ବାଲୁଗାଁ: ଦିନକୁଦିନ ଗ୍ରୀଷ୍ମପ୍ରବାହ ବୃଦ୍ଧି ପାଉଥିବା ବେଳେ ଜନସାଧାରଣ ତଥା ପଥଚାରୀଙ୍କୁ ସାମାନ୍ୟ ତୃଷ୍ଣା ମେଣ୍ଟେଇବା ପାଇଁ ବାଲୁଗାଁ ବିଜ୍ଞାପିତ ଅଞ୍ଚଳ ପରିଷଦ ଅନ୍ତର୍ଗତ ବିଭିନ୍ନ ସ୍ଥାନରେ ପାନୀୟ ଜଳ ବ୍ୟବସ୍ଥା କରାଯାଉଛି। ଏନଏସି ଅନ୍ତର୍ଗତ ସୋମନାଥ ବସ ଷ୍ଟାଣ୍ଡ, ଚିଲିକା କୁଳ ଜେଟି, ମାଛ ମାର୍କେଟ, ଉମାମହେଶ୍ୱର ମନ୍ଦିର ନିକଟ, ବାଣପୁର ରୋଡ଼, କଲ୍ୟାଣମଣ୍ଡପ ନିକଟରେ ସର୍ବସାଧାରଣ ତଥା ପଥଚାରୀଙ୍କ ନିମିତ୍ତ ଜଳଛତ୍ର ମାନ ଖୋଲାଯାଇଥିବା ବେଳେ ପଶୁପକ୍ଷୀଙ୍କ ନିମିତ୍ତ ସୋମନାଥ ବସ ଷ୍ଟାଣ୍ଡ, ଅଡିଟୋରୀୟମ ହଲ, ଚିଲିକା କୁଳ, ଉମାମହେଶ୍ୱର ମନ୍ଦିର ନିକଟ, ରାମପୁର ଛକ ଆଦି ସ୍ଥାନରେ ୭ ଗୋଟି ପାନୀୟଜଳ ଷ୍ଟାଣ୍ଡ କରାଯାଇଛି।
ଉକ୍ତ ଜଳଛତ୍ର କେନ୍ଦ୍ର ଗୁଡିକୁ ଏନଏସି ଅଧ୍ୟକ୍ଷା ସୁକାନ୍ତି ପାଇକରାୟ ଉଦଘାଟନ କରିଥିବା ବେଳେ ଉପାଧ୍ୟକ୍ଷ ଭଗବାନ ପ୍ରଧାନ, ଆଇନ ମନ୍ତ୍ରୀଙ୍କ ପ୍ରତିନିଧି ସ୍ୱପ୍ନା ବଡ଼ଜେନା, ସମସ୍ତ କାଉନସିଲର, ଏନଏସି ଅଧ୍ୟକ୍ଷା ପ୍ରତିନିଧି ସନ୍ତୋଷ ପାଇକରାୟ, ଏନଏସି କାର୍ଯ୍ୟନିର୍ବାହୀ ଅଧିକାରୀ ପ୍ରାଣନାଥ ସେଠ, ସମସ୍ତ ପରିଷଦ କର୍ମଚାରୀ ପ୍ରମୁଖ ଉପସ୍ଥିତ ଥିଲେ। ଆଜିଠାରୁ ଖରାର ପ୍ରକୋପ ହ୍ରାସ ନହେବା ପର୍ଯ୍ୟନ୍ତ ସମସ୍ତ ଜଳଛତ୍ର କେନ୍ଦ୍ର ଗୁଡିକ ସୁଚାରୁରୂପେ ପରିଚାଳିତ ହେବାନେଇ ଏନଏସି ଅଧ୍ୟକ୍ଷା ଶ୍ରୀମତୀ ପାଇକରାୟ କହିଛନ୍ତି।