ସୀତାରାମ ଅଗ୍ରୱାଲ
ଚିଲିକା: ସତରେ ବାପା, ମା ପୁଅ ଝିଅ ଜନ୍ମ କରିବାର ପରିଣାମ ଯେ ଦିନେ ଏତେ ଭୟଙ୍କର ହୋଇପାରେ ତାହା କଳ୍ପନା କରିହେଉନି। ଜଣେ ୮୦ ବର୍ଷୀୟ ବୃଦ୍ଧାଙ୍କୁ ପରିଣତ ବୟସରେ ନିଜ ଘର ଛାଡି ଯାଯାବର ଜୀବନଯାପନ କରିବାକୁ ପଡୁଛି। ଓଳିଏ ଖାଇଲେ ପୁଣି ଓଳିଏ ଉପାସରେ ରହୁଛନ୍ତି ବୃଦ୍ଧା ଜଣକ। ଏପରି ଏକ ହୃଦୟ ବିଦାରକ ଦୃଶ୍ୟ ଦେଖିବାକୁ ମିଳିଛି ଖୋର୍ଦ୍ଧା ଜିଲ୍ଲା ଚିଲିକା ବ୍ଲକ ଅନ୍ତର୍ଗତ ବଡକୁଳ ପାନ୍ଥନିବାସ ଯିବା ରାସ୍ତାରେ।
ରାସ୍ତାର ଡାହାଣ ପାର୍ଶ୍ୱରେ ଏକ ଛୋଟିଆ ଘରେ ଜଣେ ବୃଦ୍ଧା ଅସ୍ଥାୟୀ ଭାବେ ବାସ କରୁଛନ୍ତି। ବୃଦ୍ଧାଙ୍କ ନାମ ଅପସରା ମହାପାତ୍ର। ବୟସ ୮୦ ଟପିଗଲାଣି। ଚିଲିକା ବ୍ଲକ ବିଧାରପୁର ଗ୍ରାମ ସ୍ଥିତ ବ୍ରାହ୍ମଣ ଶାସନ ସାହିରେ ତାଙ୍କ ଘର। ତାଙ୍କର ଦୁଇଟି ପୁଅ ଏବଂଗୋଟିଏ ଝିଅ ଥାଇ ମଧ୍ୟ ଏବେ ସେ ବେସାହାରା।
ବୃଦ୍ଧା କୁହନ୍ତି ତାଙ୍କର ଅନେକ ସମ୍ପତି ଥାଇ ମଧ୍ୟ ଆଜି ସେ ଦୁଇ ଓଳି ଖାଇବା ପାଇଁ ସଂଘର୍ଷ କରୁଛନ୍ତି। ତାଙ୍କୁ କେହି ଗାଳିଗୁଲଜ କଲେ ସେ ସାହିପାରନ୍ତିନି। ପରିବାର ଲୋକମାନେ ପ୍ରତି ଛୋଟ ଛୋଟ କଥାରେ ଅପସରାଙ୍କୁ ଗାଳି ଗୁଲଜ କରିବା ସହ ସଦାବେଳେ ତାଙ୍କ ଉପରେ ଦାଉ ସାଧିଥାନ୍ତି। ଏପରିକି ଟିକିଏ ଟିକିଏ କଥା ଯୋଗୁଁ ଘରେ ସଦାବେଳେ କଳହ ସୃଷ୍ଟି ହୁଏ। ସେଥିନିମନ୍ତେ ସମ୍ମାନ ହରାଇ ବଞ୍ଚିବା ଅପେକ୍ଷା ସ୍ୱାଭିମାନ ସହ ବଞ୍ଚିବାର ପନ୍ଥା ଆପଣେଇଛନ୍ତି ବୋଲି ବୃଦ୍ଧାଜଣଙ୍କ କୋହଭରା କଣ୍ଠରେ କହିଛନ୍ତି। ତେଣୁ ସେ ଦୀର୍ଘ ଏକ ବର୍ଷ ହେଲା ନିଜ ଘର ଛାଡି ଯାଯାବର ଜୀବନଯାପନ କରୁଛନ୍ତି।
ଓଳିଏ ମାଗିଯାଚି ଖାଇଲେ ଓଳିଏ ଉପାସରେ ରୁହନ୍ତି ଅପସରା। ଗତ ଏକମାସ ହେଲା ଅପସରା ବଡକୁଳ ପାନ୍ଥନିବାସ ଯିବା ରାସ୍ତାରେ ଏକ ଛୋଟିଆ ଘରେ ରହୁଛନ୍ତି। ଉକ୍ତ ଘରଟିକୁ କେହି ଜଣେ ସହୃଦୟ ବ୍ୟକ୍ତି ବୃଦ୍ଧାଙ୍କୁ ରହିବା ଲାଗି ଦେଇଛନ୍ତି। ବାଟରେ ଯିବା ଆସିବା ସମୟରେ କୌଣସି ସ୍ଵେଚ୍ଚାସେବୀ କିମ୍ବା ସମାଜସେବୀ ବ୍ୟକ୍ତିବିଶେଷ ଯଦି ବୃଦ୍ଧାଙ୍କୁ ଖାଇବାକୁ ଦିଅନ୍ତି ତେବେ ସେ ଖାଦ୍ୟ ପାଇଥାନ୍ତି, ନଚେତ ଅନାହାରରେ ଦିନ କାଟିଥାନ୍ତି।
ରାଜ୍ୟ ସରକାର ବୟସ୍କ ନାଗରିକ ମାନଙ୍କ ନିମନ୍ତେ ଏକାଧିକ ଯୋଜନାମାନ ପ୍ରଣୟନ କରିଥିବାବେଳେ ପରିଣତ ବୟସରେ ବୃଦ୍ଧାଙ୍କ ଏପରି ଅବସ୍ଥା ଉକ୍ତ ଯୋଜନାଗୁଡିକର କାର୍ଯ୍ୟକାରିତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ସ୍ଥାନୀୟ ଏବଂ ଜିଲ୍ଲା ପ୍ରଶାସନ ଏ ଦିଗରେ ଯଥାଶୀଘ୍ର ଉଚିତ ପଦକ୍ଷେପ ଗ୍ରହଣ କରିବା ସହ ବୃଦ୍ଧାଙ୍କ ଥଇଥାନ ବ୍ୟବସ୍ଥା କରିବା ନିମନ୍ତେ ସାଧାରଣରେ ଦାବି ହେଉଛି।