ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଆଲ୍ଫା ସ୍ପୋଟିଂ କ୍ଲବ୍ ବ୍ରହ୍ମପୁର ତରଫରୁ ଆୟୋଜିତ ବିଜୁ ପଟ୍ଟନାୟକ ମେମୋରିଅଲ୍ କ୍ରିକେଟ୍ ଟୁର୍ଣ୍ଣାମେଣ୍ଟର ସପ୍ତମ ଦିବସରେ ଧାନବାଦ ଷ୍ଟାରସ୍ ବିଜୟୀ ହୋଇଛି । ଗ୍ରୁପ୍ ବିର ଦ୍ୱିତୀୟ କ୍ୱାଟର ଫାଇନାଲ୍ ରାମେଶ୍ୱର ସ୍ପୋଟିଂ (ବ୍ରହ୍ମପୁର) ଏବଂ ଧାନବାଦ ଷ୍ଟାର୍ସ (ଝାରଖଣ୍ଡ) ମଧ୍ୟରେ ଅନୁଷ୍ଠିତ ହୋଇଥିଲା । ରାମେଶ୍ୱର ଦଳ ଟସ୍ ଜିତି ପ୍ରଥମେ ବ୍ୟାଟିଂ କରି ୩୦.୨ ଓଭରରେ ସମସ୍ତ ୱିକେଟ ହରାଇ ୧୫୮ ରନ ସଂଗ୍ରହ କରିଥିଲା । ଦଳ ପାଇଁ ସର୍ବାଧିକ ଉଜଙ୍ଗ ଗଉଡ଼ ୭୧ ବଲ୍ରେ ୫୩ ରନ କରିଥିଲେ । ଦ୍ୱିତୀୟ ଇନିସ୍ରେ ଧନବାଦ୍ ଷ୍ଟାର୍ସ ଦଳ ୩୦.୪ ଓଭରରେ ୮ ୱିକେଟ ହରାଇ ୧୬୨ ରନ କରି ବିଜୟ ହୋଇ ସେମିଫାଇନାଲ୍ରେ ପ୍ରବେଶ କରିଛି । ଦଳ ପକ୍ଷରୁ ଅକ୍ଷୟ କୁମାର ଗୌର ସର୍ବାଧିକ ୬୧ ବଲ୍ରେ ୬୧ ରନ କରିଥିଲେ । ଆମ୍ପାୟର ଭାବେ ପ୍ରସନ୍ନ ପାଢ଼ୀ ଏବଂ ସୁଶାନ୍ତ କୁମାର ପଣ୍ଡା, ସ୍କୋରର ଭାବେ ଅମ୍ବିକା ପ୍ରସାଦ ପାଣିଗ୍ରାହୀ ଓ ବିକାଶ ସାମଲ ଏବଂ ଆଲ୍ଫା ଦଳର କର୍ମକର୍ତ୍ତାଗଣ ଖେଳ ପରିଚାଳନାରେ ସହଯୋଗ କରିଥିଲେ । ଆଜିର ମ୍ୟାଚରେ ବିଜୟୀ ହୋଇ ଦ୍ୱିତୀୟ ଦଳ ଭାବେ ଗୁପ ବିର ସେମିଫାଇନାଲ୍ରେ ପ୍ରବେଶ କରିଛି ଧାନବାଦ୍ ଷ୍ଟାର୍ସ । ମୁଖ୍ୟ ଅତିଥି ରୂପେ ଆଲ୍ଫା ଦଳର ସାଧାରଣ ସଂପାଦକ ବିଜୟ ଭାସ୍କର ସିଂ ସାମନ୍ତ ଉପସ୍ଥିତ ରହି ମ୍ୟାନ ଅଫ୍ ଦି ମ୍ୟାଚ ପୁରସ୍କାର ପ୍ରଦାନ କରିଥିଲେ । ଅକ୍ଷୟ କୁମାର ଗୌରଙ୍କୁ ମ୍ୟାନ୍ ଅଫ୍ ଦ ମ୍ୟାଚ୍ ଘୋଷଣା କରାଯାଇଥିଲା ।
