ସୀତାରାମ ଅଗ୍ରୱାଲ
ଚିଲିକା: ବିରଳ ଫିସିଂ କ୍ୟାଟ୍ ର ମୃତଦେହ ଉଦ୍ଧାର ହୋଇଛି। ଚିଲିକା ବ୍ଲକ ଚଣ୍ଡେଶ୍ୱର ପଂଚାୟତ ଦାରୁଗାଁ ଗ୍ରାମ ନିକଟ ଧାନ ଗହୀରରୁ ମୃତ ଦେହ ଉଦ୍ଧାର ହୋଇଛି। ଏହି ଫିସିଂ କ୍ୟାଟର ମୃତ ଦେହ ଏକ ପୁରୁଷ ପ୍ରଜାତି ଫିସିଂ କ୍ୟାଟ୍ ବୋଲି ଜଣା ପଡିଛି।
ସ୍ଥାନୀୟ ଯୁବକମାନେ ଗାଁ ନିକଟସ୍ଥ ପୋଖରୀକୁ ଶୌଚ ହେବାକୁ ଯାଇଥିବା ବେଳେ ଏହି ଫିସିଂ କ୍ୟାଟ୍ କୁ ଦେଖିଥିଲେ। ଫିସିଂ କ୍ୟାଟ୍ କୁ କୌଣସି ଦୁର୍ବୃତ୍ତ ବାଡେଇ ବାଡେଇ ମାରି ଦେଇଥିବା ଅନୁମାନ କରାଯାଉଛି। ଏପର୍ଯ୍ୟନ୍ତ ଫିସିଂ କ୍ୟାଟ୍ ର ମୃତଦେହ ସେଠାରେ ପଡି ରହିଛି। ଯାହାକୁ ନେଇ ପ୍ରାଣୀ ପ୍ରେମୀ ମାନେ ଚିନ୍ତା ପ୍ରକଟ କରିଛନ୍ତି।
ଫିସିଂ କ୍ୟାଟ୍ ର ସଂଖ୍ୟା ଦିନକୁ ଦିନ କମ୍ ହେବାରେ ଲାଗିଛି। ଫିସିଂ କ୍ୟାଟ୍ କେବଳ ଏବେ ଚିଲିକାର ଉପକୂଳରେ ଦେଖା ଯାଉଛନ୍ତି। ଫିସିଂ କ୍ୟାଟ୍ ମାଛ ଖାଇ ବଂଚୁଥିବାରୁ ସେମାନଙ୍କ ସଂଖ୍ୟା ଓଡିଶାର ବିଭିନ୍ନ ସ୍ଥାନରୁ ବିଲୁପ୍ତ ହୋଇଗଲେଣି। ତେଣୁ ଏହାର ସୁରକ୍ଷା ପାଇଁ ବିଭିନ୍ନ ସଂଗଠନ କାର୍ଯ୍ୟ କରୁଥିବା ବେଳେ ସେହି ସଂଗଠନର କାର୍ଯ୍ୟ କେବଳ କାଗଜ ପତ୍ରରେ ଥିବା ଦେଖିବାକୁ ମିଳିଛି। ତେଣୁ ଏହି ବିରଳ ପ୍ରଜାତିର ଫିସିଂ କ୍ୟାଟର ସୁରକ୍ଷା ଜରୁରୀ ହୋଇ ପଡିଛି।
