Tag: ପୁରୀ

ପୁରୀ: ପୁରୀର କେତେକ ଅଂଚଳରେ ମହାପ୍ରଭୁ ଶ୍ରୀଜଗନ୍ନାଥଙ୍କ ନାମରେ ଥିବା ଜମି ଜବରଦଖଲକାରୀଙ୍କ କବଳରେ ରହିଛି। ମାଟିତୋଟା ମଉଜାରେ ଥିବା ଏହି ଜମିରୁ ଜବରଦଖଲ ଉଚ୍ଛେଦ ପାଇଁ ଶ୍ରୀମନ୍ଦିର ପ୍ରଶାସନ କତ୍ତୃପକ୍ଷ ବାସେଳୀସାହି ଥାନାରେ ଏତଲା ଦେଇଛନ୍ତି। ଏ ଦିଗରେ ତୁରନ୍ତ କାର୍ଯ୍ୟାନୁଷ୍ଠାନ ପାଇଁ ପ୍ରଶାସନ ପକ୍ଷରୁ ଜିଲାପାଳ ଓ ଏସପିଙ୍କୁ ଅନୁରୋଧ କରାଯାଇଛି।

ମାଟିତୋଟା ୟୁନିଟ ନମ୍ବର-୧, ଖାତା ନମ୍ବର-୩୮ ର ମୋଟ ୧୦୯ଟି ପ୍ଲଟ ଜବରଦଖଲରେ ରହିଛି। ଏ ସମ୍ପର୍କରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ ସାମାଜିକ ଗଣମାଧ୍ୟମରେ କହିଛନ୍ତି, ଶ୍ରୀ ଜଗନ୍ନାଥ ମହାପ୍ରଭୁଙ୍କ ଭୂ ସମ୍ପତ୍ତିର ସୁରକ୍ଷା ପାଇଁ ପ୍ରଶାସନ ବଦ୍ଧପରିକର। କୌଣସି ଜାଲିଆତି ବା ବେଆଇନ୍ ଉଦ୍ୟମକୁ ବରଦାସ୍ତ କରାଯିବ ନାହିଁ।

ପୁରୀ: ବେଦାନ୍ତ ଜମି ପ୍ରସଙ୍ଗକୁ ନେଇ ଆଜି ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ ପ୍ରତିକ୍ରିୟା ରଖିଥିବା ବେଳେ ସମସ୍ତ ସରକାରୀ ଜମି ସରକାରୀ ଖାତାକୁ ଫେରିବା ନେଇ ମତ ରଖିଛନ୍ତି।ସେହିପରି ଚାଷୀ ମାଙ୍କର ଥିବା ବ୍ୟକ୍ତିଗତ ଜମି ସେମାନଙ୍କ ନାମ କୁ ଫେରିବା ନେଇ କୌଣସି ରେଜିଷ୍ଟ୍ରେସନ ଖର୍ଚ୍ଚ ଦେବାକୁ ପଡିବ ନାହିଁ। ପୁରୀରେ ବେଦାନ୍ତ ବିଶ୍ବବିଦ୍ୟାଳୟ ପାଇଁ ଚାଷୀ ମାନଙ୍କ ଠାରୁ ନିଆ ଜାଇଥିବା ଜମି ଫେରିପାଇବେ ଚାଷୀ।

ତେବେ ଜମି ପ୍ରତି ବଦଳରେ ଚାଷୀମାନେ ନେଇଥିବା କ୍ଷତିପୂରଣ ରାଶି ଫେରାଇବେ। ଅଧିଗ୍ରହଣ ହୋଇଥିବା ଜମିର ସତ୍ତ୍ବ ବା ରେକର୍ଡ଼ ସଂଶୋଧନ କରାଯାଇ ଚାଷୀଙ୍କୁ ପଟ୍ଟା ଓ ଜମି ଦଖଲ ଦିଆଯିବ। ସେହିଭଳି ବେଦାନ୍ତକୁ ଲିଜ୍ ଦିଆଯାଇଥିବା ସରକାରୀ ଜମି ସରକାରୀ ଖାତାକୁ ଫେରାଇ ଅଣାଯିବ। ଦିନେ ଦୁଇ ଦିନ ଭିତରେ ଏନେଇ ବିଜ୍ଞପ୍ତି ପ୍ରକାଶ ପାଇବ।

ଅନୀଲ ଅଗ୍ରୱାଲ ଫାଉଣ୍ଡେସନ ପାଇଁ ମୋଟ ୩୩୪୨. ୫୩ ଏକର ଘରୋଇ ଜମି ଅଧିଗ୍ରହଣ କରିଥିଲେ ସରକାର। ଏଥିରେ ପାଖାପାଖି ୬ ହଜାର ଜମିହରା ଚାଷୀଙ୍କୁ ଚିହ୍ନଟ କରି ସେମାନଙ୍କ ଜମି ଫେରସ୍ତ କରାଯିବ।

ସେହିପରି ବେଦାନ୍ତକୁ ଲିଜ ଦିଆଯାଇଥିବା ୪୯୪.୯୮ ଏକର ସରକାରୀ ଜମି ପୁଣି ସରକାରୀ ଖାତାକୁ ଫେରାଇ ଆଣିବେ ସରକାର।

ପୁରୀ: କେନ୍ଦ୍ର ନୂତନ ଓ ଅକ୍ଷୟ ଶକ୍ତି, ଉପଭୋକ୍ତା ବ୍ୟାପାର, ଖାଦ୍ୟ ଓ ସାଧାରଣ ବଣ୍ଟନ ମନ୍ତ୍ରୀ ପ୍ରହ୍ଲାଦ ଯୋଶୀ ଆଜି ପୁରୀସ୍ଥିତ ଶ୍ରୀ ଜଗନ୍ନାଥ ମନ୍ଦିରରେ ୧୦ ଟି ବ୍ୟାଟେରୀ ଚାଳିତ ଯାନକୁ ପତାକା ଦେଖାଇ ଶୁଭାରମ୍ଭ କରିଛନ୍ତି। ଭାରତୀୟ ଅକ୍ଷୟ ଶକ୍ତି ବିକାଶ ସଂସ୍ଥା ଲିଃ. (ଆଇଆରଇଡିଏ)ର ସିଏସଆର୍ କାର୍ଯ୍ୟକ୍ରମ ଅଧୀନରେ ଏହି ପଦକ୍ଷେପର ଉଦ୍ଦେଶ୍ୟ ହେଉଛି ପରିବେଶ ଅନୁକୂଳ ଗମନାଗମନକୁ ପ୍ରୋତ୍ସାହିତ କରିବା ଏବଂ ପବିତ୍ର ତୀର୍ଥସ୍ଥାନକୁ ଆସୁଥିବା ଶ୍ରଦ୍ଧାଳୁମାନଙ୍କ ସୁଗମ୍ୟତାରେ ଉନ୍ନତି ଆଣିବା, ବିଶେଷ କରି ବରିଷ୍ଠ ନାଗରିକ ଏବଂ ଦିବ୍ୟାଙ୍ଗମାନଙ୍କୁ ସମ୍ମାନ ଓ ଐତିହ୍ୟ ସ୍ଥଳରେ ସହାୟତା ଯୋଗାଇଦେବା।

ଶ୍ରୀ ଜଗନ୍ନାଥ ମନ୍ଦିର ପ୍ରଶାସନର ମୁଖ୍ୟ ପ୍ରଶାସକଙ୍କୁ ବ୍ୟାଟେରୀ ଚାଳିତ ଯାନର ଚାବି ହସ୍ତାନ୍ତର କରିବା ସମୟରେ ସାଂସ୍କୃତିକ ସ୍ଥଳଗୁଡ଼ିକରେ ଦୀର୍ଘସ୍ଥାୟୀ ସମାଧାନ ଉପରେ କେନ୍ଦ୍ର ମନ୍ତ୍ରୀ ଶ୍ରୀ ଯୋଶୀ ଗୁରୁତ୍ୱାରୋପ କରିଥିଲେ। ସେ କହିଥିଲେ, ଏହି ଐତିହାସିକ ମନ୍ଦିରରେ ବ୍ୟାଟେରୀ ଚାଳିତ ଯାନଗୁଡ଼ିକର ମୁତୟନ ସବୁଜ ଶକ୍ତି ପ୍ରତି ଆମର ପ୍ରତିବଦ୍ଧତାକୁ ଦର୍ଶାଉଛି। ଏଗୁଡ଼ିକ ପର୍ଯ୍ୟଟକମାନଙ୍କୁ ଏକ ସୁଲଭ ଏବଂ ପରିବେଶ ଅନୁକୂଳ ପରିବହନ ବିକଳ୍ପ ପ୍ରଦାନ କରିବ। ଏହିପରି ସ୍ଥାୟୀ ସିଏସଆର ପ୍ରକଳ୍ପଗୁଡ଼ିକୁ ସମର୍ଥନ କରିବାରେ ଆଇଆରଇଡିଏର ପ୍ରୟାସ ଦେଶର ସବୁଜ ମିଶନ ପ୍ରତି ସେମାନଙ୍କର ଅତୁଟ ସମର୍ପଣ ଏବଂ ଗୁରୁତ୍ୱପୂର୍ଣ୍ଣ ଐତିହ୍ୟ ସ୍ଥଳରେ ପର୍ଯ୍ୟଟକଙ୍କ ଅଭିଜ୍ଞତାରେ ସୁଧାର ଆଣିବାର ପ୍ରୟାସକୁ ପ୍ରତିଫଳିତ କରେ ବୋଲି ଶ୍ରୀ ଯୋଶୀ କହିଥିଲେ।

ଆଇଆରଇଡିଏର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ ପ୍ରଦୀପ କୁମାର ଦାସ ଦୀର୍ଘସ୍ଥାୟୀତ୍ୱ ପ୍ରତି କମ୍ପାନୀର ସମର୍ପଣ ଉପରେ ଆଲୋକପାତ କରି କହିଥିଲେ, ‘‘ଆମର ସିଏସଆର ପଦକ୍ଷେପ ମାଧ୍ୟମରେ ଐତିହ୍ୟ ସ୍ଥଳକୁ ୧୦ ଟି ପରିବେଶ ଅନୁକୂଳ ଯାନ ଯୋଗାଇ ଦେବା ଆଇଆରଇଡିଏ ପାଇଁ ସମ୍ମାନର ବିଷୟ। ଏହି ପ୍ରକଳ୍ପ ଜୀବନର ପ୍ରତ୍ୟେକ କ୍ଷେତ୍ରରେ ଦୀର୍ଘସ୍ଥାୟୀ ଓ ନବୀକରଣଯୋଗ୍ୟ ଶକ୍ତି ସମାଧାନ ଚଳାଇବା ପାଇଁ ଆମର ଲକ୍ଷ୍ୟ ସହିତ ମେଳ ଖାଉଛି ଏବଂ ପରିଦର୍ଶକମାନଙ୍କ ପାଇଁ ପରିବେଶ ଅନୁକୂଳ ପରିବହନ ସୁବିଧା ପ୍ରଦାନ କରିବାକୁ ଲକ୍ଷ୍ୟ ରଖିଛି।’’

ଆଇଆରଇଡିଏ ନିର୍ଦ୍ଦେଶକ (ଅର୍ଥ) ଡ. ବି.କେ. ମହାନ୍ତିଙ୍କ ସମେତ ନୂତନ ଏବଂ ଅକ୍ଷୟ ଶକ୍ତି ମନ୍ତ୍ରଣାଳୟ (ଏମଏନଆରଇ), ଶ୍ରୀ ଜଗନ୍ନାଥ ମନ୍ଦିର ପ୍ରଶାସନ ଏବଂ ଆଇଆରଇଡିଏର ଅନ୍ୟ ବରିଷ୍ଠ ଅଧିକାରୀମାନେ ମଧ୍ୟ ଏହି ସମାରୋହରେ ଯୋଗ ଦେଇଥିଲେ। କେନ୍ଦ୍ର ମନ୍ତ୍ରୀ, ଆଇଆରଇଡିଏର ସିଏମଡି ଏବଂ ଏମଏନଆରଇ ଏବଂ ଆଇଆରଇଡିଏର ଅନ୍ୟ ଅଧିକାରୀମାନେ ଭଗବାନ ଜଗନ୍ନାଥ ମନ୍ଦିରରେ ଦର୍ଶନ କରିଥିଲେ।

ପୁରୀ: ପେନସନ ଓ ପେନସନଭୋଗୀ କଲ୍ୟାଣ ବିଭାଗ ପକ୍ଷରୁ ପୁରୀ ସ୍ବର୍ଗଦ୍ବାର ବ୍ୟାଙ୍କ ଅଫ୍‌ ବରୋଦା ଶାଖା ଏବଂ କଚେରୀ ଛକ ସ୍ଥିତ ମୁଖ୍ୟ ଡାକଘରେ ଡିଜିଟାଲ ଜୀବନ ପ୍ରମାଣପତ୍ର (ଡିଏଲସି) ଅଭିଯାନ ୩.୦ ଅନୁଷ୍ଠିତ ହୋଇଯାଇଛି। ବିଭାଗର ବରିଷ୍ଠ ନିର୍ଦ୍ଦେଶକ (ଆଇଟି) ଅନୀଲ ବଂଶଲଙ୍କ ସମେତ ବ୍ୟାଙ୍କ ଅଫ୍‌ ବରୋଦା, ଡାକ ବିଭାଗ ଏବଂ ୟୁଆଇଡିଏଆଇର ବରିଷ୍ଠ ଅଧିକାରୀମାନେ ଉପସ୍ଥିତ ରହି ପେନସନଭୋଗୀଙ୍କୁ ଡିଏଲସି କରାଇବା ସହିତ ସେମାନଙ୍କୁ ଚେହେରା ପ୍ରମାଣୀକରଣ ପଦ୍ଧତିରେ ଜୀବନ ପ୍ରମାଣପତ୍ର ଦାଖଲ କରିବା ବିଷୟରେ ସଚେତନ କରାଇଥିଲେ। ଏହିସବୁ ଶିବିରରେ ବ୍ୟାପକ ପ୍ରଚାରପ୍ରସାର ଏବଂ ଏହାକୁ ଫଳପ୍ରଦ କରିବା ପାଇଁ ସମସ୍ତ ପ୍ରୟାସ କରାଯାଇଥିଲା।

ସୂଚନାଯୋଗ୍ୟ, ପେନସନ ଓ ପେନସନଭୋଗୀ କଲ୍ୟାଣ ବିଭାଗ ପକ୍ଷରୁ ୧ରୁ ୩୦ ନଭେମ୍ବର ପର୍ଯ୍ୟନ୍ତ ଡିଏଲସି ଅଭିଯାନ ୩.୦ ଅନୁଷ୍ଠିତ ହେଉଛି। ଏହି ଅଭିଯାନ ସାମଗ୍ରିକ ସରକାର ଆଭିମୁଖ୍ୟ ନେଇ ସାରା ଭାରତର ୮୦୦ ସହର/ଜିଲ୍ଲାରେ ଅନୁଷ୍ଠିତ ହେଉଛି ଏବଂ ଏଥିରେ ସବୁ ଅଂଶୀଦାର ଏକାଠି ହୋଇ ସହଯୋଗ କରୁଛନ୍ତି।

କେନ୍ଦ୍ର ସରକାରୀ ପେନସନଭୋଗୀଙ୍କ ସହଜ ଜୀବନଧାରଣ ପାଇଁ ଚେହେରା ପ୍ରମାଣୀକରଣ ବା ଫେସ୍‌ ଅଥେଣ୍ଟିକେସନ୍‌ ପଦ୍ଧତିରେ ଡିଏଲସି ଦାଖଲ ପ୍ରକ୍ରିୟା ୨୦୨୧ରେ ଆରମ୍ଭ ହୋଇଥିଲା। ଏହି ଜ୍ଞାନକୌଶଳ ଦ୍ୱାରା ପେନସନଭୋଗୀମାନେ ଯେକୌଣସି ଆଣ୍ଡ୍ରଏଡ୍ ସ୍ମାର୍ଟଫୋନ୍ ବ୍ୟବହାର କରି ଜୀବନ ପ୍ରମାଣପତ୍ର ଦାଖଲ କରିପାରିବେ। ଏହା ବାହ୍ୟ ବାୟୋମେଟ୍ରିକ୍ ଡିଭାଇସ୍ ର ଆବଶ୍ୟକତା ହ୍ରାସ କରିଥାଏ ଏବଂ ଏହି ପ୍ରକ୍ରିୟାକୁ ଅଧିକ ଶସ୍ତା ଓ ସୁଲଭ କରିଥାଏ।

୨୦୨୨ ଅଭିଯାନରେ ୧.୪୧ କୋଟି ରୁ ଅଧିକ ଡିଏଲସି କରାଯାଇଥିଲା, ଏଥି ମଧ୍ୟରେ କେନ୍ଦ୍ର ସରକାରଙ୍କ ପେନସନଭୋଗୀଙ୍କ ଠାରୁ ୪୨ ଲକ୍ଷ ଦାଖଲ କରାଯାଇଥିଲା। ୨୦୨୩ ରେ ୧୦୦ଟି ସ୍ଥାନରେ ହୋଇଥିବା ଏହି ଅଭିଯାନରେ ୧.୪୭ କୋଟିରୁ ଅଧିକ ଡିଏଲସି ହୋଇଥିବା ବେଳେ କେନ୍ଦ୍ର ସରକାରଙ୍କ ପେନସନଭୋଗୀଙ୍କ ଠାରୁ ୪୫ ଲକ୍ଷ ଟଙ୍କା ମିଳିଥିଲା।

ବିଭିନ୍ନ ବ୍ୟାଙ୍କ, ଇଣ୍ଡିଆ ପୋଷ୍ଟ ପେମେଣ୍ଟ ବ୍ୟାଙ୍କ, ପେନସନର୍ସ ଆସୋସିଏସନ, ୟୁଆଇଡିଏଆଇ, ଇଲେକ୍ଟ୍ରୋନିକ୍ସ ଓ ଆଇଟି ମନ୍ତ୍ରଣାଳୟ, ପ୍ରତିରକ୍ଷା ମନ୍ତ୍ରଣାଳୟ, ରେଳ ମନ୍ତ୍ରଣାଳୟ ଏବଂ ଡିଓଟିର ମିଳିତ ସହଯୋଗରେ ଏହି ଅଭିଯାନ ଆୟୋଜିତ ହେଉଛି। ଏହାର ଲକ୍ଷ୍ୟ ହେଉଛି ପେନସନଭୋଗୀ, ବିଶେଷକରି ଅତିବରିଷ୍ଠ ନାଗରିକ ଏବଂ ଭିନ୍ନକ୍ଷମ ବ୍ୟକ୍ତିମାନେ ସହଜରେ ସେମାନଙ୍କ ଜୀବନ ପ୍ରମାଣପତ୍ର ଦାଖଲ କରିପାରିବେ। ଦେଶବ୍ୟାପୀ ଡିଏଲସି ଶିବିର ପ୍ରତିଷ୍ଠା କରାଯାଇଛି ଏବଂ ସ୍ମାର୍ଟଫୋନ୍ ଧରିଥିବା କର୍ମଚାରୀମାନେ ଶିବିରଗୁଡ଼ିକରେ ପେନସନଭୋଗୀଙ୍କୁ ସାହାଯ୍ୟ କରୁଛନ୍ତି। ଶଯ୍ୟାଶାୟୀ ପେନସନଭୋଗୀଙ୍କ ପାଇଁ ସ୍ୱଗୃହ ପରିଦର୍ଶନ ସୁବିଧା ମିଳୁଛି।

ଏହି ଅଭିଯାନ ସମ୍ପର୍କରେ ସାମାଜିକ ଗଣମାଧ୍ୟମ ଓ ପ୍ରଚାର ବ୍ୟାନର ମାଧ୍ୟମରେ ବ୍ୟାପକ ପ୍ରଚାରପ୍ରସାର କରାଯାଉଛି ଏବଂ ସର୍ବାଧିକ ଅଂଶଗ୍ରହଣକୁ ସୁନିଶ୍ଚିତ କରିବା ଲାଗି ଏହାର ପ୍ରଗତି ଅନୁଧ୍ୟାନ କରାଯାଉଛି।

ପୁରୀ: ଏଣିକି ପେନସନ ଉପଭୋକ୍ତାଙ୍କୁ ସେମାନଙ୍କର ଲାଇଫ ସାର୍ଟିଫିକେଟ ପ୍ରଦାନ କରିବା ପାଇଁ ଆଉ ବ୍ୟାଙ୍କ ଦୌଡ଼ିବାକୁ ପଡିବ ନାହିଁ। କେନ୍ଦ୍ର ସରକାରଙ୍କ ପେନସନ ଓ ପେନସନ କଲ୍ୟାଣ ବିଭାଗ ପକ୍ଷରୁ ଲୋକଙ୍କ ସୁବିଧା ଯୋଗାଇ ଦେବା ଲକ୍ଷ୍ୟରେ ସ୍ୱତନ୍ତ୍ର ଭାବେ ଡିଜିଟାଲ ଲାଇଫ ସାର୍ଟିଫିକେଟ ବ୍ୟବସ୍ଥା ଗ୍ରହଣ କରାଯାଇଅଛି। ଯାହା ଦ୍ୱାରା ଘରେ ବସି ଯେକୌଣସି ସ୍ଥାନରୁ ଏଣିକି ପେନସନ ଉପଭୋକ୍ତା ମାନେ ସେମାନଙ୍କର ଲାଇଫ ସାର୍ଟିଫିକେଟ ଅନଲାଇନ ମାଧ୍ୟମରେ ସ୍ୱତନ୍ତ୍ର ଆପରେ ପ୍ରଦାନ କରିପାରିବେ। ଏହି ବିଶେଷ ବ୍ୟବସ୍ଥାରେ ସାଧାରଣ ପେନସନ ଉପଭୋକ୍ତାଙ୍କ ସମେତ ଅସହାୟ, ଭିନ୍ନକ୍ଷମ ତଥା ମେଡିକାଲ ଅସୁବିଧା ଭୋଗୁଥିବା ପେନସନ ଉପଭୋକ୍ତା ମାନେ ବିଶେଷ ସୁବିଧା ପାଇପାରିବେ।

ଆଜି ପୁରୀରେ ଥିବା ବ୍ୟାଙ୍କ ଅଫ ବରୋଦା ଠାରେ ଏନେଇ ଏକ ସ୍ୱତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହୋଇଥିବା ବେଳେ କେନ୍ଦ୍ର ସରକାରଙ୍କ ପେନସନ ଓ ପେନସନ ଭୋଗୀ କଲ୍ୟାଣ ବିଭାଗର ବରିଷ୍ଠ ଅଧିକାରୀ ଅନିଲ ବଂସଲ ଯୋଗଦାନ କରି ସାଧାରଣ ଲୋକଙ୍କୁ ଏହି ନୂତନ ବ୍ୟବସ୍ଥା ସମ୍ପର୍କରେ ସଚେତନ କରାଇବା ସହ ଅନେକ ଉପଭୋକ୍ତାଙ୍କ ଡିଜିଟାଲ ଲାଇଫ ସାର୍ଟିଫିକେଟ ଆପରେ ପଞ୍ଜିକୃତ ମଧ୍ୟ କରାଇଥିଲେ। ସରକାରଙ୍କ ଏହି ବ୍ୟବସ୍ଥା ସ୍ୱତନ୍ତ୍ର ଭାବେ ହୋଇଥିବା ବେଳେ ଏଣିକି ପେନସନ ଭୋଗୀ ମାନେ କଷ୍ଟ ପାଇବେ ନାହିଁ ତଥା ସେମାନଙ୍କର ସଠିକ ପାଞ୍ଜିକରଣ ହୋଇପାରିବ। ସେହିପରି ଆଗାମୀ ଦିନରେ ଏହି ବ୍ୟବସ୍ଥା ସାମଗ୍ରିକ ବ୍ୟବସ୍ଥା ଅଭିବୃଦ୍ଧିରେ ସହାୟକ ହେବାକୁ ଯାଉଥିବା ବେଳେ ଏପରି ବ୍ୟବସ୍ଥାକୁ ନେଇ ସାଧାରଣ ପେନସନ ଉପଭୋକ୍ତା ମାନେ ବେଶ ଖୁସି ପ୍ରକଟ କରିଥିଲେ।

ଲାଇଫ ସାର୍ଟିଫିକେଟ ପ୍ରଦାନ ନେଇ ପେନସନ ଉପଭୋକ୍ତା ମାନେ ବିଭିନ୍ନ ସମୟରେ ଭିନ୍ନ ଭିନ୍ନ ସମସ୍ୟା ର ସମ୍ମୁଖୀନ ହେଉଥିବା କଷ୍ଟରୁ ଏଣିକି ଖ୍ୟାନ୍ତି ମିଳିବା ନେଇ ଉପଭୋକ୍ତା ମାନେ ସରକାରଙ୍କ ଏପରି ବ୍ୟବସ୍ଥା କୁ ସାଧୁବାଦ ଜଣାଇଛନ୍ତି। ଆଜି ଅନୁଷ୍ଠିତ ଏହି ସ୍ୱତନ୍ତ୍ର କାର୍ଯ୍ୟକ୍ରମ ରେ ପୂର୍ବତନ ଆମ୍ବାସାଡ଼ର ମଳୟ ମିଶ୍ର ମଧ୍ୟ ଯୋଗଦାନ କରି ନିଜକୁ ଧନ୍ୟ ମନେ କରିବା ସହ ଏପରି ବ୍ୟବସ୍ଥାର ଉଚ୍ଚ ପ୍ରଶଂସା କରିଥିଲେ।

ପୁରୀ: ପୁରୀ ସାଂସଦ ଡ. ସମ୍ବିତ ପାତ୍ରଙ୍କ ପ୍ରୟାସ ଫଳରେ ଆଜି ପୁରୀର ଭୋଳନାଥ ବିଦ୍ୟାପୀଠରେ ସାମାଜିକ ନ୍ୟାୟ ଏବଂ ଅଧିକାର ମନ୍ତ୍ରାଳୟ ପକ୍ଷରୁ ଏକ ବିଶେଷ ‘ସାମାଜିକ ଅଧିକାରିତା ଶିବିର’ ଆୟୋଜିତ ହୋଇଥିଲା। ଏହି ଶିବିରରେ କେନ୍ଦ୍ରମନ୍ତ୍ରୀ ବି.ଏଲ. ବର୍ମା ଏବଂ ଡ. ସମ୍ବିତ ପାତ୍ର ମିଳିତ ଭାବରେ ପୁରୀ ଲୋକସଭା କ୍ଷେତ୍ରର ବହୁ ଦିବ୍ୟାଙ୍ଗ ଏବଂ ବରିଷ୍ଠ ନାଗରିକମାନଙ୍କୁ ସହାୟକ ଉପକରଣ ବିତରଣ କରିଥିଲେ।

ଏହି ଅବସରରେ ଡ. ସମ୍ବିତ ପାତ୍ର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଦୃଷ୍ଟି ଏବଂ ଦିବ୍ୟାଙ୍ଗ ସଶକ୍ତିକରଣ ପାଇଁ ନିରନ୍ତର ପ୍ରୟାସକୁ ପ୍ରଶଂସା କରିଥିଲେ। ସେ କହିଥିଲେ, “ମୋଦୀ ସରକାର ଦିବ୍ୟାଙ୍ଗ ମାନଙ୍କ କଲ୍ୟାଣ ପାଇଁ ଅନେକ କାର୍ଯ୍ୟକ୍ରମ ହାତକୁ ନେଇଛନ୍ତି। ମୁଁ କେନ୍ଦ୍ର ସରକାରଙ୍କୁ ଅନୁରୋଧ କରିଥିଲି ଯେ ପୁରୀ ଲୋକସଭା କ୍ଷେତ୍ରରେ ଏହିଭଳି ଏକ ବୃହତ ଶିବିର ଆୟୋଜନ କରାଯାଉ।”

ଏହି ଶିବିରରେ ମୋଟ ୨୧୪୨ ଜଣ ଲାଭାର୍ଥୀଙ୍କୁ ୨.୩୩ କୋଟି ଟଙ୍କା ମୂଲ୍ୟର ୫୧୭୧ଟି ସହାୟକ ଉପକରଣ ବିତରଣ କରାଯାଇଛି। ଏହି ଉପକରଣଗୁଡ଼ିକ ମଧ୍ୟରେ ଶ୍ରବଣ ଯନ୍ତ୍ର, ଟ୍ରାଇସାଇକେଲ, ହ୍ୱିଲଚେୟାର, ବୈଶାଖୀ ଏବଂ ଅନ୍ୟାନ୍ୟ ସହାୟକ ଉପକରଣ ରହିଛି।

ଡ. ପାତ୍ର କହିଥିଲେ, “ମୁଁ ବ୍ୟକ୍ତିଗତ ଭାବେ ପୁରୀର ପ୍ରତିଟି ପଞ୍ଚାୟତରେ ପହଞ୍ଚି ଦିବ୍ୟାଙ୍ଗ ଏବଂ ବରିଷ୍ଠ ନାଗରିକମାନଙ୍କର ଆବଶ୍ୟକତା ବୁଝିଛି। ଆଜିର ଏହି ଶିବିର ସେମାନଙ୍କ ଜୀବନରେ ଏକ ବଡ଼ ପରିବର୍ତ୍ତନ ଆଣିବ।”ସେ ଆହୁରି ମଧ୍ୟ କହିଥିଲେ ଯେ ପୁରୀରେ ଏକ ସ୍ଥାୟୀ ‘ପ୍ରଧାନମନ୍ତ୍ରୀ ଦିବ୍ୟାଶା କେନ୍ଦ୍ର’ ସ୍ଥାପନ ପାଇଁ ସେ ପ୍ରୟାସ ଜାରି ରଖିଛନ୍ତି, ଯାହା ଦ୍ୱାରା ଦିବ୍ୟାଙ୍ଗ ଏବଂ ବରିଷ୍ଠ ନାଗରିକମାନେ ସହଜରେ ସରକାରୀ ଯୋଜନାର ଲାଭ ପାଇପାରିବେ।

କେନ୍ଦ୍ରମନ୍ତ୍ରୀ ଶ୍ରୀ ବର୍ମା ଡ. ପାତ୍ରଙ୍କ ପ୍ରୟାସକୁ ପ୍ରଶଂସା କରି କହିଥିଲେ, “ସମ୍ବିତ ଭାଇ ନିଜ ନିର୍ବାଚନ ମଣ୍ଡଳୀର ଲୋକଙ୍କ ପ୍ରତି ସଦା ସଜାଗ। ତାଙ୍କ ଅନୁରୋଧକ୍ରମେ ଆମେ ଏହି ବୃହତ ଶିବିର ଆୟୋଜନ କରିପାରିଲୁ। ଆଗାମୀ ଦିନରେ ମଧ୍ୟ ଆମେ ପୁରୀ ଅଞ୍ଚଳରେ ଏଭଳି ଅଧିକ ଶିବିର କରିବାକୁ ପ୍ରସ୍ତୁତ ଅଛୁ।”

ଏହି ଅବସରରେ ପୁରୀ ବିଧାୟକ ସୁନୀଲ ମହାନ୍ତି, ପିପିଲି ବିଧାୟକ ଆଶ୍ରିତ ପଟ୍ଟନାୟକ, ସତ୍ୟବାଦୀ ବିଧାୟକ ଓମ ପ୍ରକାଶ ମିଶ୍ର ଏବଂ ଅନ୍ୟ ଗଣ୍ୟମାନ୍ୟ ବ୍ୟକ୍ତି ଉପସ୍ଥିତ ଥିଲେ।

ଶେଷରେ ଡ. ପାତ୍ର କହିଥିଲେ, “ମୋଦୀ ସରକାରଙ୍କ ନେତୃତ୍ୱରେ ଆମେ ପୁରୀକୁ ଦିବ୍ୟାଙ୍ଗ ଏବଂ ବରିଷ୍ଠ ନାଗରିକ ବାନ୍ଧବ ଜିଲ୍ଲା ଭାବରେ ବିକଶିତ କରିବାକୁ ପ୍ରତିଶ୍ରୁତିବଦ୍ଧ। ଏହି ଦିଗରେ ଆମର ପ୍ରୟାସ ଅବ୍ୟାହତ ରହିବ।”

ଭୁବନେଶ୍ୱର: ଅଗ୍ନିପଥ ଯୋଜନାରେ ଚୟନ (ସର୍ଟଲିଷ୍ଟ) ହୋଇଥିବା ପ୍ରାର୍ଥୀଙ୍କ ପାଇଁ ଚଳିତ ମାସ ୧୮ରୁ ୨୬ ତାରିଖ ପର୍ଯ୍ୟନ୍ତ ପୁରୀ ତାଳବଣିଆସ୍ଥିତ ଜିଲ୍ଲା ସ୍ପୋର୍ଟସ୍‌ କମ୍ପ୍ଲେକ୍ସ ଏବଂ ଇନଡୋର ଷ୍ଟାଡିୟମ ଠାରେ ନିଯୁକ୍ତି ଶିବିର (ରାଲି) ଅନୁଷ୍ଠିତ ହେବ। ଏଥିରେ କଟକ, ପୁରୀ, ବାଲେଶ୍ୱର, ମୟୂରଭଞ୍ଜ, ଭଦ୍ରକ, ଜଗତସିଂହପୁର, ଯାଜପୁର, କେନ୍ଦ୍ରାପଡ଼ା, ଖୋର୍ଦ୍ଧା ଓ ନୟାଗଡ଼ ଜିଲ୍ଲାରୁ ଚୟନ ହୋଇଥିବା ପ୍ରାର୍ଥୀ ଏବଂ ନିୟମିତ ସୈନିକ (କେବଳ ଜେସିଓ ବର୍ଗର ସିପାହୀ ଫାର୍ମା, ସୈନିକ ଟେକ୍‌, ନର୍ସିଂ ସହାୟକ ଓ ଧାର୍ମିକ ଶିକ୍ଷକ) ଏବଂ ପଶ୍ଚିମବଙ୍ଗ, ଓଡ଼ିଶା ଓ ସିକ୍କିମର ମହିଳା ମିଲିଟାରୀ ପୁଲିସ ପାଇଁ ସର୍ଟଲିଷ୍ଟ ହୋଇଥିବା ପ୍ରାର୍ଥୀମାନେ ଅଂଶଗ୍ରହଣ କରିପାରିବେ।

ଅନଲାଇନରେ ସାଧାରଣ ପ୍ରବେଶିକ ପରୀକ୍ଷା (ସିଇଇ)ରେ ଉତ୍ତୀର୍ଣ୍ଣ ହୋଇ ସର୍ଟଲିଷ୍ଟ ହୋଇଥିବା ପ୍ରାର୍ଥୀଙ୍କୁ ଶାରୀରିକ ପରୀକ୍ଷା ଏବଂ ମେଡ଼ିକାଲ ପରୀକ୍ଷା ପାଇଁ ଡକାଯାଇଛି। ପଞ୍ଜୀକୃତ ଇମେଲ୍‌ ଆଇଡିରେ ପ୍ରାର୍ଥୀମାନଙ୍କୁ ଆଡମିଟ୍‌ କାର୍ଡ ପଠାଇ ଦିଆଯାଇଛି। ପ୍ରାର୍ଥୀମାନେ ଭାରତୀୟ ସେନାର ୱେବସାଇଟ୍‌ www.joinindianarmy.nic.in ୱେବସାଇଟ୍‌ରେ ଥିବା ସେମାନଙ୍କ ପ୍ରୋଫାଇଲରେ ଲଗଇନ କରି ନିଯୁକ୍ତି ଶିବିର ପାଇଁ ଆଡମିଟ୍‌ କାର୍ଡ ଡାଉନ ଲୋଡ୍‌ କରିପାରିବେ। ଏ ନେଇ କୌଣସି ସନ୍ଦେହ ଥିଲେ, ପ୍ରାର୍ଥୀମାନେ 0671-2305280 ଏବଂ 9437162280 ନମ୍ବରରେ କଟକ ଏଆରଓଙ୍କ ସହିତ ଯୋଗାଯୋଗ କରିପାରିବେ।

ନିଯୁକ୍ତି ପ୍ରକ୍ରିୟା ସମୟରେ କୌଣସି ବ୍ୟକ୍ତିଙ୍କୁ ନିଜର ଅସଲି ପ୍ରମାଣପତ୍ର ନଦେବା ଏବଂ ଠକ/ଏଜେଣ୍ଟଙ୍କ ପ୍ରଲୋଭନର ବଶବର୍ତ୍ତୀ ନହେବା ଲାଗି ପ୍ରାର୍ଥୀମାନଙ୍କୁ ପରାମର୍ଶ ଦିଆଯାଉଛି। ଏପରି କୌଣସି ଘଟଣା କ୍ଷେତ୍ରରେ ପ୍ରାଥୀମାନେ ତୁରନ୍ତ ସ୍ଥାନୀୟ ପୁଲିସ ଏବଂ କଟକସ୍ଥିତ ସେନା ନିଯୁକ୍ତି କାର୍ଯ୍ୟାଳୟରେ ତୁରନ୍ତ ଅଭିଯୋଗ କରାଯାଇପାରିବ। ଏଭଳି ଠକ/ଏଜେଣ୍ଟଙ୍କୁ ଗିରଫ କରିବା ଲାଗି ଏବଂ ନିଯୁକ୍ତି ଶିବିର ସମୟରେ ଠକାମି ନିମନ୍ତେ ସ୍ଥାନୀୟ ପୁଲିସ ଓ ନାଗରିକ ପ୍ରଶାସନ ଜରିଆରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ।

ଭୁବନେଶ୍ଵର: ପୁରୀ ଜିଲ୍ଲାର ପିପିଲି ଓ ସତ୍ୟବାଦୀ ବ୍ଲକ ଅଂଚଳରେ ବାର୍ଡ ଫ୍ଲୁ ଭୁତାଣୁ ନିୟନ୍ତ୍ରଣ ହୋଇପାରୁନାହିଁ। ଅନ୍ୟାନ୍ୟ ସ୍ଥାନରେ ବାର୍ଡ ଫ୍ଲୁ ଦେଖାଦେବା ପରେ ବାର୍ଡ ଫ୍ଲୁ ସଂକ୍ରମଣ ପରିପ୍ରେକ୍ଷୀରେ ଚିଲିକା ହ୍ରଦ ରେ ଥିବା ପକ୍ଷୀ ମାନଙ୍କୁ ଏବଂ ସାଧାରଣ ଲୋକ କୁ ଯେପରି ଏହା ସଂକ୍ରମିତ ହୋଇନପାରିବ ସେଥିପାଇଁ ରାଜ୍ୟ ସରକାରଙ୍କ ପ୍ରାଣୀ ସମ୍ପଦ ବିଭାଗ ନିର୍ଦ୍ଦେଶରେ ଖୋର୍ଦ୍ଧା ଜିଲ୍ଲାର ମୁଖ୍ୟ ପ୍ରାଣୀ ଚିକିତ୍ସକ ଡା ଦେବୀ ଦତ୍ତ ମାଝୀ ଓ ବାଲୁଗାଁ ବ୍ଲକ ପ୍ରାଣୀ ଚିକିତ୍ସାଳୟର ଡାକ୍ତର ସମାପିକା ମହାପାତ୍ର ଙ୍କ ନେତୃତ୍ୱରେ ଏକତ୍ୱରିତ ଟିମଗଠନ କରାଯାଇ ଚିଲିକା ବ୍ଲକ ଅଧୀନରେ ସମଗ୍ର ଚିଲିକା କୂଳରେ ଥିବା ବିଭିନ୍ନ କୁକୁଡ଼ା ଫାର୍ମରୁ କୁକୁଡ଼ା ମାନଙ୍କର ସାମ୍ପୁଲ କଲେକ୍ସନ କରାଯାଇ ପଠାଯାଇଥିବା ଜଣାଯାଇଛି।

ଏଥି ସହିତ ଟାଙ୍ଗୀ ପାର୍ଶ୍ୱ ବର୍ତ୍ତି ଏକ ଶହରୁ ଅଧିକ କୁକୁଡ଼ା ଫାର୍ମ ସହିତ ଏଥିରେ ଚିଲିକା କୂଳଠାରୁ ଦଶ କିଲୋମିଟର ପରିଧି ମଧ୍ୟରେ ଥିବା ବିଭିନ୍ନ କୁକୁଡ଼ା ଫାର୍ମ ଅନ୍ତର୍ଭୁକ୍ତ। ସମସ୍ତ ରକ୍ତ ନମୁନା ଖୋର୍ଦ୍ଧା ଜିଲ୍ଲାର ପ୍ରାଣୀ ଚିକିତ୍ସାଳୟ ମାର୍ଫତ ରେ କଟକ ରେ ଥିବା ମୁଖ୍ୟ ପ୍ରାଣୀ ନିର୍ଦେଶାଳୟ ର ଲାବ୍ରୋଟାରୀ ଓ କେନ୍ଦ୍ରସରକାର ଙ୍କ ନ୍ୟାସନାଲ ଇନଷ୍ଟିଚ୍ୟୁଟ ଫର ହାଇ ସିକୁରିଟ ଡିଜିଜେସ କୁ ଭୁତାଣୁ ଚିନ୍ହଟ ପାଇଁ ପଠାଯାଇଛି।ସେଠାରୁ ଯଦି ପୋଜେଟିଭ ରିପୋର୍ଟ ଆସେ ତେବେ ଚିଲିକା ଅଞ୍ଚଳରେ ଥିବା ସମସ୍ତ କୁକୁଡ଼ା ଫାର୍ମ ଗୁଡିକ ଉପରେ ତ୍ୱରିତ ପଦକ୍ଷେପ ନିଆଯିବ।ସଂକ୍ରମିତ କୁକୁଡ଼ାଙ୍କ ସଂସ୍ପର୍ଶରେ ଆସି କୋୖଣସି ବ୍ୟକ୍ତି ଗତ ଜ୍ୱର ରେ ଆକ୍ରାନ୍ତ ହେଲେ ତାଙ୍କୁ ଆଇସଲେସନ ରଖାଯିବା ସହିତ ତାଙ୍କ ରକ୍ତ ନମୁନା ପରୀକ୍ଷା କରିବାକୁ ସରକାରଙ୍କ ମାର୍ଗ ଦର୍ଶିକା ରହିଛି।ଏହି ସଂକ୍ରମଣ ଯେପରି ମନୁଷ୍ୟ ଶରୀରକୁ ନ ବ୍ୟାପେ ସେଥିପାଇଁ ସତର୍କତା ଅବଲମ୍ବନ କରାଯାଉଛି।

ଚିଲିକା ହ୍ରଦ ନିକଟରେ ଥିବା ବିଭିନ୍ନ କୁକୁଡ଼ା ଫାର୍ମ ଓ ସଂକ୍ରମଣ ସ୍ଥିତି ଉପରେ ସତର୍କ ନଜର ରଖିବାକୁ ପ୍ରାଣୀ ନିର୍ଦେଶକ ଙ୍କ କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି।ଜିଲ୍ଲାର ବିଭିନ୍ନ ସ୍ଥାନରେ କ୍ରମାଗତ ଭାବେ ତୁହକୁ ତୁହା ବର୍ଷା ଲାଗିରହିଲେ ତାପମାତ୍ରା ହ୍ରାସ ପାଇବା ସହ ଫ୍ଲୁ ବ୍ୟାପକ ଭାବେ ବୃଦ୍ଧି ପାଇବାର ଆଶଙ୍କା ରହିଛି।ଏଥି ସହ ବିଭିନ୍ନ ସ୍ଥାନରେ ପ୍ରାଣୀ ମାନଙ୍କୁ ଲାଂଫି ଭୁତାଣୁ ସଂକ୍ରମଣ ଯୋଗୁଁ ବିଭିନ୍ନ ଗାଈ ଗୋରୁ ମଡକ ଆସିପାରେ ସେଥିପାଇଁ ଉପକୂଳ ଓଡ଼ିଶାରେ ଟୀକାକରଣ ଜୋରରେ ଚାଲିଛି।

ଚିଲିକା ଅଞ୍ଚଳରେ ବାର୍ଡ ଫ୍ଲୁ ଚିହ୍ନଟ ହେଲେ ପରିସ୍ଥିତି ଭୟାବହ ହେବ।କାରଣ ଚିଲିକା କୂଳ କୁ ଲାଗି ଥିବା ସମସ୍ତ କୁକୁଡ଼ା ଫାର୍ମ ର କୁକୁଡ଼ା ମରା ଅଭିଯାନ ଓ ବିଶୋଧନ ପକ୍ରିୟା ତ୍ୱରିତ ସମୟ ମଧ୍ୟରେ ହେବ କାରଣ ଚିଲିକା ର ଦଶ କିଲୋମିଟର ପରିଧି ମଧ୍ୟରେ ଏଯାବତ ବିଦେଶୀ ପକ୍ଷୀ ବିଚରଣ କରୁଥିବା ବେଳେ ସେମାନେ ଯେପରି ଏଥିରେ ସଂକ୍ରମିତ ନ ହୁଅନ୍ତି ସେଥିପ୍ରତି ମଧ୍ୟ ପଦକ୍ଷେପ ନିଆଯିବ। ଚିଲିକା ହ୍ରଦ ସମସ୍ତ ପକ୍ଷୀ ଅଭୟାରଣ୍ୟରେ ଥିବା ସମସ୍ତ ପକ୍ଷୀ ଙ୍କୁ ଯେପରି ଏହା ନ ବ୍ୟାପେ ସେମାନଙ୍କର ମଧ୍ୟ ବାଧ୍ୟତାମୂଳକ ଭାବେ ସମ୍ପୁଲ ଟେଷ୍ଟ କରାଯିବ।

ପୁରୀ ଜିଲ୍ଲା ଉପକୂଳରେ ଏହି ସଂକ୍ରମଣ ବ୍ୟାପିଥିବାରୁ ଖୋର୍ଦ୍ଧା ଓ ଗଂଜାମ ଜିଲ୍ଲାର ଚିଲିକା କୂଳ ଅଂଚଳରେ ବିଶେଷ ଦୃଷ୍ଟି ଦେବାକୁ ପରାମର୍ଶ ଦିଆଯାଇଛି।ପୁରୀ ଜିଲ୍ଲାର ଚିଲିକାକୁ ସଲନଗ୍ନ କରୁଥିବା ପାର୍ଶ୍ଵ ବର୍ତି କଣାସ, ଖୋର୍ଦ୍ଧା ଜିଲ୍ଲାର ଟାଙ୍ଗୀ ସ୍ଥିତ ମଙ୍ଗଳା ଯୋଡି, ସୋରଣ ଆଦି ଅଞ୍ଚଳରେ ପକ୍ଷୀମାନେ ବିଚରଣ କରୁଥିବା ବେଳେ ସେଇ ଅଂଚଳରେ ମଧ୍ୟ କୁକୁଡ଼ା ଫାର୍ମ ଗୁଡିକ ରହିଛି।

ଏପଟେ ବାର୍ଡ ଫ୍ଲୁ ସଂକ୍ରମଣ ପରିପ୍ରେକ୍ଷୀରେ ଦୀର୍ଘ ୧୦ ଦିନ ଧରି ଚିଲିକା ଅଞ୍ଚଳରେ ଚିକେନ୍ ବ୍ୟବସାୟ ଧିମା ପଡିଯାଇଛି।ଆଗଭଳି ଲୋକଙ୍କ ଆଉ ଚିକେନ୍ ଦୋକାନ ଆଗରେ ଗହଳି ହେଉନାହିଁ ବୋଲି ବେପାରୀ ମାନେ କହୁଛନ୍ତି। ଚିଲିକା ଅଞ୍ଚଳ ର ବହୁ ଫାର୍ମ ମାଲିକ ମାନେ ଗୋଟା କୁକୁଡ଼ା କୁ ବହୁ ଶସ୍ତାରେ ଦେଉଥିବା ବେଳେ,ବାର୍ଡ ଫ୍ଲୁ ସଂକ୍ରମିତ ଭୟରେ ବହୁ ସ୍ଥାନରେ ଚିକେନ୍ ଦୋକାନ ବନ୍ଦ ରହିଛି।ବାର୍ଡ ଫ୍ଲୁ କାରଣରୁ ଚିକେନ୍ ବେପାର ମାନ୍ଦା ପଡିଯିବା ଯୋଗୁଁ ଚିଲିକା ମାଛ ବହୁତ ଦର ଉଚ୍ଚା ରହିଛି।

ଭୁବନେଶ୍ବର: ସଫ୍ଟୱେର ଓ ପ୍ରାଣୀଙ୍କ କିସମ ଉପରେ ଏକବିଂଶତମ ଆଞ୍ଚଳିକ ପ୍ରଶିକ୍ଷଣ କାର୍ଯ୍ୟକ୍ରମ ଆସନ୍ତାକାଲି ପୁରୀରେ ଆୟୋଜିତ ହେବ। ଓଡ଼ିଶା, ପଶ୍ଚିମବଙ୍ଗ, ଛତିଶଗଡ଼, ଝାଡ଼ଖଣ୍ଡ ଓ ବିହାରର ରାଜ୍ୟ ଓ ଜିଲ୍ଲାସ୍ତରୀୟ ନୋଡାଲ ଅଧିକାରୀମାନେ ଏଠାରେ ପ୍ରଶିକ୍ଷଣ ନେବେ। ସଫ୍ଟୱେର ବିଶେଷକରି ମୋବାଇଲ ଆପ୍ ଓ ଡ୍ୟାଶବୋର୍ଡ ଉପରେ ଏହି ତାଲିମ ଦିଆଯିବ।

ପ୍ରଶିକ୍ଷଣ କାର୍ଯ୍ୟକ୍ରମର ଉଦଘାଟନୀ ସମାରୋହରେ କେନ୍ଦ୍ର ମତ୍ସ୍ୟପାଳନ, ପ୍ରାଣୀ ସମ୍ପଦ ଏବଂ ଦୁଗ୍ଧ ଉତ୍ପାଦନ ରାଷ୍ଟ୍ର ମନ୍ତ୍ରୀ ପ୍ରଫେସର ଏସ.ପି. ସିଂ ବାଘେଲ ଦୀକ୍ଷାନ୍ତ ଅଭିଭାଷଣ ରଖିବେ। ସେହିପରି ଓଡ଼ିଶା ସରକାରଙ୍କ ମତ୍ସ୍ୟପାଳନ, ପ୍ରାଣୀସମ୍ପଦ ଓ ଦୁଗ୍ଧ ଉତ୍ପାଦନ ବିଭାଗ ମନ୍ତ୍ରୀ ଗୋକୁଳାନନ୍ଦ ମଲ୍ଲିକ ମଧ୍ୟ କାର୍ଯ୍ୟକ୍ରମରେ ଅଭିଭାଷଣ ରଖିବେ। ଭାରତ ସରକାରଙ୍କ ପ୍ରାଣୀ ସମ୍ପଦ ଓ ଦୁଗ୍ଧ ଉତ୍ପାଦନ ବିଭାଗ ସଚିବ ଅଳକା ଉପାଧ୍ୟାୟ, ଉପଦେଷ୍ଟା (ପରିସଂଖ୍ୟାନ) ଜଗତ ହଜାରିକା, ଆଇସିଏଆର-ଏନବିଏଜିଆର ନିର୍ଦ୍ଦେଶକ ଡକ୍ଟର ବି.ପି ମିଶ୍ର, ଓଡ଼ିଶା ସରକାରଙ୍କ ମତ୍ସ୍ୟପାଳନ, ପ୍ରାଣୀସମ୍ପଦ ଓ ଦୁଗ୍ଧ ଉତ୍ପାଦନ ବିଭାଗ ପ୍ରମୁଖ ଶାସନ ସଚିବ ସୁରେଶ କୁମାର ବଶିଷ୍ଠ, ପ୍ରାଣୀ ସମ୍ପଦ ଓ ପ୍ରାଣୀ ଚିକିତ୍ସା ନିର୍ଦ୍ଦେଶାଳୟର ନିର୍ଦ୍ଦେଶକ ରାମାଶିଷ ହାଜରା ପ୍ରମୁଖ ଉପସ୍ଥିତ ରହିବେ।

କାର୍ଯ୍ୟକ୍ରମରେ ଓଡ଼ିଶା, ପଶ୍ଚିମବଙ୍ଗ, ଛତିଶଗଡ଼, ଝାଡ଼ଖଣ୍ଡ ଓ ବିହାର କ୍ଷେତ୍ରରେ ବିଭିନ୍ନ କିସମର ଗୃହପାଳିତ ପ୍ରାଣୀଙ୍କ ଗଣନା ସମ୍ପର୍କରେ ତାଲିମ ଦିଆଯିବ। ଗୃହପାଳିତ ପ୍ରାଣୀଙ୍କ ଗଣନାର କେତେକ ବୈଷୟିକ ଦିଗ ଏବଂ ମୋବାଇଲ ଆପ୍ ଓ ଡ୍ୟାଶବୋର୍ଡର ଉପଯୋଗ ସମ୍ପର୍କରେ ମଧ୍ୟ ତାଲିମ ଦିଆଯିବ।

ଭୁବନେଶ୍ବର: ଓଡିଶା ଆସୁଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ତଥା କେନ୍ଦ୍ର ସ୍ବାସ୍ଥ୍ୟ ମନ୍ତ୍ରୀ ଜେପି ନଡ୍ଡା। ଓଡିଶା ରାଜ୍ୟ କାର୍ଯ୍ୟକାରିଣୀ ବୈଠକରେ ସେ ଯୋଗ ଦେବା ପାଇଁ ଓଡିଶା ଆସୁଛନ୍ତି। ଏ ନେଇ ରାଜ୍ୟ ବିଜେପି ତରଫରୁ ଏହି ସୂଚନା ଦିଆଯାଇଛି। ସେଥିରେ କୁହାଯାଇଛି ଯେ ଆସନ୍ତା ୧୯ ଏବଂ ୨୦ ତାରିଖରେ ପୁରୀରେ ରାଜ୍ୟ କାର୍ଯ୍ୟକାରିଣୀ ବୈଠକ ଅନୁଷ୍ଠିତ ହେବ। ସେଥିରେ ଶ୍ରୀ ନଡ୍ଡା ଯୋଗଦେବେ।

ପୁରୀର ବ୍ଲ ଲିଲି ହୋଟେଲରେ ଏହି ବୈଠକ କରାଯିବ ବୋଲି ନିଷ୍ପତି କରାଯାଇଛି। ଏଥିରେ ୧୯ ତାରିଖ ସକାଳ ୧୦ଟା ୩୦ରେ ପଦାଧିକାରୀ ବୈଠକ ହେବ। ଅପରାହ୍ନ ୨ଟା ୩୦ରେ କାର୍ଯ୍ୟକାରିଣୀ ବୈଠକ ଉଦଘାଟିତ ହେବ ଏବଂ ୨୦ ତାରିଖ ସନ୍ଧ୍ୟା ପର୍ଯ୍ୟନ୍ତ ଚାଲିବ।

ଏହି ବୈଠକରେ ରାଜ୍ୟର ସବୁ ନେତା ଉପସ୍ଥିତ ରହିବେ। ଏଥିରେ ଚଳିତ ବିଧାନସଭା ଏବଂ ଲୋକସଭା ନିର୍ବାଚନର ସଂଯୋଜକ, ଜିଲ୍ଲା ସାଧାରଣ ସଂପାଦକ, ସଭାପତି, ରାଜ୍ୟ କାର୍ଯ୍ୟକାରିଣୀ ସଦସ୍ୟ, ସମସ୍ତ ମୋର୍ଚ୍ଚା ସଭାପତି, ମୁଖ୍ୟମନ୍ତ୍ରୀ, ସବୁ ମନ୍ତ୍ରୀ, ସାଂସଦ ବିଧାୟକ, କେନ୍ଦ୍ର ମନ୍ତ୍ରୀ ଉପସ୍ଥିତ ରହିବେ ବୋଲି କୁହାଯାଇଛି। ରାଜ୍ୟରେ ବିଜେପି ସରକାର ଗଠନ କରିବା ପରେ ଏହା ହେଉଛି ପ୍ରଥମ କାର୍ଯ୍ୟକାରିଣୀ ବୈଠକ।

ଭୁବନେଶ୍ଵର: ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଶନିବାର ଉପ-ମୁଖ୍ୟମନ୍ତ୍ରୀ ପ୍ରଭାତୀ ପରିଡା, ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ଓ ସଂସ୍କୃତି ମନ୍ତ୍ରୀ ସୂର୍ଯ୍ୟବଂଶୀ ସୂରଜଙ୍କୁ ଆଜି ଠାରୁ ପୁରୀ ଯାଇ ରଥଯାତ୍ରାର ଅବଶିଷ୍ଟ ରୀତିନୀତି ନିରୀକ୍ଷଣ କରିବାକୁ ନିର୍ଦ୍ଦେଶ ଦେଇଛନ୍ତି। ନିଳାଦ୍ରୀ ବିଜେ ସରିବା ପର୍ଯ୍ୟନ୍ତ ପୁରୀ ଠାରେ ସକ୍ରିୟ ଭାବେ ଉପସ୍ଥିତ ରହି ଅବଶିଷ୍ଟ ରୀତିନୀତି ଯେପରି ସୁବ୍ୟବସ୍ଥିତ ଓ ଶୃଙ୍ଖଳିତ ଭାବେ ଅନୁଷ୍ଠିତ ହେବ ଏବଂ ଶ୍ରଦ୍ଧାଳୁଙ୍କ କୌଣସି ଅସୁବିଧା ନହେବ ତାହା ସୁନିଶ୍ଚିତ କରିବାକୁ ମୁଖ୍ୟମନ୍ତ୍ରୀ ଶ୍ରୀ ମାଝୀ ପରାମର୍ଶ ଦେଇଛନ୍ତି।

ପୁରୀ: ବିଭିନ୍ନ କ୍ଷେତ୍ରର ସମସ୍ତ ହିତାଧିକାରୀଙ୍କ ମଧ୍ୟରେ ଦାୟିତ୍ୱପୂର୍ଣ ପର୍ଯ୍ୟଟନ ତଥା ବନ୍ୟଜନ୍ତୁ ସଂରକ୍ଷଣକୁ ପ୍ରୋତ୍ସାହିତ କରିବା ପାଇଁ ପୁରୀ ସମୁଦ୍ର ବେଳାଭୂମିରେ ଉଦ୍ଘାଟନ ହେଲା ବିଚ୍ ପାଭିଲିୟନ୍। ଜୁଲାଇ ମାସ ୨୦୨୪, ମହାପ୍ରଭୁ ଜଗନ୍ନାଥଙ୍କ ପବିତ୍ର ରଥଯାତ୍ରାରୁ ବାହୁଡା ଯାତ୍ରା ପର୍ଯନ୍ତ ଏହି ସଚେତନତା ଅଭିଯାନ ଜାରିରହିବ।

ଓଡ଼ିଶାର ୪୮୦ କିମି ସୁଦୀର୍ଘ ସୁନ୍ଦର ବେଳାଭୂମି, ପର୍ଯ୍ୟଟନ ପାଇଁ ସାରା ବିଶ୍ବରେ ପରିଚିତ। ସାରା ବିଶ୍ଵରୁ ବିଲୁପ୍ତ ପ୍ରାୟ ଅଲିଭ୍ ରିଡଲେ କଇଁଛମାନଙ୍କ ମଧ୍ୟରୁ ଏକ ବୃହତମ ଅଂଶ ପ୍ରତିବର୍ଷ ପ୍ରଜନନ ପାଇଁ ଏହି ବେଳାଭୂମିକୁ ଆସନ୍ତି ହେଲେ ପାଟ୍ରୋଲିଂ ଅଭାବ, ଅବହେଳା ଏବଂ ଅସୁରକ୍ଷିତ ଉପକୂଳ ବେଳାଭୂମି ପାଇଁ ପ୍ରତିବର୍ଷ ହଜାର ହଜାର ଅଲିଭ୍ ରିଡଲେ କଇଁଛ ମୃତ୍ୟୁବରଣ କରନ୍ତି। ଭବିଷ୍ୟତ ପିଢୀ ପାଇଁ ଅଲିଭ୍ ରିଡଲେ କଇଁଛମାନଙ୍କୁ ସୁରକ୍ଷା ଦେବା ପାଇଁ ଇମାଜେରୀର ପ୍ରତିଷ୍ଠାତା ତଥା ପ୍ରମୋଟର କିର୍ତ୍ତିକିଶୋର ମହାରଣା ଦ୍ୱାରା ଏହି ଅଭିଯାନ ଆରମ୍ଭ ହୋଇଛି।

ଏହି କାର୍ଯକ୍ରମରେ ଅବସରପ୍ରାପ୍ତ ଆଇଏଫଏସ ସିସିଏଫ ଓଡିଶା ଡକ୍ଟର ଅରୁଣ କୁମାର ମିଶ୍ର, ଜି ସାର୍ଥକର ଚିଫ୍ ଚ୍ୟାନେଲ ଅଫିସର ପ୍ରତୀକ ସିଲ୍, ଅଶୋକ ରାଉତ, ଦେବାଶିଷ ପଟ୍ଟନାୟକ, ବିଶ୍ୱ ରଂଜନ ବରାଳ, କୀର୍ତ୍ତନାଥ ତ୍ରିପାଠୀଙ୍କ ସହିତ ବହୁ ମାନ୍ୟଗଣ୍ୟ ବ୍ୟକ୍ତି ଯୋଗ ଦେଇଥିଲେ।

କିର୍ତ୍ତିକିଶୋର ମହାରଣା ଏହି ଅଭିଯାନର ଉଦ୍ଦେଶ୍ୟ ଏବଂ କାର୍ଯ୍ୟକାରିତା ସମ୍ପର୍କରେ ଆଲୋକପାତ କରିଥିଲେ। ସେ କହିଥିଲେ ଯେ ଅଲିଭ୍ ରିଡଲେ କଇଁଛକୁ ସୁରକ୍ଷା ଦେବାର ସମୟ ଆସିଛି। ଏହି ସଚେତନତା, ଭବିଷ୍ୟତ ପିଢୀ ପାଇଁ କଇଁଛ ସଂରକ୍ଷଣର ଏକ ମାର୍ଗ ପ୍ରସ୍ତୁତ କରିବାରେ ସାହାଯ୍ୟ କରିବା ସହ ପରିଷ୍କାର ବେଳାଭୂମି ସେମାନଙ୍କ ବସା ପାଇଁ କଇଁଛମାନଙ୍କୁ ଆକର୍ଷିତ କରିବ। ସେମାନଙ୍କର ପ୍ରଜନନ ସମୟରେ ପାଟ୍ରୋଲିଂ କରିବା ଆମର ଦ୍ଵାୟିତ୍ଵ ଯାହା ଆମର ଭବିଷ୍ୟତକୁ ସୁନ୍ଦର କରିବାରେ ସାହାଯ୍ୟ କରିବ।

ଡକ୍ଟର ଅରୁଣ କୁମାର ମିଶ୍ର ଏହି କାର୍ଯକ୍ରମକୁ ସମର୍ଥନ କରିବା ସହ ଆଗକୁ ଏହାର ଉନ୍ନତି ପାଇଁ ପ୍ରତିଶ୍ରୁତି ଦେଇଥିଲେ ଏବଂ ଓଡିଶା ଉପକୂଳରେ ସମୁଦ୍ର କଇଁଛମାନଙ୍କର ବସା ବାନ୍ଧିବାରେ ସେ ସମସ୍ତ ପ୍ରକାର ଚେଷ୍ଟା ଜାରି ରଖିବେ ବୋଲି କହିଥିଲେ।

ଦେବାଶିଷ ପଟ୍ଟନାୟକ କହିଥିଲେ ଯେ ଏହା ଅଲିଭ୍ ରିଡଲେ କଇଁଛକୁ ସୁରକ୍ଷା ଦେବା ସହ ସୁନ୍ଦର ବେଳାଭୂମି ଗଢି ତୋଳିବାର ଏହି କାର୍ଯକ୍ରମ ହେଉଛି ଏକ ଅନନ୍ୟ ଉଦାହରଣ। ମୁଁ ଏହି ଅଭିଯାନର ସଫଳତା ପାଇନ ମୋର ପ୍ରୟାସ ସବୁବେଳେ ଜାରି ରଖିବି।

ଜି ସାର୍ଥକର ଚିଫ୍ ଚ୍ୟାନେଲ ଅଫିସର ପ୍ରତୀକ ସିଲ୍ କହିଥିଲେ ଯେ “ଏହି ବ୍ୟାପକ ପ୍ରୟାସର ଅଂଶ ହୋଇ ଆମେ ବହୁତ ଆନନ୍ଦିତ ଏବଂ ଗର୍ବିତ। ଏହି ଆନନ୍ଦକୁ ଆମର ସମସ୍ତ ଦର୍ଶକଙ୍କ ସହ ମଧ୍ୟ ବାଣ୍ଟିବାକୁ ଯାଉଛୁ। ପରିବେଶ ସୁରକ୍ଷା ପାଇଁ ଏହିପରି ମହତ୍ୱପୂର୍ଣ ଓ ପ୍ରଭାବଶାଳୀ ବାର୍ତ୍ତା, ଆମ ପାଇଁ ସବୁ ବେଳେ ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଓ ଆମେ ଏଥି ପ୍ରତି ସବୁବେଳେ ଧ୍ୟାନ ଦେଇଥାଉ।”

ଏହି ଅଭିଯାନ ଉପରେ ସୂଚନା ଦେଇ ବାଲାଜୀ ସିଂ ଆର, ସିଓଓ – ଏୟାରଟେଲ ଓଡିଶା କହିଛନ୍ତି, “ଏହି ପଦକ୍ଷେପର ଅଂଶ ହୋଇଥିବାରୁ ମୁଁ ବହୁତ ଖୁସି ଏବଂ କୃତଜ୍ଞ। ଏହା ଅଲିଭ୍ ରିଡଲେ କଇଁଛର ବାସସ୍ଥାନ ସଂରକ୍ଷଣ କରିବାରେ ଓ ସୁନ୍ଦର ପରିବେଶ ସହ ଅନୁକୂଳ ପର୍ଯ୍ୟଟନକୁ ପ୍ରୋତ୍ସାହିତ କରିବାରେ ନିଶ୍ଚୟ ସାହାଯ୍ୟ କରିବ। ଆମେ ଏହି ସାମାଜିକ ସଚେତନତା ଅଭିଯାନକୁ ଆହୁରି ବ୍ୟାପକ କରିବାରେ ସାହାଯ୍ୟ କରିବୁ। ଏୟାରଟେଲ ସବୁବେଳେ ପର୍ଯ୍ୟଟକମାନଙ୍କୁ ଓଡିଶାର ସମସ୍ତ ପର୍ଯ୍ୟଟନସ୍ଥଳୀରେ ନିରବଚ୍ଛିନ୍ନ ନେଟୱାର୍କ ଯୋଗାଇ, ରାଜ୍ୟ ପର୍ଯ୍ୟଟନ ବୃଦ୍ଧିକୁ ସାହାଯ୍ୟ କରିଥାଏ।”