ପ୍ରୟାଗରାଜ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ବେସାମରିକ ବିମାନ ଚଳାଚଳ ମନ୍ତ୍ରୀ ରାମ ମୋହନ ନାଇଡୁଙ୍କ ନେତୃତ୍ୱରେ ପ୍ରୟାଗରାଜ ବିମାନବନ୍ଦର ସଂସ୍କୃତି ଓ ଭକ୍ତିର ସହର ତଥା ମହାକୁମ୍ଭ ମହୋତ୍ସବକୁ ଆସିବା ପାଇଁ ଏକ ପ୍ରମୁଖ ପ୍ରବେଶ ପଥରେ ପରିଣତ ହୋଇପାରିଛି। ୧୩ ଜାନୁୟାରୀରୁ ୨୬ ଫେବୃୟାରୀ ମଧ୍ୟରେ ମହାକୁମ୍ଭକୁ ଭକ୍ତମାନଙ୍କ ଆଗମନ ପାଇଁ ସମ୍ପ୍ରସାରଣ କାମ କରାଯାଇଛି।
ଉପଯୁକ୍ତ ପ୍ଲାନିଂ ଓ ସମନ୍ୱୟ କାରଣରୁ ପ୍ରୟାଗରାଜ ବିମାନବନ୍ଦରକୁ ସମ୍ପ୍ରସାରିତ କରାଯାଇଛି। ଗତବର୍ଷ ଡିସେମ୍ବର ୮ ତାରିଖରେ ରାମ ମୋହନ ନାଇଡୁ ଟର୍ମିନାଲ ସମ୍ପ୍ରସାରଣ, ମରାମତି କାର୍ଯ୍ୟ, ଯାତ୍ରୀ ସୁବିଧା ପରି ବିଭିନ୍ନ କାର୍ଯ୍ୟର ସମୀକ୍ଷା କରିଥିଲେ। ରାଜ୍ୟ ସରକାର, ଡିଜିସିଏ, ବିସିଏଏସ, ଏଏଆଇ ସହ ନିୟମିତ ସମୀକ୍ଷା ବୈଠକ କାରଣରୁ ସମୟ ଭିତରେ ବିଭିନ୍ନ ପ୍ରକଳ୍ପ କାମ ସରିଛି। ଚଳିତବର୍ଷ ଜାନୁୟାରୀ ୯ ତାରିଖରେ ରାଷ୍ଟ୍ରମନ୍ତ୍ରୀ ମୂରଲୀଧର ମୋହଲ ପ୍ରୟାଗରାଜ ବିମାନବନ୍ଦରର କାର୍ଯ୍ୟର ଅଗ୍ରଗତି ନେଇ ସମୀକ୍ଷା ବି କରିଥିଲେ।
ଚଳିତବର୍ଷ ଜାନୁୟାରୀରେ ୮୧ଟି ଅତିରିକ୍ତ ନୂଆ ବିମାନ ସେବା ଲାଗୁ କରାଯାଇଛି। ଦେଶର ବିଭିନ୍ନ ପ୍ରାନ୍ତରୁ ପ୍ରୟାଗରାଜକୁ ମାସିକ ୮୦ ହଜାର ସିଟ ବିଶିଷ୍ଟ ୧୩୨ଟି ବିମାନ ସେବା ଜାରି କରାଯାଇଛି। ସାରା ଦେଶର ୧୭ଟି ସହରରୁ ପ୍ର୍ରୟାଗରାଜ ସହ ସିଧା ସଳଖ ବିମାନ ସେବା ପରିବର୍ଦ୍ଧିତ କରାଯାଇଛି ଯାହା ଡିସେମ୍ବରରେ ମାତ୍ର ୮ଟି ଭିତରେ ସୀମିତ ରହିଥିଲା। ଶ୍ରୀନଗର ଓ ବିଶାଖାପାଟଣା ସମେତ ସାରା ଦେଶର ୨୬ଟି ସହର ସହ ସିଧା ସଳଖ ବିମାନ ଉଡାଣ ହୋଇ ପ୍ରୟାଗରାଜକୁ ଭକ୍ତ ଓ ଶ୍ରଦ୍ଧାଳୁମାନେ ଆସିପାରୁଛନ୍ତି।
ମହାକୁମ୍ଭ ଅବସରରେ ବିଭିନ୍ନ ସ୍ନାନ ପାଇଁ ଭକ୍ତମାନଙ୍କ ସମାଗମକୁ ଦୃଷ୍ଟିରେ ରଖି ବିମାନ ଭଡା ବି ଅପରିବର୍ତିତ ରଖାଯାଇଛି। ୨୯ ଜାନୁୟାରୀ, ୩ ଫେବୃୟାରୀ, ୪ ଫେବୃୟାରୀ, ୧୨ ଫେବୃୟାରୀ, ୨୬ ଫେବୃୟାରୀରେ ସାହି ସ୍ନାନ ସହ ବିଭିନ୍ନ ସ୍ନାନର ବିଧି ରହିଛି। ଏଥିପାଇଁ ଆବଶ୍ୟକୀୟ ବନ୍ଦୋବସ୍ତ କରିବାକୁ ଡିଜିସିଏକୁ କୁହାଯାଇଥିବା ସୂଚନା ମିଳିଛି।
ତଦନୁସାରେ ଅହମଦାବାଦକୁ ସଂଯୋଗ କରି ୨୮ ଓ ୨୯ ଜାନୁୟାରୀରେ ଆକାଶ ଏୟାର ପକ୍ଷରୁ ବିମାନ ସେବା ଆରମ୍ଭ କରାଯିବ। ଫେବୃୟାରୀରେ ଅହମଦାବାଦରୁ ୯ଟି ବିମାନ ଓ ବେଙ୍ଗାଳୁରୁରୁ ପ୍ରୟାଗରାଜକୁ ଚାରି ହଜାର ସିଟ ବିଶିଷ୍ଟ ୧୨ଟି ବିମାନ ସେବା ଆରମ୍ଭ କରାଯିବ।
ଦିଲ୍ଲୀ, ଚେନ୍ନାଇ, ଗୁଆହାଟି, ବେଙ୍ଗାଳୁରୁ, ଅହମଦାବାଦ, ମୁମ୍ବାଇ, ଜୟପୁର, ହାଇଦ୍ରାବାଦରୁ ପ୍ରୟାଗରାଜକୁ ଫେବୃୟାରୀ ସୁଦ୍ଧା ୪୩ ହଜାର ସିଟ ବୃଦ୍ଧି କରାଯାଇ ସ୍ପାଇସ ଜେଟ ବିମାନ ସେବା ଆରମ୍ଭ ହେବାର ରହିଛି।
ମହାକୁମ୍ଭ ସମୟରେ ବିଭିନ୍ନସ୍ଥାନରୁ ପ୍ରୟାଗରାଜକୁ ବିମାନ ସେବା ଦ୍ୱାରା ଅଧିକରୁ ଅଧିକ ଭକ୍ତ ଓ ଶ୍ରଦ୍ଧାଳୁ ଯିବା ଆସିବା କରିପାରିବେ। ପ୍ରୟାଗରାଜକୁ ଅଧିକ ବିମାନସେବା ଦ୍ୱାରା ବିମାନ ଭଡା ବୃଦ୍ଧି ଜନିତ ଚାପ ହ୍ରାସ ହୋଇପାରିବା ସହ ଭକ୍ତ ଓ ଶ୍ରଦ୍ଧାଳୁଙ୍କ ଲାଗି ପଥ ସୁଗମ ହୋଇଯିବ।
ମହାକୁମ୍ଭ ସମୟରେ ସପ୍ତାହକ ମଧ୍ୟରେ ୩୦, ୧୭୨ ଜଣ ଯାତ୍ରୀଙ୍କୁ ନେଇ ୨୨୬ଟି ବିମାନ ଚଳାଚଳ କରିଛି। ପ୍ରଥମଥର ପାଇଁ ଗୋଟିଏ ଦିନରେ ୫ ହଜାର ଯାତ୍ରୀ ଯିବା ଆସିବା କରିବାର ରେକର୍ଡ ସୃଷ୍ଟି ହୋଇଛି। ୧୦୬ ବର୍ଷ ଭିତରେ ୨୪ ଘଂଟିଆ ବିମାନ ସେବା ଲାଗି ରାତିରେ ବି ବିମାନ ଚଳାଚଳ ଆରମ୍ଭ କରାଯାଇଛି।
ବିମାନ ବନ୍ଦରର ଟର୍ମିନାଲକୁ ୬, ୭୦୦ ସ୍କୋୟାର ମିଟରରୁ ୨୫, ୫୦୦ ସ୍କୋୟାର ମିଟରକୁ ବୃଦ୍ଧି କରାଯାଇଛି। ପୁରୁଣା ଟର୍ମିନାଲ ୫୪୦ରୁ ୧,୦୮୦ ଯାତ୍ରୀଙ୍କୁ ହ୍ୟାଣ୍ଡଲ କରିପାରିବାର କ୍ଷମତା ବହନ କରିଛି। ନୂଆ ଟର୍ମିନାଲରେ ଏବେ ୧,୬୨୦ ଯାତ୍ରୀଙ୍କୁ ହ୍ୟାଣ୍ଡଲ କରାଯାଇ ପାରୁଛି। ୨୦୦ରୁ ୬୦୦ ଯାନ ପାର୍କିଂ କରିପାରିବାର ବି ବ୍ୟବସ୍ଥା କରାଯାଇଛି। ୮ରୁ ୪୨କୁ ଚେକ-ଇନ କାଉଂଟର ବୃଦ୍ଧି କରାଯାଇଛି। ୪ରୁ ୧୦କୁ ଏକ୍ସବିଆଇଏସ ଓ ଏଚବି ମେସିନ ବୃଦ୍ଧି କରାଯାଇଛି। ଅତିରିକ୍ତ ଟ୍ୟାକ୍ସି ଟ୍ରାକ ସହ ୪ରୁ ୧୫କୁ ପାର୍କିଂ ବେ ବୃଦ୍ଧି, ୨ରୁ ୫କୁ କନଭେୟର ବେଲ୍ଟ ବୃଦ୍ଧି, ୪ରୁ ୧୧କୁ ବିମାନ ବନ୍ଦର ଗେଟ ସଂଖ୍ୟାରେ ବୃଦ୍ଧି ପରି ବିଭିନ୍ନ ପଦକ୍ଷେପ ନିଆଯାଇଛି।
ଏଫ ଆଣ୍ଡ ବି କାଉଂଟର ସଂଖ୍ୟା ବୃଦ୍ଧି କରାଯାଇଛି। ଉଡାନ ଯାତ୍ରୀ କାଫେ ଦ୍ୱାରା ଏହି ବନ୍ଦୋବସ୍ତ କରାଯାଇଛି। ଭିନ୍ନକ୍ଷମ ବ୍ୟକ୍ତିଙ୍କ ପାଇଁ ସ୍ୱତନ୍ତ୍ର ବ୍ୟବସ୍ଥା କରାଯାଇଥିବା ବେଳେ ପ୍ରି ପେଡ ଟ୍ୟାକ୍ସି କାଉଂଟର ସିଟି ବସ ସର୍ଭିସ ପରି ବିଭିନ୍ନ ଆନୁସଙ୍ଗିକ ବ୍ୟବସ୍ଥା କରାଯାଇଛି। ଆମ୍ବୁଲାନ୍ସ ସେବା ସହ ଏୟାର ଆମ୍ବୁଲାନ୍ସ ସେବାକୁ ବି ବୃଦ୍ଧି କରାଯାଇଛି।
ଚଳିତ ମହକୁମ୍ଭକୁ ଆସୁଥିବା ଯାତ୍ରୀ ଓ ପର୍ଯ୍ୟଟକଙ୍କ ସୁବିଧା ପାଇଁ ଉତରପ୍ରଦେଶ ସରକାରଙ୍କ ସହଯୋଗକ୍ରମେ ଏସବୁ ଆନୁସଙ୍ଗିକ ବ୍ୟବସ୍ଥା କରାଯାଇଥିବା ସୂଚନା ଦିଆଯାଇଛି।