Tag: ପ୍ରଦୀପ ମାଝି

ଭୁବନେଶ୍ବର: ବହୁ କଳ୍ପନାଜଳ୍ପନା ପରେ ଶେଷରେ କଂଗ୍ରେସ ଛାଡିଲେ ବରିଷ୍ଠ ନେତା ତଥା ଦଳର କାର୍ଯ୍ୟକାରୀ ସଭାପତି ପ୍ରଦୀପ ମାଝି। ଆଜି ସେ ଏଆଇସିସିର ସଭାପତି ସୋନିଆ ଗାନ୍ଧୀଙ୍କୁ ଚିଠି ଲେଖି ହାତ ଛାଡିଲେ ବୋଲି ଜଣାଇଛନ୍ତି। ଏଥିରେ ସେ ଉଲ୍ଲେଖ କରିଛନ୍ତି ଯେ, ବହୁ ଦୁଃଖ ଏବଂ କଷ୍ଟରେ କଂଗ୍ରେସ ଛାଡୁଛନ୍ତି। କଂଗ୍ରେସର ପ୍ରାଥମିକ ସଭ୍ୟ ପଦରୁ ଇସ୍ତଫା ଦେଲି ବୋଲି ସେ ଚିଠିରେ ଉଲ୍ଲେଖ କରିଛନ୍ତି।

ଏହି ଇସ୍ତଫା ପତ୍ରରେ ଆହୁରି କହିଛନ୍ତି ଯେ, ସେ କଂଗ୍ରେସରେ ଯେଉଁ ପଦବୀରେ ରହିବା କଥା ତାହା ତାଙ୍କୁ ମିଳିଛି। ସେ କଂଗ୍ରେସରେ ରହି ବେଶ୍ ଭଲ ଅନୁଭବ କରିଛନ୍ତି। ହେଲେ ଲୋକମାନଙ୍କୁ ସେବା କରିବା ପାଇଁ ଯାହା ଆବଶ୍ୟକ ତାହା ଦଳରେ ଅଭାବ ରହିଥିବାର ମୁଁ ଅନୁଭବ କଲି। ସେଥିପାଇଁ ଅଧିକ ଜନସେବାରେ ନିଜକୁ ନିୟୋଜିତ କରିବା ପାଇଁ ଦଳର ପ୍ରାଥମିକ ସଭ୍ୟପଦରୁ ଇସ୍ତଫା ଦେଲି ବୋଲି ସେ ଚିଠିରେ ଲେଖିଛନ୍ତି।

ଏହି ଉସ୍ତଫା ପତ୍ର ସେ ସୋନିଆ ଗାନ୍ଧୀଙ୍କୁ ଦେବା ସହିତ ଗୋଟିଏ ଗୋଟିଏ କପି ରାହୁଳ ଗାନ୍ଧୀ, ଓଡିଶା କଂଗ୍ରେସ ପ୍ରଭାରୀ ଚେଲ୍ଲା କୁମାର, ପ୍ରଦେଶ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକ ଏବଂ ଏଆଇସିସି ସାଧାରଣ ସଂପାଦକ ରୁଦ୍ର ରାଜୁଙ୍କୁ ମଧ୍ୟ ପ୍ରଦାନ କରିଛନ୍ତି।

ପ୍ରଦୀପ ମାଝି ପ୍ରଦେଶ କଂଗ୍ରେସର କାର୍ଯ୍ୟକାରୀ ସଭାପତି ଥିଲେ। ସେ ନବରଂଗପୁର ନିର୍ବାଚନ ମଣ୍ଡଳୀରୁ କଂଗ୍ରେସ ସାଂସଦ ଥିଲେ। ରାଜ୍ୟ କଂଗ୍ରେସର ସେ ଜଣେ ଟାଣୁଆ ନେତା ଭାବରେ ବେଶ୍ ପରିଚିତ। ସେ ସିଧା ରାହୁଳ ଗାନ୍ଧୀ ଏବଂ ସୋନିଆ ଗାନ୍ଧୀଙ୍କ ସଂପର୍କରେ ଥିଲେ। ହେଲେ ରାଜ୍ୟ କଂଗ୍ରେସ ତଥା ନବରଂଗପୁର କଂଗ୍ରେସ ଉପରେ ପ୍ରଦୀପ ଖପ୍ପା ଥିଲେ। ସେଥିପାଇଁ ସେ ଦଳ ଛାଡିବେ ବୋଲି ପୂର୍ବରୁ ଚର୍ଚ୍ଚା ଚାଲିଥିଲା।

କଂଗ୍ରେସ ଛାଡିବା ପୂର୍ବରୁ ପ୍ରଦୀପ ମାଝି ବିଜେଡିର ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସଙ୍କ ସହିତ ଦୁଇଥର ସାକ୍ଷାତ କରିଛନ୍ତି। ବର୍ତ୍ତମାନ କଂଗ୍ରେସରୁ ଇସ୍ତଫା ଦେବା ପରେ ସେ ବିଜେଡିରେ ମିଶିବା ନିଶ୍ଚିତ ହୋଇଛି।

ଭୁବନେଶ୍ବର: ବର୍ତ୍ତମାନ ମଝି ନଈରେ ଭାସୁଛନ୍ତି କଂଗ୍ରେସ ନେତା ପ୍ରଦୀପ ମାଝି। ସକାଳେ ଶୁଭୁଛି କଂଗ୍ରେସ ଛାଡିବେ, ପୁଣି ସଂଧ୍ୟାରେ ଶୁଭୁଛି ନାଇଁ ଛାଡିବେ ନାହିଁ। କେତେବେଳେ କୁହାଯାଉଛି ବିଜେଡି ଯିବେ, କେତେବେଳେ ବିଜେପି। ଏସବୁ ଦୋଛକି ଭିତରେ ବର୍ତ୍ତମାନ ଘାଣ୍ଟି ହେବାରେ ଲାଗିଛନ୍ତି ଏହି ପୂର୍ବତନ ସାଂସଦ ପ୍ରଦୀପ ମାଝି।

ନିକଟରେ ସେ ନୂଆଦିଲ୍ଲୀରେ ରାହୁଳ ଗାନ୍ଧୀଙ୍କୁ ସାକ୍ଷାତ କରିଛନ୍ତି। ପ୍ରଦୀପ କଂଗ୍ରେସ ଛାଡିବା ନେଇ କୁଆଡେ ରାହୁଳ ଗାନ୍ଧୀଙ୍କ ପାଖରେ ଖବର ପହଞ୍ଚିଲା। ସେଥିପାଇଁ ରାହୁଳ ତାଙ୍କୁ ଡାକି ଆଲୋଚନା କଲେ। ଶୁଣାଗଲା ଯେ, ତାଙ୍କୁ ରାହୁଳ ଗାନ୍ଧୀ ରାଜସ୍ଥାନରୁ ରାଜ୍ୟସଭାକୁ ପଠାଇବେ। ସେଥିପାଇଁ ସେ ଆଉ କଂଗ୍ରେସ ଛାଡିବେ ନାହିଁ। ହେଲେ ଏହା କିଛି ଦିନର ନିରବତା ପରେ ପୁଣି ଉଠିଲା ନା ପ୍ରଦୀପ କଂଗ୍ରେସ ଛାଡିବେ।

ରାହୁଳ ଗାନ୍ଧୀଙ୍କୁ ସାକ୍ଷାତ କରି ଆସିବାର କିଛି ଦିନ ପରେ ପ୍ରଦୀପ କୁଆଡେ ବିଜେଡି ସାଂଗଠାନିକ ସଂପାଦକ ପ୍ରଣବ ପ୍ରକାଶ ଦାସଙ୍କୁ ପୁଣି ଭେଟିଛନ୍ତି। ଏହି ଗୁପ୍ତ ଆଲୋଚନା ପରେ ପୁଣିଥରେ ପ୍ରଦୀପ କୁଆଡେ ମନ ପରିବର୍ତ୍ତନ କରିଛନ୍ତି। ବିଜେଡିରୁ ରାଜ୍ୟ ସଭାକୁ ଯିବେ ବୋଲି ତାଙ୍କୁ ପ୍ରତିଶୃତି ଦିଆଯାଇଛି। ଫଳରେ ସେ କଂଗ୍ରେସ ଛାଡି ବିଜେଡିରେ ଯୋଗଦେବେ ବୋଲି ପୁଣି ଆରମ୍ଭ ହେଲା ଚର୍ଚ୍ଚା।

ଥରେ ନୁହେଁ, ବହୁଥର ପ୍ରଣବଙ୍କୁ ଭେଟିଛନ୍ତି ପ୍ରଦୀପ। ସେ ବିଜେଡିରେ ଯୋଗ ଦେବା ଏକ ପ୍ରକାରର ନିଶ୍ଚିତ ବୋଲି ଜଣାପଡିଥିଲା। ଯାହାଫଳରେ ପ୍ରଦୀପଙ୍କ ମିଶ୍ରଣକୁ ନେଇ ନବରଂଗପୁର ବିଜେଡିରେ ଅସନ୍ତୋଷ ବୃଦ୍ଧି ପାଇଲା। ହେଲେ ସେସବୁକୁ ପ୍ରଣବ ମ୍ୟାନେଜ କଲେ। ସେମାନଙ୍କ ମିଶ୍ରଣ ପର୍ବ କେବେ ହେବ ତାହା ମଧ୍ୟ କୁଆଡେ ନିର୍ଦ୍ଧାରିତ ହେଲା। ହେଲେ ହଠାତ କଣ ହେଲା କେଜାଣି ସେଥିରେ ଭଟ୍ଟା ପଡିଲା।

ତେବେ ଏଠାରେ ସାଧାରଣରେ ପ୍ରଶ୍ନ ଉଠୁଛି ଯେ, ପ୍ରଦୀପ କଂଗ୍ରେସ ଛାଡିବା ପାଇଁ କାହିଁକି ଚାହୁଛନ୍ତି। ତାହାର କାରଣରେ ଏତିକି କୁହାଯିବ ଯେ, ସେ ଦୀର୍ଘ ବର୍ଷ ଧରି ପଦପଦବୀରୁ ଦୂରେଇ ରହିଲେଣି। କଂଗ୍ରେସ ଅବସ୍ଥା ଯାହା ସେଥିରେ ସଂଗଠନକୁ ବଞ୍ଚାଇ ରଖିବା ପାଇଁ ଯେଉଁ ଅର୍ଥର ଆବଶ୍ୟକ ତାହା ନାହିଁ। ପଦପଦବୀ ନ ଥିବାରୁ ପ୍ରଦୀପ ନିଜେ ମଧ୍ୟ ନିଜର ସଂଗଠନ ଚଳାଇବା ପାଇଁ ଅକ୍ଷମ ହୋଇପଡିଲେଣି। ବର୍ତ୍ତମାନ ପରିସ୍ଥିତିରେ କର୍ମିମାନଙ୍କୁ ବାନ୍ଧି ରଖିବା ତାଙ୍କ ପାଇଁ କାଠିକର ପାଠ ହୋଇ ପଡିଛି। ସେଥିପାଇଁ ସେ ଏକ ବିକଳ୍ପ ରାସ୍ତା ବାଛିବାକୁ ଚିନ୍ତା କରୁଛନ୍ତି ବୋଲି ଅନୁମାନ କରାଯାଇଛି।

ତେବେ ଏହି ବିକଳ୍ପରେ ତାଙ୍କୁ ବାଧା ଦେଉଛି କଂଗ୍ରେସ ସହିତ ଥିବା ତାଙ୍କର ରକ୍ତ ସଂପର୍କ। ରାହୁଳ ଗାନ୍ଧୀ ସୋନିଆ ଗାନ୍ଧୀଙ୍କ ସହ ଜାତୀୟ କଂଗ୍ରେସର ବରିଷ୍ଠ ନେତାଙ୍କ ସହିତ ପ୍ରଦୀପଙ୍କ ଭଲ ସଂପର୍କ। ସେମାନଙ୍କରେ କଳାଦାଗ ଲଗାଇବା ପାଇଁ ସେ ଚାହୁଁ ନାହାଁନ୍ତି। ତାଙ୍କର ବାପା ଅବଶ୍ୟ ବିଜୁବାବୁଙ୍କ ସାଥୀରେ ଥିଲେ। ହେଲେ ସେ ନିଜେ ପୁରା ଖାଣ୍ଟି କଂଗ୍ରେସିଆ ଭାବେ ପରିଚୟ ସୃଷ୍ଟି କରିଛନ୍ତି।

ହେଲେ ସେ ଅନୁଭବ କରିସାରିଲେଣି ଯେ, ନିଜର ସଂଗଠନ ବଞ୍ଚିଲେ ତାଙ୍କ ରାଜନୀତି ବଞ୍ଚିବ। ନଚେତ ସେ ମୈଦାନରୁ କୁଆଡେ ହଜିଯିବେ। ଆଉ ସେଥିପାଇଁ ଆବଶ୍ୟକ ଅର୍ଥ। ସେହି ଦୃଷ୍ଟିରୁ ପ୍ରଦୀପ ବିଜେଡିରୁ ରାଜ୍ୟସଭା ଯାଇ ନିଜ ରାଜନୈତିକ ଭବିଷ୍ୟତକୁ ସୁଦୃଢ କରିବା ପାଇଁ ଚାହୁଁଛନ୍ତି।