The Samikhsya Odia
ନୂଆଦିଲ୍ଲୀ: ଶେଷରେ ମୁଖ୍ୟମନ୍ତ୍ରୀ ନିବାସକୁ ପ୍ରବେଶ କରିଛ କରୋନା ଭାଇରସ। ଆଜି ରାଜସ୍ଥାନର ମୁଖ୍ୟମନ୍ତ୍ରୀ ଅଶୋକ ଗେହେଲଟ କରୋନା ପଜେଟିଭ ଚିହ୍ନଟ ହୋଇଛନ୍ତି। ତାଙ୍କ ଦେହରେ ସାମାନ୍ୟ ଲକ୍ଷଣ ପ୍ରକାଶ ପାଇବାରୁ ସେ ନମୂନା ପରୀକ୍ଷା କରାଇଥିଲେ। ପରୀକ୍ଷା ପରେ ତାହା ପଜେଟିଭ ବୋଲି ଜଣାପଡିଛି।
ଏ ନେଇ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ତରଫରୁ ସୂଚନା ପ୍ରଦାନ କରାଯାଇଛି। ଏଥିରେ କୁହାଯାଇଛି ଯେ, ମୁଖ୍ୟମନ୍ତ୍ରୀ ସାମାନ୍ୟ ଲକ୍ଷଣ ଥିବା କରୋନା ଆକ୍ରାନ୍ତ ହୋଇଛନ୍ତି। ସେ ବର୍ତ୍ତମାନ ଘରେ ବିଶ୍ରାମ କରୁଛନ୍ତି।
ନୂଆଦିଲ୍ଲୀ: ରାଜସ୍ଥାନର ଶିକ୍ଷା ମନ୍ତ୍ରୀ ଏକ ବିବାଦିତ ବୟାନ ଦେଇଛନ୍ତି। ଯେଉଁ ବିଦ୍ୟାଳୟରେ ମହିଳା କର୍ମଚାରୀ ଅଧିକ ଥାଆନ୍ତି, ସେଠାରେ ଅଧିକ ଝଗଡା ହୁଏ ବୋଲି ସେ କହିଛନ୍ତି। ଯାହା ଫଳରେ ପ୍ରଧାନ ଶିକ୍ଷୟିତ୍ରୀଙ୍କୁ ‘ସରିଡନ୍’ (ମୁଣ୍ଡବିନ୍ଧାର ଔଷଧ) ଲଗାଇବାକୁ ପଡୁଛି। ଅନ୍ତର୍ଜାତୀୟ ବାଳିକା ଦିବସ ଅବସରରେ ଜୟପୁରରେ ଆୟୋଜିତ ଏକ କାର୍ଯ୍ୟକ୍ରମରେ ଏଭଳି ଏକ ଅଜବ ବୟାନ ଦେଇଛନ୍ତି ଶିକ୍ଷାମନ୍ତ୍ରୀ।
ରାଜସ୍ଥାନର ଶିକ୍ଷା ମନ୍ତ୍ରୀ ହେବା ସହ ରାଜସ୍ଥାନ ପ୍ରଦେଶ କଂଗ୍ରେସ କମିଟିର ସଭାପତି ଭାବେ ଗୋବିନ୍ଦ ସିଂ ଦାୟିତ୍ୱ ତୁଲାଉଛନ୍ତି। ଦୋତସାରାରେ ସେ କହିଛନ୍ତି ଯେ, ରାଜସ୍ଥାନ ସରକାର ସର୍ବଦା ମହିଳାଙ୍କ ସୁରକ୍ଷା ଏବଂ ଆରାମର ଯତ୍ନ ନେଉଛନ୍ତି। କିନ୍ତୁ ମହିଳା କର୍ମଚାରୀଙ୍କ ପରସ୍ପର ମଧ୍ୟରେ ଝଗଡା ହେବାର କିଛି ଅଭିଯୋଗ ଆସୁଛି। ଯଦି ଆପଣମାନେ ଏହି ଛୋଟ ଛୋଟ ଜିନିଷଗୁଡ଼ିକୁ ଠିକ୍ କରିପାରିବେ, ତେବେ ଆପଣମାନେ ସବୁବେଳେ ପୁରୁଷଙ୍କଠାରୁ ଆଗରେ ରହିବେ ବୋଲି ଶିକ୍ଷାମନ୍ତ୍ରୀ କହିଛନ୍ତି।
ଭୁବନେଶ୍ବର: ବର୍ତ୍ତମାନ ମଝି ନଈରେ ଭାସୁଛନ୍ତି କଂଗ୍ରେସ ନେତା ପ୍ରଦୀପ ମାଝି। ସକାଳେ ଶୁଭୁଛି କଂଗ୍ରେସ ଛାଡିବେ, ପୁଣି ସଂଧ୍ୟାରେ ଶୁଭୁଛି ନାଇଁ ଛାଡିବେ ନାହିଁ। କେତେବେଳେ କୁହାଯାଉଛି ବିଜେଡି ଯିବେ, କେତେବେଳେ ବିଜେପି। ଏସବୁ ଦୋଛକି ଭିତରେ ବର୍ତ୍ତମାନ ଘାଣ୍ଟି ହେବାରେ ଲାଗିଛନ୍ତି ଏହି ପୂର୍ବତନ ସାଂସଦ ପ୍ରଦୀପ ମାଝି।
ନିକଟରେ ସେ ନୂଆଦିଲ୍ଲୀରେ ରାହୁଳ ଗାନ୍ଧୀଙ୍କୁ ସାକ୍ଷାତ କରିଛନ୍ତି। ପ୍ରଦୀପ କଂଗ୍ରେସ ଛାଡିବା ନେଇ କୁଆଡେ ରାହୁଳ ଗାନ୍ଧୀଙ୍କ ପାଖରେ ଖବର ପହଞ୍ଚିଲା। ସେଥିପାଇଁ ରାହୁଳ ତାଙ୍କୁ ଡାକି ଆଲୋଚନା କଲେ। ଶୁଣାଗଲା ଯେ, ତାଙ୍କୁ ରାହୁଳ ଗାନ୍ଧୀ ରାଜସ୍ଥାନରୁ ରାଜ୍ୟସଭାକୁ ପଠାଇବେ। ସେଥିପାଇଁ ସେ ଆଉ କଂଗ୍ରେସ ଛାଡିବେ ନାହିଁ। ହେଲେ ଏହା କିଛି ଦିନର ନିରବତା ପରେ ପୁଣି ଉଠିଲା ନା ପ୍ରଦୀପ କଂଗ୍ରେସ ଛାଡିବେ।
ରାହୁଳ ଗାନ୍ଧୀଙ୍କୁ ସାକ୍ଷାତ କରି ଆସିବାର କିଛି ଦିନ ପରେ ପ୍ରଦୀପ କୁଆଡେ ବିଜେଡି ସାଂଗଠାନିକ ସଂପାଦକ ପ୍ରଣବ ପ୍ରକାଶ ଦାସଙ୍କୁ ପୁଣି ଭେଟିଛନ୍ତି। ଏହି ଗୁପ୍ତ ଆଲୋଚନା ପରେ ପୁଣିଥରେ ପ୍ରଦୀପ କୁଆଡେ ମନ ପରିବର୍ତ୍ତନ କରିଛନ୍ତି। ବିଜେଡିରୁ ରାଜ୍ୟ ସଭାକୁ ଯିବେ ବୋଲି ତାଙ୍କୁ ପ୍ରତିଶୃତି ଦିଆଯାଇଛି। ଫଳରେ ସେ କଂଗ୍ରେସ ଛାଡି ବିଜେଡିରେ ଯୋଗଦେବେ ବୋଲି ପୁଣି ଆରମ୍ଭ ହେଲା ଚର୍ଚ୍ଚା।
ଥରେ ନୁହେଁ, ବହୁଥର ପ୍ରଣବଙ୍କୁ ଭେଟିଛନ୍ତି ପ୍ରଦୀପ। ସେ ବିଜେଡିରେ ଯୋଗ ଦେବା ଏକ ପ୍ରକାରର ନିଶ୍ଚିତ ବୋଲି ଜଣାପଡିଥିଲା। ଯାହାଫଳରେ ପ୍ରଦୀପଙ୍କ ମିଶ୍ରଣକୁ ନେଇ ନବରଂଗପୁର ବିଜେଡିରେ ଅସନ୍ତୋଷ ବୃଦ୍ଧି ପାଇଲା। ହେଲେ ସେସବୁକୁ ପ୍ରଣବ ମ୍ୟାନେଜ କଲେ। ସେମାନଙ୍କ ମିଶ୍ରଣ ପର୍ବ କେବେ ହେବ ତାହା ମଧ୍ୟ କୁଆଡେ ନିର୍ଦ୍ଧାରିତ ହେଲା। ହେଲେ ହଠାତ କଣ ହେଲା କେଜାଣି ସେଥିରେ ଭଟ୍ଟା ପଡିଲା।
ତେବେ ଏଠାରେ ସାଧାରଣରେ ପ୍ରଶ୍ନ ଉଠୁଛି ଯେ, ପ୍ରଦୀପ କଂଗ୍ରେସ ଛାଡିବା ପାଇଁ କାହିଁକି ଚାହୁଛନ୍ତି। ତାହାର କାରଣରେ ଏତିକି କୁହାଯିବ ଯେ, ସେ ଦୀର୍ଘ ବର୍ଷ ଧରି ପଦପଦବୀରୁ ଦୂରେଇ ରହିଲେଣି। କଂଗ୍ରେସ ଅବସ୍ଥା ଯାହା ସେଥିରେ ସଂଗଠନକୁ ବଞ୍ଚାଇ ରଖିବା ପାଇଁ ଯେଉଁ ଅର୍ଥର ଆବଶ୍ୟକ ତାହା ନାହିଁ। ପଦପଦବୀ ନ ଥିବାରୁ ପ୍ରଦୀପ ନିଜେ ମଧ୍ୟ ନିଜର ସଂଗଠନ ଚଳାଇବା ପାଇଁ ଅକ୍ଷମ ହୋଇପଡିଲେଣି। ବର୍ତ୍ତମାନ ପରିସ୍ଥିତିରେ କର୍ମିମାନଙ୍କୁ ବାନ୍ଧି ରଖିବା ତାଙ୍କ ପାଇଁ କାଠିକର ପାଠ ହୋଇ ପଡିଛି। ସେଥିପାଇଁ ସେ ଏକ ବିକଳ୍ପ ରାସ୍ତା ବାଛିବାକୁ ଚିନ୍ତା କରୁଛନ୍ତି ବୋଲି ଅନୁମାନ କରାଯାଇଛି।
ତେବେ ଏହି ବିକଳ୍ପରେ ତାଙ୍କୁ ବାଧା ଦେଉଛି କଂଗ୍ରେସ ସହିତ ଥିବା ତାଙ୍କର ରକ୍ତ ସଂପର୍କ। ରାହୁଳ ଗାନ୍ଧୀ ସୋନିଆ ଗାନ୍ଧୀଙ୍କ ସହ ଜାତୀୟ କଂଗ୍ରେସର ବରିଷ୍ଠ ନେତାଙ୍କ ସହିତ ପ୍ରଦୀପଙ୍କ ଭଲ ସଂପର୍କ। ସେମାନଙ୍କରେ କଳାଦାଗ ଲଗାଇବା ପାଇଁ ସେ ଚାହୁଁ ନାହାଁନ୍ତି। ତାଙ୍କର ବାପା ଅବଶ୍ୟ ବିଜୁବାବୁଙ୍କ ସାଥୀରେ ଥିଲେ। ହେଲେ ସେ ନିଜେ ପୁରା ଖାଣ୍ଟି କଂଗ୍ରେସିଆ ଭାବେ ପରିଚୟ ସୃଷ୍ଟି କରିଛନ୍ତି।
ହେଲେ ସେ ଅନୁଭବ କରିସାରିଲେଣି ଯେ, ନିଜର ସଂଗଠନ ବଞ୍ଚିଲେ ତାଙ୍କ ରାଜନୀତି ବଞ୍ଚିବ। ନଚେତ ସେ ମୈଦାନରୁ କୁଆଡେ ହଜିଯିବେ। ଆଉ ସେଥିପାଇଁ ଆବଶ୍ୟକ ଅର୍ଥ। ସେହି ଦୃଷ୍ଟିରୁ ପ୍ରଦୀପ ବିଜେଡିରୁ ରାଜ୍ୟସଭା ଯାଇ ନିଜ ରାଜନୈତିକ ଭବିଷ୍ୟତକୁ ସୁଦୃଢ କରିବା ପାଇଁ ଚାହୁଁଛନ୍ତି।
ଜୟପୁର: ରାଜସ୍ଥାନର ଶ୍ରୀଗଙ୍ଗାନଗରରେ କୃଷକମାନେ ବିଜେପି ନେତାଙ୍କ ସହ କେନ୍ଦ୍ର ସରକାରଙ୍କ କୃଷି ଆଇନ ବିରୋଧରେ ଆନ୍ଦୋଳନ କରୁଛନ୍ତି। ଆନ୍ଦୋଳନରତ ଚାଷୀମାନେ ସେଠାରେ ବିଜେପି ନେତାଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି। ପରିସ୍ଥିତି ଏତେ ଭୀଷଣ ହେଲା ଯେ, ପୋଲିସକୁ ବାଧ୍ୟ ହୋଇ ଚାଷୀଙ୍କ ଉପରକୁ ଲାଠି ଚାଲଣ କରିବାକୁ ପଡିଥିଲା। ଏହି ଲାଠି ଚାଲଣ ଯୋଗୁଁ ଅନେକ ଚାଷୀ ମଧ୍ୟ ଆହତ ହୋଇଛନ୍ତି। ବର୍ତ୍ତମାନ ସେଠାରେ ଏକ ତିକ୍ତ ପରିସ୍ଥିତି ସୃଷ୍ଟି ହୋଇଛି। ଶ୍ରୀଗଙ୍ଗନଗରର ଜିଲ୍ଲାପାଳ ସେଠାରେ ପୋଲିସ୍ ଫୋର୍ସ ମୁତୟନ କରିବା ପାଇଁ ନିର୍ଦ୍ଦେଶ ଦେଇଛନ୍ତି।
କୃଷକମାନେ ବିଜେପି ଅନୁସୂଚିତ ଜାତି ମୋର୍ଚ୍ଚା ରାଜ୍ୟ ସଭାପତି କୈଲାଶ ମେଘୱାଲଙ୍କ ପୋଷାକ ଚିରି ଦେଇଥିଲେ। କୈଳାଶ ମେଘୱାଲଙ୍କୁ ମଧ୍ୟ ଆକ୍ରମଣ କରାଯାଇଥିଲା। ଉତ୍ତ୍ୟକ୍ତ ଚାଷୀଙ୍କ ଠାରୁ କୈଳାଶ ମେଘୱାଲଙ୍କୁ ପୋଲିସ ମୁକ୍ତ କରିଥିଲା।
ମୁଦ୍ରାସ୍ଫୀତି ଏବଂ ଜଳସେଚନ ନେଇ ବିଜେପି ନେତାମାନେ ଜିଲ୍ଲାପାଳଙ୍କ ନିକଟରେ ବିକ୍ଷୋଭ ପ୍ରଦର୍ଶନ କରୁଥିଲେ। ତା’ପରେ କୃଷକମାନେ ସେଠାରେ ପହଞ୍ଚି ପ୍ରବଳ ଝଗଡା କରିଥିଲେ। ଏହା ପରେ ପୋଲିସ ଲାଠି ଚାଲଣ କରିବାକୁ ବାଧ୍ୟ ହୋଇଥିଲା। ଏଥିରେ ବହୁ ଚାଷୀ ଆହତ ହୋଇଥିଲେ।
ନୂଆଦିଲ୍ଲୀ: ଉତ୍ତରଭାରତର ଉତ୍ତରପ୍ରଦେଶ, ରାଜସ୍ଥାନ ସମେତ କେତୋଟି ରାଜ୍ୟରେ ଗତକାଲି ବଜ୍ରପାତ ଯୋଗୁଁ ଅନେକ ଲୋକଙ୍କ ଜୀବନ ଚାଲିଯାଇଛି। ଉତ୍ତରପ୍ରଦେଶର ଭିନ୍ନ ଭିନ୍ନ ସ୍ଥାନରେ ବଜ୍ରପାତ ଯୋଗୁଁ ୪୦ ଲୋକଙ୍କ ମୃତ୍ୟୁ ହୋଇଯାଇଛି। କାନପୁର ଏବଂ ଏହାର ଆଖପାଖ ଜିଲ୍ଲାରେ ବଜ୍ରପାତ ଯୋଗୁଁ ୧୮ ଜଣ ଙ୍କ ଜୀବନ ଚାଲିଯାଇଥିବା ବେଳେ ପ୍ରୟାଗରାଜରେ ୧୪ ଜଣ, କୌଶାମ୍ବୀରେ ୪ ଜଣ, ଆଗ୍ରାରେ ୩ ଜଣ, ଉନ୍ନାବରେ ୨ ଜଣଙ୍କ ମୃତ୍ୟୁ ହୋଇଛି।
ସେହିଭଳି ପ୍ରତାପଗଡ଼, ବାରଣାସୀ ଏବଂ ରାୟବରେଲୀରେ ଜଣେ ଲେଖାଏଁ ଲୋକଙ୍କ ବଜ୍ରପାତ ଯୋଗୁଁ ପ୍ରାଣହାନୀ ଘଟିଛି। ଅନେକ ସ୍ଥାନରେ ଏହି ବଜ୍ରପାତ ଯୋଗୁଁ ପଶୁମାନଙ୍କ ମଧ୍ୟ ଜୀବନ ଚାଲିଯାଇଛି। ଏହି ଘଟଣାରେ ମୃତକଙ୍କ ପରିବାରକୁ କ୍ଷତିପୂରଣ ବାବଦକୁ ଯୋଗୀ ସରକାର ୪-୪ ଲକ୍ଷ ଟଙ୍କା ଅନୁକମ୍ପା ରାଶି ପ୍ରଦାନ କରିବେ ବୋଲି ଘୋଷଣା କରିଛନ୍ତି।
ଅପରପକ୍ଷେ ରାଜସ୍ଥାନର ଆମେର କିଲ୍ଲା ନିକଟସ୍ଥ ଏକ ଟାୱାରରେ ଚଢି ସେଲ୍ଫି ଫଟୋ ନେଉଥିବା ବେଳେ ୮ ଜଣ ଲୋକଙ୍କ ଘଟଣା ସ୍ଥଳରେ ମୃତ୍ୟୁ ହୋଇଛି।
ନୂଆଦିଲ୍ଲୀ: ଦୁଇ ବର୍ଷ ପରେ ରାଜସ୍ଥାନର ବିଧାନସଭା ନିର୍ବାଚନ ଅନୁଷ୍ଠିତ ହେବ। ହେଲେ ତାହା ପୂର୍ବରୁ ବିଜେପି ମୁଖ୍ୟାଳୟରେ ବ୍ୟାନର-ପୋଷ୍ଟର ବଦଳାଇ ଦିଆଯାଇଛି। ପାର୍ଟିର ଏହି ନୂଆ ପୋଷ୍ଟରରେ ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେଙ୍କ ଫଟୋ ଦେଖିବାକୁ ମିଳିନାହିଁ। ୨୦ ବର୍ଷ ପରେ ଏହା ପ୍ରଥମ ଘଟଣା, ଯାହା ରାଜସ୍ଥାନ ପୋଷ୍ଟର ଆଉ ହୋର୍ଡିଙ୍ଗରେ ରାଜେଙ୍କ ଫଟୋକୁ ରଖାଯାଇନାହିଁ।
ବସୁନ୍ଧରା ୨୦୧୩ରୁ ୨୦୧୮ ମସିହା ପର୍ଯ୍ୟନ୍ତ ରାଜ୍ୟର ମୁଖ୍ୟମନ୍ତ୍ରୀ ଥିଲେ। ଗତ କିଛି ବର୍ଷ ହେଲା ବିଜେପିର ଶୀର୍ଷ ନେତା ଏବଂ ରାଜେଙ୍କ ମଧ୍ୟରେ ତିକ୍ତତା ଲାଗିଥିବା କୁହାଯାଉଛି। ଯାହାଫଳରେ ରାଜସ୍ଥାନ ବିଜେପିରେ ସବୁ କିଛି ଠିକ ଚାଲିନଥିବା ପ୍ରଶ୍ନ ଉଠିବା ଆରମ୍ଭ ହୋଇଯାଇଛି।
ଜୟପୁର: ରାଜସ୍ଥାନରେ କଂଗ୍ରେସ ପରେ ଏବେ ବିଜେପିରେ ମଧ୍ୟ ବିରୋଧର ସ୍ଵର ଉଠିଛି। ପୂର୍ବତନ ମୁଖ୍ୟମନ୍ତ୍ରୀ ବସୁନ୍ଧରା ରାଜେଙ୍କୁ ଦଳ ଅଣଦେଖା କରୁଥିବାର ଅଭିଯୋଗ କରିଛନ୍ତି ତାଙ୍କ ସମର୍ଥକ। ବସୁନ୍ଧରାଙ୍କ ପ୍ରଶଂସକ ବିଜେପିରୁ ଅଲଗା ହୋଇ ଏକ ନୂଆ ରାଜନୈତିକ ମଞ୍ଚ ତିଆରି କରିଛନ୍ତି। ଯେଉଁ ମଞ୍ଚର ନାମ ରହିଛି ବସୁନ୍ଧରା ରାଜେ ସମର୍ଥକ ରାଜସ୍ଥାନ ମଞ୍ଚ। ଏହା ସହିତ ବସୁନ୍ଧରା ସମର୍ଥକ ମାନେ ରାଜସ୍ଥାନର ସମସ୍ତ ଜିଲ୍ଲାରେ ଜିଲ୍ଲା ସଭାପତି ମନୋନୀତ କରିବା ଆରମ୍ଭ କରିଦେଇଛି।
ଏତଦବ୍ୟତୀତ ଏହି ମଞ୍ଚ ଦ୍ଵାରା ଯୁବ ମୋର୍ଚ୍ଚା ଏବଂ ମହିଳା ମୋର୍ଚ୍ଚା ଗଠନ କରିବା ଲାଗି ପ୍ରସ୍ତୁତି ଆରମ୍ଭ କରିଦେଇଛି। ଉଲ୍ଲେଖଯୋଗ୍ୟ ଯେ, ବିଜେପି ପାଇଁ ଏହା ହେଉଛି ପ୍ରଥମ ଘଟଣା, ଯାହାକି ଦଳଠାରୁ ଅଲଗା ହୋଇ କୋଣସି ଏକ ନେତାର ସମର୍ଥନରେ ଅଲଗା ସଂଗଠନ ପ୍ରସ୍ତୁତ କରାଯାଉଛି।
ତେବେ ଏହାକୁ ନେଇ ରାଜ୍ୟ ସଭାପତି ସତୀଶ ପୂନିୟା କହିଛନ୍ତି ଯେ, ଏହି ଘଟଣା ସମସ୍ତ ବିଜେପି ନେତାଙ୍କୁ ଜଣା ଅଛି। ଏବଂ ଯେଉଁ ମାନେ ଏହି ସଂଗଠନ ତିଆରି କରୁଛନ୍ତି ସେମାନେ ବିଜେପିର ସକ୍ରିୟ ସଦସ୍ୟ ନୁହନ୍ତି। ବିଜେପି କୌଣସି ବ୍ୟକ୍ତି କେନ୍ଦ୍ରିତ ଦଳ ନୁହେଁ, ଏହା ସଂଗଠନ ଆଧାରିତ ଦଳ।
ନୂଆ ଦିଲ୍ଲୀ: ରାଜସ୍ଥାନର ପୂର୍ବତନ ସାଂସଦ ତଥା କଂଗ୍ରେସ ନେତା ବୁଟା ସିଂଙ୍କ ପରଲୋକ ହୋଇଯାଇଛି। ୮୬ ବର୍ଷ ବୟସରେ ତାଙ୍କର ପରଲୋକ ହୋଇଯାଇଛି। ଦୀର୍ଘ ଦିନ ଧରି ଅସୁସ୍ଥତା ପରେ ଆଜି ଦିଲ୍ଲୀରେ ସେ ଶେଷ ନିଶ୍ୱାସ ତ୍ୟାଗ କରିଛନ୍ତି। ବୁଟାସିଂଙ୍କର ଦେହାନ୍ତରେ ପ୍ରଧାନମନ୍ତ୍ରୀ ମୋଦୀ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ଏ ନେଇ ପ୍ରଧାନମନ୍ତ୍ରୀ ଟ୍ୱିଟରେ ଲେଖିଛନ୍ତି ଯେ, “ଶ୍ରୀ ବୁଟା ସିଂ ଜୀ ଜଣେ ଅଭିଜ୍ଞ ପ୍ରଶାସକ ଏବଂ ଗରିବ ଲୋକଙ୍କ କଲ୍ୟାଣ ପାଇଁ ତଥା ପ୍ରଭାବଶାଳୀ ସ୍ୱର ଥିଲେ। ତାଙ୍କ ଦେହାନ୍ତରେ ଦୁଃଖିତ। ତାଙ୍କ ପରିବାର ଏବଂ ସମର୍ଥକଙ୍କ ପ୍ରତି ମୋର ସମବେଦନା।”
ବୁଟା ସିଂ ବିହାରର ରାଜ୍ୟପାଳ ଭାବେ କାର୍ଯ୍ୟ କରିଥିଲେ। ସେ ଶିଖ ସଂପ୍ରଦାୟର ଜଣେ ପ୍ରମୁଖ ନେତା ଥିଲେ ସେ କେନ୍ଦ୍ର ସରକାରରେ ପୂର୍ବରୁ ମନ୍ତ୍ରୀ ଭାବେ ଦାୟିତ୍ଵ ନେଇଥିଲେ।
ରାଜସ୍ଥାନ : ରାଜସ୍ଥାନ ସରକାରରେ ପୁଣି ହଲ୍ଚଲ୍ ଦେଖାଦେଇଛି । ପଞ୍ଚାୟତ ନିର୍ବାଚନରେ ହାର୍ ମିଳିବା ପରେ ରାଜସ୍ଥାନର କ୍ଷମତାସୀନ ସରକାର ଅଶୋକ ଗେହଲେଟ୍ଙ୍କ ସାମ୍ନାରେ ପୁଣିଥରେ ସଂକଟ ଠିଆ ହୋଇଛି । ଭାରତୀୟ ଟ୍ରାଇବଲ ପାର୍ଟିର ଦୁଇ ବିଧାୟକ ଏବେ ରାଜସ୍ଥାନ ସରକାରଙ୍କଠାରୁ ସମର୍ଥନ ପ୍ରତ୍ୟାହାର କରିଛନ୍ତି । ବିଟିପିର ଏହି ଦୁଇ ବିଧାୟକ ଲଗାତାର ଗେହେଲତ ସରକାରଙ୍କ ସମର୍ଥନ ଦେଉଥିଲେ ।
ଚଳିତ ବର୍ଷ ଆରମ୍ଭରୁ ବିଧାନସଭାରେ ଗେହେଲତ୍ ସରକାର ବହୁମତ ସାବ୍ୟଓ୍ତ କରିଥିଲେ । ଏହି ସମୟରେ ବିଟିପିର ଦୁଇ ବିଧାୟକ ଗେହେଲଟ୍ ସରକାରଙ୍କ ସମର୍ଥନ ଜଣାଇଥିଲେ। କିନ୍ତୁ ନିକଟରେ ରାଜ୍ୟରେ ହୋଇଥିବା ପଞ୍ଚାୟତ ସମିତି ନିର୍ବାଚନରେ କଂଗ୍ରେସ ବହୁ ଆସନରେ ବିଫଳ ହେବା ପରେ ଗେହେଲଟ୍ ସରକାରରେ ପୁଣିଥରେ ହଲ୍ଚଲ୍ ସୃଷ୍ଟି ହୋଇଛି । ଅପରପକ୍ଷରେ ଚଳିତ ପଞ୍ଚାୟତ ନିର୍ବାଚନରେ କଂଗ୍ରେସ ସେମାନଙ୍କୁ ସାଥ୍ ନ ଦେଇ ତାଙ୍କ ସହ ଧୋକ୍କା କରିଛି ବାଲି ଅଭିଯୋଗ କରିଛନ୍ତି ବିଟିପିର ଦୁଇ ବିଧାୟକ । ପଞ୍ଚାୟତ ନିର୍ବାଚନରେ1833 ଆସନରେ ବିଜେପି ଜିତ୍ ହାସଲ କରିଥିବାବେଳେ କଂଗ୍ରେସ 1713ଟି ଆସନରେ ଜିତିଛି । ଏତଦ୍ବ୍ୟତୀତ ଜିଲ୍ଲା ପ୍ରମୁଖ ନିର୍ବାଚନରେ ମଧ୍ୟ ବିଜେପି ବେଶ୍ ଭଲ ପ୍ରଦର୍ଶନ କରିଛି ।
ତେବେ ଏହି ଦୁଇ ବିଧାୟକଙ୍କ ସମର୍ଥନ ପ୍ରତ୍ୟାହାର କରିବା ଦ୍ବାରା ଗେହେଲଟ୍ ସରକାରଙ୍କ ଉପରେ କୌଣସି ପ୍ରଭାବ ପଡିବ ନାହିଁ । ଏବେ କଂଗ୍ରେସ ପାଖରେ ବହୁମତ ରହିଛି । ତେବେ କିଛି ବିଧାନସଭା ଆସନରେ ଉପନିର୍ବାଚନ ଅନୁଷ୍ଠିତ ହୁଏ। ରାଜସ୍ଥାନର ମୋଟ୍ 200 ଆସନରୁ ଗେହେଲଟ୍ ସରକାରଙ୍କ ପାଖରେ118ଟି ଆସନ ରହିଛି । ତେବେ ଏଥିରେ ନିର୍ଦ୍ଦଳୀୟ ବିଧାୟକ ବି ସାମିଲ୍ ରହିଛନ୍ତି । ଅପରପକ୍ଷରେ ମୁଖ୍ୟମନ୍ତ୍ରୀ ଅଶୋକ ଗେହେଲଟ୍ ରାଜସ୍ଥାନ ସରକାରରେ ହଲଚଲ୍କୁ ନେଇ ଚିନ୍ତା ପ୍ରକଟ କରିଛନ୍ତି ।
ସୂଚନାଯୋଗ୍ୟ, ଚଳିତ ବର୍ଷ ଆରମ୍ଭରେ ରାଜସ୍ଥାନ କଂଗ୍ରେସ ଦୁଇ ଭାଗରେ ବିଭକ୍ତ ହୋଇଥିଲା । ସଚିନ ପାଇଲଟ୍ ନିଜ ସମର୍ଥକଙ୍କ ସହିତ ସରକାରଠୁ ଦୂରେଇ ରହିଥିବାବେଳେ ଦୀର୍ଘ ସମୟ ଧରି ରାଜନୈତିକ ଘମାସନ ପରେ ସଚିନ୍ ପୁନର୍ବାର ଦଳକୁ ଫେରିଥିଲେ । ତଥାପି ଏପର୍ଯ୍ୟନ୍ତ ସଚିନ୍ଙ୍କୁ କୌଣସି ବଡ ଦାୟିତ୍ବ ମିଳିପାରିନାହିଁ । (ଏଜେନ୍ସି)