ସୀତାରାମ ଅଗ୍ରୱାଲ
ବାଣପୁର: ବାଣପୁର ବ୍ଲକ ନରେନ୍ଦ୍ରପୁର ପଞ୍ଚାୟତ ଅନ୍ତର୍ଗତ ବଡ଼ସିରେଇପୁର ଗ୍ରାମରେ ଦୀର୍ଘ ଦିନ ଧରି ଅଙ୍ଗନବାଡି କେନ୍ଦ୍ରର କର୍ମୀଙ୍କୁ ନେଇ ଜାରି ରହିଥିବା ବିବାଦ ଥମିବାର ନାଁ ଧରୁ ନାହିଁ। ପରିସ୍ଥିତି ଏପରି ହେଲାଣି ଯେ ଆଜି ଉକ୍ତ ଗ୍ରାମର ପ୍ରାୟ ୮୦ ରୁ ଊର୍ଦ୍ଧ୍ଵ ପୁରୁଷ ଓ ମହିଳା ମାନେ ସୁଦୂର ଖୋର୍ଦ୍ଧା ଗସ୍ତକରି ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଛନ୍ତି। ଗ୍ରାମର ଦୁଇ ଗୋଟି ଅଙ୍ଗନବାଡି କେନ୍ଦ୍ରର ଦୁଇ ଜଣ କର୍ମୀଙ୍କ ବହିଷ୍କାର ଦାବିରେ ଉକ୍ତ ଧାରଣା ଦିଆଯାଇଛି।
ଗ୍ରାମବାସୀଙ୍କ ଅଭିଯୋଗ ମୁତାବକ, ଦୀର୍ଘ ଦେଢ଼ ବର୍ଷ ହେଲା ଅଙ୍ଗନବାଡି କର୍ମୀ ଏବଂ ଗ୍ରାମବାସୀଙ୍କ ମଧ୍ୟରେ ବିବାଦ ଲାଗି ଅଙ୍ଗନବାଡି କେନ୍ଦ୍ର ବନ୍ଦ ହୋଇ ରହିଛି। ଯାହାଫଳରେ ଶିଶୁ ଏବଂ ଗର୍ଭବତୀ ମହିଳାମାନେ ବହୁ ଅସୁବିଧାର ସମ୍ମୁଖୀନ ହେବାସହ ସମସ୍ତ ସୁବିଧା ସୁଯୋଗରୁ ବଞ୍ଚିତ ହେଉଛନ୍ତି। ନୂତନ ଅଙ୍ଗନବାଡି କର୍ମୀ ନିଯୁକ୍ତି ପାଇଁ ଗ୍ରାମବାସୀଙ୍କ ଦାବି ହେଉଛି।
ଏ ବାବଦରେ ବାରମ୍ବାର ଗ୍ରାମବାସୀମାନେ ବିଭାଗୀୟ ଅଧିକାରୀଙ୍କ ଦୃଷ୍ଟି ଆକର୍ଷଣ କରିବା ପରେ ଗତ ଫେବୃଆରୀ ମାସ ୧୧ ତାରିଖରେ ଜିଲ୍ଲା ସମାଜ ମଙ୍ଗଳ ଅଧିକାରୀ, ବାଣପୁର ସିଡ଼ିପିଓ, ତହସିଲଦାର, ଆଇଆଇସି ଗ୍ରାମବାସୀଙ୍କ ସହ ଆଲୋଚନା କରି ଉକ୍ତ ସମସ୍ୟାର ସମାଧାନ ନିମନ୍ତେ ୭ ଦିନ ସମୟ ନେଇଥିଲେ। କିନ୍ତୁ ଆଜକୁ ୫ ମାସରୁ ଉର୍ଦ୍ଧ୍ଵ ସମୟ ବିତିଯାଇଥିଲେ ସୁଦ୍ଧା ଏଥିପ୍ରତି କେହି ଗୁରୁତ୍ୱ ନଦେବାରୁ ଆଜି ଗ୍ରାମବାସୀ ମାନେ ପ୍ରବଳ ବର୍ଷାରେ ଉପଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ଦୀର୍ଘ ସମୟ ପର୍ଯ୍ୟନ୍ତ ଧାରଣାରେ ବସିବା ସହ ଉପଜିଲ୍ଲାପାଳଙ୍କୁ ଏକ ଦାବିପତ୍ର ପ୍ରଦାନ କରିଥିଲେ।
ଉକ୍ତ ଧାରଣାକୁ ଜିଲ୍ଲା ବିଜେପି ସଭାପତି ରଶ୍ମିରଞ୍ଜନ ମହାପାତ୍ର ଏବଂ ବିଜେପି ନେତା ନିକୁଞ୍ଜ ପଟ୍ଟନାୟକ ସମର୍ଥନ କରିବା ସହ ଉପଜିଲ୍ଲାପାଳଙ୍କ ସହ ଏନେଇ ଆଲୋଚନା ମଧ୍ୟ କରିଥିଲେ।
ପରିଶେଷରେ ଉପଜିଲ୍ଲାପାଳଙ୍କ ନିକଟରୁ ଉକ୍ତ ସମସ୍ୟାର ଯଥାଶୀଘ୍ର ସମାଧାନ ନିମନ୍ତେ ନିର୍ଭର ପ୍ରତିଶୃତି ପାଇବାପରେ ଗ୍ରାମବାସୀମାନେ ଧାରଣାରୁ ଉଠିଥିଲେ।
ବଡ଼ସିରେଇପୁର ଗ୍ରାମ କମିଟି ସଭାପତି ପ୍ରବୋଧ କୁମାର ବିଶ୍ୱାଳ, ସମ୍ପାଦକ ବିକି ମୁଦୁଲି, ଝୁଲଣ ଜେନା, ବୁଲାରାମ ପ୍ରଧାନ, ରଙ୍କନାଥ ମହାନ୍ତି ଓ ସରୋଜ ସୁବୁଦ୍ଧିଙ୍କ ନେତୃତ୍ୱରେ ବହୁ ଗର୍ଭବତୀ ମହିଳାଙ୍କ ସମେତ ପାଖାପାଖି 80 ଜଣ ଗ୍ରାମବାସୀ ଧାରଣାରେ ବସିଥିଲେ।