Tag: ପିପିଲି ଉପନିର୍ବାଚନ

ଭୁବନେଶ୍ବର, ପିପିଲିରେ ଚାଲିଥିବା ଉପନିର୍ବାଚନରେ ସବୁଠାରୁ ଧନୀ ପ୍ରାର୍ଥୀ ହେଉଛନ୍ତି  ଦୁଇ ଜଣ। ସେମାନେ ହେଲେ କଂଗ୍ରେସର ଅଜିତ ମଙ୍ଗରାଜ ଏବଂ ବିଜେଡିର ରୁଦ୍ର ପ୍ରତାପ ମହାରାଥୀ। ଏହି ଉପନିର୍ବାଚନରେ ମୋଟ 10 ଜଣ ପ୍ରାର୍ଥୀ ପ୍ରତିଦ୍ବନ୍ଦିତା କରୁଛନ୍ତି। ସେମାନଙ୍କ ମଧ୍ୟରେ ଏହି ଦୁଇ ଜଣ ହେୁଛନ୍ତି କୋଟିପତି ପ୍ରାର୍ଥୀ। ପ୍ରାର୍ଥୀମାନେ ଦାଖଲ କରିଥିବା ସତ୍ୟପାଠକୁ ଅନୁଧ୍ୟାନ କରି ଏହି ତଥ୍ୟ ଦେଇଛି ଓଡିଶା ଇଲେକ୍ସନ ୱାଚ୍ ସଂସ୍ଥା।

ତଥ୍ୟ ଅନୁସାରେ କଂଗ୍ରେସ ପ୍ରାର୍ଥୀ ଅଜିତ ମଙ୍ଗରାଜଙ୍କ ମୋଟ ସଂପତ୍ତି ମୂଲ୍ୟ ହେଉଛି 8 କୋଟି 1 ଲକ୍ଷ 40 ହଜାର ଟଙ୍କା। ଏଥିସହିତ ଗତ ଆର୍ଥିକ ବର୍ଷରେ ସେ 39 ଲକ୍ଷ ଟଙ୍କା ରୋଜଗାର କରିଛନ୍ତି। ତାଙ୍କର ରିଏଲ ଇଷ୍ଟେଟ ବ୍ୟବସାୟ ରହିଛି। ସତ୍ୟପାଠ ଅନୁସାରେ ଅଜିତ ମଙ୍କରାଜଙ୍କ ଶିକ୍ଷାଗତ ଯୋଗ୍ୟତା ହେଉଛି ଗ୍ରାଜୁଏସନ।

ସେହିପରି ଦ୍ବିତୀୟ ଧନି ପ୍ରାର୍ଥୀ ହେଉଛନ୍ତି ବିଜେଡିର ରୁଦ୍ର ପ୍ରତାପ ମହାରାଥୀ। ତାଙ୍କର ମୋଟ ସଂପତ୍ତି ମୂଲ୍ୟ ରହିଛି 5 କୋଟି 26 ଲକ୍ଷ 71 ହଜାର 997 ଟଙ୍କା। ସେ ମଧ୍ୟ ଗତ ଆର୍ଥିକ ବର୍ଷରେ ରୋଜଗାର କରିଛନ୍ତି ମୋଟ 15 ଲକ୍ଷ ଟଙ୍କା। ସେ ସ୍ବରୋଜଗାରକ୍ଷମ ବୋଲି ତାଙ୍କର ସତ୍ୟପାଠରେ ଦାଖଲ କରିଛନ୍ତି। ରୁଦ୍ରଙ୍କର ଶିକ୍ଷାଗତ ଯୋଗ୍ୟତା ହେଉଛି ପୋଷ୍ଟ ଗ୍ରାଜୁଏଟ।

ତୃତୀୟ ତାଲିକାରେ ଅଛନ୍ତି ବିଜେପି ପ୍ରାର୍ଥୀ ଆଶ୍ରିତ ପଟ୍ଟନାୟକ। ତାଙ୍କର ମୋଟ ସଂପତ୍ତିର ମୂଲ୍ୟ ହେଉଛି 97 ଲକ୍ଷ ଟଙ୍କା। ଏଥିସହିତ ଗତ ଆର୍ଥିକ ବର୍ଷରେ ସେ 15 ଲକ୍ଷ ଟଙ୍କା ରୋଜଗାର କରିଥିଲେ। ସେ ଜଣେ ସମାଜ ସେବୀ ବୋଲି ସତ୍ୟପାଠରେ ଉଲ୍ଲେଖ କରିଛନ୍ତି। ତେବେ ତାଙ୍କର ଶିକ୍ଷାଗତ ଯୋଗ୍ୟତା ହେଲା ଦ୍ବାଦଶ ବୋଲି ଜଣାପଡିଛି।

ଅନ୍ୟମାନଙ୍କ ମଧ୍ୟରେ ସିପିଏମ ପ୍ରାର୍ଥୀ ଅଶୋକ ପ୍ରଧାନଙ୍କ ସଂପତ୍ତି 94 ଲକ୍ଷ, ସ୍ବାଧୀନ ପ୍ରାର୍ଥୀ ନଗେନ୍ଦ୍ର ନାଥ ମିଶ୍ରଙ୍କର 23 ଲକ୍ଷ ଏବଂ ଜୟପ୍ରକାଶ ସେଠୀଙ୍କର 19 ଲକ୍ଷ ରହିଛି।

ଭୁବନେଶ୍ବର, ପିପିଲି ଉପନିର୍ବାଚନ ଆସନ୍ତା ଏପ୍ରିଲ 17 ତାରିଖରେ ହେବ ବୋଲି ଘୋଷଣା ହେବା ପରେ ରାଜ୍ୟ ନିର୍ବାଚନ ଅଧିକାରୀ ପ୍ରସ୍ତୁତି ଆରମ୍ଭ କରିଦେଇଛନ୍ତି। ଆଜି ଭୁବନେଶ୍ବରସ୍ଥିତ କାର୍ଯ୍ୟାଳୟରେ ରାଜ୍ୟ ନିର୍ବାଚନ ଅଧିକାରୀ ସୁଶୀଲ ଲୋହାନୀ ସାମ୍ବାଦିକ ସମ୍ମିଳନୀରେ ବିସ୍ତୁତ ରୂପରେଖ ପ୍ରଦାନ କରିଛନ୍ତି।

ସେ କହିଛନ୍ତି ଯେ, କୋଭିଡ କଟକଣା ମଧ୍ୟରେ ପିପିଲି ଉପନିର୍ବାଚନ ହେବ। ସେଥିପାଇଁ ପ୍ରାର୍ଥୀଙ୍କ ସହିତ ମାତ୍ର ପାଞ୍ଚଜଣ କର୍ମି ପ୍ରଚାରରେ ଯାଇପାରିବେ। ନାମାଙ୍କନ ପତ୍ର ଦାଖଲ ବେଳେ ପ୍ରାର୍ଥୀମାନଙ୍କୁ ମାତ୍ର ଦୁଇଟି ଗାଡି ବ୍ୟବହାର ପାଇଁ ଅନୁମତି ପ୍ରଦାନ କରାଯିବ।

ସେହିପରି 80 ବର୍ଷରୁ ଉର୍ଦ୍ଧ, ଦିବ୍ୟାଙ୍ଗ, କରୋନା ସଂକ୍ରାମିତମାନେ ପୋଷ୍ଟାଲ ଭୋଟ ଦେବା ପାଇଁ ଆବେଦନ କରିପାରିବେ। ସେମାନେ ବୁଥକୁ ନ ଆସି ଘରେ ରହି ଏହି ଭୋଟ ଦେଇପାରିବେ ବୋଲି ନିର୍ବାଚନ ଅଧିକାରୀ କହିଛନ୍ତି।

ଯେଉଁମାନେ ଭୋଟ ଗ୍ରହଣ କାର୍ଯ୍ୟରେ ନିୟୋଜିତ ହେବେ, ସେମାନଙ୍କର ଅଗ୍ରାଧୀକାର ଭାବେ କରୋନା ଟୀକା ପ୍ରଦାନ କରାଯିବ। ସେହିପରି ଏହି ଅଧିକାରୀମାନେ କୋଭିଡ ଯୋଦ୍ଧା ଭାବେ ବିବେଚନା କରାଯିବ ବୋଲି ଲୋହାନୀ କହିଛନ୍ତି।

ସେହିପରି ପ୍ରଚାର ବେଳେ କର୍ମିମାନେ କୋଭିଡ ଗାଇଡ ଲାଇନ ଅନୁସାରେ ପ୍ରଚାର କରିବେ। ସେମାନେ ସାନିଟାଇଜର, ମାସ୍କ ଏବଂ ସାମାଜିକ ଦୂରତା ଭିତରେ ରହି ପ୍ରଚାର କରିବେ।

ଚଳିତ ଉପନିର୍ବାଚନରେ ପିପିଲିରେ ଅଧିକ 77ଟି ବୁଥ କରାଯିବ ବୋଲି ନିଷ୍ପତି କରାଯାଇଛି। ଗତ ସାଧାରଣ ନିର୍ବାଚନରେ ପିପିଲି ନିର୍ବାଚନ ମଣ୍ଡଳିରେ 273 ଟି ବୁଥ କରାଯାଇଥିଲା। ଏଥର କରୋନା ପାଇଁ  350ଟି ବୁଥ କରାଯିବ ବୋଲି ଲୋହାନୀ କହିଛନ୍ତି। ପିପିଲିରେ ମୋଟ ଭୋଟର ସଂଖ୍ୟା ହେଉଛି 2 ଲକ୍ଷ 29 ହଜାର 5 ଶହ 83। ଗୋଟିଏ ବୁଥରେ ଯେପରି ହଜାର ଭୋଟର ଭୋଟ ଦେବେ ସେହିପରି ବ୍ୟବସ୍ଥା କରାଯିବ।

ପିପିଲି ଉପନିର୍ବାଚନ ଆସନ୍ତା ଏପ୍ରିଲ 17 ତାରିଖରେ ଭୋଟ ଗ୍ରହଣ ହେବ। ଏନେଇ ମାର୍ଚ୍ଚ 23 ତାରିଖରେ ବିଜ୍ଞପ୍ତି ପ୍ରକାଶ ପାଇବ। ନାମାଙ୍କନ ଦାଖଲ ଶେଷ ତାରିଖ ରହିଛି ମାର୍ଚ୍ଚ 30 ତାରିଖ ଏବଂ ଯା଼ଞ୍ଚ 31 ତାରିଖ ହେବ। ପ୍ରାର୍ଥୀପତ୍ର ପ୍ରତ୍ୟାହାର ଏପ୍ରିଲ 3 ତାରିଖ ରଖାଯାଇଛି। ଭୋଟ ଗଣତି ମୋ 5 ତାରିଖରେ କରାଯିବ। ଏହିଦିନ ପାଞ୍ଚୋଟି ରାଜ୍ୟର ବିଧାନସଭା ନିର୍ବାଚନ ଭୋଟ ଗଣତି ମଧ୍ୟ କରାଯିବ।

ଭୁବନେଶ୍ବର, ଦୁଇ ଉପନିର୍ବାଚନର ଫଳାଫଳ ବାହାରିବା ପରେ ବର୍ତ୍ତମାନ ପିପିଲି ଉପରେ ରାଜନୈତିକ ବିଶେଷଜ୍ଞଙ୍କ ନଜର ନିକ୍ଷେପ ହୋଇଛି। କାରଣ କେତେବେଳେ ପିପିଲି ଉପନିର୍ବାଚନ ପାଇଁ ତାରିଖ ଘୋଷଣା ହୋଇପାରେ। ହେଲେ ତିର୍ତ୍ତୋଲ ଏବଂ ବାଲେଶ୍ବର ଉପନିର୍ବାଚନ ଫଳ ପରେ ବିରୋଧୀ ବିଜେପି ଏବଂ କଂଗ୍ରେସ ହତାସ ହୋଇପଡିଛି। ପିପିଲି ପରି ଗୋଟିଏ ସମ୍ବେଦନଶୀଳ ନିର୍ବାଚନ ମଣ୍ଡଳିରେ ଜିତିବା ସମ୍ଭବ ନୁହେଁ ବୋଲି ସେମାନେ ଅନୁମାନ କରିସାରିଲେଣି।

ପିପିଲି ନିର୍ବାଚନ ମଣ୍ଡଳୀରେ ଦୀର୍ଘ 35 ବର୍ଷ ଧରି ଅଣ କଂଗ୍ରେସ ହାତରେ ରହିଛି। ପ୍ରଦୀପ ମହାରଥୀ ସେଠାରୁ ସାତ ଥର ବିଧାୟକ ଭାବେ ନିର୍ବାଚିତ ହୋଇ ଆସୁଥିଲେ। ମୁଖ୍ୟତଃ ତାଙ୍କର ଦୃଢ ସଂଗଠନ, ଲୋକଙ୍କ ସହିତ ରହିବା ହିଁ ତାଙ୍କ ବିଜୟର ମୁଖ୍ୟ କାରଣ ଥିଲା। ତାଙ୍କର ଏହି ଲୋକ ସଂପର୍କ ଏବଂ ସଂଗଠନ ଯୋଗୁଁ ସେଠାରେ ବିଜେପି ଓ କଂଗ୍ରେସ ପଶିବା ସମ୍ଭବ ହୋଇପାରି ନାହିଁ।

ଗତ ସାଧାରଣ ନିର୍ବାଚନରେ ପିପିଲିରୁ ପ୍ରଦୀପ ମହାରଥୀ  ୮୮,୫୧୮ଖଣ୍ଡ ଭୋଟ ପାଇ ନିର୍ବାଚିତ ହୋଇଥିଲେ। ସେତେବେଳେ ତାଙ୍କ ନିକଟତମ ପ୍ରତିଦ୍ୱନ୍ଦି ବିଜେପିର ଆଶ୍ରିତ ପଟ୍ଟନାୟକ ୭୨,୭୩୧ଖଣ୍ଡ ଭୋଟ ଏବଂ କଂଗ୍ରେସ ପ୍ରାର୍ଥୀ ଅଜିତ ମଙ୍ଗରାଜ ୯୮୩୦ଖଣ୍ଡ ଭୋଟ ପାଇଥିଲେ। ଅନ୍ୟ ଦଳର କୌଣସି ସ୍ଥିତି ସେଠାରେ ନାହିଁ। ଭୋଟ ପ୍ରତିଶତକୁ ଯଦି ବିଚାର କରାଯାଏ ତେବେ ବିଜେଡି ୫୦.୬୬ ପ୍ରତିଶତ ଭୋଟ ପାଇଥିବାବେଳେ ବିଜେପି ୪୧.୬୨ ପ୍ରତିଶତ ଓ କଂଗ୍ରେସ ପ୍ରାର୍ଥୀ ମାତ୍ର ୫.୬୩ ପ୍ରତିଶତ ଭୋଟ ପାଇଥିଲେ।

ପ୍ରଦୀପ ମହାରଥୀଙ୍କ ପରଲୋକ ପରେ ପିପିଲି ଲୋକଙ୍କର ତାଙ୍କ ପ୍ରତି କେତେ ଭଲ ପାଇବା ତାହା ବେଶ୍ ପରିଦୃଷ୍ଟ ହୋଇଥିଲା। ତାଙ୍କର ଶ୍ରଦ୍ଧାଞ୍ଜଳୀ ସଭାରେ ଯେପରି ସମାଗମ ହୋଇଥିଲା ତାହା ହିଁ ପ୍ରମାଣିତ କରିଥିଲା ମହାରଥୀଙ୍କ ପ୍ରତି ଲୋକଙ୍କର ଭକ୍ତିଭାବ। ଏପରିକି ତାଙ୍କର ଦଶାହ ବେଳେ ଚାରିଶହ ଲୋକ ସ୍ବଇଚ୍ଛାରେ ଲଣ୍ଡା ହୋଇ ନିଜର ଭଲ ପାଇବାକୁ ପ୍ରମାଣିତ କରିଛନ୍ତି। ବିଭିନ୍ନ ଶ୍ରଦ୍ଧାଞ୍ଜଳୀ ସଭାରେ ଖୋଲାଖୋଲି ଭାବେ ପ୍ରଦୀପ ମହାରଥୀଙ୍କ ଧର୍ମପତ୍ନୀ ପ୍ରତିଭା ମହାରଥୀଙ୍କୁ ପ୍ରାର୍ଥୀ କରାଯାଉ ବୋଲି ଦାବୀ କରିଛନ୍ତି।

ଅନ୍ୟପଟେ ବିଜେଡିର ନିର୍ବାଚନ ରଣନୀତିକୁ ଯଦି ସମୀକ୍ଷା କରାଯାଏ ତେବେ ପରଲୋକ ବିଧାୟକଙ୍କ ପରିବାରର ଜଣଙ୍କୁ ଟିକେଟ ଦେଇଥାଏ। ବିଜେପୁରରେ ସୁବଳ ସାହୁଙ୍କ ପତ୍ନୀ ରିତା ସାହୁ, ପାଟକୁରାରେ ବେଦପ୍ରକାଶ ଅଗ୍ରୱାଲାଙ୍କ ସ୍ତ୍ରୀ ସାବିତ୍ରୀ ଅଗ୍ରୱାଲା, ତିର୍ତ୍ତୋଲରେ ବିଷ୍ଣୁ ଦାସଙ୍କ ପୁତ୍ର ବିଜୟ ଶଙ୍କର ଦାସଙ୍କୁ ବିଜେଡି ଟିକେଟ ଦେଇଛି।

ଦଳର ଏହି ରଣନୀତି ଠିକ୍ ଏବଂ ଲୋକଙ୍କର ଆସ୍ଥାଭାଜନ ହୋଇ ଜିତିବା ସହଜ ହୋଇଛି। ସେହି ନୀତିକୁ ଧରିଲେ ବିଜେଡି ସ୍ବର୍ଗତ ପ୍ରଦୀପ ମହାରଥୀଙ୍କ ପରିବାରରୁ ନିଶ୍ଚିତ ଜଣଙ୍କୁ ଟିକେଟ ଦେବ। ଆଉ ବିପୁଳ ଭୋଟରେ ସେ ନିଶ୍ଚିତ ଜିତିବେ ବୋଲି ଏବେଠାରୁ ଜଣା ପଡିଗଲାଣି। ଅନ୍ୟ ବିରୋଧୀ ଦଳ କେବଳ ରାଜନୈତିକ ଧର୍ମ ପାଳନ ପାଇଁ ପ୍ରାର୍ଥୀ ଛିଡା କରିବେ। ପିପିଲି ଉପନିର୍ବାଚନ ପାଇଁ ଆସନ୍ତା ଡିସେମ୍ବର କିମ୍ବା ଜାନୁୟାରୀରେ ତାରିଖ ଘୋଷଣା ହେବ ବୋଲି ଅନୁମାନ କରାଯାଉଛି।