ବାଣପୁର: ଖୋର୍ଦ୍ଧା ଜିଲ୍ଲା ବାଣପୁର ବଜାର ଚିଆଙ୍କ ସାହି ଛକରେ ଥିବା ଏକ ମେଡ଼ିସିନ ଦୋକାନରେ ସଟସର୍କିଟ ଯୋଗୁଁ ଅଗ୍ନିକାଣ୍ଡ ଘଟି ଲକ୍ଷାଧିକ ଟଙ୍କାର ମେଡ଼ିସିନ ଜଳିପୋଡ଼ି ପାଉଁଶ ହୋଇଯାଇଛି। ସୂଚନା ମୁତାବକ ବାଣପୁର ବ୍ଲକ ବରଡ଼ି ଗ୍ରାମର ଶ୍ରୀଧର ପଟ୍ଟନାୟକ ଦୀର୍ଘ ବର୍ଷ ହେଲା ବାଣପୁର ବଜାର ଚିଆଙ୍କ ସାହି ଛକରେ ‘ମାମାଲି ଆଣ୍ଡ ଗୁଡୁଲୀ’ ନାମକ ଏକ ମେଡ଼ିସିନ ଷ୍ଟୋର କରିଛନ୍ତି। ତେବେ ଅଚାନକ ଗତକାଲି ବିଳମ୍ବିତ ରାତ୍ରିରେ ଉକ୍ତ ମେଡ଼ିସିନ ଷ୍ଟୋରରେ ସଟସର୍କିଟ ହୋଇ ଅଗ୍ନିକାଣ୍ଡ ଘଟିଥିଲା। ଖବର ପାଇ ମେଡ଼ିସିନ ଷ୍ଟୋର ମାଲିକ ଶ୍ରୀ ପଟ୍ଟନାୟକ ଦୋକାନ ଆସି ଦେଖିଲା ବେଳକୁ ସମସ୍ତ ମେଡ଼ିସିନ ଏବଂ ଅନ୍ୟ ଆସବାବପତ୍ର ଜଳିପୋଡି ପାଉଁଶ ହୋଇଯାଇଥିଲା। ପାଖାପାଖି ୪୦ ଲକ୍ଷ ଟଙ୍କାର କ୍ଷୟକ୍ଷତି ହୋଇଥିବା ଶ୍ରୀ ପଟ୍ଟନାୟକ କହିଛନ୍ତି।
ଉକ୍ତ ଅଗ୍ନିକାଣ୍ଡ ଦ୍ୱାରା ଶ୍ରୀଧରଙ୍କ ଅପୂରଣୀୟ କ୍ଷତି ହୋଇଥିବା ବେଳେ ସେ ଦୁଃଖରେ ଭାଂଗିପଡିଛନ୍ତି। ତେବେ ମା’ ଭଗବତୀ କେମିଷ୍ଟ ଆଣ୍ଡ ଡ୍ରଗିଷ୍ଟ ଆସୋସିଏସନ ର ସଭାପତି ପ୍ରଶାନ୍ତ ପଣ୍ଡା ଏବଂ ଅନ୍ୟ ସଭ୍ୟ ମାନେ ଘଟଣାସ୍ଥଳରେ ପହଞ୍ଚି ଶ୍ରୀଧରଙ୍କୁ ସମବେଦନା ଜଣାଇବା ସହ ତାଙ୍କୁ ସହଯୋଗ କରିବା ପାଇଁ ଖୋର୍ଦ୍ଧା କେମିଷ୍ଟ ଆଣ୍ଡ ଡ୍ରଗିଷ୍ଟ ଆସୋସିଏସନ କୁ ଚିଠି ଲେଖିଥିବା ଜଣାପଡିଛି।
