ସୀତାରାମ ଅଗ୍ରୱାଲ
ବାଣପୁର: ଆଜି ପବିତ୍ର ସପ୍ତମୀ ପରିପ୍ରେକ୍ଷୀରେ ବଡ଼ି ଭୋରରେ ବାଣପୁରସ୍ଥିତ ପ୍ରସିଦ୍ଧ ମା’ ଭଗବତୀ ମନ୍ଦିର ଦର୍ଶନ କରିଛନ୍ତି ବିଜେପି ରାଷ୍ଟ୍ରୀୟ ପ୍ରବକ୍ତା ଡ଼ା ସମ୍ବିତ ପାତ୍ର। ଶ୍ରୀ ପାତ୍ର ସକାଳୁ ମା’ ଙ୍କ ଦର୍ଶନ କରିବା ସହ ଆଶୀର୍ବାଦ ଲୋଡିଛନ୍ତି। ସେ ମନ୍ଦିର ପରିସରରେ କିଛି ସମୟ ଅତିବାହିତ କରିବା ସହ ସେଠାରେ ଜାରି ରହିଥିବା ବାସନ୍ତିକ ନବରାତ୍ରି ବିଶ୍ଵଶାନ୍ତି ମହାଯଜ୍ଞ ସ୍ଥଳ ପରିକ୍ରମା କରିଥିଲେ।
ଆଧ୍ୟାତ୍ମିକ ଚିନ୍ତନରେ ବିଶ୍ୱାସ ରଖୁଥିବା ଶ୍ରୀ ପାତ୍ର ଏହି ନବରାତ୍ରିରେ ନବ ଦିନ ଉପବାସ କରୁଥିବାର ଜଣାପଡିଛି l ଜଣେ ବିଚକ୍ଷଣ ରାଜନେତା ସମେତ ନିଜର ବାକଚତୁରିରେ ବିରୋଧିଙ୍କୁ ଧରାଶାୟୀ କରି ପାରୁଥିବା ଶ୍ରୀ ପାତ୍ର ଆଗାମୀ ପୁରୀ ଲୋକସଭା ନିର୍ବାଚନ ପାଇଁ ସମସ୍ତ ସାତଗୋଟି ନିର୍ବାଚନମଣ୍ଡଳିରେ ନିରନ୍ତର ସଂଗଠନ ଜାରି ରଖିଥିବାର ଦେଖିବାକୁ ମିଳୁଛି।
ଆନୁଷ୍ଠାନିକ ଭାବେ ଘୋଷଣା ନହେଲେ ସୁଦ୍ଧା ଚଳିତ ସାଧାରଣ ନିର୍ବାଚନରେ ପୁରୀ ଲୋକସଭା କ୍ଷେତ୍ରରୁ ଡ଼ା ସମ୍ବିତ ପାତ୍ର ପୁନଶ୍ଚ ବିଜେପି ପ୍ରାର୍ଥୀ ହେବେ ବୋଲି ଏକ ପ୍ରକାର ନିଶ୍ଚିତ। ତେବେ ଶ୍ରୀ ପାତ୍ର ଗତ ଲୋକସଭା ନିର୍ବାଚନରେ ଖୁବ କମ ଭୋଟରେ ବିଜେଡି ପ୍ରାର୍ଥୀ ପିନାକୀ ମିଶ୍ରଙ୍କ ଠାରୁ ପରାସ୍ତ ହେବା ପରେ ବିଗତ ଚାରିବର୍ଷ ଧରି ପୁରୀ ସଂସଦୀୟ କ୍ଷେତ୍ରରେ ଅହରହ ସଂଗଠନ କରି ଆସୁଛନ୍ତି।