ଭୁବନେଶ୍ୱର: ଭୁବନେଶ୍ୱରରେ ଆନ୍ତର୍ଜାତୀୟ ଲାୟନ୍ସ କ୍ଲବ ୩୨୨ସି୪ ଜିଲ୍ଲାର ଜିଲ୍ଲା ସମ୍ମିଳନୀ ହୋଟେଲ ଏକ୍ସଲେନ୍ସିଠାରେ ଅନୁଷ୍ଠିତ ହୋଇଯାଇଛି। ଆନ୍ତର୍ଜାତୀୟ ଲାୟନ୍ସ କ୍ଲବ ଯାହାକି ପୃଥିବୀର ବୃହତମ ଏନ.ଜି.ଓ. ଭାବରେ ମାନ୍ୟତା ପାଇଛି, ତାହା ସାରା ପୃଥିବୀରେ ୨୧୦ ଦେଶରେ ୧୫ ଲକ୍ଷ ସଦସ୍ୟ ଅଛନ୍ତି। ଭାରତବର୍ଷରେ ଲାୟନ୍ସ କ୍ଲବରେ ସବୁଠାରୁ ଅଧିକ ସଦସ୍ୟ ଓ କ୍ଲବ ରହିଛନ୍ତି। ଓଡ଼ିଶାରେ ଲାୟନ୍ସ କ୍ଲବର ୩ଟି ଲାୟନ୍ସ ଜିଲ୍ଲା ଅଛି। ତାହା ମଧ୍ୟରୁ ଭୁବନେଶ୍ୱର (ଖୋର୍ଦ୍ଧା ଜିଲ୍ଲା) ଓ ଦକ୍ଷିଣର ୯ଟି ଜିଲ୍ଲା ନେଇ ୩୨୨ ସି୪ ଜିଲ୍ଲାର ଦୁଇଦିନିଆ ଜିଲ୍ଲା ସମ୍ମିଳନୀ ଅନୁଷ୍ଠିତ ହେଉଛି।
ଏହି ସମ୍ମିଳନୀରେ ମଣିପୁରମ ଗୋଲ୍ଡ଼ର ମୁଖ୍ୟ ଲାୟନ ଭି.ପି. ନନ୍ଦକୁମାର ଯିଏକି ଭାରତବର୍ଷରୁ ଲାୟନ୍ସ କ୍ଲବର ଆନ୍ତର୍ଜାତୀୟ ନିର୍ଦ୍ଦେଶକ ଅଛନ୍ତି, ସେ ମୁଖ୍ୟ ଅତିଥି ଭାବେ ଯୋଗ ଦେଇଛନ୍ତି। ଭୁବନେଶ୍ୱର ଶିକ୍ଷା ଓ ଅନୁସନ୍ଧାନ ବିଶ୍ୱବିଦ୍ୟାଳୟର କୁଳପତି ଓ ଏମ୍ସ ଭୁବନେଶ୍ୱର ର ପୂର୍ବତନ ନିର୍ଦ୍ଦେଶକ ଡ଼କ୍ଟର ଅଶୋକ କୁମାର ମହାପାତ୍ର ମୁଖ୍ୟବକ୍ତା ଭାବରେ ଯୋଗ ଦେଇଥିଲେ। ଏହି ସମ୍ମିଳନୀର ମୁଖ୍ୟ ହେଉଛନ୍ତି ଜିଲ୍ଲା ୩୨୨ସି୪ର ଜିଲ୍ଲା ଗଭର୍ଣ୍ଣର ଲାୟନ ପୂର୍ଣ୍ଣଚନ୍ଦ୍ର ପାଢୀ।
ଏହି ସମ୍ମିଳନୀରେ ଭୁବନେଶ୍ୱର, ବ୍ରହ୍ମପୁର ଭଳି ବଡ଼ ବଡ଼ ସହରର ୪୫ କ୍ଲବର ସଦସ୍ୟମାନେ ଭାଗ ନେଇଛନ୍ତି। ୧୬ ଓ ୧୭ ତାରିଖ ଦୁଇଦିନ ଧରି ଅନୁଷ୍ଠିତ ହେବାକୁ ଥିବା ଏହି ସମ୍ମିଳନୀରେ ଓଡ଼ିଶାରେ ଓ ଭାରତବର୍ଷରେ ଲାୟନ୍ସ କ୍ଲବ ମାନଙ୍କ ଉତ୍ତୋରତ୍ତର ଉନ୍ନତି ନିମନ୍ତେ କାର୍ଯ୍ୟ କରିବା ପାଇଁ ଆଲୋଚନା ହେବ ଓ ଲାୟନ୍ସ କ୍ଲବରେ ବିଭିନ୍ନ ବିଭାଗରେ ଭଲ କାମ କରୁଥିବା ସଦସ୍ୟମାନଙ୍କୁ ପୁରସ୍କୃତ କରାଯିବ।
ଏହି ସମ୍ମିଳନୀରେ କ୍ୟାବିନେଟ ସମ୍ପାଦକ ଲାୟନ ବିଜୟ କୁମାର ସାହୁ, ଅତିଥି କମିଟିର ଚେୟାରମ୍ୟାନ ଡ଼କ୍ଟର ସୁରେଶ ସାହୁ ତଥା ଅନ୍ୟ ଲାୟନ୍ସ କ୍ଲବର ନେତୃବର୍ଗ ଉପସ୍ଥିତ ଥିଲେ।