ସୀତାରାମ ଅଗ୍ରୱାଲ
ଚିଲିକା: ଆମ୍ ଆଦମୀ ପାର୍ଟି ତରଫରୁ ଚିଲିକା ନିର୍ବାଚନ ମଣ୍ଡଳୀର କାର୍ଯ୍ୟକର୍ତ୍ତା ସମ୍ମିଳନୀ ଦିଗନ୍ତିକା ହୋଟେଲ ଠାରେ ଆୟୋଜନ ହୋଇଯାଇଛି। ଏହି କାର୍ଯ୍ୟକ୍ରମର ସଭାପତିତ୍ବ ଖୋର୍ଦ୍ଧା ଜିଲ୍ଲା ସାଙ୍ଗଠନିକ ସମ୍ପାଦକ ସୁନିଲ ଷଡ଼ଙ୍ଗୀ କରିଥିଲେ ଓ ଚିଲିକା ନିର୍ବାଚନ ମଣ୍ଡଳୀର ସାଙ୍ଗଠନିକ ରିପୋର୍ଟ ରଖିଥିଲେ।
ଚିଲିକାରେ ସବୁ ପଞ୍ଚାୟତରେ ସଂଗଠନ ନିର୍ମାଣ ଶେଷ ପର୍ଯ୍ୟାୟରେ ଅଛି ବୋଲି ଶ୍ରୀଯୁକ୍ତ ଷଡ଼ଙ୍ଗୀ କହିଥିଲେ। ଚିଲିକାରେ କିପରି ଭାବେ ସରକାରୀ ଶିକ୍ଷା ବ୍ୟବସ୍ଥା ଓ ସ୍ୱାସ୍ଥ୍ୟ ବ୍ୟବସ୍ଥା ଫେଲ ହୋଇଛି ତା ଉପରେ ଚିଲିକା ସଭାପତି ସୁବାସ ଜଗଦ୍ଦେଵ ଆଲୋଚନା କରିଥିଲେ। ଆଗାମୀ ଦିନରେ ପ୍ରତି ପଞ୍ଚାୟତରେ ବୈଠକ ଆୟୋଜନ ହେବାକୁ ଯାଉଛି ବୋଲି ଶ୍ରୀଯୁକ୍ତ ଜଗଦ୍ଦେଵ ସୂଚନା ଦେଇଥିଲେ।
କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଆପ୍ ରାଜ୍ୟ ଆବାହକ ନିଶିକାନ୍ତ ମହାପାତ୍ର ଯୋଗଦେଇ ତାଙ୍କ ଅଭିଭାଷଣରେ ବିଜେଡି, ବିଜେପିର ମଦ ଆମିଷ ଭୋଜିର ରାଜନୀତିକୁ ଚ୍ୟାଲେଞ୍ଜ ଦେଉଛି ଅରବିନ୍ଦ କେଜରିୱାଲଙ୍କ ଶିକ୍ଷା, ସ୍ୱାସ୍ଥ୍ୟ, ବିଜୁଳୀର ରାଜନୀତି। ଗୁଜୁରାଟର ଉଦାହରଣ ଦେଇ ଶ୍ରୀଯୁକ୍ତ ମହାପାତ୍ର କହିଥିଲେ ଯେ, ଗୁଜୁରାଟରେ ମଧ୍ୟ ଲୋକ କହୁଥିଲେ ପରିବର୍ତ୍ତନ, ଗୁଜୁରାଟରେ କଷ୍ଟ କିନ୍ତୁ ବିଗତ ଆଠ ମାସ ଭିତରେ ହୋଇଥିବା କଠିନ ପରିଶ୍ରମ ପରେ ଗୁଜୁରାଟରେ ବ୍ୟବସ୍ଥା ପରିବର୍ତ୍ତନର ନିକଟତର ହୋଇ ପାରିଛି ଆମ୍ ଆଦମୀ ପାର୍ଟି। ଠିକ ସେପରି ଓଡ଼ିଶାରେ ମଧ୍ୟ ଆମ୍ ଆଦମୀ ପାର୍ଟି ବ୍ୟବସ୍ଥା ପରିବର୍ତ୍ତନ କରିପାରିବ କହିଥିଲେ।
ସମ୍ମାନୀତ ଆତିଥି ଭାବେ ଖୋର୍ଦ୍ଧା ଜିଲ୍ଲା ସଭାପତି ଶୁଭାଶିଷ ସ୍ୱାଇଁ ସାମିଲ ହୋଇଥିଲେ। ଧନ୍ୟବାଦ ଭାଷଣ ଦେବା ସହିତ ଆପ୍ କିପରି ସାଧାରଣ ଜନତାଙ୍କ ରାଜନୀତି କରିଥାଏ ତାହା ଉପରେ ଶ୍ରୀଯୁକ୍ତ ସ୍ୱାଇଁ ଆଲୋକପାତ କରିଥିଲେ।
ଏହି କାର୍ଯ୍ୟକ୍ରମରେ ଶତାଧିକ କର୍ମୀ ସାମିଲ ହୋଇଥିଲେ ଏବଂ କିଛି ବୁଦ୍ଧିଜୀବି ଓ ଯୁବକ ନୂତନ ଭାବେ ଯୋଡି ହୋଇଥିଲେ।
