ସୀତାରାମ ଅଗ୍ରଓ୍ବାଲ
ବାଣପୁର: ରଙ୍ଗର ପର୍ବ ହୋଲିକୁ ବେଶ୍ ନିଆରା ଢଙ୍ଗରେ ପାଳନ କରିଛି ଅରୁଣିମା କ୍ଲବ। ସାରା ବିଶ୍ବରେ କରୋନା ଭୟଙ୍କର ଆତଙ୍କ ଖେଳାଇଥିବାବେଳେ ଭାରତରେ ଏହି ରୋଗୀଙ୍କ ସଂକ୍ରମିତଙ୍କ ସଂଖ୍ୟା ୬୨ରେ ପହଞ୍ଚିଲାଣି। କରୋନାର କରାଳ ରୂପରେ ସମେସ୍ତ ପ୍ରାୟ ଭୀତତ୍ରସ୍ତ। ଏପରି ସମୟରେ ବାଣପୁର ସାନହନ୍ତୁଆଡର ଅରୁଣିମା କ୍ଲବର ସଦସ୍ୟମାନେ ହୋଲିରେ ରଙ୍ଗର ଖେଳ ନ ଖେଳି ମାନବତାର ରଙ୍ଗ ପ୍ରଦର୍ଶନ କରିଛନ୍ତି। କରୋନା ଭୂତାଣୁ ସଂକ୍ରମଣର ପ୍ରତିରୋଧ ପାଇଁ ନିରାକରଣ ପାଇଁ ଲୋକଙ୍କ ସତର୍କ କରାଇବା ସହିତ ସଚେତନତା ସୃଷ୍ଟି କରିଛନ୍ତି ଅରୁଣିମା ବ୍ଲକ୍ର ସଦସ୍ୟବୃନ୍ଦ। ଏହି କ୍ଲବ ତରଫରୁ ଏକ ନିର୍ଦ୍ଦେଶାବଳୀ ଜାରି କରାଯାଇ ଘର ଘର ବୁଲି ଲୋକଙ୍କୁ ଏହାକୁ ବଣ୍ଟନ କରିବା ସହିତ ଏହା ସମ୍ପର୍କରେ ସଚେତନ କରାଯାଇଥିଲା। ଏଥିରେ କରୋନା ସତର୍କତା ନେଇ ଅନେକଗୁଡିଏ ପଦକ୍ଷେପ ବିଷୟରେ ଉଲ୍ଲେଖ ରହିଛି। ଯେପରିକି – ମୁହଁ ଓ ହାତକୁ ବାରମ୍ବାର ସ୍ପର୍ଶ କରନ୍ତୁ ନାହିଁ ବା କରମର୍ଦ୍ଦନ ବା ଆଲିଙ୍ଗନ କରନ୍ତୁ ନାହିଁ। କାର୍ଯ୍ୟସ୍ଥଳରେ ସଭା ସମିତି କରନ୍ତୁ ନାହିଁ କି ଜ୍ବର, କାଶ ହେଉଥିବା ବ୍ୟକ୍ତିଙ୍କଠାରୁ ନିଜକୁ ଦୂରେଇ ରଖନ୍ତୁ। ସେହିପରି ଜରୁରୀ ଆବଶ୍ୟକତା ନଥିଲେ ବାହାରକୁ ଯାଆନ୍ତୁ ନାହିଁ। ସାମାନ୍ୟ ଜ୍ବର, କାଶ କିମ୍ବା ଥଣ୍ଡା ପରି ଲକ୍ଷଣ ଦେଖାଯାଉଥିଲେ ତୁରନ୍ତ ଡାକ୍ତରଙ୍କ ସହ ପରାମର୍ଶ କରନ୍ତୁ। ନିୟମିତ ହାତ ଓ ମୁହଁକୁ ସଫା ରଖନ୍ତୁ। ନିଜ ପରିବେଶକୁ ପରିଷ୍କାର ପରିଚ୍ଛନ୍ନ ରଖନ୍ତୁ। ଜନଗହଳି ଥିବା ସ୍ଥାନକୁ ଯାଆନ୍ତୁ ନାହିଁ ଜନଗହଳି ଥିବା ସ୍ଥାନରେ ମାସ୍କ ବ୍ୟବହାର କରନ୍ତୁ ବୋଲି କୁହାଯାଇଥିଲା।
ଏହି କ୍ଲବର ସଭାପତି ଶେଷଦେବ ବରାଳଙ୍କ ନେତୃତ୍ବରେ ଆୟୋଜିତ ଏହି ନିଆରା ରଙ୍ଗ ଉତ୍ସବରେ ସାମିଲ୍ ହୋଇଥିଲେ ଦୀପକ ଜେନା, କହ୍ନା ସ୍ବାଇଁ , ସୁନଜ ମହାନ୍ତି , ସମ୍ପାଦକ ସୁନୀଲ, ମୁନା ବରାଳ, ଦିନେଶ, ଆଶିଷ ଏବଂ ଅନ୍ୟ ସଦସ୍ୟ ମାନେ ହେଲେ ମହେନ୍ଦ୍ର, ଗୁରୁ, ଭାଗି, ଦାଶରଥି, କାଳିଆ, ମୁନା ବିଶ୍ୱାଳ ପ୍ରମୁଖ।
ସୂଚନାଯୋଗ୍ୟ, ନୂଆବର୍ଷକୁ ମଧ୍ୟ ବେଶ୍ ନିଆରା ଢଙ୍ଗରେ ପାଳିତ କରିଥିଲେ ଏହି ଅରୁଣିମା କ୍ଲବ। ନବବର୍ଷ ଅବସରରେ ଏହି କ୍ଲବର ସଦସ୍ୟମାନେ ବାଣପୁର ଗୋଷ୍ଠୀସ୍ବାସ୍ଥ୍ୟକେନ୍ଦ୍ରରେ ଫଳ ବଣ୍ଟନ କରିଥିଲେ। ଏତଦ୍ବ୍ୟତୀତ ଏହାର କର୍ମକର୍ତ୍ତାମାନେ ବାଣପୁର ଥାନାକୁ ଯାଇ ପୋଲିସ୍ ଓ ସାଧାରଣଜନତାଙ୍କ ସହ ନିବିଡିତା ହେବା ଦିଗରେ ଦୀର୍ଘ ସମୟ ଆଲୋଚନା କରିଥିଲେ। ଅରୁଣିମା କ୍ଲବର ଏଭଳି ଏକ ନିଆରା ଉଦ୍ୟମ ତଥା ବିଭିନ୍ନ ପର୍ବପର୍ବାଣୀକୁ ଭିନ୍ନ ଢଙ୍ଗରେ ପାଳନକୁ ନେଇ ସାଧାରଣରେ ବେଶ୍ ପ୍ରଶଂସା କରାଯାଇଛି।