ରମେଶ ମହାନ୍ତି
ଜଗତସିଂହପୁର: ବିଗତ ୨୪ ଘଣ୍ଟା ମଧ୍ୟରେ ଜଗତସିଂହପୁର ଜିଲ୍ଲାକୁ ୨୮୪ ଜଣ ପ୍ରବାସୀ ଫେରିଛନ୍ତି। ଏହାକୁ ମିଶାଇ ସମୁଦାୟ ୧୨୪୬ ଜଣ ପ୍ରବାସୀ ଜିଲ୍ଲାକୁ ଫେରିଛନ୍ତି। ସ୍ବାମୀ ବିବେକାନନ୍ଦ ମହାବିଦ୍ୟାଳୟ ପରିସରରେ ସମସ୍ତ ପ୍ରବାସୀଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇ ସେମାନଙ୍କୁ ନିଜ ନିଜ ବ୍ଲକ୍ ତଥା ପଞ୍ଚାୟତର କ୍ବାରେଣ୍ଟାଇନ୍ ସେଣ୍ଟରକୁ ପଠାଯାଇଛି। ଗତକାଲି ସମୁଦାୟ ୧୩୭ ଟି ସ୍ବାବ ନମୂନା ସଂଗୃହୀତ ହୋଇ ପରୀକ୍ଷଣ ପାଇଁ ପଠାଯାଇଛି। ୯ ତାରିଖରେ ନିଆଯାଇଥିବା ୧୫୫ ଟି ସ୍ବାବ୍ ନମୂନାର ରିପୋର୍ଟ ନେଗେଟିଭ୍ ଆସିଥିବା ବେଳେ ୧୦ ତାରିଖରେ ସଂଗୃହୀତ ସ୍ବାବ ନମୂନାର ରିପୋର୍ଟ ବର୍ତ୍ତମାନ ସୁଦ୍ଧା ଆସିନାହିଁ।
ଜିଲ୍ଲାପାଳ ସଂଗ୍ରାମ କେଶରୀ ମହାପାତ୍ର ନିଜେ ଏସ୍ଭିଏମ୍ କଲେଜ ପରିସରରେ ଉପସ୍ଥିତ ରହି ପ୍ରବାସୀଙ୍କ ରହିବା ଏବଂ ଖାଇବା ସମ୍ପର୍କରେ ପଚାରି ବୁଝିଥିଲେ। ଜିଲ୍ଲାପାଳଙ୍କ ସହିତ ଜିଲ୍ଲା ମୁଖ୍ୟ ଚିକିତ୍ସାଧାରୀ ବିଜୟ ପଣ୍ଡା, ପୌର ନିର୍ବାହୀ ଅଧିକାରୀ ବିମଳ କୁମାର ଲେଙ୍କା, ଜିଲ୍ଲାପାଳଙ୍କ ଓଏସ୍ଡି ସ୍ମୃତି ରଞ୍ଜନ ମିଶ୍ର ପ୍ରମୁଖ ଉପସ୍ଥିତ ଥିଲେ। ଅତିରିକ୍ତ ଜିଲ୍ଲାପାଳ ସଚ୍ଚିଦାନନ୍ଦ ସାହୁ ପ୍ରବାସୀଙ୍କ ନାମ ପଞ୍ଜୀକରଣ କରିବା ସହିତ ସମସ୍ତ ପ୍ରବାସୀଙ୍କୁ ବସ୍ ଯୋଗେ ପଠାଇଥିଲେ।
ଗତକାଲି ୨୮୪ ଜଣ ପ୍ରବାସୀ ଶ୍ରମିକ ଫେରିଥିବା ବେଳେ ସେମାନଙ୍କ ମଧ୍ୟରେ ଜଗତସିଂହପୁର ବ୍ଲକ୍ରୁ ୭୬ ଜଣ, କୁଜଙ୍ଗ ବ୍ଲକ୍ରୁ ୧୧ ଜଣ, ବାଲିକୁଦା ବ୍ଲକ୍ରୁ ୪୭ ଜଣ, ଏରସମା ବ୍ଲକ୍ରୁ ୫୩ ଜଣ, ନାଉଗାଁ ବ୍ଲକ୍ରୁ ୨୨ ଜଣ, ତିର୍ତ୍ତୋଲ ବ୍ଲକ୍ରୁ ୫୫ ଜଣ, ଜଗତସିଂହପୁର ପୌର ପରିଷଦର ୧୯ ଜଣ ଏବଂ ପାରାଦୀପ ପୌର ପରିଷଦର ଜଣେ ବ୍ୟକ୍ତି ରହିଛନ୍ତି। ସମସ୍ତ ପ୍ରବାସୀଙ୍କୁ ନିଜ ନିଜର ସ୍ଥାନୀୟ କ୍ବାରେଣ୍ଟିନ୍ ସେଣ୍ଟରକୁ ପଠାଇ ଦିଆଯାଇଛି।
