ବାଣପୁର: ଆଜି ବିଜେପି ପକ୍ଷରୁ ଚିଲିକା ନିର୍ବାଚନମଣ୍ଡଳୀ ଅନ୍ତର୍ଗତ ବିରଜାଈ ମଣ୍ଡଳର ‘ସେବା ପକ୍ଷ’ ଉପଲକ୍ଷେ ଏକ ମଣ୍ଡଳସ୍ତରୀୟ କର୍ମଶାଳା ବାଣପୁରସ୍ଥିତ ଶୁଭମଙ୍ଗଳ କଲ୍ୟାଣ ମଣ୍ଡପ ପରିସରରେ ଅନୁଷ୍ଠିତ ହୋଇଯାଇଛି। ମଣ୍ଡଳ ସଭାପତି ତଥା ଭେଟେଶ୍ୱର ପଞ୍ଚାୟତ ସରପଞ୍ଚ ସାବିତ୍ରୀ ଭୋଳଙ୍କ ସଭାପତିତ୍ୱରେ ଅନୁଷ୍ଠିତ ଉକ୍ତ କର୍ମଶାଳାରେ ଭେଟେଶ୍ୱର ପଞ୍ଚାୟତ ସମିତିସଭ୍ୟା ରଶ୍ମିତା ପ୍ରଧାନ, ରାଜ୍ୟ ବିଜେପି କାର୍ଯ୍ୟକାରିଣୀ ସଦସ୍ୟ ତଥା ପୂର୍ବତନ ବାଣପୁର ବ୍ଲକ ଅଧ୍ୟକ୍ଷ ମାଧବ ଚନ୍ଦ୍ର ଦଳେଇ, ପୂର୍ବତନ ମଣ୍ଡଳ ସଭାପତି ତଥା ବରିଷ୍ଠ ବିଜେପି ସଂଗଠକ ଜିତେନ୍ଦ୍ର କୁମାର ଭୋଳ, ନୀଳାଦ୍ରିପ୍ରସାଦ ପଞ୍ଚାୟତ ବିଜେପି ସଭାପତି ଶତ୍ରୁଘ୍ନ ସାହୁ ଅତିଥି ଭାବେ ଯୋଗଦେଇଥିଲେ।
ଶ୍ରୀ ଭୋଳ ଏହି ଅବସରରେ ଆସନ୍ତାକାଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଜନ୍ମଦିବସ ଉପଲକ୍ଷେ ସେବା ପକ୍ଷ ବିରଜାଈ ମଣ୍ଡଳରେ ପାଳନ ହେବ ବୋଲି ସୂଚନା ଦେଇଥିଲେ।
ଉକ୍ତ ମଣ୍ଡଳ ଅନ୍ତର୍ଗତ ଭେଟେଶ୍ୱର, ଭବାନୀପୁର, ତୁମୁରାପୁଟ, ନୀଳାଦ୍ରିପ୍ରସାଦ ଏବଂ ଦାମିଆ ବରବରା ପଞ୍ଚାୟତରେ ଆସନ୍ତାକାଲି ଠାରୁ ଅକ୍ଟୋବର ଦୁଇ ତାରିଖ ପର୍ଯ୍ୟନ୍ତ ବିଭିନ୍ନ ସେବା କାର୍ଯ୍ୟ ତଥା ରକ୍ତଦାନ ଶିବିର, ସ୍ୱଚ୍ଛ ଭାରତ, ବୃକ୍ଷରୋପଣ, ବିଭିନ୍ନ ପ୍ରତିଯୋଗିତା, ପୁଷ୍କରିଣୀ ସଫେଇ ଆଦି କାର୍ଯ୍ୟକ୍ରମ ଅନୁଷ୍ଠିତ ହେବ ବୋଲି କହିଥିଲେ।
ଆସନ୍ତାକାଲି ପ୍ରଥମ ଦିବସରେ ଭେଟେଶ୍ୱର ପଞ୍ଚାୟତରେ ମେଗା ଚାରାରୋପଣ କାର୍ଯ୍ୟକ୍ରମ ହେବ ବୋଲି ଜଣାପଡିଛି।
ଉକ୍ତ କର୍ମଶାଳାରେ ମଣ୍ଡଳ ସେବା ପକ୍ଷ ସଂଯୋଜକ ଦୀପକ ବେହେରା, ଶ୍ରୀକାନ୍ତ ବେହେରା, ସନ୍ତୋଷ ପ୍ରଧାନ, ବିଜୟ ବେହେରା, ମଣ୍ଡଳର ସମସ୍ତ ଶକ୍ତିକେନ୍ଦ୍ରର ସଭାପତି, ବୁଥ ସଭାପତି, ରାଜ୍ୟ ଓ ଜିଲ୍ଲାସ୍ତରୀୟ ପଦାଧିକାରୀ ଏବଂ ସମସ୍ତ ଆଗଧାଡିର ବିଜେପି କାର୍ଯ୍ୟକର୍ତ୍ତା ମାନେ ଯୋଗ ଦେଇଥିଲେ।