ବାଣପୁର (ସୀତାରାମ ଅଗ୍ରୱାଲ): ଏକତା ପରିଷଦ ଟ୍ରଷ୍ଟ ପକ୍ଷରୁ ଆଦିବାସୀ ମାଆମାନଙ୍କ ସୁରକ୍ଷା ଅଧିକାର ନିମିତ୍ତ ଏକ ଆଇନ ସମ୍ପର୍କିତ କର୍ମଶାଳା ବାଣପୁର ନିକଟସ୍ଥ ଉତ୍ତରାୟଣୀ ମନ୍ଦିର ପ୍ରାଙ୍ଗଣରେ ଅନୁଷ୍ଠିତ ହୋଇଯାଇଛି। ଏକତା ପରିଷଦର ପ୍ରତିଷ୍ଠାତା ସଦସ୍ୟା ଓ ପରିଚାଳିକା ସନ୍ଧ୍ୟାରାଣୀ ଦେବୀ କର୍ମଶାଳାର ସଭା ପରିଚାଳନା କରିଥିବା ବେଳେ ବାଣପୁର ସମନ୍ଵିତ ଶିଶୁ ବିକାଶ ଅଧିକାରୀ ସୁଜାତା ତ୍ରିପାଠୀ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ।
ସମ୍ମାନିତ ଅତିଥି ଭାବେ ସରସ୍ବତୀ ପ୍ରଧାନ, ଟୁନି ଦାସ, ସବିତା ପ୍ରଧାନ ଯୋଗ ଦେଇ ମହିଳା ମାନଙ୍କ ଅଧିକାର ସମ୍ପର୍କରେ ଆଲୋକ ପାତ କରିଥିଲେ। ଅତିଥି ମାନେ ସମାଜରେ ଆଦିବାସୀ ମହିଳା ଓ ଶିଶୁ ସେମାନଙ୍କ ଅଧିକାର ସମ୍ପର୍କରେ ବର୍ତ୍ତମାନ ସୁଦ୍ଧା ସଚେତନ ନଥିବାରୁ ସେମାନେ ଅବହେଳିତ ହୋଇ ରହୁଛନ୍ତି। ସରକାରଙ୍କ ପ୍ରଦତ୍ତ ଆଇନ ସେମାନଙ୍କ ସୁରକ୍ଷା ପାଇଁ କଣ ପ୍ରଣିଧାନ ଅଛି ମୁଖ୍ୟ ଅତିଥି ତାହାକୁ ଆଦିବାସୀ ମହିଳା ମାନଙ୍କ ଆଗରେ ପରିପ୍ରକାଶ କରିଥିଲେ।
ଏହି ପରିପ୍ରେକ୍ଷୀରେ ଆଦିବାସୀ ମାନଙ୍କର ଅଧିକାର ଓ ଆଇନ ସମ୍ପର୍କରେ ଦୀର୍ଘ ୨୦ବର୍ଷ ଧରି ଏକତା ପରିଷଦ ଏ ଅଞ୍ଚଳରେ କାର୍ଯ୍ୟକରି ଆସୁଥିବାରୁ ଅତିଥି ମାନେ ଟ୍ରଷ୍ଟକୁ ସାଧୁବାଦ ଜଣାଇଥିଲେ। ଦୀର୍ଘ କୋଡିଏ ବର୍ଷ ଧରି ନିରନ୍ତର ସେବାର ଅବତାରଣା କରି ଆଗକୁ ଆଦିବାସୀ ମହିଳା ଓ ଶିଶୁ ମାନଙ୍କର ସମସ୍ତ ଅସୁବିଧାକୁ ସରକାରଙ୍କ ପାଖରେ ଉପସ୍ଥାପନ କରିବାକୁ ଏକତା ପରିଷଦ ବଦ୍ଧପରିକର ବୋଲି ସନ୍ଧ୍ୟାରାଣୀ ଦେବୀ ମତ ପ୍ରକାଶ କରିଥିଲେ।