ସୀତାରାମ ଅଗ୍ରୱାଲ
ବାଣପୁର: ସ୍କୁଲରେ ପ୍ରେରଣା ଯୋଗାଇବା ସହ ପିଲାଙ୍କର ବୁଦ୍ଧିକୁ ବିକାଶରେ ରୂପାନ୍ତରିତ କରିଥାଏ ବିଜ୍ଞାନ ମେଳା। ଏହି ପରିପ୍ରେକ୍ଷୀରେ ଆଜି ଖୋର୍ଦ୍ଧା ଜିଲ୍ଲା ବାଣପୁର ଗୋଦାବରୀଶ ବିଦ୍ୟାପୀଠରେ ଏକ ବ୍ଲକ ସ୍ତରୀୟ ବିଜ୍ଞାନ ମେଳା ଅନୁଷ୍ଠିତ ହୋଇଯାଇଛି।
ଉକ୍ତ ମେଳାକୁ ବାଣପୁର ଗୋଷ୍ଠୀ ଶିକ୍ଷା ଅଧିକାରୀ ସନାତନ ଜାଲି ମୁଖ୍ୟ ଅତିଥି ଭାବେ ଯୋଗ ଦେଇ ଆନୁଷ୍ଠାନିକ ଭାବେ ଉଦ୍ଘାଟନ କରିଥିବା ବେଳେ ଅତିରିକ୍ତ ଶିକ୍ଷା ଅଧିକାରୀ ସନ୍ଧ୍ୟାରାଣୀ ହରିଚନ୍ଦନ ସମ୍ମାନିତ ଅତିଥି ଓ ମନୋଜ କୁମାର ହରିଚନ୍ଦନ ମୁଖ୍ୟବକ୍ତା ଭାବରେ ଯୋଗ ଦେଇଥିଲେ।
ପ୍ରକାଶ ଥାଉକି ବାଣପୁର ବ୍ଲକର ସମସ୍ତ ୮୦ ଟି ଉଚ୍ଚ ପ୍ରାଥମିକ ସ୍କୁଲ ଏବଂ ହାଇସ୍କୁଲର ଛାତ୍ରଛାତ୍ରୀ ବିଜ୍ଞାନ ମେଳାରେ ଯୋଗଦେଇ ବିଜ୍ଞାନ ପ୍ରକଳ୍ପ ସମ୍ବନ୍ଧରେ ସେମାନଙ୍କର ପାରଦର୍ଶିତା ପ୍ରତିପାଦନ କରିଥିଲେ। ସେଥି ମଧ୍ୟରୁ ୭ଟି ସ୍କୁଲ ଯଥା ଗୋରଡ଼ଝରି ହାଇସ୍କୁଲର ନବମ ଶ୍ରେଣୀ ଛାତ୍ରୀ ଅର୍ପିତା ସାହୁ ଆଡ଼ଭାନମେଣ୍ଟ ଆଇସିଟି, ସରକାରୀ ଉଚ୍ଚ ପ୍ରାଥମିକ ସ୍କୁଲର ଛାତ୍ର ଶୁଭମ ସାହୁ ପରିବେଶ ଅନୁକୂଳ, ଗୋଦାବରୀଶ ହାଇ ସ୍କୁଲର ଛାତ୍ରୀ ସର୍ବାଣୀ ପ୍ରଧାନ ସ୍ୱାସ୍ଥ୍ୟ ଓ ସଫେଇ କାରଣ, ଭେଟିନାଥ ଦେବ ସରକାରୀ ସ୍କୁଲର ଛାତ୍ର ହରେକୃଷ୍ଣ ପ୍ରଧାନ ଯାନବାହାନ ଯନ୍ତ୍ରିକରଣ, ବାନମ୍ବର ହାଇସ୍କୁଲର ଶଶାଙ୍କ ଶେଖର ଘଡାଇ ପରିବେଶ ସନ୍ତୁଳନ, ପତିତପାବନ ସରକାରୀ ହାଇ ସ୍କୁଲର ଶୁଭ ପରିଡା ଐତିହାସିକ ଉନ୍ନତି ସହିତ ନୂତନ ଚିନ୍ତାଧାରା ଓ ଗାଣିତିକ ବିଜ୍ଞାନ ପ୍ରକଳ୍ପରେ ଛାତ୍ରୀ ମଧୁସ୍ମିତା ବରାଳ କୃତକାର୍ଯ୍ୟ ହୋଇଥିଲେ।
ବାଣପୁର ଗୋଦାବରୀଶ ମହାବିଦ୍ୟାଳୟର ରସାୟନ ବିଜ୍ଞାନ ବିଭାଗର ଅଧ୍ୟାପକ ମନୋଜ ନାୟକ ଓ ଉଦ୍ଭିଦ ବିଜ୍ଞାନ ବିଭାଗ ଅଧ୍ୟପିକା ନିହାରବାଳା ରାଉତ ବିଚାରପତି ଭାବେ ଯୋଗଦେଇ ଉର୍ଣ୍ଣତ ମାନର ପ୍ରକଳ୍ପ ତିଆରି କରିଥିବା ଛାତ୍ରଛାତ୍ରୀଙ୍କୁ ଚୟନ କରିଥିଲେ। ପ୍ରକଳ୍ପ ଗୁଡିକରେ କୃତକାର୍ଯ୍ୟ ହୋଇଥିବା ଛାତ୍ର ଛାତ୍ରୀଙ୍କୁ ଗୋଦାବରୀଶ ବିଦ୍ୟାପୀଠର ପ୍ରଧାନ ଶିକ୍ଷକ ଶ୍ୟାମ ସୁନ୍ଦର ପ୍ରଧାନ ପୁରସ୍କାର ବିତରଣ କରିଥିଲେ।
ସମସ୍ତ ବିଜ୍ଞାନ ମେଳାକୁ ସିଆରସିସି ସମୀର ସେଠି, ମନୋରଞ୍ଜନ ଖୁଣ୍ଟିଆ, ଶ୍ରୀକାନ୍ତ ନାୟକ ଓ କୈଳାଶ ଚନ୍ଦ୍ର ସାହୁଙ୍କ ସହଯୋଗରେ ସୁଚାରୁ ରୁପେ ପରିଚାଳନା କରାଯାଇଥିଲା।
