସ୍ତା ଓ ଗୃହ ନିର୍ମାଣ ବିଭାଗ ପକ୍ଷରୁ କାର୍ଯ୍ୟାଦେଶ ପାଇଁ ନିର୍ଦ୍ଦେଶ ରହିଥିଲା।

ଏନେଇ ସ୍ଥାନୀୟ ପ୍ରଶାସନ ପକ୍ଷରୁ ସରକାରୀ ଜାଗା ଚିହ୍ନଟ କରି ଅବରୋଧକାରୀଙ୍କୁ ସୂଚିତ କରାଯିବା ସହ ସ୍ଥାନୀୟ ପ୍ରଶାସନ ପକ୍ଷରୁ ଅକ୍ଟୋବର ୪ ରେ ଉଚ୍ଛେଦ ପ୍ରକ୍ରିୟା ଆରମ୍ଭ ହୋଇଥିଲା। ମାତ୍ର କିଛି ଅନିର୍ବାଯ୍ୟ କାରଣ ଯୋଗୁଁ ଉଚ୍ଛେଦ ପ୍ରକ୍ରିୟା ସ୍ଥଗିତ ରହିଥିଲା। ଯାହାକି ସ୍ଥାନୀୟ ପ୍ରଶାସନ ପକ୍ଷରୁ ଗତ ସେପ୍ଟେମ୍ବର ମାସ ଠାରୁ ଅନେକ ଥର ବିଭିନ୍ନ ସ୍ଥାନରେ ଜାଗା ଚିହ୍ନଟ କରାଯାଇଥିବା ବେଳେ ବାସ୍ତବରେ କେତେ ଜାଗା ଉଚ୍ଛେଦ ହେବ ତାହା ସ୍ଥାୟୀ ଓ ଅସ୍ଥାୟୀ ଜବରଦଖଲ କାରୀ ଅଗୋଚରରେ ରହିଥିଲେ।

ତେବେ ନୂତନ ବର୍ଷ ପ୍ରାରମ୍ଭରୁ ଚିଲିକା ତହସିଲଦାର କାହ୍ନୁ ଚରଣ ଘଡେଇ ଜବରଦଖଲକାରୀଙ୍କୁ ଉଚ୍ଛେଦ ପାଇଁ ନୋଟିସ ଜାରି କରିଥିଲେ। ଯାହାକି ଆଜି ପୂର୍ବାହ୍ନରେ ଚିଲିକା ତହସିଲଦାର ଶ୍ରୀ ଘଡେଇଙ୍କ ନିର୍ଦ୍ଦେଶ କ୍ରମେ ଉଚ୍ଛେଦ ପ୍ରକ୍ରିୟା ଆରମ୍ଭ କରାଯାଇଛି।

ଅତିରିକ୍ତ ତହସିଲଦାର ବିଷ୍ଣୁପ୍ରିୟା ବେହେରା, ବାଲୁଗାଁ ରାଜସ୍ୱ ଅଧିକାରୀ ନିକୁଞ୍ଜ ପ୍ରଧାନ, ଅମିନ, ତହସିଲ କର୍ମଚାରୀ, ଏକ ପ୍ଲାଟୁନ ଫୋର୍ସ ଓ ସ୍ଥାନୀୟ ପୋଲିସ ପ୍ରଶାସନ ଉପସ୍ଥିତିରେ ଉଚ୍ଛେଦ ପ୍ରକ୍ରିୟା କରାଯାଇଥିଲା।

ଏହି ପ୍ରକ୍ରିୟା ବାଲୁଗାଁ ସହରରେ ସମ୍ପୂର୍ଣ୍ଣ ଅବରୋଧ ମୁକ୍ତ କରିବା ପର୍ଯ୍ୟନ୍ତ ଜାରି ରହିବ ବୋଲି ତହସିଲଦାର ଶ୍ରୀ ଘଡେଇ କହିଛନ୍ତି।

ବାଣପୁର: ଆଜି ଅପରାହ୍ନରେ ବାଣପୁର ବାଲୁଗାଁ ୧୬ ନମ୍ବର ଜାତୀୟ ରାଜପଥ ଅନ୍ତର୍ଗତ ଧୂଆଁଳ ଛକ ଓଭରବ୍ରିଜ ଉପରେ ଏକ ଅଣ୍ଡା ବୋଝେଇ ଟ୍ରକ ଦୁର୍ଘଟଣା ଗ୍ରସ୍ତ ହୋଇ ମଝି ରାସ୍ତାରେ ଓଲଟିପଡ଼ିଛି। ଫଳରେ ଗାଡ଼ିମୋଟର ଯାତାୟାତ ବାଧାପ୍ରାପ୍ତ ହୋଇଛି।

ସୂଚନା ମୁତାବକ ଆନ୍ଧ୍ରାରୁ ଭୁବନେଶ୍ୱର ଅଭିମୁଖେ ଯାଉଥିବା ଏକ ଅଣ୍ଡା ବୋଝେଇ ଟ୍ରକକୁ ଏକ ଟ୍ରଲର ଧୂଆଁଳ ଛକ ଓଭରବ୍ରିଜ ଉପରେ ଧକ୍କା ଦେଇ ଫେରାର ହୋଇଯାଇଥିଲା।  ଫଳରେ ଟ୍ରକଟି ଭାରସାମ୍ୟ ହରାଇ ଓଲଟି ପଡ଼ିଛି। ଖବର ପାଇ ଘଟଣାସ୍ଥଳରେ ଜାତୀୟ ରାଜପଥ ପେଟ୍ରୋଲିଂ ବାହାନ ପହଞ୍ଚିଥିବା ବେଳେ ଟ୍ରକ ଡ୍ରାଇଭର ଅଚେତ ହୋଇପଡ଼ିଥିବା ଜଣାପଡିଛି।

ବର୍ତ୍ତମାନ ଦୁର୍ଘଟଣାସ୍ଥଳରେ ଟ୍ରକଟି ପଡ଼ି ରହିଥିବା ବେଳେ ଯାତାୟାତ ବାଧାପ୍ରାପ୍ତ ହୋଇଛି।

ବାଣପୁର: ଗତକାଲି ରାତି ୧୦ ଘଟିକାରେ ବାଣପୁରରୁ ଭୁବନେଶ୍ୱର ଯାଉଥିବା ଏକ କାର ଜାତୀୟ ରାଜପଥ ବିଷ୍ଣୁଡ଼ିହ ଓଭର ବ୍ରିଜ ନିକଟ ରାସ୍ତା ଉପରେ ସମ୍ପୂର୍ଣ୍ଣ ଜଳି ଯାଇଛି। କାରଟି ସୁଜକି ଡ଼ିଜାୟାର ହୋଇଥିବା ବେଳେ ତାହାର ନମ୍ବର ଓଡି ୧୪ କିୟୁ ୩୮୬୯ ବୋଲି ଜଣାପଡିଛି।

ଖବର ମୁତାବକ ବାଣପୁର ଏଏନସି ଅନ୍ତର୍ଗତ ବଡହନ୍ତୁଆଡ଼ ମୁସଲିମ ସାହିର ଅବିଦ ଖାଁ ତାଙ୍କ ଭାଇ ବାହାଘର ନିମନ୍ତେ ବିବାହ ସାମଗ୍ରୀ କିଣିବା ପାଇଁ ଭୁବନେଶ୍ୱର ଯାଉଥିଲେ। ବିଷ୍ଣୁଡ଼ିହ ଓଭରବ୍ରିଜ ନିକଟରେ ବ୍ୟାଟେରୀ ସର୍ଟ ସର୍କିଟରୁ କାରରେ ନିଆଁ ଲାଗିଥିବା ବେଳେ କାର ଭିତରେ ଥିବା ସମସ୍ତ ଯାତ୍ରୀ ସୁରକ୍ଷିତ ଥିବା ଜଣାପଡିଛି।

ବାଲୁଗାଁ ଅଗ୍ନିଶମ ବାହିନୀ ତୁରନ୍ତ ପହଞ୍ଚି ନିଆଁ ଲିଭାଇଥିବା ବେଳେ କାରଟି ସମ୍ପର୍ଣ୍ଣ ଜଳି ଯାଇଥିବା ଜଣାପଡିଛି। ବାଣପୁର ପୋଲିସ ପହଞ୍ଚି ତଦନ୍ତ ଜାରି ରଖିଛି।

ଟାଙ୍ଗୀ: ଖୋର୍ଦ୍ଧା ଜିଲ୍ଲା ଟାଙ୍ଗି ଥାନା ଅଧୀନସ୍ଥ ୧୬ ନମ୍ବର ଜାତୀୟ ରାଜପଥ ଦିକ୍ଷୀତପଡା ନିକଟରେ ଦୁର୍ଘଟଣା ଘଟିଛି। ଆଜି ଭୋର ୫ଟା ସମୟରେ ଦୁର୍ଘଟଣା ଘଟି ଜଣେ ମୃତ ୫ଗୁରୁତର ହୋଇଛନ୍ତି। ଗୁରୁତରଙ୍କୁ ଭୁବନେଶ୍ୱର ସ୍ଥାନାନ୍ତରିତ କରାଯାଇଛି। ଏନେଇ ଟାଙ୍ଗୀ ପୋଲିସର ତଦନ୍ତ ଆରମ୍ଭ ହୋଇଛି।

ସୂଚନାରୁ ଜଣାପଡିଛି କାର୍ତ୍ତିକରେ ଖୋର୍ଦ୍ଧା ଜିଲ୍ଲା ଟାଙ୍ଗୀ ଥାନା କୟଥପଲା ଗ୍ରାମର ୮ ଜଣ ହବିଷ୍ୟାଳି ଏକ ଅଟୋରେ ପୁରୀ ଜଗା ଦର୍ଶନ କରିବାକୁ ଯାଉଥିଲେ। ହେଲେ ଜଗା ଦର୍ଶନ ସେମାନଙ୍କ ପାଇଁ ଅଧାରେ ରହିଗଲା। ପୁରୀ ଯାଉଥିବା ବେଳେ ଜାତୀୟ ରାଜପଥ ଇକ୍ଷିତପଡା ଠାରେ ଅଟୋକୁ ଏକ ଟ୍ରକ ସାଇଟ ମାରିବାରୁ ଅଟୋଟି ଓଲଟି ପଡିଥିଲା।

ଅଟୋରେ ଥିବା ଜଣେ ହବିଶ୍ୟାଳୀ ମହିଳା ମୃତ୍ୟୁବରଣ କରିଥିଲେ। ଅଟୋ ରିକ୍ସା ଚାଳକ ସହ ୪ ଜଣ ହବିଶ୍ୟାଳୀ ଗୁରୁତର ହୋଇଛନ୍ତି। ମୃତ ହବିଶ୍ୟାଳୀଙ୍କର ନାମ ହେଲା ସୁଷମା ସାମନ୍ତରାୟ (୬୦ ବର୍ଷ)। ଗୁରୁତର ଅଟୋ ଚାଳକ ହେଲେ ମିଟୁ ସେନ (୩୦ ବର୍ଷ)। ଅନ୍ୟ ଗୁରୁତର ମାନେ ହେଲେ ଶଶୀ ଗୁମାନ ସିଂ (୭୨), ଆଶାମଣୀ ସାମନ୍ତରାୟ (୬୫), ସଜନୀ ସାମନ୍ତରାୟ (୬୮ ବର୍ଷ) ବୋଲି ଜଣା ପଡିଛି।

ଗୁରୁତର ମାନଙ୍କୁ ଟାଙ୍ଗୀ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରୁ ଭୁବନେଶ୍ୱରକୁ ସ୍ଥାନାନ୍ତର କରାଯାଇଛି।ଖବର ପାଇ ଟାଙ୍ଗୀ ପୋଲିସ ଘଟଣା ସ୍ଥଳରେ ପହଁଚି ତଦନ୍ତ ଆରମ୍ଭ କରିଛି।

ବାଲୁଗାଁ (ସୀତାରାମ ଅଗ୍ରୱାଲ): ଗୁରୁବାର ସନ୍ଧ୍ୟାରେ ଖୋର୍ଦ୍ଧା ଜିଲ୍ଲା ନାଭାଲ ଫାଣ୍ଡି ନିକଟସ୍ଥ ୧୬ ନଂ ଜାତୀୟ ରାଜପଥ ସରନଇ ଓଭର ବ୍ରିଜ ନିକଟରୁ ମୁର୍ମୁଷ ଅବସ୍ଥାରେ ଜଣେ ଅଜଣା ବ୍ୟକ୍ତିଙ୍କୁ ଉଦ୍ଧାର କରିଛି ପୋଲିସ। ମୁର୍ମୁଷ ଅବସ୍ଥାରେ ଜଣେ ବ୍ୟକ୍ତି ଦୀର୍ଘ ସମୟ ଧରି ରାସ୍ତା କଡରେ ପଡିଥିବା ଦେଖି ସ୍ଥାନୀୟ ଲୋକେ ନାଭାଲ ଫାଣ୍ଡିରେ ଖବର ଦେଇଥିଲେ।

ଖବର ପାଇ ନାଭାଲ ଫାଣ୍ଡି ଅଧିକାରୀ ରବୀନ୍ଦ୍ର ନାଥ ଗୌଡା ଘଟଣା ସ୍ଥଳରେ ପହଞ୍ଚି ଅଜଣା ବ୍ୟକ୍ତିଙ୍କୁ ଉଦ୍ଧାର କରି ୧୦୮ ଆମ୍ବୁଲାନ୍ସ ଯୋଗେ ବାଣପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇ ଦେଇଛନ୍ତି। ପରୀକ୍ଷା ନିରୀକ୍ଷା ପରେ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି। ସମ୍ପୃକ୍ତ ମୃତ ବ୍ୟକ୍ତିଙ୍କ ପରିଚୟ ମିଳିପାରି ନଥିବା ବେଳେ ଆନୁମାନିକ ୫୫ ବର୍ଷ ବୋଲି ନାଭାଲଫାଣ୍ଡି ଅଧିକାରୀ ଶ୍ରୀ ଗୌଡା କହିଛନ୍ତି।

ସେ ଏକ ବ୍ଲୁ ରଙ୍ଗର ପ୍ୟାଣ୍ଟ ଓ ଏକ ଚେକ ଟି ସାର୍ଟ ପିନ୍ଧିଥିବା ଦେଖିବାକୁ ମିଳିଛି।

ବ୍ରହ୍ମପୁର: ଖଲ୍ଲିକୋଟ ଥାନା ୧୬ ନଂ ଜାତୀୟ ରାଜପଥ ଡିମିରିଆ ଛକରେ ଘଟିଛି ଏକ ମର୍ମନ୍ତୁଦ ଦୁର୍ଘଟଣା। କାଉଡ଼ିଆ ମନେ ଗଞ୍ଜାମ ଋଷିକୂଲ୍ୟା ନଦୀରୁ ପାଣି ନେଇ ବାଣପୁର ଅଭିମୁଖେ ଯାଉଥିବା ବେଳେ ଡିମିରିଆ ଛକ ନିକଟରେ ଦୁଇ କାଉଡ଼ିଆଙ୍କ ସହ ଡିମିରିଆ ପଞ୍ଚାୟତ ଦଲିବାଟି ଗ୍ରାମର ଏ ବନମାଳି ପାତ୍ରଙ୍କ ଉପରେ ଟ୍ରକ ମାଡ଼ି ଯାଇଥିଲା। ଯାହା ଫଳରେ ଘଟଣା ସ୍ଥଳରେ ଦୁଇ କାଉଡ଼ିଆଙ୍କମୃତ୍ୟୁ ହୋଇଥିବା ବେଳେ ବନମାଳିଙ୍କୁ ଖଲ୍ଲିକୋଟ ମେଡିକାଲରେ ଡାକ୍ତର ମୃତ ଘୋଷଣା କରିଛନ୍ତି।

ମୃତ ଦୁଇ କାଉଡ଼ିଆ ହେଲେ ବାଣପୁର ହରିଜନ ସାହିର ପପୁ ନାହାକ ଓ ରଞ୍ଜିତ ନାହାକ। ଘଟଣା ସ୍ଥଳରେ ଖଲ୍ଲିକୋଟ ପୋଲିସ ପହଞ୍ଚି ଶବକୁ ଜବତ କରିବା ସହ ଟ୍ରକ ଡ୍ରାଇଭରକୁ ଅଟକ ରଖି ତଦନ୍ତ ଆରମ୍ଭ କରିଛି। ଏନେଇ ଖଲ୍ଲିକୋଟ ଥାନା ଅଧିକାରୀ ନରେଶ ସାହୁ  ସୂଚନା ଦେଇଛନ୍ତି।

ଖୋର୍ଦ୍ଧା: ବୁଧବାର ଭୋରରୁ ଶୁକ୍ରବାର ସନ୍ଧ୍ୟା ସୁଦ୍ଧା ଖୋର୍ଦ୍ଧା ଜିଲ୍ଲାର ବାଲୁଗାଁ ନାଭଲ ଛକ ଠାରୁ ସୁନଖେଳା ଛକ ଦୀର୍ଘ ସତର କିଲୋମିଟର ଦୂରତା ମଧ୍ୟରେ ଦୁର୍ଘଟଣା ଯୋଗୁଁ ୪୫ ଗୋରୁଙ୍କ ମୃତ୍ୟୁ ହୋଇଛି। ଜାତୀୟ ରାଜପଥର ବେଲପଡା, ବାଲୁଗାଁ ଓଭର ବ୍ରିଜ, ବିଷ୍ଣୁଡିହ, କୋତରି, ସୋଲାରୀ, ନାଚୁଣି, ସୁନଖେଳା ଆଦି ସ୍ଥାନରେ ନୀରିହ ପ୍ରାଣୀଙ୍କ ଦୁର୍ଘଟଣାଜନିତ ମୃତ୍ୟୁ ସହିତ କିଛି ଜୀଵିତ ପ୍ରାଣୀ ଅତ୍ୟନ୍ତ ଦୟନୀୟ ଓ ମୁର୍ମୁଷୁ ଅବସ୍ଥାରେ ପଡିଛନ୍ତି।

ସେମାନଙ୍କୁ ଉଦ୍ଧାର କରି କିଛି ଜୀବ ପ୍ରେମୀ ଓ ସ୍ଥାନୀୟ ଜନସାଧାରଣ ନିକଟସ୍ଥ ପ୍ରାଣୀ ଚିକିତ୍ସା କେନ୍ଦ୍ରକୁ ନେଇଛନ୍ତି। କିନ୍ତୁ ସେଠାରେ ଦୁର୍ଘଟଣାଗ୍ରସ୍ତ ପ୍ରାଣୀଙ୍କୁ ସୁ ଚିକିତ୍ସା ମିଳୁନଥିବା ଅଭିଯୋଗ ହୋଇଛି। ଯାହାଫଳରେ ସାଧାରଣ ଲୋକ ଖର୍ଚ୍ଚରେ ଗାଡି ଭଡାକରି ଚିକିତ୍ସା ପାଇଁ ଭୁବନେଶ୍ୱରସ୍ଥିତ ବିଭିନ୍ନ ପ୍ରାଣୀ ଚିକିତ୍ସାଳୟ ଓ ଗୋଶାଳାକୁ ପଠାଯାଉଥିବା ଜଣାପଡିଛି।

ଜାତୀୟ ରାଜପଥ ପ୍ରାଧିକରଣ କିମ୍ବା ଜିଲ୍ଲା ପ୍ରଶାସନ ପକ୍ଷରୁ ଦୁର୍ଘଟଣାଗ୍ରସ୍ତ ପ୍ରାଣୀମାନଙ୍କୁ ଜାତୀୟ ରାଜପଥ ଉପରୁ ଚିକିତ୍ସା କେନ୍ଦ୍ର କିମ୍ବା ଭୁବନେଶ୍ୱର ମହାନଗର ନିଗମ ଅଧୀନରେ ଥିବା ତ୍ୱରିତ ପ୍ରାଣୀ ଚିକିତ୍ସାଳୟକୁ ନେବା ପାଇଁ କୌଣସି ପ୍ରକାରରେ ଆଗ୍ରହ ପ୍ରକାଶ କିମ୍ବା ସହାୟତା କରିବା ଦେଖାନାହିଁ। ସେହିଭଳି ଦୁର୍ଘଟଣାରେ ମୃତ ପ୍ରାଣୀ ଶରୀରକୁ ରାସ୍ତା ଉପରୁ ହଟାଇବା ପାଇଁ କୌଣସି ପ୍ରକାର ସହଯୋଗ ମିଳୁନାହିଁ। ଖୋର୍ଦ୍ଧା ଜିଲ୍ଲାର ମୁଖ୍ୟ ପ୍ରାଣୀ ଚିକିତ୍ସକ, ଜିଲ୍ଲାପାଳ, ପ୍ରାଣୀକଲ୍ୟାଣ ନିର୍ଦ୍ଦେଶକ ତୁରନ୍ତ ଦୁର୍ଘଟଣା ଗ୍ରସ୍ତ ପ୍ରାଣୀମାନଙ୍କୁ ଉଦ୍ଧାର କରି ନେବାପାଇଁ ଆମ୍ବୁଲାନ୍ସ ତୁରନ୍ତ ଯୋଗାଇବାକୁ ଦାବୀ ହେଉଛି।

ଚିଲିକା ଅଞ୍ଚଳରେ ବିଭିନ୍ନ ଗ୍ରାମ ଅଞ୍ଚଳରେ ଥିବା ବୁଲା ଗାଈ ଗୋରୁଙ୍କୁ ଫସଲ ଖାଉଥିବା ଅଭିଯୋଗ କରି ରାତ୍ରିରେ କିଛି ମୁଷ୍ଟିମେୟ ଲୋକ ଷୋହଳ ନମ୍ବର ଜାତୀୟ ରାଜପଥ ଉପରକୁ ଏହି ଗାଈଗୋରୁଙ୍କୁ ତଡୁଥିବା ଦେଖାଯାଉଛି। ତେବେ ବେଲ ପଡ଼ା, ଧୁଆଁଳ, କୋତରୀ, ସୁନାଖେଳା, ବଡ଼କୁଳ ଆଦି ଛକ ନିକଟସ୍ଥ ରାସ୍ତା କଡରେ ଏହି ଗାଇଗୋରୁ ଆଶ୍ରୟ ନେଇଥିବା ବେଳେ ମଧ୍ୟ ରାତ୍ରିରେ ବେପାରୁଆ ଭାବେ ଷୋହଳ ନମ୍ବର ଜାତୀୟ ରାଜପଥ ଉପରେ ଗାଡି ଚଳାଉଥିବା ଡ୍ରାଇଭରମାନେ ସେମାନଙ୍କୁ ଜାଣି ଶୁଣି ଦୁର୍ଘଟଣା କରାଉଛନ୍ତି।

ଚିଲିକା ଅଞ୍ଚଳରେ ଗୋ ଶାଳା ଅଭାବ ଯୋଗୁଁ ବହୁ ସଂଖ୍ୟକ ରୋଗାକ୍ରାନ୍ତ ଗାଈ ଗୋରୁ ଖାଦ୍ୟ ଅଭାଵ ଓ ଉପଯୁକ୍ତ ଚିକିତ୍ସା ଅଭାବରୁ ବାଲୁଗାଁ ବଜାର ଓଭର ବ୍ରିଜ ଉପରେ ଆଶ୍ରୟ ନେଇଥାନ୍ତି। ମଧ୍ୟ ରାତ୍ରିରେ ଜାତୀୟ ରାଜପଥ ଉପରେ ପୋଲିସର ପାଟ୍ରୋଲିଂ ହେଉନଥିବା ବେଳେ ଏହି ସବୁ ଘଟଣା ଘଟୁଥିବା ଜଣାପଡିଛି।

ଷୋହଳ ନମ୍ବର ଜାତୀୟ ରାଜପଥର କିଛି ସ୍ଥାନ ବାଣପୁର ଥାନା ଉପରେ ଓ କିଛି ଅଂଶ ବାଲୁଗାଁ ଥାନା ଅଂଚଳରେ ଥିବାରୁ ମଧ୍ୟ ରାତ୍ରିରେ ଅସାମାଜିକ ମଦୁଆ ଗାଡି ଡ୍ରାଇଭର ଦୁର୍ଘଟଣା ଘଟାଇ ଅତି ସହଜରେ ଚାଲିଯାଉଛନ୍ତି। ବାଲୁଗାଁ ବାଣପୁର ଓଭର ବ୍ରିଜ ପାଖରେ ଜାତୀୟ ରାଜପଥ ପାର୍ଶ୍ୱରେ ଏକ ପୋଲିସ ଚୌକି ଥିବା ବେଳେ ରାତ୍ରିରେ ବନ୍ଦ ରହୁଛି।

ରାତ୍ରୀ ସମୟରେ ଏହି ଚୌକି ଖୋଲା ରହିଲେ ଜାତୀୟ ରାଜପଥ ଉପରେ ଘଟୁଥିବା ଘଟଣା ଉପରେ ସତର୍କ ନଜର ସହିତ ବିଭିନ୍ନ ଦୁର୍ଘଟଣାକୁ ରୋକାଯାଇପାରନ୍ତା। ପ୍ରତ୍ୟହ ସକାଳୁ ଷୋଳ ନମ୍ବର ଜାତୀୟ ରାଜପଥ ନିରୀହ ପ୍ରାଣୀ ମାନଙ୍କ ରକ୍ତରେ ରଞ୍ଜିତ ହୋଇପଡୁଛି। ଏହି ସମ୍ପର୍କରେ ଖୋର୍ଦ୍ଧା ଜିଲ୍ଲାର ମୁଖ୍ୟ ପ୍ରାଣୀ ଚିକିତ୍ସକ ଦେବୀ ଦତ୍ତ ମାଝୀଙ୍କୁ ଅବଗତ କରାଇଥିଲେ ମଧ୍ୟ ସେ ଚୁପ ରହୁଥିବା ଜଣାପଡିଛି।

ବାଲୁଗାଁ ସରକାରୀ ପ୍ରାଣୀ ଚିକିତ୍ସାଳୟରେ ବ୍ଲକ ଭେଟନାରୀ ଡାକ୍ତର ପୋଷ୍ଟ ଖାଲି ପଡ଼ିଛି।ଆଉ ତିନି ଜଣ ପ୍ରାଣୀ ଚିକିତ୍ସା ଡାକ୍ତର ପୋଷ୍ଟ ଖାଲି ରହିଛି। କେବଳ ଜଣେ ମାତ୍ର ଏଲ ଆଇ ଙ୍କ ଭରସାରେ ବାଲୁଗାଁ ଅଂଚଳରେ ପ୍ରାଣୀ ଚିକିତ୍ସା ଚାଲିଛି।

ପ୍ରାଣୀ ଚିକିତ୍ସାଳୟ ପରିସର ମଧ୍ୟରେ ପ୍ରାଣୀ ମାନଙ୍କ ଚିକିତ୍ସା ପାଇଁ ଜରୁରୀ କୋୖଣସି ଔଷଧ କି ଇଂଜେକସନ ଔଷଧ ଟିକେ ମିଳୁନାହିଁ। ଏ ସମ୍ପର୍କରେ ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସକ ଡା ଦେବୀ ଦତ୍ତ ମାଝୀଙ୍କୁ ଅବଗତ ପରେ ସେ ଏହା ଉପରେ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି।

ରେଢ଼ାଖୋଲ (କନ୍ଦର୍ପ ବେହେରା ): ଝିଅର ପାଠ ପଢା ପାଇଁ ଆବଶ୍ୟକ କାଗଜପତ୍ର ଦସ୍ତଖତ କରିବାକୁ ଯାଉଥିବା ସମୟରେ ରାସ୍ତାରେ ମହିଳାଙ୍କ ଅଜଣା ଗାଡି ଧକ୍କାରେ ମୃତ୍ୟୁ ହୋଇଥିବା ଜଣାପଡିଛି। ଏହାର ପ୍ରତିବାଦରେ ଗ୍ରାମବାସୀ କ୍ଷତି ପୂରଣ ଦାବିରେ ଶବରଖି ବେତଗଡ ଠାରେ ରାସ୍ତା ଅବରୋଧ କରିଛନ୍ତି।

ସୂଚନା ଅନୁଯାୟୀ ରେଢ଼ାଖୋଲ ଥାନା ଲୁହାପଙ୍କ ପଂଚାୟତ ଖର୍ସାଲୀ ଗ୍ରାମର ଯମୁନା ମୁଣ୍ଡା ଝିଅ ଯୁକ୍ତ ୨ ପାଠ ପଠା ପାଇଁ ଆବଶ୍ୟକ କାଗଜ ପତ୍ର ଦସ୍ତଖତ କରିବା ପାଇଁ ଲୁହାପଙ୍କ ସରପଞ୍ଚଙ୍କ ପାଖକୁ ଯାଉଥିବା ବେଳେ ରେଢ଼ାଖୋଲ -ଅନୁଗୁଳ ୫୫ ନମ୍ବର ଜାତୀୟ ରାଜପଥ ବେତଗଡଠାରେ ଯମୁନା ମୁଣ୍ଡାଙ୍କୁ ଅଜଣା ଗାଡି ଦୁର୍ଘଟଣା ଘଟାଇ ଫେରାର ହୋଇଯାଇଥିଲା। ପରିବାର ଲୋକ ସୂଚନା ପାଇ ଘଟଣାସ୍ଥଳରେ ପହଂଚି ଗ୍ରାମବାସୀ ସହାୟତାରେ ରାସ୍ତା ରୋକ କରିଥିଲେ। ଯା’ ଫଳରେ ଉଭୟ ପାର୍ଶ୍ୱରେ ଶହ ଶହ ଗାଡି ଅଟକି ରହିଥିଲା।

ଘଟଣା ସ୍ଥଳରେ ରେଢ଼ାଖୋଲଥାନାଧିକାରୀ ସବିତାଲତା ସେଠି ପହଞ୍ଚି ବୁଝାସୁଝା କରିଥିଲେ ସୁଦ୍ଧା ଉତ୍ୟକ୍ତ ଲୋକ ବୁଝି ନଥିଲେ। ଉପ ଜିଲ୍ଲାପାଳ ଆସି ଆମକଥା ବୁଝିଲେ ଯାଇ ଶବ ଉଠା ଯିବ ବୋଲି ଯିଦି କରିଥିଲେ। ଦୀର୍ଘ ୨ ଘଣ୍ଟା ପରେ ଉପ ଜିଲ୍ଲାପାଳ ରଶ୍ମିରଞ୍ଜନ ମହାନ୍ତି ପହଞ୍ଚିଥିଲେ। ସରକାରଙ୍କ ଠାରୁ ହରିଶ୍ଚନ୍ଦ୍ର ଯୋଜନାରୁ ଆର୍ଥିକ ସହାୟତା ଯୋଗାଇ ଦେଇଥିଲେ।

ରେଢ଼ାଖୋଲରେ ଶବ ବ୍ୟବଚ୍ଛେଦ ପରେ ପରିବାର ଲୋକଙ୍କୁ ହସ୍ତାନ୍ତର କରାଯାଇଥିଲା। ପୋଲିସ ଏକ ମାମଲା ରୁଜୁ କରି ଥିବା ଜଣା ପଡିଛି।

ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଗତକାଲି ପୁର୍ବାହ୍ନରେ ବ୍ରହ୍ମପୁର ଲାଞ୍ଜିପଲୀ ଜାତୀୟ ରାଜପଥ କଡ଼ରେ ମୁର୍ମୁଷୁ ଅବସ୍ଥାରେ ପଡ଼ିଥିବା ଜଣେ ବ୍ୟକ୍ତିଙ୍କୁ ସ୍ଥାନୀୟ ଲୋକେ ଉଦ୍ଧାର କରି ଚିକିତ୍ସା ନିମନ୍ତେ ବ୍ରହ୍ମପୁର ବଡ ଡାକ୍ତରଖାନାକୁ ପଠାଇଥିଲେ। କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି।

ପ୍ରକାଶ ଥାଉକି ମୃତ ବ୍ୟକ୍ତିଙ୍କ ନାମ ଧନେଶ୍ଵର ମହାପାତ୍ର ଓ ଲାଞ୍ଜିପଲୀ ଚନ୍ଦନ ନଗରରେ ତାଙ୍କର ଘର। ସେ ପ୍ରତ୍ୟେକ ଦିନ ପ୍ରାତଃ ଭ୍ରମଣରେ ଘରୁ ବାହାରି ଯାଆନ୍ତି। କିନ୍ତୁ ଗତକାଲି ସେ ସକାଳୁ ଯାଇ ଘରକୁ ଫେରିଥିଲେ। ଏହା ମଧ୍ୟରେ ସେ ହୃଦଘାତରେ ଆକ୍ରମଣ ହୋଇ ରାସ୍ତା କଡରେ ପଡ଼ିଥିବା ଦେଖି ସ୍ଥାନୀୟ ଲୋକେ ଉଦ୍ଧାର କରି ବଡ ଡାକ୍ତରଖାନାକୁ ପଠାଇଥିଲେ।

ଖବର ପାଇ ଧନେଶ୍ଵରଙ୍କ ପୁଅ ବଡ଼ ଡ଼ାକ୍ତରଖାନାରେ ପହଞ୍ଚି ବାପାଙ୍କ ଶବ ଚିହ୍ନଟ କରିଥିଲେ। ସେପଟେ ପୋଲିସ ଡାକ୍ତରଖାନାରେ ପହଞ୍ଚି ଏକ ଅପମୃତ୍ୟୁ ମାମଲା ରୁଜୁ କରି ଶବ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଥିଲା। ବ୍ୟବଚ୍ଛେଦ ପରେ ପରିବାର ଲୋକଙ୍କୁ ଶବ ହସ୍ତାନ୍ତର କରି ଘଟଣାର ତଦନ୍ତ ଆରମ୍ଭ କରିଛି ପୋଲିସ।

ରେଢ଼ାଖୋଲ (କନ୍ଦର୍ପ ବେହେରା): ସମ୍ବଲପୁର କଟକ ୫୫ ନଂ ଜାତୀୟ ରାଜପଥର ଲୁହାପଙ୍କ ନିକଟରେ ଗୁରୁବାର ଅପରାହ୍ନ ୪ ଟା ସମୟରେ ଭ୍ୟାନ ଧକ୍କାରେ ଜଣେ ବାଇକ ଆରୋହୀଙ୍କ ମୃତ୍ୟୁ ହୋଇଛି। ସୂଚନାଯୋଗ୍ୟ ଯେ ଜଣେ ବାଇକ ଆରୋହୀ ଜାତୀୟ ରାଜପଥରେ ଯାଉଥିବା ବେଳେ ପଛ ପଟରୁ ଏକ ଭ୍ୟାନ ବାଇକ୍ କୁ ଧକ୍କା ଦେଇଥିଲା।

ଫଳରେ ବାଇକ ଚାଳକ ଜଣଙ୍କ ଛିଟିକି ହୋଇ ରାସ୍ତାରେ ପଡ଼ିଯାଇଥିଲେ। ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ରେଢ଼ାଖୋଲ ଡାକ୍ତରଖାନାକୁ ପଠାଇଥିଲେ। ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।

ତେବେ ମୃତକଙ୍କ ପରିଚୟ ସ୍ପଷ୍ଟ ଜଣାପଡି ନଥିବାବେଳେ ସେପଟେ ଘଟଣା ସ୍ଥଳରେ ରେଢ଼ାଖୋଲ ପୋଲିସ ପହଞ୍ଚି ଦୁର୍ଘଟଣା ଘଟାଇଥିବା ଭ୍ୟାନ ଓ ବାଇକ୍ କୁ ଜବତ କରି ଘଟଣାର ତଦନ୍ତ ଆରମ୍ଭ କରିଛି।

ବାଲୁଗାଁ (ସୀତାରାମ ଅଗ୍ରୱାଲ): ଖୋର୍ଦ୍ଧା ଜିଲ୍ଲା ବାଲୁଗାଁ ଥାନା ୧୬ ନମ୍ବର ଜାତୀୟ ରାଜପଥ ଛତ୍ରଗଡ଼ ଛକରେ ଆଜି ଭୋରରୁ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଯାଇଛି। ଯେଉଁଥିରେ ଦୁଇ ଜଣଙ୍କ ଘଟଣାସ୍ଥଳରେ ମୃତ୍ୟୁ ହୋଇଛି।

ସୂଚନା ମୁତାବକ ଭୁବନେଶ୍ୱରରୁ ବ୍ରହ୍ମପୁର ଅଭିମୁଖେ ଏକ ଟ୍ରାଭେରା କାର ଏବଂ ଆଇରନ ବୋଝେଇ ଟ୍ରକ ଆଗ ପଛ ହୋଇ ଯାଉଥିବା ବେଳେ ଛତ୍ରଗଡ଼ ଛକରେ ଟ୍ରାଭେରାକୁ ପଛପଟୁ ଧକ୍କା ଦେଇଥିଲା ଆଇରନ ବୋଝେଇ ଟ୍ରକ। ଫଳରେ ଟ୍ରାଭେରାରେ ଉପସ୍ଥିତ ଥିବା ଦୁଇ ଜଣ ବ୍ୟକ୍ତିଙ୍କ ଘଟଣାସ୍ଥଳରେ ମୃତ୍ୟୁ ହୋଇଛି। ମୃତ ବ୍ୟକ୍ତି ଦ୍ବୟ ହେଲେ ଗଞ୍ଜାମ ଜିଲ୍ଲା ବେଲଗୁଣ୍ଠା ଅଞ୍ଚଳର ଟ୍ରାଭେରା ଡ୍ରାଇଭର ବିଦ୍ୟାଧର ବେହେରା ଏବଂ ଟ୍ରାଭେରା ମାଲିକ ମନୋରଞ୍ଜନ ପାଣିଗ୍ରାହୀ।

ଖବର ପାଇ ନାଭାଲ ଫାଣ୍ଡି ଅଧିକାରୀ ରବୀନ୍ଦ୍ରନାଥ ଗୌଡ ଅଗ୍ନିଶମ ବାହିନୀ ସହ ସଦଳବଳେ ଦୁର୍ଘଟଣାସ୍ଥଳରେ ପହଞ୍ଚି ଦୁଇ ମୃତକଙ୍କ ଶରୀରକୁ ଗାଡି ମଧ୍ୟରୁ ଉଦ୍ଧାର କରି ବାଲୁଗାଁ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ପଠାଇଦେଇଛନ୍ତି।

ଅପରପକ୍ଷରେ ଦୁର୍ଘଟଣା ଘଟାଇଥିବା ଟ୍ରକ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଥିବା ପୋଲିସ ସୂଚନା ଦେଇଛି।

ବ୍ରହ୍ମପୁର (କୈଳାଶ ଚନ୍ଦ୍ର ଚୌଧୁରୀ): ଗଞ୍ଜାମ ଜିଲ୍ଲା ଜାତୀୟ ରାଜପଥ ୧୬ ହରିଡ଼ାମୂଳ ବଡ଼ଘାଟି ନିକଟରେ ଗ୍ୟାସ୍‌ ଟ୍ୟାଙ୍କର ଓଲଟିପଡିଥିବା ସୂଚନା ମିଳିଛି। ଯେଉଁଥିରେ ଗାଡ଼ି ଡ୍ରାଇଭର ଗୁରୁତର ହୋଇଥିବା ବେଳେ ୨ କିମି ଯାଏଁ ରାସ୍ତାକୁ ପୋଲିସ ସିଲ୍ କରିଛି।

ସୂଚନା ଅନୁଯାୟୀ, ବିଶାଖାପାଟଣାରୁ ଖୋର୍ଦ୍ଧା ଅଭିମୁଖେ ଗ୍ୟାସ ଟ୍ୟାଙ୍କର ଆସୁଥିଲା। କିନ୍ତୁ ହରିଡ଼ାମୂଳ ବଡ଼ଘାଟି ନିକଟରେ ଭାରସମ୍ୟ ହରାଇ ଓଲଟିପଡିଥିଲା। ଖବର ପାଇ ଖଲିକୋଟ ଥାନା ପୋଲିସ, ଛତ୍ରପୁର ଏସ୍ ଡି ପି ଓ ଗୌରହରି ସାହୁ ଓ ଅଗ୍ନିଶମ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚି ପରିସ୍ଥିତି ଆୟତ୍ତ କରିଛନ୍ତି ଓ ଟ୍ୟାଙ୍କର ରୁ ଗ୍ୟାସ ଲିକ୍ ଯୋଗୁଁ ପ୍ରତି ୧୫ ମିନିଟ ଥରେ ଗ୍ୟାସ ଟ୍ୟାଙ୍କରକୁ ପାଣି ପକାଯାଉଛି।

ଦୁର୍ଘଟଣାସ୍ଥଳରେ ପୋଲିସ ପହଞ୍ଚିବା ପରେ ଗୁରୁତର ଆହତ ଡ଼୍ରାଇଭରକୁ ଉଦ୍ଧାର କରି ଚିକିତ୍ସା ପାଇଁ ଖଲିକୋଟ ଡାକ୍ତରଖାନାକୁ ପଠାଇଯାଇଛି ଓ ଅବସ୍ଥା ଗୁରୁତର ଥିବାରୁ ତାଙ୍କୁ ବ୍ରହ୍ମପୁର ବଡ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଛି। ଗତକାଲି ରାତିରେ ଏହି ଘଟଣା ଘଟିଛି ଓ ଆଜି ବୈଷୟିକ ଟିମ୍ ଆସିବା ପରେ ଟ୍ୟାଙ୍କର ଉଦ୍ଧାର କାର୍ଯକ୍ରମ ଚାଲିଛି।