ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ଉତ୍ତର ପ୍ରଦେଶର ବାରଣାସୀର ରୁଦ୍ରାକ୍ଷ ଆନ୍ତର୍ଜାତିକ ସହଯୋଗ ଓ ଅଧିବେଶନ କେନ୍ଦ୍ରରେ କାଶୀ ସଂସଦ ସାଂସ୍କୃତିକ ମହୋତ୍ସବ ୨୦୨୩ର ଉଦଯାପନୀ ସମାରୋହରେ ଉଦବୋଧନ ଦେଇଛନ୍ତି । ଏହି ଅବସରରେ ପ୍ରଧାନମନ୍ତ୍ରୀ ୧୧୧୫ କୋଟି ଟଙ୍କା ବ୍ୟୟରେ ଉତ୍ତର ପ୍ରଦେଶର ବିଭିନ୍ନ ସ୍ଥାନରେ ନିର୍ମିତ ୧୬ଟି ଅଟଳ ଆବାସୀୟ ବିଦ୍ୟାଳୟର ମଧ୍ୟ ଉଦଘାଟନ କରିଛନ୍ତି । ଶ୍ରୀ ମୋଦୀ କାଶୀ ସଂସଦ ଖେଳ ପ୍ରତିଯୋଗିତା ପାଇଁ ପଞ୍ଜୀକରଣ ପୋର୍ଟାଲ ମଧ୍ୟ ଉନ୍ମୋଚନ କରିଛନ୍ତି । କାଶୀ ସଂସଦ ସାଂସ୍କୃତିକ ମହୋତ୍ସବର ବିଜେତାଗଣଙ୍କୁ ମଧ୍ୟ ସେ ପୁରସ୍କାର ପ୍ରଦାନ କରିଥିଲେ । କାର୍ଯ୍ୟକ୍ରମ ଆଗରୁ ପ୍ରଧାନମନ୍ତ୍ରୀ ଅଟଳ ଆବାସୀୟ ବିଦ୍ୟାଳୟ ବିଦ୍ୟାର୍ଥୀମାନଙ୍କ ସହ ମଧ୍ୟ ମତ ବିନିମୟ କରିଥିଲେ ।
ସମବେତ ଜନତାଙ୍କୁ ଉଦବୋଧନ ଦେଇ ପ୍ରଧାନମନ୍ତ୍ରୀ କହିଥିଲେ ଯେ ପ୍ରଭୁ ମହାଦେବଙ୍କ ଆଶୀର୍ବାଦ ଯୋଗୁ କାଶୀ ପ୍ରତି ସମ୍ମାନ ନିରବଚ୍ଛିନ୍ନ ଭାବେ ବଢ଼ିବାରେ ଲାଗିଛି ଓ ନଗରୀ ନିମନ୍ତେ ପ୍ରଣୀତ ନୀତିଗୁଡ଼ିକ ଶିଖର ଛୁଇଁଛି । ଜି-୨୦ର ଶିଖର ବୈଠକ ପାଇଁ କାଶୀର ଅବଦାନର ପ୍ରଧାନମନ୍ତ୍ରୀ ଆଲୋକପାତ କରିବା ସହ ଯେଉଁମାନେ ଏହି ନଗରୀ ପରିଦର୍ଶନ କରିଛନ୍ତି, ସେମାନେ ଏହାର ସେବା, ମାଧୁର୍ଯ୍ୟ, ସଂସ୍କୃତି ଓ ସଂଗୀତ ଦ୍ୱାରା ଆବିଭୂତ ହୋଇ ଯାଇଛନ୍ତି ଓ ଜି-୨୦ର ସଫଳତା ଭଗବାନ ମହାଦେବଙ୍କ ଆଶୀର୍ବାଦ ବଳରେ ସମ୍ଭବ ହୋଇଛି ବୋଲି ସେ କହିଥିଲେ ।
ମହାଦେବଙ୍କ ଆଶୀର୍ବାଦ ଯୋଗୁ କାଶୀ ବିକାଶର ଅଭୂତପୂର୍ବ ଗତି ହାସଲ କରିଛି । ସେ ବାରଣାସୀରେ ଆଜି ଶିଳାନ୍ୟାସ କରିଥିବା ଆନ୍ତର୍ଜାତିକ କ୍ରିକେଟ୍ ଷ୍ଟାଡିୟମ୍ ଓ ୧୬ଟି ଅଟଳ ଆବାସିକ ବିଦ୍ୟାଳୟର ଉତ୍ସର୍ଗୀକୃତ ଭାବ ପାଇଁ ଶ୍ରୀ ମୋଦୀ କାଶୀର ଜନସାଧାରଣ ଓ ଶ୍ରମିକମାନଙ୍କ ପରିବାରକୁ ଅଭିନନ୍ଦନ ଜଣାଇଥିଲେ ।
ପ୍ରଧାନମନ୍ତ୍ରୀ କହିଥିଲେ ଯେ ୨୦୧୪ ମସିହା ଠାରୁ କାଶୀର ସଂସଦ ସଦସ୍ୟ ଭାବେ ତାଙ୍କ ଦୂରଦୃଷ୍ଟି ଶେଷରେ ବାସ୍ତବ ରୂପ ନେଇଛି । ସେ କାଶୀ ସାଂସ୍କୃତିକ ମହୋତ୍ସବରେ ବିପୁଳ ସଂଖ୍ୟାରେ ଅଂଶଗ୍ରହଣ ପ୍ରତି ସମର୍ଥନ ଜଣାଇବା ସହ ସେ ଅଞ୍ଚଳ ବିଭିନ୍ନ ମେଧା ସହ ପରିଚିତ ହୋଇଥିବାରୁ କୃତଜ୍ଞତା ମଧ୍ୟ ଜଣାଇଥିଲେ । ଏହା ମହୋତ୍ସବର ପ୍ରଥମ ଭାଗ ହୋଇଥିବା ତଥା ଏଥିରେ ପ୍ରାୟ ୪୦ ହଜାର କଳାକାର ଅଂଶଗ୍ରହଣ କରିବା ଓ ଲକ୍ଷ ଲକ୍ଷ ପରିଦର୍ଶକ ଏଠାକୁ ଆସିଥିଲେ ବୋଲି ସେ କହିଥିଲେ । ଜନସାଧାରଣଙ୍କ ସହଯୋଗ ଯୋଗୁ କାଶୀ ସଂସଦ ସାଂସ୍କୃତିକ ମହୋତ୍ସବ ଆଗାମୀ ଦିନରେ ଏହାର ଏକ ପରିଚୟ ସୃଷ୍ଟି କରିବ ବୋଲି ସେ ବିଶ୍ୱାସ ପ୍ରକଟ କରିଥିଲେ । କାଶୀ ବିଶ୍ୱବ୍ୟାପୀ ପର୍ଯ୍ୟଟକଙ୍କ ଆକର୍ଷଣର କେନ୍ଦ୍ର ବିନ୍ଦୁ ହେବାରେ ଲାଗିଛି ବୋଲି ସେ କହିଥିଲେ ।
ଶ୍ରୀ ମୋଦୀ କହିଥିଲେ ଯେ କାଶୀ ଓ ସଂସ୍କୃତି ଏକ ଶକ୍ତିର ଦୁଇଟି ନାମ ଓ କାଶୀ ଭାରତର ସାଂସ୍କୃତିକ ରାଜଧାନୀ ହେବାର ଗୌରବ ହାସଲ କରିଛି । ନଗରୀର କୋଣେ ଅନୁକୋଣେ ସଂଗୀତର ସ୍ରୋତ ବହିଚାଲେ ଓ ଏହା ମଧ୍ୟ ନଟରାଜଙ୍କ ନିଜସ୍ୱ ନଗରୀ । ସମସ୍ତ କଳା ଓ କୃତିର ଉତ୍ସ ବୋଲି ମହାଦେବଙ୍କୁ ସ୍ୱୀକାର କରି ପ୍ରଧାନମନ୍ତ୍ରୀ କହିଥିଲେ ଯେ ଭରତ ମୁନିଙ୍କ ଭଳି ଋଷିଗଣ କଳାର ସ୍ୱରୂପକୁ ବିକଶିତ କରାଇଥିଲେ । କାଶୀରେ ସବୁ ଜିନିଷରେ ସଂଗୀତ କଳାର ଛାପ ରହିଛି ।
ନଗରୀ ଗୌରବମୟ ଶାସ୍ତ୍ରୀୟ ସଂସ୍କୃତି ଉପରେ ଆଲୋକପାତ କରି ଶ୍ରୀ ମୋଦୀ ନଗରୀଟି ତବଲା, ସାହାନାଇ, ସୀତାର, ସାରଙ୍ଗୀ ଓ ବୀଣାର ସମାହାର ବୋଲି କହିଥିଲେ । ବାରାଣାସୀ, ଖୟାଲ, ଠୁମରୀ, ଦାଦ୍ରା, ଚଇତି ଓ କଜରୀ ଭଳି ସଂଗୀତ ଧାରା ଶହ ଶହ ବର୍ଷ ଧରି ସାଇତି ରଖିଥିବା ବେଳେ ଭାରତରେ ମଧୁୁର ଆତ୍ମା କୁହାଯାଉଥିବା ଗୁରୁ-ଶିଷ୍ୟ ପରମ୍ପରାକୁ ଉଜ୍ଜୀବିତ କରି ରଖିଛି । ପ୍ରଧାନମନ୍ତ୍ରୀ ତେଲିୟ ଘରାନା, ପିଆରୀ ଘରାନା ଓ ରାମପୁର କବୀର ଚୌରା ମୋହଲ୍ଲାର ସଂଗୀତସାଧକ ଗଣଙ୍କ ଯୋଗୁ ବାରାଣାସୀ ବିଶ୍ୱରେ ନାମ କମାଇଥିବା ଅନେକ ବିଶିଷ୍ଟ ସାଧକଙ୍କ ବିଷୟରେ ଅବତାରଣା କରିଥିଲେ । ବାରାଣାସୀର କେତେକ ମହାନ ସଂଗୀତଜ୍ଞ ସହ ମତ ବିନିମୟ ହୋଇଥିବାରୁ ସେ କୃତଜ୍ଞତା ଜଣାଇଥିଲେ ।
ଆଜି ଉଦଘାଟିତ କାଶୀ ସଂସଦ ଖେଳ ପ୍ରତିଯୋଗିତାର ପୋର୍ଟାଲକୁ ନେଇ ପ୍ରଧାନମନ୍ତ୍ରୀ କହିଥିଲେ ଯେ ସେ ଖେଳ ପ୍ରତିଯୋଗିତା ହେଉ ବା କାଶୀ ସଂସଦ ସାଂସ୍କୃତିକ ମହୋତ୍ସବ ଏହା କାଶୀର ନୂତନ ପରମ୍ପରାର ଅୟମାରମ୍ଭ ମାତ୍ର । ବର୍ତ୍ତମାନ କାଶୀ ସଂସଦ ଜ୍ଞାନ ପ୍ରତିଯୋଗିତା ମଧ୍ୟ ଆୟୋଜିତ ହେବ । “କାଶୀର ସଂସ୍କୃତି, ଖାଦ୍ୟପେୟ ଓ କଳାକୁ ନେଇ ସଚେତନତା ବୃଦ୍ଧି ପାଇଁ ଉଦ୍ୟମ ହୋଇଛି । କାଶୀ ସଂସଦ ଜ୍ଞାନ ପ୍ରତିଯୋଗିତା କାଶୀର ଉଭୟ ଗ୍ରାମ ଓ ସହରରେ ବିଭିନ୍ନ ସ୍ତରରେ ହେବ” ବୋଲି ସେ କହିଥିଲେ ।
ପ୍ରଧାନମନ୍ତ୍ରୀ କହିଥିଲେ ଯେ କାଶୀ ନଗରୀର ଜନସାଧାରଣ ଖୁବ୍ ଜ୍ଞାନୀ ଓ ପ୍ରତ୍ୟେକ ଅଧିବାସୀ କାଶୀର ବାର୍ତ୍ତାବହ ସଦୃଶ । ସେମାନଙ୍କୁ ଜ୍ଞାନ ସମ୍ପର୍କରେ ସଠିକ ଯୋଗାଯୋଗ କରିବାକୁ ଯାତ୍ରୀ ମାର୍ଗଦର୍ଶକଙ୍କୁ ଅଧିକ ଗୁଣବାନ କରିବାକୁ ସେ ପ୍ରସ୍ତାବ ଦେଇଥିଲେ । ସେଥିପାଇଁ କାଶୀ ସଂସଦ ଯାତ୍ରୀ ମାର୍ଗଦର୍ଶନ ପ୍ରତିଯୋଗିତା ମଧ୍ୟ ଆୟୋଜିତ ହେବ । “ମୁଁ ତାହା କରିବାକୁ ଚାହୁଁଛି କାରଣ ମୋ କାଶୀ ସମ୍ପର୍କରେ ବିଶ୍ୱବାସୀ ଅବଗତ ହୁଅନ୍ତୁ, ତାହା ହିଁ ମୁଁ ଚାହେଁ । କାଶୀର ଯାତ୍ରୀ ମାର୍ଗଦର୍ଶିକା ବିଶ୍ୱରେ ସମ୍ମାନିତ ହେବା ମୁଁ ଚାହେଁ” ବୋଲି ସେ କହିଥିଲେ ।
ବିଶ୍ୱବ୍ୟାପୀ ଅଧିକରୁ ଅଧିକ ବିଦ୍ୱାନ କାଶୀ ସଂସ୍କୃତ ଶିକ୍ଷା କରିବାକୁ ଆସନ୍ତୁ, ଏହାକୁ ମନରେ ରଖି ଆଜି (୨୩-୦୯-୨୦୨୩) ୧୧୦୦ କୋଟି ଟଙ୍କା ବ୍ୟୟରେ ଅଟଳ ଆବସୀୟ ବିଦ୍ୟାଳୟ ମାନ ଉଦଘାଟିତ ହୋଇଛି । ଶ୍ରମିକଙ୍କ ପିଲାଙ୍କ ସମେତ ସମାଜର ଦୁର୍ବଳ ଶ୍ରେଣୀର ପିଲାମାନେ ଯେପରି ଗୁଣାତ୍ମକ ଶିକ୍ଷା ଲାଭ କରିପାରିବ ସେଥିପାଇଁ ଏହି ବିଦ୍ୟାଳୟଗୁଡ଼ିକ ଉଦଘାଟିତ ହୋଇଛି । “କୋଭିଡ୍ ବୈଶ୍ୱିକ ମହାମାରୀ କାଳରେ ଯେଉଁ ପିଲାମାନେ ନିଜର ମାତାପିତାଙ୍କୁ ହରାଇଛନ୍ତି । ସେମାନେ ବିନା ଦେୟାର ପଢ଼ିପାରିବେ ।” ସଂଗୀତ, କଳା, କାରୁକଳା, ବୈଷୟିକ ଜ୍ଞାନ ଓ କ୍ରୀଡ଼ା ମଧ୍ୟ ନିୟମିତ ପାଠ୍ୟକ୍ରମକୁ ଛାଡ଼ି ଏଥିରେ ରହିବ । ଆଦିବାସୀ ସମାଜ ନିମନ୍ତେ ଏକ ଏକଲବ୍ୟ ଆବାସିକ ବିଦ୍ୟାଳୟ ବିକଶିତ ହେଉଥିବା ପ୍ରଧାନମନ୍ତ୍ରୀ ସୂଚନା ଦେଇଥିଲେ । “ନୂନତ ଶିକ୍ଷା ନୀତି ସହ ସରକାର ଭାବନାରେ ସମ୍ପୂର୍ଣ୍ଣ ପରିବର୍ତ୍ତନ ଆଣିଛନ୍ତି । ବିଦ୍ୟାଳୟଗୁଡ଼ିକ ଆଧୁନିକ ହେବା ସହ ଶ୍ରେଣୀଗୁଡ଼ିକ କୁଶଳ ହେଉଛି ।” ପିଏମ ଶ୍ରୀ ଅଭିଯାନ ମାଧ୍ୟମରେ ଦେଶର ହଜାର ହଜାର ବିଦ୍ୟାଳୟର ଆଧୁନିକୀକରଣ ଆଧୁନିକ ପ୍ରଯୁକ୍ତି ବିଦ୍ୟା ଜରିଆରେ ହେଉଥିବା ସେ କହିଥିଲେ ।
କାଶୀ ନଗରୀର ସମସ୍ତ ବିକାଶମୂଳକ କାର୍ଯ୍ୟ ନିମନ୍ତେ ନଗରବାସୀଙ୍କ ଆକୁଣ୍ଠ ସହଯୋଗକୁ ପ୍ରଧାନମନ୍ତ୍ରୀ ସ୍ୱୀକାର କରିଥିଲେ । ପ୍ରବାସୀ ଶ୍ରମିକମାନଙ୍କ ନିମନ୍ତେ ବିଭିନ୍ନ ରାଜ୍ୟରେ ବଜେଟ୍ ଉପଲବ୍ଧ ଥିବାବେଳେ, କେତେକ ରାଜ୍ୟ ନିର୍ବାଚନ ଦୃଷ୍ଟିରୁ ସୁବିଧା ହେଉଥିବା ଉଦେଶ୍ୟରେ ଖର୍ଚ୍ଚ କରୁଛନ୍ତି । ମାତ୍ର ଉତ୍ତର ପ୍ରଦେଶରେ ଯୋଗୀ ଜୀଙ୍କ ମୁଖ୍ୟମନ୍ତ୍ରୀତ୍ୱ କାଳରେ ସମାଜର ଗରୀବ ଶ୍ରେଣୀର ପିଲାଙ୍କ ନିମନ୍ତେ ଏହା ଖର୍ଚ୍ଚ ହେଉଛି । ନିଜର ଆତ୍ମବିଶ୍ୱାସ ପାଇଁ ପ୍ରଧାନମନ୍ତ୍ରୀ ଆବାସିକ ବିଦ୍ୟାଳୟଗୁଡ଼ିକର ବିଦ୍ୟାର୍ଥୀମାନଙ୍କ ପ୍ରଶଂସା କରିଥିଲେ । “ମୋ କଥାକୁ ବିଶ୍ୱାସ କର, ଆଗାମୀ ଦଶ ବର୍ଷ ମଧ୍ୟରେ ଆପଣମାନେ ଦେଖିବେ ଏହିସବୁ ବିଦ୍ୟାଳୟ ବିଦ୍ୟାର୍ଥୀମାନେ କାଶୀ ପାଇଁ ଗୌରବ ଆଣିବେ” ବୋଲି କହି ସେ ଅଭିଭାଷଣର ଅନ୍ତ ଘଟାଇଥିଲେ ।
ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଶ୍ରୀ ଯୋଗୀ ଆଦିତ୍ୟନାଥ ଓ ରାଜ୍ୟ ମନ୍ତ୍ରୀଗଣ ଏହି ଅବସରରେ ଉପସ୍ଥିତ ଥିଲେ ।
ପୃଷ୍ଠଭୂମି-
କାଶୀର ସାଂସ୍କୃତିକ ମଜଭୁତୀକରଣ ନିମନ୍ତେ କାଶୀ ସଂସଦ ସାଂସ୍କୃତିକ ମହୋତ୍ସବର ପରିକଳ୍ପନା କରାଯାଇଛି । ଏଥିରେ ୧୭ଟି ବିଭିନ୍ନ ଶ୍ରେଣୀରୁ ୩୭ ହଜାରରୁ ଅଧିକ ଅଂଶଗ୍ରହଣକାରୀ ଯୋଗ ଦେଇ ସେମାନଙ୍କ କର୍ମ ନିପୁଣତା ପ୍ରଦର୍ଶନ କରିଥିଲେ ।
ଗୁଣାତ୍ମକ ଶିକ୍ଷାର ବିକାଶ ନିମନ୍ତେ ଉତ୍ତର ପ୍ରଦେଶର ବିଭିନ୍ନ ସ୍ଥାନରେ ୧୬ଟି ଅଟଳ ଆବାସିକ ବିଦ୍ୟାଳୟ ଆଜି ଉଦଘାଟିତ ହୋଇଥିବା ବେଳେ ଏ ବାବଦ ୧୧୧୫ କୋଟି ଟଙ୍କା ଖର୍ଚ୍ଚ ହୋଇଛି । ଶ୍ରମିକ, ନିର୍ମାଣ ଶ୍ରମିକ ଓ ବାପା ମାଆ ଛେଉଣ୍ଡ (କୋଭିଡ-୧୯) ଯୋଗୁ ପିଲାମାନଙ୍କୁ ଗୁଣାତ୍ମକ ଶିକ୍ଷା ପ୍ରଦାନ କରି ସେମାନଙ୍କ ସର୍ବାଙ୍ଗୀଣ ବିକାଶ ଏହି ବିଦ୍ୟାଳୟର ଲକ୍ଷ୍ୟ । ୧୦ରୁ ୧୫ ଏକର ପରିମିତ ସ୍ଥାନ ମଧ୍ୟରେ ଏହି ବିଦ୍ୟାଳୟ ତିଆରି ହୋଇଛି । ଏଥିରେ ଶ୍ରେଣୀ ଗୃହ, ଖେଳ ପଡ଼ିଆ, ଅଡିଟୋରିୟମ, ଛାତ୍ରାବାସ ଓ କର୍ମଚାରୀ ଆବାସସ୍ଥଳୀମାନ ରହିଛି । ପ୍ରତ୍ୟେକ ବିଦ୍ୟାଳୟରେ ଅନ୍ୟୁନ ଏକ ହଜାର ବିଦ୍ୟାର୍ଥୀ ପଢ଼ିପାରିବେ ।
