ହେମାଙ୍ଗ ପ୍ରସାଦ ରାଉଳ
ବ୍ରହ୍ମପୁର: ଦିନକୁ ଦିନ ଗଂଜାମ ଜିଲ୍ଲାରେ କରୋନା ସଂକ୍ରମିତ ସଂଖ୍ୟା ବୃଦ୍ଧି ପାଇବାରେ ଲାଗିଛି । କେତେକ ସ୍ଥାନରେ ଗୋଷ୍ଠୀ ସଂକ୍ରମଣ ଭୟ ମଧ୍ୟ ଦେଖିବାକୁ ମିଳିଲାଣି । ଫଳରେ ଜିଲ୍ଲା ପ୍ରଶାସନ ତତ୍ପର ହୋଇ ଉକ୍ତ ଅଂଚଳଗୁଡ଼ିକୁ ନିଜ ଅକ୍ତିଆରରେ ନେଇଛି । ଗୋଷ୍ଠୀ ସଂକ୍ରମଣର ଭୟ ଥିବା ଖଲିକୋଟ ବ୍ଲକ୍ ଅନ୍ତର୍ଗତ ବାଦପଲ୍ଲୀ ଓ ଆଇତିପୁର ପଞ୍ଚାୟତର ୧୦ଟି ଗ୍ରାମକୁ କଣ୍ଟେନମେଣ୍ଟ ଜୋନ୍ ଓ ୨୨ ଟି ଗ୍ରାମକୁ ବଫର ଜୋନ୍ ଭାବେ ଗଂଜାମ ଜିଲ୍ଲାପାଳ ବିଜୟ ଅମୃତା କୁଲାଙ୍ଗେ ଘୋଷଣା କରିଛନ୍ତି । ବାଦପଲ୍ଲୀ ପଂଚାୟତରୁ ୧୨ ଜଣ କରୋନା ପଜିଟିଭ୍ ଚିହ୍ନଟ ହେବା ପରେ ଘୋଡ଼ାପଡ଼ା, ସିଆଳିଆପାଟ, କୁରିମପୁର, ଗୁଣ୍ଡୁରିପଲ୍ଲୀ, ବାଦପଲ୍ଲୀ, ସାନବଳ, ନୂଆପଲ୍ଲୀ, ଛକାସିଂ, ଦେବୀଝର ପ୍ରଭୃତି ୯ଟି ଗ୍ରାମକୁ କଣ୍ଟେନମେଣ୍ଟ ଜୋନ୍ ଭାବେ ଘୋଷଣା କରାଯାଇଛି । ସେହିପରି ଏହି ପଞ୍ଚାୟତର ମରେଇ ନୂଆଗାଁ, ନଲସିଙ୍ଗ, ଖାସୁଲା, ସୋରିଷପାଟଗଞ୍ଜର, ବଡ଼ପଲ, କୁମାର ସିଙ୍ଗ ପ୍ରଭୃତି ୧୦ଟି ଗ୍ରାମକୁ ବଫଳ ଜୋନ୍ ଭାବେ ଘୋଷଣା କରାଯାଇଛି ।
ଆଇତିପୁର ପଂଚାୟତରେ ୩ ଜଣ କରୋନା ପଜିଟିଭ୍ ଚିହ୍ନଟ ହେବା ପରେ ବିରିପୁର ଗ୍ରାମକୁ କଣ୍ଟେନମେଣ୍ଟ ଜୋନ୍ ଭାବେ ଘୋଷଣା କରାଯାଇଥିବାବେଳେ ଉସ୍ତାପଡ଼ା, ଆଇତିପୁର, ଖୋଜାପଲ୍ଲୀ, ପାଳଧୂଆପଲ୍ଲୀ, ଭିକାପଡ଼ା, ରାଇପଡ଼ା, ରାମଚନ୍ଦ୍ରପୁର, କୈରାଶି, ଲକ୍ଷ୍ମଣପୁର, ରତନପୁର, ବାଗଲପୁର, ମାଳଖୋଜାପଲ୍ଲୀ ପ୍ରଭୃତି ୧୨ଟି ଗାଁକୁ ବଫଳ ଜୋନ୍ ଭାବେ ଘୋଷଣା କରିଛନ୍ତି ଜିଲ୍ଲାପାଳ । କଣ୍ଟେନମେଣ୍ଟ ଜୋନ୍ରେ ଲୋକଙ୍କ ଯିବା ଆସିବା ଉପରେ ସଂପୂର୍ଣ୍ଣ କଟକଣା ଲାଗୁ ହୋଇଛି । କିନ୍ତୁ ବଫର ଜୋନ୍ରେ ଅତ୍ୟାବଶ୍ୟକ କ୍ଷେତ୍ରରେ ଲୋକଙ୍କୁ ବାହାରକୁ ଯିବାକୁ ଅନୁମତି ଦିଆଯାଇଛି । ସଂପୂର୍ଣ୍ଣ ଦୁଇଟି ଯାକ ପଂଚାୟତର ପ୍ରବେଶ ପଥରେ ବ୍ୟାରିକେଡ଼୍ କରାଯିବା ସହ ଚାରିପଟୁ ସିଲ୍ କରିଦିଆଯାଇଛି । ସେଠାରେ ଅସ୍ଥାୟୀ ଚେକପୋଷ୍ଟ କରିବା ପାଇଁ ଖଲିକୋଟ ଥାନାଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି । ଖଲିକୋଟ ବ୍ଲକ୍ର ଅତିରିକ୍ତ ତହସିଲ୍ଦାର ଜ୍ୟୋତିର୍ମୟ ଦାଶଙ୍କୁ ଏକଜ୍ୟୁକିଟିଭ୍ ମାଜିଷ୍ଟ୍ରେଟ ଭାବେ ଦାୟିତ୍ୱ ଦିଆଯାଇଛି । ଏହି ସମୟରେ ଲୋକଙ୍କୁ ଅତ୍ୟାବଶ୍ୟକ ସାମଗ୍ରୀ ଯୋଗାଇ ଦେବା ପାଇଁ ବିଡ଼ିଓ ନବକୃଷ୍ଣ ଜେନାଙ୍କୁ ନିର୍ଦ୍ଦେଶ ଦିଆଯାଇଛି । ଘରକୁ ଘର ବୁଲି ଲୋକଙ୍କୁ ସ୍କ୍ରିନିଂ କରିବା ସହ ଆବଶ୍ୟକ ସ୍ଥଳେ ସ୍ୱାବ ସଂଗ୍ରହ କରିବା ପାଇଁ ନିର୍ଦ୍ଦେଶ ଦିଆଯାଇଛି ।