ବାଲୁଗାଁ: ବାଣପୁର ବାଲୁଗାଁ ରୋଟାରୀ କ୍ଳବର ନୂତନ କର୍ମକର୍ତ୍ତା ମାନଙ୍କ ଅଧିଷ୍ଠାନ ଉତ୍ସବ ବାଲୁଗାଁ ଅଶୋକ ନଗରସ୍ଥିତ ଶ୍ରୀ ଶ୍ରୀ ଉମାମହେଶ୍ବର ବଣିକ ସଙ୍ଘ ସଭାଗୃହରେ ଏକ ବର୍ଣ୍ଣାଢ୍ୟ ପରିବେଶରେ ପାଳନ କରା ଯାଇଥିଲା। ଅତିଥି ଭାବେ ଆଇନ, ଅବକାରୀ ଓ ପୂର୍ତ୍ତ ମନ୍ତ୍ରୀ ପୃଥିରାଜ ହରିଚନ୍ଦନ, ପ୍ରାକ୍ତନ ରୋଟାରୀ ପ୍ରାନ୍ତପାଳ ଦିଲ୍ଲୀପ କୁମାର ପଟ୍ଟନାୟକ ଓ ସହକାରୀ ପ୍ରାନ୍ତପାଳ ପ୍ରବୀର କୁମାର ପୃଷ୍ଟିଙ୍କ ଉପସ୍ଥିତିରେ ପୂର୍ବତନ ସଭାପତି ଶ୍ୟାମ ସୁନ୍ଦର ପୃଷ୍ଟିଙ୍କ ଠାରୁ ଚଳିତ ବର୍ଷର ସଭାପତି ସୁନୀଲ କୁମାର ପାତ୍ର ଦାୟିତ୍ୱ ଗ୍ରହଣ କରିଥିବା ବେଳେ ପୂର୍ବ ସଂପାଦକ ଅଶୋକ କୁମାର ନାୟକଙ୍କ ଠାରୁ ନୂତନ ସଂପାଦକ ହିମାଂଶୁ କୁମାର ପାତ୍ର ନେବା ଅବସରରେ ଚଳିତ ବର୍ଷ କ୍ଳବ ପକ୍ଷରୁ କରାଯିବାକୁ ଥିବା ସମସ୍ତ କାର୍ଯ୍ୟକ୍ରମ ବିଷୟରେ ଅବଗତ କରାଇ ଥିଲେ।
ମନ୍ତ୍ରୀ ଶ୍ରୀ ହରିଚନ୍ଦନ ତାଙ୍କର ଭାଷଣରେ ରୋଟାରୀ କ୍ଳବ ଖାଲି ରାଜ୍ୟରେ ନୁହେଁ କି ଦେଶରେ ନୁହେଁ ସାରା ବିଶ୍ବ ସ୍ତରରେ ସମାଜରେ ନିହାତି ଆବଶ୍ୟକ ଥିବା କାର୍ଯ୍ୟକ୍ରମ ମାନ କରିବାରେ ପ୍ରମୂଖ ଭୂମିକା ଗ୍ରହଣ କରିଥିବା ବିଷୟ କହିବା ସହିତ ଯେତେବେଳେ ଯେ, କୌଣସି ସମୟରେ କୌଣସି ଆବଶ୍ୟକ ପଡେ ତେବେ ମହାଶୟ ସବୁବେଳେ ରୋଟାରୀ ସହିତ ଅଛନ୍ତି ବୋଲି ପ୍ରକାଶ କରିଥିଲେ। ଅନ୍ୟତମ ଅତିଥି ପ୍ରାକ୍ତନ ପ୍ରାନ୍ତପାଳ ରୋଟାରୀର ଆଭିମୁଖ୍ୟ ତଥା ସମାଜ ପାଇଁ କରାଯାଉଥିବା କାର୍ଯ୍ୟକ୍ରମ ବିଷୟ ସବୁକୁ ଅତି ପ୍ରାଞ୍ଜଳ ଭାବେ ବର୍ଣ୍ଣନା କରିଥିଲେ।
କ୍ଳବ ପକ୍ଷରୁ ଅତିଥି ମାନେ ଭିନ୍ନକ୍ଷମ ମାନଙ୍କୁ ତିନି ଚକିଆ ଗାଡି ପ୍ରଦାନ କରିଥିଲେ, ବାଣପୁର ଓ ଚିଲିକା ବ୍ଳକ ସ୍ତରରେ ଗତ ହାଇସ୍କୁଲ ସାର୍ଟିଫିକେଟ୍ ପରୀକ୍ଷାରେ ସର୍ବାଧିକ ନମ୍ବର ରଖି କୃତକାର୍ଯ୍ୟ ହୋଇଥିବା ଦୁଇ ଝିଅଙ୍କୁ ଓ ଗତ ବର୍ଷ ସିବିଏସଇ ଦଶମ ପରୀକ୍ଷାରେ ଓଡିଶାରେ ପ୍ରଥମ ସ୍ଥାନ ଅଧିକାର କରିଥିବା ବାଲୁଗାଁର ଜଣେ ଛାତ୍ର କେ ସ୍ବୟଂ ପ୍ରସାଦ ପାତ୍ରଙ୍କୁ ମେଡାଲ ପ୍ରଦାନ କରିବା ସହିତ ବାଣପୁର ଓ ବାଲୁଗାଁ ଏନ ଏ ସି ରେ ନିଜ କର୍ତ୍ତବ୍ୟକୁ ସୂଚାରୁ ରୂପେ ସମ୍ପାଦନ କରିଥିବା ଚାରି ଜଣ ସ୍ବଚ୍ଛ ସାଥିଙ୍କୁ ସମ୍ବର୍ଦ୍ଧିତ କରିଥିଲେ।
ସେହିପରି ବାଲୁଗାଁ ଓ ବାଣପୁର ଥାନାର ଦୁଇ ଜଣ ହୋମଗାର୍ଡଙ୍କୁ ମଧ୍ୟ ସେମାନଙ୍କ କର୍ତ୍ତବ୍ୟ ପାଇଁ ସମ୍ମାନିତ କରିଥିଲେ।
ଉକ୍ତ ଉତ୍ସବରେ ଅତିଥି ମାନଙ୍କ ଉପସ୍ଥିତିରେ ନୂତନ ଭାବେ ଛ’ ଜଣ ସଭ୍ୟ ପଦ ଗ୍ରହଣ କରିଥିଲେ। ରବୀନ୍ଦ୍ରନାଥ ପ୍ରଧାନ ଓ ଧୀରେନ୍ଦ୍ରନାଥ ପାତ୍ରଙ୍କ ସମ୍ପାଦିତ କ୍ଳବ ବୁଲେଟିନ୍ “ସାଳିଆ” ଅତିଥି ମାନଙ୍କ ଦ୍ବାରା ଉନ୍ମୋଚନ କରାଯାଇଥିଲା। ଉତ୍ସବକୁ ଡ. ସୁନୀଲ କୁମାର ପଟ୍ଟନାୟକ ସମ୍ପାଦନ କରିଥିବା ବେଳେ ରବିନାରାୟଣ ନାୟକ ସ୍ବାଗତ ଭାଷଣ ଦେଇଥିଲେ। ଜଗଦୀଶ ପ୍ରସାଦ ଲାଖୋଟିଆ, ମନୋରଞ୍ଜନ ବାରିକ, ସତୀଶ କୁମାର ସୁବୁଦ୍ଧି ପ୍ରମୂଖ ଅତିଥି ମାନଙ୍କର ପରିଚୟ ପ୍ରଦନ କରିଥିଲେ, ନୂତନ ସଭ୍ୟମାନଙ୍କ ବିଷୟରେ ଡ. ଚିନ୍ତାମଣି ମିଶ୍ର ଉପସ୍ଥାପନ କରିଥିଲେ। କୃତୀ ଛାତ୍ର ଛାତ୍ରୀଙ୍କ ବିଷୟରେ ଗଗନ ବିହାରୀ ବେହେରା ଉପସ୍ଥାପନ କରିଥିଲେ, ସମସ୍ତ କାର୍ଯ୍ୟକ୍ରମକୁ ପରିଚାଳନା କରିବାରେ କ୍ଳବର ବରିଷ୍ଠ ସଭ୍ୟ ବିଜୟ କୁମାର ନନ୍ଦ, ଡାକ୍ତର ଯୋଗୀନ୍ଦ୍ର ସେନାପତି, ନନ୍ଦକିଶୋର ମିଶ୍ର, ସୁରେଶ ଚନ୍ଦ୍ର ବେହେରା, ରବିନାରାୟଣ ପାଲ, ଅଶୋକ କୁମାର ପାତ୍ର ପ୍ରମୂଖ ସମ୍ପୂର୍ଣ୍ଣ ଭାବରେ ସହଯୋଗ କରିଥିଲେ।
ଧନ୍ୟବାଦ୍ ପ୍ରସ୍ତାବରେ କ୍ଳବ ପକ୍ଷରୁ କରାଯାଇଥିବା ଭଦ୍ରୋଚିତ ଅନୁରୋଧ ରକ୍ଷାକରି ନିଜର ମୂଲ୍ୟବାନ ସମୟ ଦେଇ ମାନ୍ୟବର ଅତିଥି ମହୋଦୟ ମାନେ ଯୋଗଦାନ କରିଥିବା ସହିତ ବିଭିନ୍ନ କ୍ଳବର ରୋଟାରୀଆନ ବନ୍ଧୁ ମାନେ, ବିଭିନ୍ନ ବର୍ଗରେ ପୁରସ୍କୃତ ହୋଇଥିବା ବ୍ୟକ୍ତି ବିଶେଷ ତଥା ପରିବାର ସଦସ୍ୟମାନଙ୍କୁ କ୍ଳବ ପକ୍ଷରୁ ଧୀରେନ୍ଦ୍ରନାଥ ପାତ୍ର ହାର୍ଦ୍ଦିକ ଧନ୍ୟବାଦ୍ ଅର୍ପଣ କରିଥିଲେ।