ବାଣପୁର: ବୁଧବାର ପୂର୍ବାହ୍ନରେ ବାଣପୁର ବ୍ଲକ ସଭାଗୃହରେ ମହାତ୍ମାଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନାର ଏକ ସାମାଜିକ ସମିକ୍ଷା ବୈଠକ ଓ ସାଧାରଣ ଜନଶୁଣାଣୀ ଅନୁଷ୍ଠିତ ହୋଇଯାଇଛି। ବୈଠକରେ ବ୍ଲକ ଅଧ୍ୟକ୍ଷ ଅମରେନ୍ଦ୍ର ରଣସିଂହ, ଜିଲ୍ଲା ଉପାଧ୍ୟକ୍ଷ ଗୋପୀନାଥ ମହାରଣା, ଅତିରିକ୍ତ ପ୍ରକଳ୍ପ ନିର୍ଦେଶକ କସ୍ତୁରୀବାଳା ଜେନା, ଭାରପ୍ରାପ୍ତ ବିଡ଼ିଓ ଟି. ପଦ୍ମନାଭ ଦୋରା, ମନରେଗା ସଂଯୋଜିକା ଜ୍ୟୋସ୍ନାମୟୀ ରାଉତ ଜିଲ୍ଲା ସାମାଜିକ ଅଡିଟର ପ୍ରଦୋଷ ମହାରଣା ଉପସ୍ଥିତ ରହି ଜଣାଶୁଣାଣି କରିଥିଲେ। ବିଗତ ବର୍ଷର ବିଭିନ୍ନ କାର୍ଯ୍ୟର ଅଗ୍ରଗତି ଓ ଶ୍ରମିକ ପ୍ରାପ୍ୟ ଉପରେ ଆଲୋଚନା କରାଯାଇ ବିଭିନ୍ନ କାର୍ଯ୍ୟର ସମୀକ୍ଷା କରାଯାଇଥିଲା। ଉକ୍ତ ଯୋଜନାରେ ବିଭିନ୍ନ ଗ୍ରାମ ପଞ୍ଚାୟତକୁ ଆସିଥିବା ୨୩ଗୋଟି ଅମୃତ ସରୋବରରୁ କେବଳ ଗୋଟିଏ ପୋଖରୀର କାର୍ଯ୍ୟ ସମାପ୍ତ ହୋଇଥିବା ବେଳେ ଅନ୍ୟ ପୋଖରୀ ଗୁଡିକର କାର୍ଯ୍ୟ ସମାପ୍ତ ହୋଇନଥିବା ଜଣାପଡିଛି।
ତେବେ କାର୍ଯ୍ୟ କରିଥିବା ବ୍ୟକ୍ତି ମାନେ ସେମାନଙ୍କ ପ୍ରାପ୍ୟ ପାଇନଥିବାରୁ ବୈଠକରେ ଯୁକ୍ତିତର୍କ ହୋଇଥିବାର ଜଣାପଡିଛି। ପଞ୍ଚାୟତ ସମିତି ଅଧୀନରେ ଭେଟେଶ୍ୱର ପଞ୍ଚାୟତଶ୍ରମିକ ମାନଙ୍କ ନିମନ୍ତେ ଅଧିକ କାର୍ଯ୍ୟ ଦିବସ ସୃଷ୍ଟି କରିଥିବାରୁ ବୈଠକରେ ସରପଞ୍ଚ ସାବିତ୍ରୀ ଭୋଳଙ୍କୁ ପୁରସ୍କାର ପ୍ରଦାନ କରଯାଇଥିଲା। ମହାତ୍ମାଗାନ୍ଧୀ ନିଶ୍ଚିତ କର୍ମ ନିଯୁକ୍ତି ଯୋଜନାରେ କାର୍ଯ୍ୟକ୍ଷମ ହେବାକୁ ଥିବା ବର୍ଷା ଦିନିଆ ପ୍ରକଳ୍ପ ଗୁଡିକୁ ଶୀଘ୍ର ଶେଷ କରିବାକୁ ବୈଠକରେ ପ୍ରାଥମିକତା ଦିଆଯାଇଥିଲା ।ଏହି ବୈଠକରେ ସମସ୍ତ ସରପଞ୍ଚ, ସମିତି ସଭ୍ଯ, କନିଷ୍ଠ ଯନ୍ତ୍ରୀ, ପଞ୍ଚାୟତ ନିର୍ବାହୀ ଅଧିକାରୀ ଓ ଜିଆରଏସ ମାନେ ଉପସ୍ଥିତ ଥିଲେ।