ସୀତାରାମ ଅଗ୍ରୱାଲ
ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ବ୍ଲକ ଅଧିନସ୍ଥ ନୀଳାଦ୍ରି ପ୍ରସାଦ ଗ୍ରାମ ପଞ୍ଚାୟତ ପଡିଆ ଠାରେ ଆଜି ଅପରାହ୍ନରେ ଚାଷୀ ମୂଲିଆ ସଂଘ ତରଫରୁ ଏକ ବିରାଟ ଜନ ସମାବେଶର ଆୟୋଜନ କରାଯାଇଥିଲା। ମାଆ ବିରଜାଇ ଠକୁରାଣୀଙ୍କ ମନ୍ଦିର ଠାରୁ ଶହ ଶହ ଆଦିବାସୀ ପୁରୁଷ ଓ ମହିଳାଙ୍କର ଏକ ବିଶାଳ ଶୋଭାଯାତ୍ରା ବାହାରି ପ୍ରାୟ ୫ କିଲୋମିଟର ଆସି ସଭାସ୍ଥଳରେ ପହଞ୍ଚିଥିଲେ। ପଦଯାତ୍ରାରେ ଆଦିବାସୀମାନେ ଲାଲ ପତାକା ପ୍ରଦର୍ଶନ କରି ବିଭିନ୍ନ ପ୍ରକାର ଧ୍ଵନି ଦେଇ ପହଁଚିଲା ପରେ ସଭା ସ୍ଥଳରେ ପାରମ୍ପରିକ ନାଚ ଗୀତରେ କେନ୍ଦ୍ର ସରକାରଙ୍କୁ ତାତ୍ସଲ୍ୟ କରିଥିଲେ। ଉକ୍ତ ସମାବେଶରେ ମୁଖ୍ୟତଃ ଜଳ, ଜମି, ଜଙ୍ଗଲ ସୁରକ୍ଷା ଓ ଅଧିକାର ତଥା ବନବିଭାଗର କାଠ ମାଫିଆମାନଙ୍କ ସଲସୁତୁରାରେ ଜଙ୍ଗଲ ଲୁଟ କରି ନିରୀହ ଆଦିବାସୀ ମାନଙ୍କ ନାମରେ ମିଥ୍ୟା କାଠ ଚୋରି ଅପରାଧରେ ଗିରଫ କରିବାକୁ ବିରୋଧ କରାଯାଇଥିଲା।
ଉକ୍ତ ସମାବେଶକୁ ବାଣପୁର ବ୍ଲକର ଆବାହକ ରମେଶ ଶବର, ଦେବରାଜ ଶବର, ସୁରେନ୍ଦ୍ର ଶବର ତଥା ମାନବ ଅଧିକାର ସୁରକ୍ଷା ମଞ୍ଚର ଆବାହକ ଆଡଭୋକେଟ ଅବନୀ ଗୟା, ରାଜ୍ୟ ସଭାପତି ଗଗନ ମଲ୍ଲିକ ଓ ରାଜ୍ୟ କମିଟି ସଭ୍ୟ ନିରାକାର ନାୟକ, ମୋହନ ନାଇଡୁ, ବାସୁଦେବ ଦାସଙ୍କ ଉପସ୍ଥିତିରେ ଆଦିବାସୀ ମାନେ ସେମାନଙ୍କ ଅଧିକାର ପାଇବା ପାଇଁ ଦାବି କରିଥିଲେ।
ଉପସ୍ଥିତ ରାଜ୍ୟ ଓ ଜିଲ୍ଲା ସ୍ଥରୀୟ କର୍ମକର୍ତ୍ତା ନିଜ ଅଭିଭାଷଣରେ ବ୍ରିଟିଶ ଶାସନ ସମୟରେ ଯେଉଁଭଳି ଭାବେ ଆଦିବାସୀ ମାନେ ନିର୍ଯ୍ୟାତିତ ହେଉଥିଲେ ଆଜି ମଧ୍ୟ ସେହିଭଳି ଭାବରେ ନିର୍ଯ୍ୟାତିତ ହେଉଛନ୍ତି। କେନ୍ଦ୍ର ସରକାରଙ୍କ ଦ୍ଵାରା ୨୦୦୬ ମସିହାରେ ଜଙ୍ଗଲ ସୁରକ୍ଷା ଆଇନ ଲାଗୁ ହେଲାପରେ ମଧ୍ୟ ଆଜିକା ଦିନରେ ସେମାନଙ୍କର ଅଧିକାର ପାଇ ପାରୁନାହାନ୍ତି।
ସରକାର ଚଂଚକତା କରି ମୁଷ୍ଟିମେୟ ଆଦିବାସୀଙ୍କୁ ହାତବାରିସୀ କରିଥିବା ବେଳେ ମୂଳ ଆଦିବାସୀ ମାନେ ସେଥିରୁ ବଞ୍ଚିତ ହେଇଛନ୍ତି। ଆଦିବାସୀ ମାନେ ବିଭିନ୍ନ ନାଚ ଗୀତ ମାଧ୍ୟମରେ କେନ୍ଦ୍ର ସରକାର ଏହାର ତୁରନ୍ତ ପଦକ୍ଷେପ ନେବାକୁ ଦର୍ଶାଇଛନ୍ତି। ସରକାର ପୁଞ୍ଜିପତି ମାନଙ୍କୁ ଜମି ବିକ୍ରୀ କରି ନିଜର ରାଜକୋଷ ବଢ଼ାଉଥିବାର ଅଭିଯୋଗ କରି କେନ୍ଦ୍ର ସରକାରଙ୍କୁ ସତର୍କ କରାଇଛନ୍ତି କି ଯଦି ଆଦିବାସୀ ମାନଙ୍କ ନାର୍ଯ୍ଯ ଅଧିକାର ଓ ଦାବି ପୂରଣ ନହୁଏ ଆଗାମୀ ଦିନରେ ଆଦିବାସୀ ମାନେ ଲାଲ ପତାକା ଧରି ରାଜରାସ୍ତାକୁ ଓହ୍ଲାଇବା ସହ ରାସ୍ତାରୋକ ଓ ସମସ୍ତ ଅଫିସ୍ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବାକୁ ଚାଷୀ ମୂଲିଆ ସଂଘର କର୍ମକର୍ତ୍ତା ଚେତାବନୀ ଦେଇଛନ୍ତି।