ରଞ୍ଜିତ୍ ପଣ୍ଡା
କୁଜଙ୍ଗ: କୁଜଙ୍ଗ ମତ୍ସ୍ୟବିଭାଗର ଅତିରିକ୍ତ ମତ୍ସ୍ୟଅଧିକାରୀ ମାନସରଂଜନ ସାହୁଙ୍କ ଗତକାଲି ଅପରାହ୍ନ ସମୟରେ ଏକ ସଡ଼କ ଦୁର୍ଘଟଣାରେ ଗୁରୁତର ହୋଇଥିବା ଜଣାପଡ଼ିଛି । ତାଙ୍କ ଆଖିରେ ଗୁରୁତର ଆଘାତ ଲାଗିଥିବାରୁ ତାଙ୍କୁ ତୁରନ୍ତ କଟକ ସ୍ଥାନାନ୍ତର କରାଯାଇଛି । ଶ୍ରୀଯୁକ୍ତ ସାହୁ ଗତକାଲି ବିଭାଗୀୟ କାର୍ଯ୍ୟ କାର୍ଯ୍ୟାଳୟରେ ସମ୍ପାଦନ କରି ତାଙ୍କ କଟକସ୍ଥିତ ବାସଭବନ ଅଭିମୁଖେ ସ୍କୁଟି(ଓଡ଼ି୦୫ଏକ୍ୟୁ୮୮୯୮)ଯୋଗେ ଯାଉଥିଲେ । କଟକ-ପାରାଦୀପ ରାଜ୍ୟ ରାଜପଥର ପଥୁରିଆ ଛକ ନିକଟରେ ଏକ ଭାରୀଯାନ ତାଙ୍କ ଆଡ଼କୁ ଦ୍ରୁତଗତିରେ ମାଡ଼ି ଆସିଥିଲା । ଫଳରେ ସେ ଭାରସାମ୍ୟ ହରାଇ ରାସ୍ତାର ବାମପାର୍ଶକୁ ଯାଇ ପଡ଼ିଯାଇଥିଲେ । ତାଙ୍କ ଆଖିରେ ଗଭୀର କ୍ଷତ ହୋଇଥିବା ପ୍ରାଥମିକ ଭାବେ ଜଣାପଡ଼ିଛି ।
କୁଜଙ୍ଗ ଗୋଷ୍ଠୀସ୍ୱାସ୍ଥ୍ୟକେନ୍ଦ୍ରରେ ତାଙ୍କର ପ୍ରାଥମିକ ଚିକିତ୍ସା କରାଯିବାପରେ ତାଙ୍କୁ କଟକ ସ୍ଥାନାନ୍ତର କରାଯାଇଥିବା ଜଣାପଡ଼ିଛି । ସବୁଠାରୁ ଆଶ୍ଚର୍ଯ୍ୟର ବିଷୟ ହେଉଛି ଯେ ଗୁରୁତର ଅବସ୍ଥାରେ ଶ୍ରୀଯୁକ୍ତ ସାହୁଙ୍କୁ କୁଜଙ୍ଗ ସ୍ୱାସ୍ଥ୍ୟକେନ୍ଦ୍ରକୁ ଆଣିଥିବା ୧୦୮ ଆମ୍ବୁଲାନ୍ସର କର୍ମଚାରୀ ତାଙ୍କ ପକେଟରୁ ମନିପର୍ସ ନେଇଯାଇଥିବା ନେଇ ଅଭିଯୋଗ ହୋଇଛି । ମେଡ଼ିକାଲରେ ଚିକିତ୍ସିତ ହେଉଥିବା ଜନୈକା ରୋଗୀଙ୍କ ମହିଳା ଆଟେଣ୍ଡାଂଟ ଆମ୍ବୁଲାନ୍ସ କର୍ମଚାରୀ ଜଣକ ଗୁରୁତର ଆହତ ମତ୍ସ୍ୟଅଧିକାରୀଙ୍କ ପକେଟରୁ ମନିପର୍ସ ନେଇଯାଇଥିବାନେଇ ପ୍ରତ୍ୟେକ୍ଷଦର୍ଶୀ ଥିବା ମତ୍ସ୍ୟଅଧିକାରୀଙ୍କ ସହକର୍ମୀମାନେ ପ୍ରକାଶ କରିଛନ୍ତି । ପର୍ସରେ ନଗଦ ଟଙ୍କାସହିତ ଏଟିଏମ କାର୍ଡ଼ ଏବଂ ଅନ୍ୟାନ୍ୟ ଗୁରୁତ୍ୱପୂର୍ଣ୍ଣ କାଗଜପତ୍ର ଥିବା ସହକର୍ମୀମାନେ ପ୍ରକାଶ କରିଛନ୍ତି ।
