ଚିଲିକା: ଆଜି ସ୍ବାସ୍ଥ୍ୟ ସେବା କ୍ଷେତ୍ରରେ ଐତିହାସିକ ପଦକ୍ଷେପ ସୂରୁପ କଟକ ବାଲିଯାତ୍ରା ପଡ଼ିଆ ଠାରେ କେନ୍ଦ୍ର ସ୍ବାସ୍ଥ୍ୟ ମନ୍ତ୍ରୀ ଜଗତ ପ୍ରକାଶ ନଡ୍ଡା ଓ ମୁଖ୍ୟମନ୍ତ୍ରୀ ମୋହନ ଚ଼ରଣ ମାଝୀଙ୍କ ଦ୍ବାରା ଆୟୁଷ୍ମାନ ଭାରତ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା, ଗୋପବନ୍ଧୁ ଜନ ଆରୋଗ୍ୟ ଯୋଜନା ଓ ଆୟୁଷ୍ମାନ ଭାରତ ବୟୋବନ୍ଦନା ଯୋଜନାର ଶୁଭାରମ୍ଭ କରିଛନ୍ତି।
ଏହି ପରିପ୍ରେକ୍ଷୀରେ ଚ଼ିଲିକା ବିଧାନସଭା କ୍ଷେତ୍ରର ସାତ ଗୋଟି ସ୍ଥାନରେ ଉକ୍ତ ଯୋଜନାର ଶୁଭାରମ୍ଭ ହୋଇଯାଇଛି। ଚିଲିକା ବ୍ଲକର ଚାରି ଗୋଟି ସ୍ଥାନ ଏବଂ ବାଣପୁର ବ୍ଲକର ତିନି ଗୋଟି ସ୍ଥାନରେ ଉକ୍ତ ଶୁଭାରମ୍ଭ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଚିଲିକା ବ୍ଲକର ଜରିପଡ଼ା ପଞ୍ଚାୟତ ଅନ୍ତର୍ଗତ ଦାଶରଥି ଉଚ୍ଚ ବିଦ୍ୟାଳୟରେ, ଚାଷଙ୍ଗରା ପଞ୍ଚାୟତର ବୋରିଆ ସାହି ବାତ୍ୟା ଆଶ୍ରୟସ୍ଥଳି, ସାନନଈରୀ ପଞ୍ଚାୟତର ସାନନଈରୀ ବାତ୍ୟା ଆଶ୍ରୟସ୍ଥଳି ଏବଂ ସୋରଣ ପଞ୍ଚାୟତର ବେଣାଗଡିଆ ବାତ୍ୟା ଆଶ୍ରୟସ୍ଥଳି ରେ ଉକ୍ତ ଯୋଜନାର ଶୁଭାରମ୍ଭ ହୋଇଯାଇଛି। ଦାଶରଥି ଉଚ୍ଚ ବିଦ୍ୟାଳୟରେ ଅତିଥି ଭାବେ ଚିଲିକା ବ୍ଲକ ଅଧ୍ୟକ୍ଷା ଜ୍ୟୋତ୍ସ୍ନା ବେହେରା, ବିଡିଓ ପୁନମ ମହାପାତ୍ର,ଖୋର୍ଦ୍ଧା ଉପଜିଲ୍ଲାପାଳ କିଶୋର କୁମାର ପଣ୍ଡା ଯୋଗଦେଇଥିବା ବେଳେ ବୋରିଆ ସାହି ବାତ୍ୟା ଆଶ୍ରୟସ୍ଥଳିରେ ଅତିଥିଭାବେ ମନ୍ତ୍ରୀଙ୍କ ନିର୍ଦେଶକ୍ରମେ ପୂର୍ବତନ ଜିଲ୍ଲା ପରିଷଦ ସଭ୍ୟ ସୁମନ୍ତ ପଟ୍ଟନାୟକ, ଦିଲ୍ଲୀପ ପଟ୍ଟନାୟକ, ଚିଲିକା ତହସିଲଦାର କାଁହୁଚରଣ ଘଡେଇ, ବାଲୁଗାଁ ଏନଏସି ଅଧ୍ୟକ୍ଷା ସୁକାନ୍ତି ପାଇକରାୟ,ଏନଏସି କାର୍ଯ୍ୟନିର୍ବାହୀ ଅଧିକାରୀ ପ୍ରାଣନାଥ ସେଠ ଯୋଗଦେଇଥିଲେ।
ଅନୁରୂପଭାବେ ବେଣାଗଡିଆ ବାତ୍ୟା ଆଶ୍ରୟସ୍ଥଳିରେ ଅତିଥିଭାବେ ଚିଲିକା ବ୍ଲକ ଉପାଧ୍ୟକ୍ଷ ଅରୁଣ ପଟ୍ଟନାୟକ ଏବଂ ସାନନଈରୀ ବାତ୍ୟା ଆଶ୍ରୟସ୍ଥଳିରେ ଅତିଥିଭାବେ ପୁରୀ ସାଂସଦଙ୍କ ପ୍ରତିନିଧି ଦୀନବନ୍ଧୁ ସାହୁ ଏବଂ ବାଲୁଗାଁ ମେଡିକାଲ ଅଧିକାରୀ ଡାକ୍ତର ସଂଗ୍ରାମ ସାହୁ ଯୋଗଦେଇ ହିତାଧିକାରୀଙ୍କୁ ନୂତନ ସ୍ୱାସ୍ଥ୍ୟ କାର୍ଡ ପ୍ରଦାନ କରିଥିଲେ। ଉକ୍ତ ଚାରି ଗୋଟି ସ୍ଥାନରେ ସମୁଦାୟ ଦଶ ଜଣ ଲେଖାଏଁ ଚାଳିଶି ଜଣ ହିତାଧିକାରୀଙ୍କୁ ଉକ୍ତ କାର୍ଡ ପ୍ରଦାନ କରାଯାଇଥିଲା।
ସେହିପରି ଭାବେ ବାଣପୁର ବ୍ଲକର ତିନି ଗୋଟି ସ୍ଥାନ ଯଥାକ୍ରମେ ହଳନ୍ଦା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର, ନୀଳାଦ୍ରିପ୍ରସାଦ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ଏବଂ ସୁନାଖେଳା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ର ନିକଟସ୍ଥ ନାଚୁଣୀ ଗୋଦାବରୀଶ ଉଚ୍ଚ ବିଦ୍ୟାଳୟ ପଡିଆରେ ଉକ୍ତ ଯୋଜନାର ଶୁଭାରମ୍ଭ ହୋଇଯାଇଛି। ହଳନ୍ଦା ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଅତିଥିଭାବେ ସମାଜସେବୀ ଦୁଷ୍ମନ୍ତ ହରିଚନ୍ଦନ,ପୁରୀ ସାଂସଦଙ୍କ ପ୍ରତିନିଧି ଜଗନ ପାଟ୍ଟଶାଣୀ, ବାଣପୁର ବ୍ଲକ ଏବିଡ଼ିଓ ଯୋଗେନ୍ଦ୍ର ମହାକୁଳ, ବାଣପୁର ଏନଏସି କାର୍ଯ୍ୟନିର୍ବାହୀ ଅଧିକାରୀ ନିଗମାନନ୍ଦ ନନ୍ଦ ଯୋଗଦେଇଥିବା ବେଳେ ନୀଳାଦ୍ରିପ୍ରସାଦ ପ୍ରାଥମିକ ସ୍ୱାସ୍ଥ୍ୟକେନ୍ଦ୍ରରେ ଅତିଥିଭାବେ ସମାଜସେବୀ ଜିତେନ୍ଦ୍ର ଭୋଳ, ଆଇନ ମନ୍ତ୍ରୀଙ୍କ ପ୍ରତିନିଧି ଦିଲ୍ଲୀପ ହୋତା, ତହସିଲଦାର ଟି.ପଦ୍ମନାଭ ଦୋରା,ସ୍ଥାନୀୟ ସରପଞ୍ଚ, ସମିତିସଭ୍ୟ ଆଦି ଯୋଗଦେଇଥିଲେ।
ସେହିପରି ଭାବେ ନାଚୁଣୀ ଗୋଦାବରୀଶ ଉଚ୍ଚ ବିଦ୍ୟାଳୟରେ ଅତିଥିଭାବେ ପୂର୍ବତନ ଚିଲିକା ବିଧାୟକ ଡାକ୍ତର ବିଭୁତି ଭୂଷଣ ହରିଚନ୍ଦନ, ବାଣପୁର ବିଡ଼ିଓ ଶୀତଲ ଅଗ୍ରୱାଲ, ବାଣପୁର ମେଡିକାଲ ଅଧିକାରୀ ଡାକ୍ତର ସଞ୍ଜୟ ମହାନ୍ତି ଆଦି ଯୋଗଦେଇ ହିତାଧିକାରୀଙ୍କୁ ନୂତନ କାର୍ଡ ପ୍ରଦାନ କରିଥିଲେ। ଉକ୍ତ ଚତିନି ଗୋଟି ସ୍ଥାନରେ ସମୁଦାୟ ଦଶ ଜଣ ଲେଖାଏଁ ତିରିଶି ଜଣ ହିତାଧିକାରୀଙ୍କୁ ଉକ୍ତ କାର୍ଡ ପ୍ରଦାନ କରାଯାଇଥିଲା। ସମସ୍ତ ସ୍ଥାନରେ ସ୍ୱାସ୍ଥ୍ୟ ଚେତନା ରଥର ଶୁଭାରମ୍ଭ ହୋଇଥିଲା ଯାହାକି ଗ୍ରାମ ଗ୍ରାମ ବୁଲି ସଚେତନ କରିବ।