ଖୋର୍ଦ୍ଧା: ଓଡ଼ିଶା ଗ୍ରାମ୍ୟ ଉନ୍ନୟନ ଓ ବିପଶନ ସମିତି(ଓରମାସ)କାର୍ଯ୍ୟାଳୟ, ଖୋର୍ଦ୍ଧା ଠାରେ ଗ୍ରାମୀଣ କାରିଗରମାନଙ୍କର ଉତ୍ପାଦିତ ସାମଗ୍ରୀର ବିକ୍ରୟ କେନ୍ଦ୍ର ଆଜି ଅପରାହ୍ନରେ ଉଦଘାଟିତ ହୋଇଯାଇଛି। ଖୋର୍ଦ୍ଧା ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ଓ ଜିଲ୍ଲା ପରିଷଦ ଅଧ୍ୟକ୍ଷ ପ୍ରଫୁଲ୍ଲ କୁମାର ଦଳେଇଙ୍କ ଉପସ୍ଥିତିରେ ଖୋର୍ଦ୍ଧା ବିଧାୟକ ଜ୍ୟୋତିନ୍ଦ୍ରନାଥ ମିତ୍ର ଏହି ବିକ୍ରୟ କେନ୍ଦ୍ରର ଶୁଭ ଉଦଘାଟନ କରିଛନ୍ତି।
ଏହି ବିକ୍ରୟ କେନ୍ଦ୍ରରେ ଜିଲ୍ଲାର ଗ୍ରାମୀଣ କାରିଗରମାନଙ୍କର ବିଭିନ୍ନ ସାମଗ୍ରୀ ବିକ୍ରୟ କରାଯିବ। ଜିଲ୍ଲାର ମହିଳା ସ୍ୱୟଂସହାୟକ ଗୋଷ୍ଠୀମାନଙ୍କର ଉତ୍ପାଦିତ ସାମଗ୍ରୀ ଓରମାସ କାର୍ଯ୍ୟାଳୟର ଏହି ବିକ୍ରୟ କେନ୍ଦ୍ରରେ ପ୍ରଦର୍ଶିତ ହେବ ଓ ବିକ୍ରୟ ହେବ। ଏଠାରେ ବିଭିନ୍ନ ସାମଗ୍ରୀ ଅନଲାଇନ ବିକ୍ରୟ ପାଇଁ ମଧ୍ୟ ବ୍ୟବସ୍ଥା କରାଯାଇଛି।
ଏହି ବିକ୍ରୟ କେନ୍ଦ୍ର ପାଇଁ ଜିଲ୍ଲା ପ୍ରଶାସନ ତରଫରୁ ୯ ଲକ୍ଷ ଟଙ୍କା ବ୍ୟୟ ଅଟକଳ କରାଯାଇଛି। ଏଥିରେ ଜିଲ୍ଲାର ସ୍ୱୟଂସହାୟକ ଗୋଷ୍ଠୀ ସାମିଲ ହୋଇ ସେମାନଙ୍କର ଉତ୍ପାଦିତ ସାମଗ୍ରୀ ବିକ୍ରୟ ପାଇଁ ସୁଯୋଗ ପାଇବେ।
ବିକ୍ରୟ କେନ୍ଦ୍ର ଉଦଘାଟନ କାର୍ଯ୍ୟକ୍ରମରେ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦେଶକ ଦିଗନ୍ତ ରାଉତରାୟ, ଉପମୁଖ୍ୟ ନିର୍ବାହୀ ଓରମାସ ଗୁଣ୍ଡିଚା ବେହେରା, ବିଡ଼ିଓ, ଖୋର୍ଦ୍ଧା ରୁମାନା ଜାଫ୍ରି, ସହକାରୀ ନିର୍ଦ୍ଦେଶକ, ଉଦ୍ୟାନ, ମହିଳା ସ୍ୱୟଂସହାୟକ ଗୋଷ୍ଠୀର ସଭ୍ୟା ପ୍ରମୁଖ ଯୋଗଦେଇଥିଲେ।