ରଞ୍ଜିତ ପଣ୍ଡା/କୁଜଙ୍ଗ : କୁଜଙ୍ଗ ଥାନା ପରିସରରେ ବରିଷ୍ଠ ନାଗରିକଙ୍କୁ ପରିଚୟ ପତ୍ର ବଣ୍ଟନ କରାଯାଇଛି । ଜିଲ୍ଲା ଆରକ୍ଷୀ ଅଧିକ୍ଷକ ଆର୍ ପ୍ରକାଶ ରଙ୍ଗରାଜନ୍ ମୁଖ୍ୟ ଅତିଥି ଭାବରେ ଯୋଗ ଦେଇ ପରିଚୟପତ୍ର ବଣ୍ଟନ କରିଥିଲେ । ଅନ୍ୟ ମାନଙ୍କ ମଧ୍ୟରେ ଉପଖଣ୍ଡ ଆରକ୍ଷୀ ଅଧିକ୍ଷକ ଦୀପକ୍ କୁମାର ଜେନା, କୁଜଙ୍ଗ ଥାନାଧିକାରୀ ଦିଲିପ୍ କୁମାର ସାହୁ, ବରିଷ୍ଠ ନାଗରିକ ମଞ୍ଚର ରାଜ୍ୟ ସମ୍ପାଦକ ବାବୁରାମ ଚୌଧୁରୀ ଏବଂ ବୀରେନ୍ଦ୍ର ବିଶ୍ଵାଳ ପ୍ରମୁଖ ଏହି କାର୍ଯ୍ୟକ୍ରମରେ ଉପସ୍ଥିତ ଥିଲେ । ପୂର୍ବରୁ ଅଗଷ୍ଟ 2019ରେ ପ୍ରଥମ ପର୍ଯ୍ୟାୟ ପରିଚୟ ପତ୍ର ବଣ୍ଟନ କରାଯାଇଥିବା ବେଳେ ଆଜି ଦ୍ବିତୀୟ ପର୍ଯ୍ୟାରେ 190 ଜଣଙ୍କୁ ପରିଚୟପତ୍ର ପ୍ରଦାନ କରାଯାଇଥିଲା ।
ଜଗତସିଂହପୁରର ଏକମାତ୍ର ଥାନା ଭାବରେ କୁଜଙ୍ଗ ଥାନାରେ ଏହି ପରିଚୟପତ୍ର ପ୍ରଦାନ କରାଯାଇଛି । ଏହି ପରିଚୟ ପତ୍ରକୁ ବରିଷ୍ଠ ନାଗରିକ ମାନେ ବସ୍ ଯାତ୍ରାଠାରୁ ଆରମ୍ଭ କରି ସମସ୍ତ ସ୍ଥାନରେ ବ୍ୟବହାର କରିପାରିବେ ବୋଲି ଜଣାପଡିଛି । କୁଜଙ୍ଗ ଥାନାଧିକାରୀ ଦିଲିପ୍ ସାହୁଙ୍କ ଏପରି ଅଭିନବ ପ୍ରୟାସକୁ ସ୍ଥାନୀୟ ଅଞ୍ଚଳ ବାସୀ ଏବଂ ବୁଦ୍ଧିଜୀବୀଙ୍କ ପକ୍ଷରୁ ପ୍ରଶଂସା କରାଯାଇଛି ।